2 Corintios 1
1
Xqꞌuebal xsahileb xchꞌo̱l
1La̱in laj Pablo. Sicꞌbil cuu xban li Dios chokꞌ x-apóstol li Jesucristo xban nak joꞌcan quiraj li Dios. Cuochben laj Timoteo li kech aj pa̱banelil. Yo̱quin chixtzꞌi̱banquil li hu aꞌin e̱riqꞌuin la̱ex aj pa̱banel li cuanquex saꞌ li tenamit Corinto ut reheb ajcuiꞌ chixjunileb laj pa̱banel li cuanqueb saꞌ chixjunil li naꞌajej Acaya. 2Chicua̱nk taxak e̱riqꞌuin li usilal ut li tuktu̱quilal li nachal chak riqꞌuin li Dios li kaYucuaꞌ ut riqꞌuin li Ka̱cuaꞌ Jesucristo.
Laj Pablo nabantioxin chiru li Dios
3Lokꞌoninbil taxak li Dios lix Yucuaꞌ li Ka̱cuaꞌ Jesucristo. Li Dios, aꞌan li kaYucuaꞌ ut junelic naruxta̱na ku ut naxcꞌojob kachꞌo̱l. 4Naxcꞌojob kachꞌo̱l saꞌ chixjunil li karaylal re nak ta̱ru̱k takacꞌojob xchꞌo̱leb li cuanqueb saꞌ raylal. Joꞌ nak naxcꞌojob kachꞌo̱l li Dios la̱o, joꞌcan ajcuiꞌ nak takacꞌojob xchꞌo̱leb li cuanqueb saꞌ raylal. 5Joꞌ nak nocotzꞌakon riqꞌuin li qꞌuila raylal li quixcꞌul li Cristo, joꞌcan ajcuiꞌ nak nacꞌojoba̱c kachꞌo̱l xban li Cristo, re nak naru takacꞌojob xchꞌo̱leb li kech aj pa̱banelil. 6La̱o nocorahobtesi̱c re nak la̱ex texcolekꞌ ut ta̱cꞌojoba̱k e̱chꞌo̱l. Naxcꞌojob kachꞌo̱l li Dios re nak la̱o takacꞌojob e̱chꞌo̱l la̱ex nak yo̱quex chixcuybal xnumsinquil li raylal joꞌ li nakacuy la̱o. 7La̱o nakanau nak cau e̱chꞌo̱l saꞌ le̱ pa̱ba̱l. Nakanau nak te̱cꞌul li raylal joꞌ yo̱co chixcꞌulbal la̱o. Abanan nakanau ajcuiꞌ nak ta̱cꞌojoba̱k e̱chꞌo̱l nak yo̱kex chixcꞌulbal li raylal joꞌ nak nacꞌojoba̱c kachꞌo̱l la̱o. 8Ex inherma̱n, nacuaj nak te̱nau joꞌ qꞌuial li raylal xkacꞌul saꞌ li naꞌajej Asia. Kꞌaxal ra xkacꞌul chak ut xkacꞌoxla nak incꞌaꞌ chic takacuy xnumsinquil. La̱o xkacꞌoxla nak incꞌaꞌ chic toeꞌxcanab chi yoꞌyo. 9Xkacꞌoxla nak ac tenebanbil ca̱mc saꞌ kabe̱n. Us ajcuiꞌ nak quikacꞌul chi joꞌcan re nak cua̱nk xcacuilal kachꞌo̱l riqꞌuin li Dios li nacuaclesin re li camenak chi yoꞌyo ut incꞌaꞌ takacꞌoxla nak cuan xcacuilal kachꞌo̱l kajunes kib. 10Li Dios, aꞌan li quicoloc chak ke chiru li ca̱mc nak corahobtesi̱c. Ut nakanau chi tzꞌakal nak aꞌan ta̱colok ke chi junelic. 11Abanan nakatzꞌa̱ma ajcuiꞌ che̱ru nak junelic textijok chikix. Cui nabaleb li nequeꞌtijoc chikix, nabaleb ajcuiꞌ li teꞌbantioxi̱nk chiru li Dios nak torosobtesi. 