Tiago 5
5
Ũn riko ag vẽsỹrénh ke
1Vãhã sóg ũn há ag jyvẽn mũ sir, ũn riko ag, ũ tỹ Jesus ki ge jãvãnh ẽn ag, ha mẽ. Ag mỹ sóg: “kygfỹ ra. Ãjag vẽnh krẽkrẽr ke vẽ ha. Ãjag jagtar ke vẽ ha. 2Ãjag tỹ nén ũ vỹ vag kãn ke mũ. Ãjag kur sĩnvĩ ẽn vỹ, tãryj' he kãn ke mũ gé, ti ga tỹ kon kỹ,” he mũ. 3“Kỹ ãjag jãnkamy vỹ, ãjag tỹ ũ jagãgtãn vãnh ja tugrĩn vẽso jãgfanh ke mũ. Kỹ vẽnh kar vỹ ãjag jykre kórég venh ke mũ. Kỹ tóg, pĩ tỹ ẽg pũn ri ke nĩ, ãjag jagtar ke ti. Kurã tỹ ẽgno tóg kakó tĩ ha, ge ra ãjag tóg ãjag tũ mág nỹtĩ hã to jykrén tĩ. 4Ãjag camarada ag vỹ, ãjag jakré tá rãnhrãj mũ, hã ra ãjag tóg, ag mỹ kajãm tũ nĩgtĩ. Hã ra ẽg jóg tỹ Topẽ vỹ ãjag camarada ag vẽsỹrénh vég mũ. 5Ãjag tỹ nén ve sór mũ kar ve ãjag huri, vẽjẽn mág, kur sĩnvĩ, ãjag tỹ nén to én mũ kar ẽn ti. Tag tãvĩ to ãjag tóg jykrén tĩ, ãjag tỹ ga kri mũn kỹ. Tãg gy ãjag nỹtĩgtĩ, ẽg tỹ ẽg mẽg jẽn há han tĩ ẽn ri ke, ẽg tỹ ti tãnh jé. 6Kỹ ãjag tóg ũn jykre kuryj ag vóg kónãn tĩ gé. Ag kãgtén ãjag tóg tĩ, hã ra ag tóg, ãjag kato vĩ tũ nĩgtĩ. Jykre kórég ãjag nỹtĩ,” he sóg mũ, ũn riko ag mỹ.
Ẽg Senhor kãtĩg mãn jãvãnh
7Inh kanhkã', ẽg Senhor kãtĩg ke jãvãnh nĩ, jatun mỹ, ag jãvo. Ẽg tỹ ẽkrãn kar kỹ ẽg tóg ti mog jãvãnh tĩgtĩ, jatun mỹ. Kỹ ta tóg kri kutẽ mũ. Kejẽn ẽg tóg vãhã ti kanẽ vég tĩ. 8Tag ri ke han nĩ. Jatun mỹ ti kãtĩg jãvãnh nĩ, ẽg Senhor ti. Ti jãvãnh to tar nỹtĩm nĩ. Kãnhmar ti kãtĩg mũ, ẽg Senhor ti, ha vem nĩ.
9Inh kanhkã', jagnẽ to vĩ vĩ he tũg nĩ. Ke tũ nĩ mũ ra ẽg Senhor tóg ãjag jykre ve kỹ ãjag vóg kónãn ke mũ. Ha vé, kãnhmar ti kãtĩg mũ, ũ tỹ ẽg jykre tugnỹm ke mũ ẽn ti.
10Vãsỹ Topẽ vĩ tó tĩ ag to jykrén. Topẽ vĩ tó ag tóg tĩ. Kỹ ũ tỹ mẽ jãvãnh ja ẽn ag tóg ag vóg kónãn. Ge ra ag tóg jatun mỹ Topẽ vĩ tó ja nĩgtĩ, ag tỹ ag vóg kónãn mũ ra. Ag ri ke han nĩ. 11Ag jykre to jykrén nĩ. Ag jagtar nỹtĩ ra ag tóg to krónh ke ja tũ nĩgtĩ gé. Hã kỹ Topẽ tóg ag mỹ vĩ há han mũ sir, ti vĩ tó tĩ ag mỹ.
