Filipos 2
2
Topẽ kósin tỹ tỹ ẽprã ke nĩ
1Ha vé, sỹ ãjag jyvẽn sór vẽ, ha mẽ. Ãjag tỹ Jesus jykre han kỹ nỹtĩ tag vỹ ãjag tar han tĩ. Ti tỹ ãjag to há nĩ tag vỹ sér tĩ. Ti kuprĩg vỹ tỹ ãjag jagrẽ nĩ. Kỹ ãjag tóg jagnẽ to há nỹtĩ gé. Jagnẽ jagãgtãn ãjag tóg tĩ gé. 2Kỹ inh jagãgtãn nĩ gé. Inh fe tỹ mrin kem nĩ gé, inh mỹ sér tĩ jé. Jagnẽ mré vẽjykre pir hã han nĩ, ha mẽ. Jagnẽ to há tãvĩ nỹtĩm nĩ. Ãjag tỹ nén ũ to jykrén kỹ jagnẽ mré to jykrén nĩ, ãjag tỹ vẽjykre pir hã han jé. 3Vẽsỹ ũn mág han sór tũg nĩ. Jagnẽ kãfór han sór tũg nĩ. “Tỹ inh ũn sĩ nĩ,” hem nĩ. Jagnẽ mỹ: “inh kãfór ti nĩ,” hem nĩ gé. 4Ãjag tỹ ãjag tũ ki rĩr mré hã jagnẽ tũn ki rĩrm nĩ gé. 5Jesus Cristo kóm ti jykre han nĩ gé, jagnẽ mỹ. Ti tỹ vẽjykre han hã vẽ, ha mẽ.
6Topẽ hã pẽ ja ti nĩ mỹr, Jesus ti, ti tỹ ti mré nĩn kỹ. Hã ra tóg tá nĩ kỹ: “isũ vẽ, kanhkã ti. Hã kỹ sóg ẽprã ke ag to tĩg ke tũ nĩ,” he ja tũ nĩ. 7Kanhkã tá ti tỹ nén tovãnh kãn sór ja ti nĩ. Kỹ tóg ẽg ri ke nĩ jé kãtĩg sór ja nĩ. Hã kỹ tóg kãtĩg ja nĩ. Ẽprã ke jagtar ri ke tóg nĩ, ti tỹ ẽprã ke fi ki mur kỹ. Ẽg tỹ ẽprã ti ve kỹ tóg tỹ ẽg hã pẽ nĩ. 8Vẽsỹ ũn mág han ja tũ tóg nĩ. Kỹ tóg ti jóg vĩ hã han ja nĩgtĩ. Ti vĩ han kỹ tóg ter ja nĩ. Krunh to sa kỹ tóg ter ja nĩ, mỹr, ha mẽ. 9Hã kỹ Topẽ tóg ti tỹ vẽnh kar kãfór han sir. Kỹ tóg ti jijin mũ sir. Kỹ ti jiji tag tóg vẽnh kar jygji kãfór nĩ. 10Ẽg tỹ ti jiji mẽ kỹ vẽnh kar tóg ti krẽm mũgmũg ke kãn mũ sir, kanhkã tá ke kar ag, ẽprã ke kar ag ke gé, vẽnh kuprĩg kar ag ke gé. 11Kỹ vẽnh kar tóg: “Jesus Cristo vỹ tỹ pã'i mág nĩ,” henh ke mũ sir. Tag hã tugrĩn ag tóg sir Topẽ to: “tỹ tóg ẽg kãfór kar nĩ,” he mũ. Tag to jykrén nĩ, ãjag tỹ ti kóm han jé, Jesus Cristo kóm.
Ẽg tỹ ẽprã ke ag mỹ jẽngrẽ han ke
12Inh kanhkã', ãjag ki sóg fe nĩ. Inh vĩ han ãjag tóg mũgtĩ, sỹ ãjag mré nĩn kỹ. Hã ra sóg ũri ãjag mré nĩ tũ nĩ. Ge ra inh vĩ kri fim nĩ. Ãjag krenkren ke vẽ. Kỹ Topẽ jykre hã han nĩ. Topẽ kamẽg nĩ. “Ti mỹ ẽg to jũnh ke tũ nĩ vỹ?“ hem nĩ. 13Ti hã ne tóg ãjag krĩn há han tĩ', ti jykre tỹ ãjag mỹ sér tĩn jé, ãjag tỹ hã mĩ hã mũn jé.
14Ãjag tỹ ti jykre han kỹ ti jykre to vĩ vĩ he tũg nĩ, ti tỹ kejẽn ãjag mỹ jagy ra. Kỹ jagnẽ mỹ jagnẽ vĩ kafãn tũg nĩ gé, ti jykre to. 15Hã tugnĩn ũ tóg ãjag to jykrén kónãn ke tũ nĩ, ãjag tỹ kygnẽg tũ nĩn kỹ. Kỹ ãjag tóg tỹ Topẽ krẽ nỹtĩ gé, ãjag tỹ ti jykre há han kỹ. Ẽprã ke kar vỹ jykre pãno nỹtĩ, Topẽ vĩ mranh kỹ. Kỹ ãjag tóg ag mỹ jẽngrẽ ri ke nỹtĩ, ãjag tỹ ag mỹ Topẽ vĩ kãmén kỹ. 16Ãjag tỹ tag han kỹ sóg tỹ ũn mág jẽnh ke mũ gé, ãjag tugrĩn, Cristo kãtĩg mãn ke kurã ẽn kã. Kỹ sóg ãjag to: “inh pijé fagrĩnh mỹ ag to vãsãn'. Inh pijé fagrĩnh mỹ ag mỹ Topẽ vĩ kãmén',” henh ke mũ.
