1 Juan 5
5
Li xcanabanquil li ma̱usilal cuan saꞌ ruchichꞌochꞌ
1Chixjunileb li nequeꞌpa̱ban re nak li Jesús aꞌan li Cristo, aꞌaneb li ralal xcꞌajol li Dios. Ut cui la̱o nakara li Acuabej Dios, takaraheb ajcuiꞌ li ralal xcꞌajol. 2Cui nakara li Dios, nakapa̱b lix chakꞌrab. Riqꞌuin aꞌan nakanau nak nakara li Dios joꞌ ajcuiꞌ eb li ralal xcꞌajol. 3Aꞌan aꞌin lix ra̱bal li Dios: nak takapa̱b lix chakꞌrab. Moco chꞌaꞌaj ta xpa̱banquil lix chakꞌrab. 4Li yoꞌlajenak saꞌ musikꞌej riqꞌuin li Dios cuan xcuanquil re xcuybal xnumsinquil li ma̱usilal li cuan saꞌ ruchichꞌochꞌ. Cuan kacuanquilal chixnumsinquil xban nak nakapa̱b saꞌ xcꞌabaꞌ li Jesucristo. 5¿Ani li tzꞌakal cuan xcuanquil re xcuybal xnumsinquil li ma̱usilal li cuan saꞌ ruchichꞌochꞌ? La̱o li nocopa̱ban re nak li Jesús aꞌan li Ralal li Dios. Caꞌaj cuiꞌ la̱o cuan kacuanquil re xcuybal xnumsinquil li ma̱usilal.
Li naxchꞌolob xya̱lal chirix li Dios Cꞌajolbej
6Li Jesucristo quicꞌulun saꞌ ruchichꞌochꞌ. Quixcꞌul li cubi haꞌ ut quihoyeꞌ ajcuiꞌ lix quiqꞌuel chiru li cruz. Ma̱cuaꞌ caꞌaj cuiꞌ li cubi haꞌ quixcꞌul. Quihoyeꞌ aj ban cuiꞌ lix quiqꞌuel. Li Santil Musikꞌej naxchꞌolob xya̱lal chiku chirix li Cristo. Ut ya̱l chixjunil li naxcꞌut chiku li Santil Musikꞌej. 7Saꞌ choxa cuanqueb li oxibeb li nequeꞌchꞌoloban lix ya̱lal. Aꞌaneb aꞌin: li Dios Acuabej, li Dios Cꞌajolbej ut li Dios Santil Musikꞌej. Li oxib aꞌin junajeb chi ribil. 8Ut oxib li cꞌaꞌru qui-uxman saꞌ ruchichꞌochꞌ li naxcꞌut chiku lix ya̱lal chirix li Jesucristo. Li xbe̱n, aꞌan nak li Santil Musikꞌej naxcꞌut chiku lix ya̱lal. Li xcab, aꞌan li cꞌaꞌru qui-uxman nak li Jesús quixcꞌul li cubi haꞌ. Ut li rox, aꞌan nak quihoyeꞌ lix quiqꞌuel li Jesús chiru cruz. Eb li oxib aꞌin juntakꞌe̱t lix ya̱laleb. 9La̱o nakapa̱b li ya̱l chꞌolobanbil xbaneb li cui̱nk. Abanan li chꞌolobanbil xban li Dios kꞌaxal cuiꞌchic nim xcuanquil chiru aꞌan. Ut li Dios quixchꞌolob xya̱lal nak li Jesús aꞌan li Ralal. 10Li ani napa̱ban re li Ralal li Dios, aꞌan naxnau tzꞌakal lix ya̱lal. Aꞌut li incꞌaꞌ napa̱ban re li Dios, naxqꞌue li Dios chokꞌ aj ticꞌtiꞌ xban nak incꞌaꞌ naxpa̱b lix ya̱lal li quixchꞌolob li Dios nak quixye re li Jesús: La̱at li cualal, chan. 11Ut aꞌan aꞌin li naxchꞌolob xya̱lal nak li Dios quixqꞌue ke li yuꞌam chi junelic. Ut li yuꞌam aꞌin natauman riqꞌuin li Ralal. 12Yalak ani napa̱ban re li Ralal li Dios, aꞌan cuan xyuꞌam chi junelic. Ut li ani incꞌaꞌ napa̱ban re li Ralal li Dios, ma̱cꞌaꞌ lix yuꞌam chi junelic.
Xnaubal nak cuan kayuꞌam chi junelic
13Xintzꞌi̱ba aꞌin chokꞌ e̱re la̱ex li nequexpa̱ban re li Ralal li Dios re nak la̱ex te̱nau nak cuan e̱yuꞌam chi junelic. 14Ut aꞌin li cau cuiꞌ kachꞌo̱l chirix li Dios. Nakanau nak li cꞌaꞌak re ru nakatzꞌa̱ma re, cui nakatzꞌa̱ma joꞌ naraj li Dios, aꞌan nocorabi. 15Nakanau nak li Dios nocorabi nak nocotijoc. Riqꞌuin aꞌin nakanau nak naxqꞌue ke li cꞌaꞌru nakatzꞌa̱ma chiru. 16Cui la̱o takil junak li kaherma̱n chi ma̱cobc ut naru xcuybal lix ma̱c, chotijok chirix re nak ta̱cuyekꞌ xma̱c xban li Dios ut ta̱cua̱nk riqꞌuin li Dios toj chirix lix camic. Abanan cuan li ma̱c incꞌaꞌ naxcuy li Dios. Ma̱cꞌaꞌ rajbal li tijoc chirix li ani yo̱ chi ba̱nu̱nc re li ma̱c li ma̱cꞌaꞌ xcuybal. 17Ya̱l nak li ma̱usilal, aꞌan ma̱c. Abanan li Dios naxnau bar cuan li ma̱c naru xcuybal ut bar cuan li incꞌaꞌ. 18Nakanau nak li ani napa̱ban re li Dios incꞌaꞌ chic yo̱k chi ma̱cobc xban nak li Ralal li Dios na-iloc re. Ut laj tza ma̱cꞌaꞌ chic xcuanquil saꞌ xbe̱n laj pa̱banel. 19Ut nakanau nak la̱o ralal xcꞌajol li Dios. Abanan li jun chꞌol chic li ma̱jiꞌ nequeꞌpa̱ban re li Dios, eb aꞌan cuanqueb rubel xcuanquil laj tza. 20Ut la̱o nakanau nak li Ralal li Dios quicꞌulun saꞌ ruchichꞌochꞌ. Quixqꞌue kanaꞌleb re xnaubal bar cuan li tzꞌakal Dios. Ut junajo chic riqꞌuin li tzꞌakal Dios xban nak xkapa̱b li Jesucristo li Ralal li Dios. Aꞌan li naqꞌuehoc ke li yuꞌam chi junelic. 21Ex inherma̱n, me̱lokꞌoni chic li jalanil dios yi̱banbil riqꞌuin ukꞌej. Joꞌcan taxak.
Currently Selected:
1 Juan 5: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.