Petedo 2 2
2
Muaquin chuibanquido iquendac, quequin chiaid
1Isadaidbo Nuquin Papan oncamiaidon abimbo chuibannubien isadaidbobidi utsi utsiec: Nuquin Papan nadoendac, quec muaquin chuibanquid icpampic. Nëbi adquidbidi muaquid mibitedi yacno iquendac. Aidon mibëd tabadquid abitedi abimbo tantiamenquio icquin icsambuen tantiamenuen ambembi chiaid chuibanec muaindac. Nuquin Papa matses bëdambuen ismenuec abided cuidadec Nuquin Icbo Esuquidistu uënësnëdash, quetiapimbo iquebi, quequin chuibanendac. Aden chuibanquid icsho Nuquin Papan cuidtequidombo nendac.#2.1 Nuquin Papan oncamiaid nebi, quequin muaquin chuiquid cuidte iste bunquin Chotaquën onqueten M.I.Ch. 13.1-5 isbanta. 2Aden muaquidën chuibansho tantiashun dadpenshun aidën chiaid tantiendac. Adashic Nuquin Papan Chiaid niacniaquec muaquido tabadacpadquiec padpidec icsambuec tabaduaindac. Adsho issun: Esus tantiaquido icsambuec tabadeque. Is, cabededendac tantiesabon. 3Muaquidon chuisho tantienda. Aidon piucquid cumapenec bunquin aid dadpen bedquimbi ambembi chiaidquio mibitedi chiec. Muasho tantiashun ambi ëndenquimboshë tantiampicpadombuen aido cumapenen Nuquin Papan cuidtequidombo nendac.
4Ëndenquimboshë nidaid uabi icnuc Nuquin Papabëd icquidon utsin utsinquien: Umbiquien abitedi namenu, quequin abi dëniacte bunsho issun Nuquin Papan inchëshquio yacno nidmeshun uidënuaquin bëtashpampic. Iuecshun abitedi cuidte uëshën chian annëdënquiacno nësecanumbi nabono, queshun adopampic.#2.4 Mayan Icsa Satanasën iuabo podobitsi icsabo nepampic. 5Adshumbic iuecquio ictanquin matses abitedishun Ambi Chiaid niacniacquec icsambuec tabadsho issun nidaid abichobi acte mabudadmequin Nuquin Papan cuidquin matses abitedi nibëdanmepampic. Padnuen Noe: Bëdambuec tabad, quequin Ambi Chiaid chuibanquid icsho Noebëta matses 7tedpactsëc Nuquin Papan cuidenquio icpampic.#2.5 Noe chiaid iste bunquin Ene. 6.9—9.29 isbanta. 6Adshumbic iuecquio ictanquin matses utsibotsen Nuquin Papan Ambi Chiaid niacniacsho cuidquin shubu dadpen icquid daëd Sodomabëta Comoda nëdëncapampic. Ambo tabadquido aton shububëta abucuësh taboadampambuec paëdquidën isisapuc uidquio icnuc nibëdquiecnuc pichicapampic. Aden icsambo icquido cuidquid nec, camenuen Nuquin Papan adopampic. 7-8Sodoma yacnocquid abentsëc Dod caid pichiquenquio icnuc Nuquin Papan cuenmepampic. Nuquin Papan chiacpadombuen naquid yec: Nuquin Papan Chiaid niacniaquec nëmbo icquido icsambuen naic tabadec, quequin tantiec uënësquio yec tsadtednequid icsho cuenmiaid yec pichiquiambo icpampic.#2.7-8 Aden chiaid iste bunquin Ene. 19.1-29 ista.
9Adembidi nëbi abi tantiaquid icsho Nuquin Papan cuidenquio iquendac. Utsibon chieshënaqui chieshtoenquio icquin abi tantiasho bëdambo icmendac. Padnuen icsambuen naic tabadquido cuidquid icquimbi matses abitedi cuidte uëshëmbi cuidnun nanu, quequin Nuquin Papan nëbi cuidenquio iquec.
10Nuquin Papan nadquidombo icsho cuidendac. Abi bunaiduidi naic icsambuec tabadquido. Adembidi pabiate shëcuë nibëdacbimbuen aton chuiquid tapabon chiaid niac niacquinc Nuquin Papan Chiaid niac niacquinc caic: Ubi bunacpadombuenuidtsëqui naimbi, queshun bëdambuen tantienquio icquin icsambuen naic tabadquido. Dacuëdtiadquidi dacuëdenquio icquin Nuquin Papabëd icquido icsambuen chuishunquin mamënshunquido. 11Padnuen Nuquin Papabëd icquido nadatiambocquid icquimbi muaquin chuibanquido icsambuen chuishuntiapimbo iquec. Aden dadpen tantiaquido icnubi aid udictsëcquio cumapenen tantiaquidquio icquin Nuquin Papabëd icquidon: Aido baded cuid, Papa, cainquio iquec.