17Hẽn ri ke mũn ag isén ke mũ. Kỹ inh kyvénh tỹ inh ki kutẽ kỹ tóg ẽg tỹ Topẽ mỹ nén ũ pũn ri ke nĩnh mũ. Ãjag tỹ ti ki ge kỹ nỹtĩ tugrĩn ke vẽ. Ge ra tóg inh mỹ sér tĩnh mũ. Inh fe tóg mrin kenh ke mũ, ãjag kóm. 18Kỹ tóg inh mỹ ti tỹ ãjag mỹ sér tĩnh há tĩ gé, iser ke ti.
Timóteo mré Epafrodito
19Sỹ ãjag mỹ Timóteo jẽnẽnh há tóg tĩ, ẽg Senhor tỹ to: “he,” hen kỹ. Ti tỹ tá vỹn ke kỹ tóg inh mỹ ãjag kãmén ke mũ. Kỹ inh krĩ tóg kãnhvy' henh ke mũ sir, isỹ ãjag to vẽmé há mẽn kỹ. 20Ti hã ne tóg ãjag mĩ ẽkrén mág tĩ'. Ũ tóg ti ri ke tũ pẽ nĩ, ti tỹ ãjag to há nĩn kỹ. 21Vẽnh kar ag vỹ: “inh rãnhrãj vỹ inh kutãn mũ,” he kãn mũ. Hã kỹ ag tóg Jesus rãnhrãj han tũ nĩgtĩ. 22Hã ra ãjag tóg Timóteo ki kanhró nỹtĩ. Inh kósin ri ke ti nĩ. Ẽg krẽ ag vỹ ẽg mré ẽg rãnhrãj han tĩ. Kỹ Timóteo vỹ inh mré Topẽ vĩ tó tỹ rãnhrãj tĩgtĩ, ti tỹ tỹ inh kósin ri ke nĩn kỹ. 23Ti hã jẽnẽ jé sóg ke mũ, ãjag to. Hã ra sóg ver ag tỹ inh mỹ nén tó mũ mẽ sór mũ, ũ tỹ inh ség mũ ag. Isỹ ag tỹ inh mỹ nén tó mũ mẽ kar kỹ sóg vãhã ti jẽnẽnh ke mũ. 24Hẽn ri ke mũn sóg kãnhmar ãjag venh tĩg ke mũ gé. Ẽg Senhor tỹ Jesus hã ne ki kanhró nĩ'.
25Hã ra tóg sỹ vẽsỹmér ũ jẽnẽnh há tĩ, ãjag to. Hã kỹ sóg Epafrodito mỹ: “ha ag to vỹn ké,” he mũ. Ãjag hã ne ti jẽnẽ ja nĩgtĩ', ti tỹ inh ki rĩr jé. Kỹ tóg inh mỹ há tĩ. Inh mré tóg Topẽ rãnhrãj han tĩ mỹr. Kỹ tóg inh kóm Topẽ vĩ to jagtar nĩ gé. 26Hã ra tóg ãjag mĩ ẽkrég mũ. Kỹ tóg ãjag to krĩ kufy jagy nĩ sir, ãjag tỹ ti kaga mẽ ja ẽn tugrĩn. 27Kaga ja tóg nĩgtĩ mỹr. Kỹ tóg ter kren pẽ han. Hã ra Topẽ tóg ti jagãgtãn. Kỹ tóg há' he mũ sir. Ti ter ra sóg inh jagtar tag kri vẽsỹrénh mág ke mũ vẽ. Hã ra Topẽ tóg inh jagãgtãn gé. 28Hã kỹ sóg ti mỹ: “ha tĩg to fũrũn,” he mũ sir, ãjag fe tỹ mrin ke jé, ãjag tỹ ti ve kỹ. Hã kỹ inh jagtar tóg pãgsĩ' henh mũ gé sir. 29Ti jun kỹ ti to mỹ sér nỹtĩm nĩ, ãjag tỹ ti ve mãn kỹ, ẽg Senhor tỹ ti jy nĩgãn kỹ. Kỹ ti mỹ: “há tóg tĩ,” hem nĩ, ãjag mỹ sér tĩn kỹ. 30Cristo rãnhrãj tugrĩn tóg ter kren mỹr. Hã ra tóg tovãnh ja tũ nĩ. Hã kỹ tóg inh ki rĩr há han. Ãjag jẽgja kã jẽg kỹ tóg inh ki rĩr há han. Ũ tỹ ge mỹ vĩ há han nĩ.
Currently Selected:
Filipos 2: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido