VaLevi 1
1
Milambu ya kwenyeka yoshe yamutunu
1Shukulu Kalunga wasanene Mosesa nakwendeka nendi oku ali mu Mbalaka Mwakuliwanena ngwendi, 2“Leka vanu va Isalele vanyunge mashiko awa omo vakombelela vin̄ombelo vyavo.
“Omo munu woshe anena cimuna wakukombelela, nambe umo wa vingombe vendi, nambe umo wa vimanga vendi, nambe umo wa vimembe vendi, 3nga ikeye alambula umo wa ku vingombe vendi kupwa mulambu wa kwenyeka, napande kunena ngombe wa nkomba wakujeneka kapenga. Co napande kumunena ku cikolo ca Mbalaka Mwakuliwanena, ngeci Shukulu Kalunga akamutambule. 4Co akakambeke livoko lyendi a mutwe wa uje cimuna ngeci vakamutambule kupwa n̄ombelo ya kumwambesa ku vuvi vwendi. 5Akatsiile uje cimuna kuje vene, co vaka-kukombelela va ka naanga ya Alone vakana maninga kuli Shukulu Kalunga, asinoni vakawashamwina ku mitambela yoshe iwana ya mutula uje uli ku cikolo ca Mbalaka. 6Asinoni akajuva uje cimuna nakumutetanga, 7co vaka-kukombelela vakatsika vitale vya a mutula nakuvwekao tuhya. 8Co vakaka vipuka vya uje cimuna a vitale vya tuhya, kukumbasanako mutwe na mazi. 9Uje munu napande kukusha vya mwimo na mapondo a kunima, co muka-kukombelela akenyekela n̄ombelo yoshe yamutunu a mutula kupwa n̄ombelo ya kwenyeka, co vweko vwa mulambu ou wa vyakulya vukavwaelelesa Shukulu Kalunga.
10“Nga munu alambula umo wa vimanga vendi nambe umo wa vimembe vendi, napande kupwa lijamba wa kujeneka kapenga. 11Akamutsiile ku kunto ya mutula, co vaka-kukombelela vakashamwine maninga ku mitambela yoshe iwana ya mutula. 12Omo uje munu namanesa kutetanga ije situ, co muka-kukombelela akaka vilyo vyoshe amolika kukumbasanako mutwe na mazi, co akavyaka a tuhya. 13Uje munu napande kukusha vya mwimo vyoshe, na mapondo a kunima, co muka-kukombelela akanena ije n̄ombelo kuli Shukulu Kalunga nakuyenyekela yoshe a mutula. Co vweko vwa mulambu ou wa vyakulya vukavwaelelesa Shukulu Kalunga.
14“Nga uje munu alambula kazila kupwa mulambu wa kwenyeka, napande kupwa katela nambe liyembe. 15Co muka-kukombelela akamunene ku mutula, amutukule mukoshi, asinoni enyekele mutwe wa uje kazila a mutula. Maninga endi akaandwekesele ku mutambela umo wa mutula. 16Vakatundise lijakwilo na vije vilimo, vakavyumbile ku mutambela wa mu ngangela ya mutula, kuje ku lishito lya lito. 17Co akamukwate a mambava nakumutavula, oloni kesi akajajule mambava endi, asinoni akamwenyekele woshe wamutunu a mutula. Co vweko vwa mulambu ou wa vyakulya vukavwaelelesa Shukulu Kalunga.
Currently Selected:
VaLevi 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006