Hebreos 1
1
Li Cꞌajolbej naxcutanobresi chiku li xlokꞌal li Acuabej Dios
1Najter kꞌe cutan li Ka̱cuaꞌ Dios qꞌuila sut quixtaklaheb chak li profeta chixyebal li ra̱tin riqꞌuineb li kaxeꞌto̱nil yucuaꞌ. Quixsiqꞌui xya̱lal chanru nak tixchꞌolob xya̱lal chiruheb. 2Aban anakcuan ma̱cuaꞌeb chic li profeta nequeꞌyehoc re li ra̱tin li Dios. Aꞌ chic li Dios Cꞌajolbej. Saꞌ xcꞌabaꞌ aꞌan, li Dios quixyi̱b li ruchichꞌochꞌ ut chixjunil li cꞌaꞌak re ru cuan. Chixjunil li quixyi̱b quicana saꞌ rukꞌ li Dios Cꞌajolbej. 3Li Ralal li Dios, aꞌan nacutanobresin re lix lokꞌal li Acuabej Dios. Ut aꞌan ajcuiꞌ nacꞌutuc chiku chanru lix naꞌleb. Li Ralal li Dios, aꞌan nacu̱tun re li ruchichꞌochꞌ riqꞌuin lix cuanquilal li ra̱tin xban nak aꞌan yal re saꞌ xbe̱n li ruchichꞌochꞌ. Ut nak ac xmayeja rib re risinquil li kama̱c, li Ralal li Dios co̱ saꞌ choxa ut quicꞌojla saꞌ xnim ukꞌ li Dios Acuabej, li kꞌaxal nim xcuanquil.
Li Dios Cꞌajolbej kꞌaxal nim xcuanquil chiruheb li ángel
4Li cuanquil quiqꞌueheꞌ re kꞌaxal nim cuiꞌchic chiru xcuanquileb li ángel xban nak aꞌan li Ralal li Dios. Lix cꞌabaꞌ quiqꞌueheꞌ xban li Acuabej Dios, aꞌan kꞌaxal lokꞌ cuiꞌchic chiru lix cꞌabaꞌeb li ángel. 5Nakanau nak kꞌaxal lokꞌ xban nak li Dios ma̱ jun cua quixye re junak ángel:
La̱at li cualal; anakcuan xinqꞌue a̱cuanquil. (Sal. 2:7)
Chi moco quixye ta chirix junak ángel:
La̱inak lix yucuaꞌ ut aꞌanak li cualal. (2 Sam. 7:14)
6Nak quixtakla chak li junaj chi Ralal saꞌ ruchichꞌochꞌ, li Dios quixye:
Chilokꞌoni̱k ru xbaneb chixjunileb li ángel.
7Quixye cuiꞌchic li Dios chirixeb li ángel:
Xinyi̱beb lin ángel chanchaneb li ikꞌ ut chanchaneb ajcuiꞌ li rakꞌ xam nak nequeꞌcꞌanjelac chicuu. (Sal. 104:4)
8Aban li Dios quixye re li Cꞌajolbej:
La̱ nimajcual cuanquilal, at Dios, xakxo̱k chi junelic kꞌe cutan. Junelic saꞌ ti̱quilal nacattaklan.
9Li ti̱quilal nacuulac cha̱cuu ut li ma̱usilal xicꞌ nacacuil. Joꞌcan nak sicꞌbil a̱cuu inban la̱in li nimajcual Dios. La̱in la̱ Dios. Kꞌaxal numtajenak li sahil chꞌo̱lej xinqꞌue a̱cue la̱at chiru li xinqꞌue reheb chixjunileb la̱ cuech aj cꞌanjelil. (Sal. 45:6-7)
10Li Dios quixye cuiꞌchic re li Cꞌajolbej:
La̱at, at Ka̱cuaꞌ, saꞌ xticlajic cayi̱b li ruchichꞌochꞌ ut riqꞌuin ajcuiꞌ a̱cuukꞌ cayi̱b li choxa.
11Eb aꞌan teꞌosokꞌ aban la̱at cua̱nkat chi junelic. Chixjunil aꞌan teꞌkꞌelokꞌ joꞌ li tꞌicr.
12Junak tꞌicr na-osoꞌ ut najalman. Joꞌcan ajcuiꞌ nak ta̱osokꞌ li ruchichꞌochꞌ ut li choxa. Aban la̱at incꞌaꞌ nacatjaleꞌ. Cua̱nkat ban chi junelic kꞌe cutan. (Sal. 102:25-27)
13Li Dios ma̱ jun cua quixye re junak ángel joꞌ quixye re li Ralal:
Tatcꞌojla̱k saꞌ innim ukꞌ toj retal tinqꞌueheb rubel la̱ cuok li xicꞌ nequeꞌiloc a̱cue. (Sal. 110:1)
14Incꞌaꞌ quixye aꞌan reheb li ángel xban nak li ángel yal musikꞌejeb chi cꞌanjelac chiru li Dios. Li Dios nataklan chak reheb chixtenkꞌanquileb li teꞌe̱chani̱nk re li colba-ib.
Currently Selected:
Hebreos 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.