Marcos 2
2
Jesus tỹ ũn kãnhrĩn kỹ nỹ tỹ há' he
(Mt 9.1-8; Lc 5.17-26)
1Kejẽn Jesus tóg kurã ũ kã ẽmã tỹ Cafarnaum tá jun mãn mũ, kỹ ag tóg mẽg mũ sir, ti tỹ tá nĩ ẽn ti. 2Kỹ ũn e ag vỹ ti tá junjun mũ, kỹ ag tóg ti to vẽnh mãn mũ, kỹ tóg fór nĩ, jãnkãmĩ hã. Kỹ tóg ag mỹ Topẽ vĩ tó mũ sir. 3Hã ra ũ ag tóg ũn kãnhgrĩ vyn kỹ tá junjun mũ sir. Ũ tỹ 4 (ke) ag vẽ. 4Hã ra ag tóg vẽnh e ẽn tugrĩn ti pétẽm tũ nĩn kỹ ti kri ĩn nón mũ. Kỹ ag tóg nor ẽn ki ũn kaga ẽn térem mũ, kur kã kã ti fi kỹ. 5Kỹ Jesus tóg ag tỹ ti ki ge kỹ nỹtĩ vég mũ sir. Kỹ tóg ũn kaga ẽn mỹ: “inh kósin, ã tỹ Topẽ vĩ mranh ja ẽn vỹ tũ tĩ ha,” he mũ.
6Hã ra Topẽ vĩ to ẽg kanhrãn tĩ ũ ag vỹ tá nỹtĩ gé. Kỹ ag tóg ti vĩ to jykrén kónãn kỹ: 7“ti tỹ ne tó nẽ? “ he mũ, jagnẽ mỹ, komẽr hã. “Topẽ to vĩ kónãn vẽ. Topẽ hã ne ti pin kỹ ẽg tỹ Topẽ vĩ mranh tỹ tũ' he há nĩnh mũ. Ti tỹ vẽsỹ Topẽ han vẽ,” he ag tóg mũ.
8Hã ra Jesus tóg ag jykre ki kanhró nĩ, ti fe tỹ. Kỹ tóg ag mỹ: “ãjag tỹ ne to jykrén kónãn nẽ?“ he mũ. 9“Ne nỹ ãjag mỹ vẽnh mỹ nỹ? Ũn kãnhgrĩn kỹ nỹ tag mỹ sóg: ã tỹ Topẽ vĩ mranh ja ẽn vỹ tũ tĩ ha, hé. Kỹn mỹ ãjag mỹ vẽnh mỹ? Sỹ ti mỹ: nĩ ra, ã kur gég tĩg, henh ke nẽ ha. Kỹn mỹ ãjag mỹ vẽnh mỹ ke gé'? 10Isỹ ãjag mỹ inh jykre ven sór vẽ ha. Tỹ sóg ẽprã ke fi kósin nĩ. Tá sóg krỹg ke mũ, Topẽ vĩ mranh tỹ vẽnh pãte fón ke tá. Sỹ tá krỹg mũ ven jé sóg ke mũ, ãjag mỹ,” he tóg. Hã kỹ tóg ũn kãnhgrĩn kỹ nỹ ẽn mỹ: 11“nĩ ra, ã kur gé tĩg,” he mũ.
12Kỹ tóg vãhã jẽgnẽ mũ sir. Ti kur gég tóg mũ sir, kỹ tóg ag rĩnve tĩg há han mũ sir, ũn kãnhgrĩn kỹ nỹ ja ẽn ti.
Vẽnh kar mỹ tóg e tĩ, kỹ ag tóg Topẽ to: “ẽg jykre kãfór ti nĩ,” he mũ. “Ge ve ja tũ ẽg nỹtĩ,” he ag tóg mũ sir.
Jesus tỹ Levi jé prẽr
(Mt 9.9-13; Lc 5.27-32)
13Kỹ Jesus tóg tĩg mãn mũ, goj nig mág tỹ Galiléia ra. Kỹ vẽnh e ag tóg ti pénĩn vẽnh mãn mãn mũ sir. Kỹ tóg ag kanhrãn mũ, fag ke gé. 14Ti tĩg mãn kỹ tóg Levi vég mũ, Alfeu kósin. Hã ra tóg ti rãnhrãj han nĩ nĩ. Governo mỹ tóg imposto kaja mãg tĩ. Kỹ Jesus tóg ti mỹ: “inh mré kãtĩg,” he mũ. Kỹ tóg jẽgnẽ kỹ ti mré tĩ mũ sir.
15Kỹ tóg kejẽn ti ĩn krẽm jẽg mũ. Hã ra ag tóg ti mré e nĩ, governo mỹ jãnkamy mãg tĩ ag, Topẽ vĩ mranh tĩ ũ ag ke gé. Ti nón mũ mũ ag tóg e tãvĩ nỹtĩ.