12Aidon nëishbimbuen tantienquio icquin ambi tantiaiduidi naic tabadec. Adquid icquin abi cuidte tantienquio icquin mua uaquin chuibanec onquec. Adquido yec icsambuec tabadsho cuidac nëish cuessuniacbimbuec uënësendac. 13Utsibo natiamequin mëyadmequido icsho issun aido natiamiac mëyadquiendac. Nuquin Papan Chiaid niac niacmequin muaquidon utsibo icsamesho issun Nuquin Papan cuidendac, quiash dacuëdtiadquidi icsateuidi bunec inchëshën icsash badiadëntsen icsaic bëdambo iquebi, quec adquido cuishonquec. Esus tantiaquin pebedednuec mibitedi chochoash tabadacno mibëd tabadec muaquidotsen chochopac caosh. Adquidbidi nebi, quiash mibëd tabadec aid icsasho isash: Esus tantiaquido abitedi icsaic, quependac utsibo.
14Muaquido iquec utsin chido isash cumapenec chudte bumpec. Nuquin Papan Chiaid niacniacquin abi icsaid ënenquio iquec. Adquid icquin Esus tantiactsëcquido utsi tantiamequin icsamepec. Abi bunacpadombuen muaquin piucquid dadpen bedte bunquido yec icsamboshëcquido nec. 15Bënnudash capuacbimbuen Nuquin Papan Chiaid niacniaquec icsambuen nateuidi bunec. Ëndenquimboshë matses utsi Bosod caidën mado Badan caid utsibon papa caid utsin utsinquien oncamiaid iquequi piucquid dadpen bedte bunquin icsambuen napampic. 16Adnubien abi catsadaid cabachubitsecquid pabiate ënapen icquid asno caid matsesbimbuec onquiampampic. ¿Atotsi quec icsambuen naic nide? cac aton icbo icsanuec niduidbuedi aucbidi chopampic.#2.16 Badanën naid iste bunquin I.T. 22.1—24.25 isbanta.
17Aidotedi muaquin tantiamequido yec acte chomenuen uëdëshcashun nacnenaidi acte nibëdquio yacbimbuecquido nec. Adecbidi abu chëshë cunquequidën tsidunacbimbuecquido nec. Adquido icsho Nuquin Papan cumapenec mëyadnuc cuidquin inchëshquio yacno nidmequin ënëdenquiocnoc cuidendac. 18Adec muaquido bëdambuec onquiacbimbuec ambembi chiec onquec. Utsin chiaid tantienquio icquin ambi tantiaiduidi naden chiec: Mibi bunacpaden mimbitsen: Nata, cac Esus tantiactsëcquin Nuquin Papan Chiaid naquin ambi icsambuen naid ënuidbuedi padpidembuec icsaindac. Aton chidopenquio isec chudte bunquin ambi icsambuen naid ënte bunenquio iquec. Chido dada utsi chudmete bunquid chudmequin icsambuen namec. Adquidotedi Nuquin Papan cuidtequidombo nec. 19Adquido icquin: Nuqui bunaiduidi nanuna. Adec nuqui bëdambo ictsiac, quequin chuibanendac. Adoac iuabimbuen ambi icsambuen naid ambembi ëntiapimbo yec icsamboshëcquido iquendac. 20Nuqui cuidmenquio icquid Nuquin Icbo Esuquidistu tantiabenquin abi icsaid ënuidbuedi padpiden Nuquin Papan Chiaid niacniaquec icsambuen nateuidi bunec icsamboshëcquid yanec udictsëcquio icsaquiendac. 21Ënden Esus chuibanac aido: Aid tantiembi, quebuedombi aid tantienquio yanec icsamboshë yansho issun: Esus tantiembi, quenquio icpatecnëdan, caimbi. 22Adquid chuiquin abimbo chiaid naden chuipanëdash: Ambi ucbudaidi opan chequid. Adecbidi chanchu nesmiaqui mactaquën padpidec nocoshquec bëchishuaquid, quepanëdash.#2.22 B.T.Ch. 26.11 tantiaquin nëid dada uapanëdash. Aid ista.
Currently Selected:
Petedo 2 2: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.