Hambakuke 1
1
1Awa akewo majwi aje asholwele Shukulu Kalunga kuli Hambakuke muka-kwimanena.
Hambakuke alinyenga a vaka-kujeneka vushunga
2Shukulu Kalunga, visimbu vyavingi njinakala nakutambeka kuli yove ngeci unjikwase. Simbu mukajo ukanjitolilila? Simbu mukajo ukatwamena ku vanu vaje vashaka kulinga vyuma vya muuka kuli yetu? 3Omwo vikajo njimwena tuyando twangacije? Omwo vikajo utavesela vanu ngeci valinge vuvi vwangacije? Kulijokota na lwozi vyoshe vinanjizengeleka. Co kwoshe-ikwoshe kuli kulilwisa nakulizunga. 4Mashiko anapu akuzeya, co maako kuvesi kwakula vin̄anda mu ngila ya vushunga. Vaka-vuvi vanahyana vaka-vushunga mu vimbanja, co vushunga kuvwesi nakulingiwa.
Kukumbulula kwa Shukulu Kalunga
5 #
Vil 13:41
Asinoni Shukulu Kalunga wendekele kuli vanu vendi ngwendi, “Kengeni akati ka miyati ya vanu ava vanamizengeleka, co mukalikomokela a vyuma vimukamona. Njikalinga cuma cimo cije kumukakulaela nameme mukaciziva. 6#2 Vim 24:2 Njikalingisa vaMbambilone kupwa muyati wa vanu va nzili, na muuka, kulisingimika. Mashwalale vavo valinakuya kwoshe-ikwoshe mu lifuti mwoshe nakufungulula mafuti a vakwavo. 7Vakevo valingisa vanu kwoshe-ikwoshe kujaja na lyova, co valyalesa nakuliziva ngeci vyoshe vali na kulinga vinapu vya vushunga, co lalo valinakukava lishiko.
8“Tuvalu twavo valinalumbisi kutuvakana shonge, co vakevo vatewesa manene na vukalu kutuvakana tungunga. Vaka-kulonda a tuvalu vakatundu ku mafuti a kulyala, co tuvalu twavo vakalingi musindo asi na vimbemba vyavo. Vaka-kulonda a tuvalu twavo vakalu nzita vwasi-vwasi nakucuncumukila a vitozi vavo ngwe vingonga.
9“Omo mbunga ya mashwalale va vaMbambilone vaya kulutwe mukulwa, co vapangesa nzili na muuka mukufungulula munu woshe. Omo vashwenya kuyehi, munu woshe-iwoshe alijajela na lyova. Co vambata vinzinda vavangi manene vaje naumo wai asa kuvalava. 10Vakevo vayengula vimyene, nakujola vamyata vakama. Nganda ya cimpaka naimo yahi kuvasa kukovela. Valundika livu ku vivumbe vya cimpaka, co vafungulula nganda. 11Asinoni vaita ngwe lihunzi, co vanai, vanu ava vakalemesa nzili yavo kuyipwisa ngwe njambi yavo.”
Hambakuke alinakulambelela lalo kuli Shukulu Kalunga
12Shukulu Kalunga, kutunda kukushangumuka yove wapwa u Njambi vene. Yove wapwa u Njambi yange wakujela, co wakala myaka yoshe. Shukulu Kalunga, Njambi yange muka-kunjinyunga, yove unaangula vaMbambilone, co unavana nzili ngeci vatuhise. 13Omo vikajo utavela vanu ava vaka-vuvi kulinga vuvi? Mesho ove apwa akujela kuwesi kukenga a vuvi, nambe kukenga vaka-vuvi ngeci valinge vyuma vyavivi. Ngecivene, omwo vikajo unolokela kuluu omo vaka-vuvi vanyongesa vanu vaka-vushunga kutuvakana vakevo?
14Vatijo upwisa vanu ngwe visi, nambe ngwe njame ya tulongolo vaje kuvesi na ntwama wakuvatwamenena? 15VaMbambilone vakakwata vanu na tulovo ngwe vakwata visi. Vavakokangeya ngwe visi vali mu manimbwa, co valisamba a vije vanakwata! 16Vakalemesa manimbwa avo nakuwakombelela vin̄ombelo ngwe vinjambi, omwo manimbwa avo akavapangela cipangi cacivwa.
17Kuma anga vakapangesa mikwale yavo ku myaka yoshe, nakunyongesa miyati ya vanu kwonwa kuvazivilako mema ku mbunge ndi?
Currently Selected:
Hambakuke 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006