Santiago 4
4
Incꞌaꞌ takajunaji kib riqꞌuin lix ma̱usilal li ruchichꞌochꞌ
1¿Cꞌaꞌut nak toj cuan pletic ut cuechꞌi̱nc ib saꞌ e̱ya̱nk? ¿Ma incꞌaꞌ ta biꞌ riqꞌuin xrahinquil ru li incꞌaꞌ us nequetiquib pletic? 2La̱ex nequerahi ru li cꞌaꞌak re ru ut xban nak incꞌaꞌ nequetau li cꞌaꞌru nequerahi ru, nequecamsi e̱ras e̱ri̱tzꞌin re nak te̱tau. Nacakoꞌ e̱chꞌo̱l xban nak incꞌaꞌ nequetau li cꞌaꞌru nequeraj ut xban aꞌan junes pletic nequeba̱nu. Ut xban nak incꞌaꞌ nequetzꞌa̱ma re li Dios li cꞌaꞌru nequeraj, joꞌcan nak incꞌaꞌ naxqꞌue e̱re. 3Ut nak nequextzꞌa̱man chiru li Dios, incꞌaꞌ nequecꞌul xban nak incꞌaꞌ nequetzꞌa̱ma joꞌ naraj li Dios. Incꞌaꞌ nequecꞌul xban nak nequetzꞌa̱ma yal re xsachbal saꞌ li joꞌ ma̱joꞌil naꞌleb. 4La̱ex chanchanex li nequeꞌxmux ru lix sumlajic xban nak la̱ex nequera ru li ma̱c. Ma̱cuaꞌ li Dios nequecꞌoxla. Cui la̱ex nequera ru li cua̱nc saꞌ lix ma̱usilal li ruchichꞌochꞌ xicꞌ yo̱quex chirilbal li Dios. 5Cuan xya̱lal nak tzꞌi̱banbil chi joꞌcaꞌin saꞌ li Santil Hu: Li Santil Musikꞌej li quixqꞌue li Dios chi cua̱nc kiqꞌuin, aꞌan kꞌaxal nocoxra ut aꞌan naraj nak caꞌaj cuiꞌ li Dios takalokꞌoni. 6Li Dios kꞌaxal numtajenak cuiꞌchic li rusilal naxqꞌue ke. Li Santil Hu naxye nak li Dios incꞌaꞌ nacuulac chiru li nequeꞌxnimobresi rib. Abanan li Dios naxqꞌue li rusilal reheb li tu̱laneb. (Prov. 3:34) 7Joꞌcan nak chekꞌaxtesihak e̱rib re li Dios. Chexnumta̱k saꞌ xbe̱n laj tza ut aꞌan ta̱e̱lelik che̱ru. 8Cauhak e̱chꞌo̱l riqꞌuin li Dios ut li Dios ta̱tenkꞌa̱nk e̱re. La̱ex aj ma̱c, jalomak e̱cꞌaꞌux. Me̱ba̱nu chic li ma̱usilal. Joꞌcan ajcuiꞌ la̱ex li yal cuib e̱chꞌo̱l saꞌ le̱ pa̱ba̱l, yotꞌomak e̱chꞌo̱l ut jalomak e̱cꞌaꞌux re nak li Dios tixti̱cobresi le̱ chꞌo̱l. 9Chirahokꞌ e̱chꞌo̱l, chiyotꞌekꞌ e̱chꞌo̱l ut chexya̱bak xban li ma̱usilal li nequeba̱nu. Ma̱cuaꞌ raj seꞌec nequeba̱nu; ya̱bac raj nequeba̱nu xban nak incꞌaꞌ us le̱ yehom e̱ba̱nuhom. Ut incꞌaꞌ raj nasahoꞌ saꞌ e̱chꞌo̱l. Narahoꞌ raj ban saꞌ e̱chꞌo̱l. 10Checubsihak e̱rib chiru li Dios ut aꞌan tixqꞌue e̱cuanquil.
Incꞌaꞌ takacuechꞌi rix li kech aj pa̱banelil
11Ex inherma̱n, me̱cuechꞌi rix le̱ rech aj pa̱banelil xban nak ani naxcuechꞌi rix li rech aj pa̱banelil naxcuechꞌi ajcuiꞌ rix lix chakꞌrab li Dios ut naxqꞌue rib chokꞌ aj rakol a̱tin. Li kacꞌanjel ma̱cuaꞌ re xcuechꞌbal rix li chakꞌrab; re ban xpa̱banquil. 12Jun ajcuiꞌ li quiqꞌuehoc re li chakꞌrab ut caꞌaj cuiꞌ aꞌan naru narakoc a̱tin. Aꞌan li nacoloc ut aꞌan ajcuiꞌ li nasachoc. Joꞌcan nak la̱at incꞌaꞌ naru nacatrakoc a̱tin saꞌ xbe̱n la̱ cuas a̱cui̱tzꞌin.
Incꞌaꞌ nakanau cꞌaꞌru takacꞌul cuulaj caꞌbej
13Anakcuan abihomak li tinye e̱re la̱ex li nequexyehoc re chi joꞌcaꞌin: Ho̱n malaj cuulaj toxic saꞌ jalan chic tenamit ut aran tocua̱nk chak jun chihabak. Aran toyacok ut ta̱cua̱nk katumin chi us. 14Aban la̱ex incꞌaꞌ nequenau cꞌaꞌru te̱cꞌul cuulaj caꞌbej xban nak li kayuꞌam chanchan li chok. Junpa̱t ajcuiꞌ nacuan ut junpa̱t chic ac ma̱cꞌaꞌ chic. 15Joꞌcaꞌin raj te̱ye: Cui li Dios naraj, tixqꞌue kayuꞌam ut takaba̱nu li bar cuan nakacꞌoxla xba̱nunquil. 16Aꞌut la̱ex nequenimobresi e̱rib chixyebal li cꞌaꞌru nequecꞌoxla xba̱nunquil. Incꞌaꞌ us nequeba̱nu nak nequenimobresi e̱rib. 17Li naxnau xba̱nunquil li us, ut incꞌaꞌ naxba̱nu, aꞌan ma̱c naxba̱nu.
Currently Selected:
Santiago 4: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.