12Kꞌaxal nasahoꞌ kachꞌo̱l xban nak nakanau nak saꞌ ti̱quilal nococuan saꞌ ruchichꞌochꞌ. Ut chi anchal kachꞌo̱l xocuan saꞌ ti̱quilal nak xocuan e̱riqꞌuin la̱ex. Moco xban ta nak cuan kanaꞌleb kajunes la̱o nak cuanco saꞌ ti̱quilal. Li Dios ban natenkꞌan ke riqꞌuin lix nimal ruxta̱n. 13Moco saꞌ jaljo̱quil ru a̱tin ta nintzꞌi̱bac e̱riqꞌuin. Tzꞌakal re ru li nintzꞌi̱ba. Nacuaj nak te̱tau ru chi tzꞌakal li nintzꞌi̱ba e̱riqꞌuin chicuix la̱in. 14Cuan tana li xetau ru ut cuan tana incꞌaꞌ. Abanan nacuaj nak te̱tau ru chi tzꞌakal nak la̱in x-apóstol li Jesucristo re nak sahak saꞌ e̱chꞌo̱l cuiqꞌuin nak tol-e̱lk li Jesucristo ut sahak ajcuiꞌ inchꞌo̱l la̱in e̱riqꞌuin la̱ex. 15Caꞌ sut raj xincꞌoxla numecꞌ e̱riqꞌuin xban nak ninnau nak xine̱cꞌul raj chi sa saꞌ e̱chꞌo̱l. Joꞌcan nak xinnumeꞌ raj e̱riqꞌuin nak xinchal arin Macedonia. 16Ut nincꞌoxla numecꞌ e̱riqꞌuin nak tinsukꞌi̱k. Ut ninnau nak tine̱tenkꞌa la̱ex chi xic aran Judea. 17¿Cꞌaꞌru nequecꞌoxla chirix aꞌin? ¿Ma incꞌaꞌ ta biꞌ nincꞌoxla chi us li cꞌaꞌru ninye? ¿Ma yal xcab rix inchꞌo̱l ta biꞌ li cꞌaꞌru yo̱quin chixba̱nunquil? ¿Ma ho̱n ta biꞌ ninye us ut junpa̱t chic tinye incꞌaꞌ joꞌ nequeꞌxba̱nu li ma̱jiꞌ nequeꞌxpa̱b li Cristo? 18Li Dios naxnau nak incꞌaꞌ yo̱quin chixyebal e̱re us cui nacuecꞌa nak incꞌaꞌ ta̱ru̱k tinba̱nu. 19Li Jesucristo li Ralal li Dios ma̱ jun sut quixye us cui aꞌan naxnau nak incꞌaꞌ tixba̱nu. Aꞌan junelic ya̱l li cꞌaꞌru naxye. Ut la̱in cuochbeneb laj Silvano ut laj Timoteo nakachꞌolob xya̱lal li Cristo che̱ru la̱ex. 20Chixjunil li yechiꞌinbil ke xban li Dios, nakacꞌul saꞌ xcꞌabaꞌ li Jesucristo. Joꞌcan nak saꞌ xcꞌabaꞌ li Jesucristo nakaye “joꞌcan taxak” re xqꞌuebal xlokꞌal li Dios. 21Saꞌ xcꞌabaꞌ li Jesucristo, li Dios naxqꞌue xcacuilal kachꞌo̱l saꞌ li kapa̱ba̱l la̱o joꞌ ajcuiꞌ la̱ex. Ut aꞌan ajcuiꞌ quisicꞌoc chak ku re nak tocꞌanjelak chiru. 22Ut li Dios quixtakla chak li Santil Musikꞌej chi cua̱nc kiqꞌuin chokꞌ retalil nak reho chic. Xban nak li Santil Musikꞌej cuan kiqꞌuin, nakanau chi ya̱l nak takacꞌul chixjunil li quixyechiꞌi ke. 23La̱in incꞌaꞌ xcuaj e̱kꞌusbal. Joꞌcan nak incꞌaꞌ xco̱in e̱riqꞌuin aran Corinto. Li Dios naxnau nak ya̱l li yo̱quin chixyebal. 24Moco yo̱co ta xminbal e̱ru saꞌ le̱ pa̱ba̱l. Ac cau e̱chꞌo̱l saꞌ le̱ pa̱ba̱l. Yo̱co ban che̱tenkꞌanquil re nak sahak e̱chꞌo̱l saꞌ le̱ pa̱ba̱l.
Currently Selected:
2 Corintios 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.