16Hã ra Topẽ vĩ to ẽg kanhrãn tĩ ũ ag vỹ tỹ Fariseu nỹtĩ gé. Jesus vég ag tóg mũ, ti tỹ Topẽ vĩ mranh tĩ ag mré jẽn kỹ. Kỹ ag tóg ti mré mũ tĩ ag mỹ: “ti ne tóg ũn jykre pãno ag mré jẽg mũ',” he mũ.
17Hã ra Jesus tóg mẽg mũ. Kỹ tóg ag mỹ: “ũn kagyga tũ ag vỹ médico venh mũ tũ nĩgtĩ'. Hã ra ũn kagyga ag hã vỹ ti venh mũ tĩ,” he mũ. “Inh pijé ũ tỹ vẽjykre kuryj han mũ ag mỹ: ãjag jykre tovãnh nĩ, he sór tĩ'. Ũ tỹ Topẽ vĩ mranh mũ ẽn ag hã mỹ sóg: ãjag jykre tovãnh nĩ, he sór tĩ,” he tóg.
Jesus tỹ vãkre kãmén
(Mt 9.14-17; Lc 5.33-39)
18Kejẽn João mré mũ tĩ ag tóg vãkrég mũ, Fariseu ag ke gé. Jẽg tũ ag nĩ, ag tỹ Topẽ mỹ há nỹtĩ jé. Kỹ ag tóg Jesus mỹ: “João mré mũ tĩ ag vỹ tóg vãkrég mũ, Fariseu mré mũ tĩ ag ke gé,” he mũ. “Jo ã mré mũ tĩ ag ne tóg vãkrég tũ nĩ',” he ag tóg.
19Kỹ tóg ag mỹ: “vẽnh kyprũg venh kãmũ mũ ag pijé vãkrég tĩ',” he mũ. “Fénhta vẽ mỹr, vẽnh kyprũg ti, kỹ ũn prũg mũ ẽn mré ke ag tóg ti venh kãmũ tĩ. Ge ti nĩ, inh mré mũ tĩ ag mỹ. Isỹ ag mré nĩn kỹ tóg ver ag mỹ sér tĩ. 20Hã ra tóg kejẽn jun mũ, inh kurã ti, kỹ ag tóg inh pére mũnh mũ. Ẽn kã hã ag tóg vãkrenh ke mũ,” he tóg.
21“Fag pijé vãfe kygnej tũ tỹ kur si jar ki hynhan tĩ'. Fag tỹ ũn kygnej tũ tỹ ki hynhan kỹ tóg jaran kenh mũ. Kỹ kur si jar ẽn tóg mág mũ sir. Ũn kygnej hã tỹ fag tóg ki hynhan tĩ, kỹ tóg jaran ke tũ nĩgtĩ,” he tóg, ti jykre tãg to.
22“Kỹ vinho vỹ ge nĩgtĩ gé,” he tóg mũ gé. “Ẽg pijé vinho kajã tỹ ti fár si tỹ sako ki kujẽg tĩ mỹr'. Ke tũ nĩ mũ ra tóg kunãnh kỹ jarn kenh mũ. Kỹ vinho tóg tũ' henh mũ, sako ti ke gé. Vinho kajã tỹ ti fár tãg ki kujẽn ke vẽ mỹr,” he tóg, ti jykre tãg to.
Jesus tỹ vẽnhkán ke kurã kãmén
(Mt 12.1-8; Lc 6.1-5)
23Kejẽn tóg, ti mré mũ tĩ ag mré trigo kré mĩ tĩ mũ. Vẽnhkán ke kurã vẽ. Ag mũn kỹ ag tóg trigo mó tỹ kym ke mũ, ag tỹ ko jé. 24Kỹ Fariseu ũ ag tóg Jesus mỹ: “ha vé, ag tỹ ne jé vẽnhkán ke kurã ki ag tỹ nén han ke tũ han nẽ?“ he mũ.
25Kỹ tóg ag mỹ: “vó,” he mũ. “Davi tỹ nén han mũ to jykrén nĩ. Ti kókĩr nĩn kỹ tóg ti tỹ nén han ke tũ han gé, ti mré mũ tĩ ag mré, hã ra Topẽ pijé ti to jũ mũ', ha mẽ. 26Topẽ ĩn kã ra tóg rã. Ẽn kã Abiatar vỹ tỹ Topẽ tũ to pã'i nĩ. Tá tóg Topẽ jamĩ ẽn kó, tỹ ti tỹ konh ke tũ ra. Topẽ tũ ki rĩr tĩ ag hã tỹ konh ke vẽ vẽ. Hã ra tóg kó, ti mré mũ ag ke gé. Rán kỹ tóg nĩ nĩ,” he tóg.
27“Ha mẽ, Topẽ vỹ ẽg mỹ vẽnhkán ke kurã nĩm, ẽg tỹ ki vẽnhkán jé. Hã ra tóg tỹ kurã kórég han tũ nĩ. 28Hã kỹ sóg tỹ vẽnhkán ke kurã to pã'i nĩ gé. Tỹ sóg ẽprã ke fi kósin nĩ mỹr,” he tóg.
Currently Selected:
Marcos 2: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido