Tito 3
3
Li cꞌaꞌru us teꞌxba̱nu laj pa̱banel
1Chajultica ajcuiꞌ chiruheb nak cheꞌpa̱ba̱nk chiru li acuabej. Ut cheꞌpa̱ba̱nk ajcuiꞌ chiruheb chixjunileb li cuanqueb saꞌ xcuanquil. Ut se̱bak xchꞌo̱leb chixba̱nunquil li cha̱bil cꞌanjel. 2Ut chaye ajcuiꞌ reheb nak incꞌaꞌ teꞌxyoꞌob a̱tin chirixeb li ras ri̱tzꞌin ut incꞌaꞌ teꞌcuechꞌi̱nk. Kꞌunakeb ban xchꞌo̱l ut cha̱bilakeb. Ut cheꞌcua̱nk saꞌ usilal riqꞌuineb chixjunileb li ras ri̱tzꞌin. 3La̱o junxil incꞌaꞌ us li kanaꞌleb nak xocuan chak. Xkakꞌet ra̱tin li Dios ut incꞌaꞌ xo-abin chiruheb li cuanqueb xcuanquil. Xkaqꞌue kib chi balakꞌi̱c. Xkaba̱nu chak li ma̱usilal li naxrahi ru li kachꞌo̱l. Xkanumsi li cutan xba̱nunquil li ma̱usilal. Xocakalin ut xicꞌ nakil kib chi kibil kib. 4Abanan quicuulac xkꞌehil nak li Dios laj Colol ke quixcꞌutbesi chiku li rusilal ut li ruxta̱n. 5Li Dios xoxcol ut xorisi saꞌ li kanajter naꞌleb. Ma̱cuaꞌ xban kayehom kaba̱nuhom chi moco xban lix ti̱quilal li kachꞌo̱l. Yal xban lix nimal ruxta̱n li Dios nak coxcol. Cuybil sachbil chic li kama̱c ut acꞌobresinbil chic li kayuꞌam xban li Santil Musikꞌej. 6Xban nak li Jesucristo quicam re kacolbal, numtajenak li kosobtesinquil xban li Dios nak quixqꞌue chak li Santil Musikꞌej chi cua̱nc kiqꞌuin. 7Joꞌcaꞌin quixba̱nu re nak ta̱ti̱cokꞌ li kachꞌo̱l xban xnimal rusilal li Dios ut take̱chani li junelic yuꞌam li yo̱co chiroybeninquil. 8Li a̱tin aꞌin li xinye a̱cue, aꞌan li tzꞌakal ya̱l. La̱in nacuaj nak ta̱chꞌolob lix ya̱lal aꞌin chiruheb li ac xeꞌxpa̱b li Dios re nak teꞌxqꞌue xchꞌo̱l chi cꞌanjelac saꞌ cha̱bilal. Li xya̱lal aꞌin kꞌaxal cha̱bil ut ta̱cꞌanjelak chiruheb chixjunileb. 9Ma̱tzꞌil rix li cꞌaꞌak re ru chi a̱tinul li ma̱cꞌaꞌ rajbal ut ma̱cuechꞌi rix lix xeꞌ xto̱nal li junju̱nk. Ut ma̱cuechꞌi rix li chakꞌrab li quiqꞌueheꞌ re laj Moisés. Ma̱cꞌaꞌ aj e xba̱nunquil aꞌan xban nak li cuechꞌi̱nc ma̱cꞌaꞌ na-oc cuiꞌ. 10Ut cui junak cui̱nk aj poꞌol chꞌo̱lej yo̱ chi tacchiꞌi̱nc saꞌ xya̱nkeb laj pa̱banel, ta̱qꞌue xnaꞌleb jun sut malaj cuib sut ut cui incꞌaꞌ na-abin cha̱cuu, incꞌaꞌ chic texcua̱nk saꞌ comonil riqꞌuin. 11Nanauman nak li jun aꞌan ac xpoꞌ xchꞌo̱l ut nama̱cob xban nak naraj tixpoꞌ xchꞌo̱leb laj pa̱banel. Aꞌan raylal naxcꞌam chak saꞌ xbe̱n xjunes rib.
Laj Tito quiyeheꞌ re cꞌaꞌru tixba̱nu
12Tintakla a̱cuiqꞌuin laj Artemas malaj ut laj Tíquico. Nak ta̱cuulak a̱cuiqꞌuin, tatxic chi junpa̱t Nicópolis. Aran toxina̱tau xban nak nincꞌoxla nak us tinnumsi li habalkꞌe aran. 13Chaqꞌue a̱chꞌo̱l chixtenkꞌanquileb nak teꞌe̱lk aran laj Apolos joꞌ ajcuiꞌ laj Zenas laj naꞌol chakꞌrab. Chatenkꞌaheb nak teꞌxic re nak cua̱nk cꞌaꞌru reheb ut ma̱cꞌaꞌ chipaltok reheb. 14Eb li kech aj pa̱banelil tento nak teꞌxtzol rib xba̱nunquil li usilal ut teꞌxtzol ajcuiꞌ xtenkꞌanquileb li tenkꞌa̱c teꞌraj re nak incꞌaꞌ ta̱cana̱k chi ma̱cꞌaꞌ rajbal lix pa̱ba̱leb.
Xqꞌuebal xsahil xchꞌo̱leb laj pa̱banel
15Chixjunileb li cuanqueb cuochben nequeꞌxtakla xsahil a̱chꞌo̱l. Ut chaqꞌue ajcuiꞌ xsahileb xchꞌo̱l li kech aj pa̱banelil. Nakara kib chi kibil kib xban nak junaj li kapa̱ba̱l. Aꞌ taxak li rusilal li Dios chicua̱nk e̱riqꞌuin che̱junilex. Joꞌcan taxak.
Currently Selected:
Tito 3: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.