Juan 21
21
Jaꞌ Yet Jix Xꞌoxa Sbꞌa Jesús Tet Jujwan Ebꞌ Scuywom
1Jix lawi tuꞌ xin, jix xꞌoxon a sbꞌa Jesús tet ebꞌ scuywom junelxa tuꞌ, yet eyecꞌ ebꞌ stiꞌ jaꞌ mar Tiberias.#21:1 Tiberias, junxa bꞌie yu jaꞌ mar Galilea. Tol jaxca tiꞌ jix yun xꞌoxon a sbꞌa tet ebꞌ. 2Junne cꞌal eecꞌ Simón Pedro yetoj Tomás, naj chi yij Tioẍ, cꞌal Natanael a Caná yul yet Galilea. Ey pax ecꞌ ebꞌ scꞌaal Zebedeo, yetoj cawanxa yet cuywomal ebꞌ. 3Jix yalon Simón Pedro tet ebꞌ jaxca tiꞌ:
—Toj jin mitxꞌo pescado, ẍi naj tet ebꞌ.
—Oj jon toj ja wetoj, ẍi ebꞌ tet naj. Catuꞌ jix too ebꞌ tuꞌ. Jix oc ebꞌ yul jun barco. Jaꞌ yet jun akꞌbꞌal tuꞌ, cꞌam cꞌal junoj noꞌ pescado jix yiꞌ ebꞌ. 4Jaꞌ yet lalanxa sajbꞌi, eyecꞌ Jesús stiꞌ jaꞌ mar tuꞌ. Jal pax ebꞌ cuywom, cꞌam cꞌal chi yiltej ebꞌ ta jaꞌ Naj eyecꞌ stiꞌ jaꞌ tuꞌ. 5Jix yalon tet ebꞌ jaxca tiꞌ:
—Jex wuẍtaj, ¿eyxam noꞌ chi atej je yu? ẍi toj tet ebꞌ.
—Cꞌam tzet, cꞌam cꞌal junoj, ẍi ebꞌ tet Naj.
6—Kꞌojwej eytoj je txim bꞌey je watxꞌ kꞌabꞌ. Jatuꞌ oj je yiꞌ je pescado tuꞌ, ẍi Jesús tet ebꞌ. Jix sjije ebꞌ tzet jix yal Jesús tuꞌ. Jaꞌ yet jix yakꞌlen stokꞌon atej xim ebꞌ tuꞌ xin, ma xa atej yu yalil noꞌ pescado tuꞌ, yutol caw jix no sicꞌlebꞌil. 7Catuꞌ jix yalon jun scuywom camcꞌulnebꞌil yu Jesús tet Pedro jaxca tiꞌ:
—Jaꞌ Naj Kaawil eyecꞌ tiꞌ, ẍi naj tet Pedro.
Jix yabꞌ cꞌal Simón Pedro jaxca tuꞌ, jix yaon oc spichil tuꞌ, yutol asan cꞌal yet yul spichil eyocoj. Catuꞌ jix kꞌojon el sbꞌa naj yul barco tuꞌ, catuꞌ jix el stiꞌ jaꞌ. 8Canebꞌ jix tom txꞌanil chi bꞌey ebꞌ yibꞌan jaꞌ, catuꞌ jix apni wanxa ebꞌ scuywom yul jun teꞌ barco tuꞌ. Tokꞌbꞌil oc xim ebꞌ, nonaj yu noꞌ pescado tuꞌ. 9Catuꞌ jix eltej ebꞌ, jix yilon ebꞌ, tol ey jun kꞌakꞌ eyoc stiꞌ jaꞌ tuꞌ. Bꞌatxan oc pescado yibꞌan stzakꞌakꞌ tuꞌ, catuꞌ ey pax ey wan pan scawilal tuꞌ. 10Jix yalon Jesús tet ebꞌ jaxca tiꞌ:
—Iꞌwejtej jaycꞌonoj noꞌ pescado jix je mitxꞌ tuꞌ, ẍi Naj tet ebꞌ. 11Jix octoj Simón Pedro yul barco tuꞌ. Jix tokꞌon el txꞌan txim tuꞌ stiꞌel jaꞌ. Nonaj txꞌan yu mimej pescado. Ey 153 noꞌ yin masanil. Caw miman noꞌ, ma pax nicꞌchatoj txꞌan txim tuꞌ yu yalil noꞌ. 12Jix lawi tuꞌ xin, jix yalon Jesús tuꞌ tet ebꞌ jaxca tiꞌ:
—Titanwej, lowoj jonwej, ẍi Jesús tet ebꞌ. Cꞌam junoj ebꞌ scuywom tuꞌ jix kꞌanlen el tet Naj jaxca tiꞌ: ¿Mac jaach txequel xin? Man ẍi oj ebꞌ, yutol yotaj xa ebꞌ, tol jaꞌ Naj Kaawil. 13Catuꞌ jix sjitzontej sbꞌa Jesús scꞌatan ebꞌ tuꞌ. Catuꞌ jix yiꞌon a ixim pan tuꞌ, jix cꞌoli spoꞌon ecꞌ xol ebꞌ, catuꞌ jix spoꞌon pax ecꞌ noꞌ pescado tuꞌ. 14Yet xa yoxelal jix xꞌoxon a sbꞌa Jesús tet ebꞌ scuywom tiꞌ, yet tax cꞌal jix pitzcꞌu a xol ebꞌ camnaj.
Jaꞌ Yet Jix Kꞌanabꞌ Jesús Yetoj Simón Pedro
15Jaxa yet jix lawi slow ebꞌ, jix yalon Jesús tet Simón Pedro jaxca tiꞌ:
—Simón, scꞌaal jaach naj Jonás, chin kꞌanle ey jaach an, ¿yel xacꞌal mi chin ja camcꞌulne yintaj wan tiꞌ? ẍi Jesús tet naj.
—Jaꞌton Jaach Cuywam. Ja wotajxa, tol chach jin camcꞌulne, ẍi Pedro tuꞌ tet Naj.
—Ta jaxca tuꞌ xin, jaxca ojabꞌ junoj ilom yuneꞌ meꞌ, quey ojabꞌ tuꞌ cha wute ja wilon ebꞌ wet xa an, ẍi Jesús tet naj. 16Jix lawi yalon wan tiꞌ, jix yalon junelxa jaxca tiꞌ tet naj:
—Simón, scꞌaal jaach naj Jonás. ¿Chim jin ja camcꞌulne? ẍi Jesús tet naj.
—Jaꞌton Jaach Cuywam. Ja wotajxa, tol chach jin camcꞌulne, ẍi Pedro tet Jesús.
—Ta jaxca tuꞌ xin, jaxca ojabꞌ junoj ilom meꞌ quey ojabꞌ tuꞌ cha wute ja wakꞌon cuenta ebꞌ wet xa an, ẍi Jesús tet naj. 17Jix yalon pax yet yoxelal jaxca tiꞌ:
—Simón, scꞌaal jaach naj Jonás, ¿Chim jin ja camcꞌulne? ẍi Jesús tet naj. Caw jix cusa scꞌul naj Pedro tuꞌ bꞌian, yutol yoxel xacꞌal jix skꞌanle Jesús tuꞌ tet naj, ta chi camel scꞌul yin Jesús tuꞌ, yuxan jix yal naj tet Jesús jaxca tiꞌ:
—Jaach Cuywam, ja wotajxa taꞌ masanil. Ja wotaj tol chach jin camcꞌulne an, ẍi Pedro tet Jesús.
—Ta jaxca ja walon tuꞌ, jaxca ojabꞌ junoj ilom meꞌ, jaxca ojabꞌ tuꞌ cha wute ja wilon ebꞌ wet xa yeoc an. 18Caw yel chi wal ey jaach an, jaꞌ yet achꞌe jaachto, asan cꞌal cha waoc ja pichil catuꞌ chach tocꞌal bꞌey chi yal ja cꞌul chach toi. Jal pax yet oj jaach ichambꞌoj, oj el jenan ja kꞌabꞌ, catuꞌ txꞌojxa mac oj kꞌalon ja nan, catuꞌ oj jaach iꞌletoj bꞌey cꞌam chi yal ja cꞌul, ẍi Jesús tet naj. 19Jix yal jaxca tiꞌ, yu tzet utbꞌil oj yun scam Pedro tuꞌ, catuꞌ oj xꞌoxon eloj tol caw miman yeloc apnoj Dios. Jix lawi tuꞌ, catuꞌ jix yalon pax tet naj jaxca tiꞌ:
—Ocan tzajan wintaj an, ẍi Jesús tet Pedro.
Jun Cuywom Camcꞌulnebꞌil Yu Jesús
20Catuꞌ jix too tꞌanan Pedro tuꞌ yintaj, jix yiloni, tol jaꞌ jun cuywom camcꞌulnebꞌil yu Jesús tzajan oc yintaj ebꞌ. Jun jix sjitzoc sbꞌa scꞌatan Jesús yet lalan slow ebꞌ yet junel, catuꞌ jix skꞌanlen el tet jaxca tiꞌ: “Jaach Cuywam, ¿mactxequel oj jaach aon oc yul skꞌabꞌ camich?” ẍi naj. 21Jaꞌ yet jix yilon Pedro jaxca tiꞌ, jix skꞌanlen tet Jesús jaxca tiꞌ:
—Jaach Cuywam, jaꞌ jun chi jul tiꞌ, ¿tzet oj yun pax scami? ẍi naj tet Jesús. 22Catuꞌ jix yalon Jesús tet naj jaxca tiꞌ:
—Ta chi yal jin cꞌul tol iquisto cꞌal jun tiꞌ, yet oj jin jul junelxa, cꞌam ja walon ja wet yin. Asan tol chach tzajlo wintaj jaach tiꞌ an, ẍi Jesús tet Pedro tuꞌ. 23Yu jun tuꞌ, jix el skꞌumal xol ebꞌ creyente tol man oj cam jun cuywom tuꞌ. Cꞌam pax tzet jix yal Jesús tuꞌ, ta man oj camoj. Asan jix yal Naj jaxca tiꞌ: “Ta chi yal jin cꞌul iquisto cꞌal, yet oj jin jul junelxa, cꞌam ja walon ja wet yin,” ẍi. 24Jaꞌton jun scuywom tiꞌ chi yakꞌ sbꞌa testigoal yin wan tiꞌ, catuꞌ jix stzꞌibꞌen pax canoj. Jaon tiꞌ, kotaj, tol caw yel wan jix stzꞌibꞌe can tiꞌ. 25Miman tocꞌal wanxa tzetyetal jix el yunen Jesús. Kꞌinaloj ta junjunal jix yun stzꞌibꞌelecan skꞌaneal, jaꞌ chi wute jin naꞌoni, cꞌam chi yabꞌ yul yibꞌankꞌinal tiꞌ, bꞌey chi ey an juun bꞌey jix tzꞌibꞌelecan skꞌaneal tuꞌ.
Currently Selected:
Juan 21: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.