Topẽ mré ke tỹ Jó kãme mẽ ãjag huri. Ti jagtar ra tóg to krónh ke ja tũ nĩ gé. Kỹ vãhã Topẽ tóg ti ki rĩr há han mũ, ti jagtar kỹ. Hã ki ãjag tóg ẽg Senhor jykre vég mũ sir. Ẽg jagãgtãn tóg mũ, ti tỹ ẽg jagtar nỹtĩ ven kỹ. Kỹ tóg sir ẽg jagãgtãn tovãnh tũ nĩgtĩ.
12Inh kanhkã', ón kỹ vĩ tũg nĩ. Ón kỹ: “he,” he tũg nĩ. Ki hã tóm nĩ, Topẽ tỹ ãjag vóg kónãn tũ nĩ jé. Kỹ ón kỹ: “Topẽ vỹ ki kanhró nĩ,” he tũg nĩ gé. Ón kỹ: “ũ tỹ ga kri nĩ ẽn vỹ ki kanhró nĩ,” he tũg nĩ gé. Ki hã tóm nĩ. Ón tũg nĩ, jagnẽ mỹ.
Ũn kaga ag to Topẽ mré vĩnh ke
13Ãjag tỹ nén ũ jagy ven kỹ Topẽ mré vĩm nĩ. Ãjag mỹ sér tĩn kỹ Topẽ mỹ jãn nĩ, kỹ ti jé tóm nĩ. 14Ãjag kaga nỹtĩn kỹ igreja to kófa ag jé prẽrm nĩ. Ẽn ag vỹ ũn kaga to Topẽ mré vĩnh ke mũ, kỹ ag tóg azeite tỹ ũn kaga to tĩn ke mũ, ẽg Senhor jiji tó kỹ. 15Ag tỹ ẽg Senhor mré vĩn kỹ tóg ũn kaga ẽn tỹ há' henh ke mũ sir, ag tỹ ti tỹ há' henh ke to: “hỹ mỹ vỹ?“ he tũ nĩn kỹ. Kỹ ũ tỹ ti vĩ mranh kỹ Topẽ vỹ ti mỹ vẽnh pãte fón ke mũ gé sir. 16Hã jé jagnẽ mỹ tó, ãjag tỹ Topẽ vĩ mranh ja ti. “Ti vĩ mranh inh, tag han kỹ,” hem nĩ jagnẽ mỹ. Kỹ jagnẽ to Topẽ mré vĩm nĩ gé, ti tỹ ãjag tỹ há' he jé, ti tỹ ãjag kaga tỹ tũ' he jé. Ẽg tỹ vẽjykre kuryj han kỹ tóg ẽg vĩ mẽ kỹ han mũ sir, Topẽ ti, ẽg tỹ ti mỹ nén ũ to vĩ', to vĩ' hen kỹ.
17Topẽ mré ke tỹ Elias mĩ ẽkrén nĩ. Ẽg mré tóg tỹ ẽprã ke nĩ ja nĩgtĩ. Hã ra tóg Topẽ mré vĩ', vĩ' he ja nĩgtĩ, ta kutẽ tũ nĩ jé. Kỹ tóg kutẽ ja tũ nĩgtĩ, prỹg tãgtũ kri kysã tỹ 6 (ke) ki. 18Kỹ tóg kejẽn Topẽ mré vĩ mãn ja nĩgtĩ, kỹ tóg kutẽ ja nĩ sir, ta ti. Kỹ nén kar tóg gan kri mur mãn ja nĩ, kỹ tóg kanẽn mãn ja nĩgtĩ gé sir. Topẽ tỹ ti vĩ han hã vẽ. Tag mĩ ẽkrén nĩ.
19Inh kanhkã', kejẽn ẽg mré ke ũ tóg prãnh ke tĩ, vẽnh vĩ há tovãnh kỹ. Kỹ ti jyvẽn nĩ, ti tỹ kygnẽ mãn tũ nĩ jé. 20Kỹ ũ tỹ ti mré vĩ mũ ẽn tóg ti kren han mũ sir, nũgme to, ti tỹ ti tỹ kygnẽ ja ẽn tovãnh kỹ. Kỹ Topẽ vỹ ti tỹ ti vĩ mranh ja ẽn tỹ vẽnh pãte fón mũ sir. Tag to jykrén nĩ.
Hã vẽ.
Currently Selected:
Tiago 5: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido