Santiago 1
1
Yichbꞌanil Scarta Naj Santiago
1Jain ton Santiago#1:1 Jaꞌ Santiago ey junxa sbꞌi chi yij pax Jacobo, jaꞌton yuẍtaj Naj Kaawil. jin an, yakꞌomal servil Dios weoc an, yakꞌomal pax servil Kaawil Jesucristo weocoj. Chi watoj scawil je cꞌul, jex lacawebꞌ tujanil jex wet Israelal, jex tol sajleminaj je yeecꞌ bꞌey junjun conobꞌ.
Jun Jelanilal Chi Yakꞌ Dios
2Jex wuẍtaj, jex wanabꞌ, jaꞌ yet chi jul yal cꞌal tzet porobꞌal je yibꞌan, akꞌwej tzalabꞌoj je cꞌul sicꞌlebꞌil. 3Ey bꞌey chi cu akꞌle porobꞌal, yet watxꞌ chi txeclo eloj, ta tol yel asanne yin Jesucristo chi kaoc cu cꞌul. Kotaj, tol jaꞌton yu wan tuꞌ chi jul can cu tecꞌanil. 4Yuxan, caw che yaoc je cꞌul yin Dios, yet watxꞌ oj waꞌxoj oc je naꞌbꞌal. Ta tol queytuꞌ che yute, watxꞌ jex ton sattaj Dios. Cꞌam niꞌoj man tzꞌajanoj jex yin. 5Ta tol jaon man to tzꞌajanoj cu jelanil xin, cu kꞌan tet Dios. Oj yakꞌ ey jon, yutol oj yakꞌ Dios ey jon cu masanil yin masanil scꞌul, ta tol chi cu kꞌan tet. Man oj cu tzule yu. 6Jaꞌ yet chi cu kꞌanon cu jelanil, sowalil tol chi kaoc yin cu cꞌul, tol oj cu chaꞌ. Manche kakꞌ caabꞌcꞌulal yet chi cu kꞌanoni. Jaꞌ ebꞌ tol chi yakꞌ caabꞌcꞌulal yin Dios, laan ebꞌ jaxca jaꞌ mar tol chi a pomna sat yu kaꞌeꞌ, catuꞌ tol chi meltzotajbꞌi sat. 7Ta tol ey jex queytuꞌ che yute je bꞌa jaxca tuꞌ, man je naꞌ tol ey niꞌoj tzet oj je chaꞌ tet Naj Kaawil. 8Jaꞌ mactxequel man jichanoj snaꞌbꞌal, man tecꞌan oj yeoc snaꞌbꞌal yin masanil tzetyetal. 9Mac jon tol mebꞌa jon, tzalajonwej, yutol ey keloc apnoj yul sat Dios. 10Jal pax jex tol bꞌeom jex xin, oj jex tzala pax oj, yet oj naꞌcha el je yu, tol cꞌam niꞌoj yeloc apnoj je bꞌeomal tuꞌ sattaj Dios. Yutol laan oj yun can el ebꞌ bꞌeom jaxca xumac an chꞌim. 11Jaꞌ yet naat xa chi a cꞌu, chi tajel bꞌulna yu sjowal kꞌakꞌ, catuꞌ junne txolan chi pujel xumac an, catuꞌ manxa watxꞌ oj yili. Jaxca chi yun staj xumac an chꞌim tuꞌ, queytuꞌ oj yun slawoj ey ebꞌ bꞌeom tuꞌ, yet lalan syambꞌan sbꞌeomal ebꞌ.
Jaꞌ Yet Chi Cu Akꞌle Porobꞌal
12Ta tol chi techa ku, yet chi cu akꞌle porobꞌal, caw watxꞌ ket. Jaꞌ yet chi xew kakꞌle porobꞌal tuꞌ, oj cu chaꞌ spaj, jaꞌton kꞌinale tol ey cꞌal yin tobꞌalkꞌinal. Jaꞌton jun albꞌilcan yu Dios tet ebꞌ chi camcꞌulneni. 13Jaꞌ yet chi cu ijbꞌale kunen junoj penail, manche cu naꞌ tol jaꞌ Dios chi cu ijbꞌani, yutol cꞌam chi skeꞌ yijbꞌale Dios yin yunen spenail. Catuꞌ cꞌam pax chi ijbꞌale junoj mactxequel yu Dios yin spenail, 14yutol jaꞌ tzet chi kiloc cu cꞌul yin, jaꞌ chi cu ijbꞌani. Jaꞌton wan tuꞌ chi cu monten cantoj yin spenail. 15Jaꞌ yet chi kunen wan tzetyetal chi kiloc cu cꞌul oj yin tuꞌ, chi oc can cu penail. Jaꞌton yet tuꞌ chi etex can el cu naꞌbꞌal yu cu penail tuꞌ. Yu cꞌal jun tuꞌ xin, chi cu toocan bꞌey syaꞌilal yin junelne. 16Jex wuẍtaj, jex wanabꞌ, manche je yakꞌ qꞌueytoj je bꞌa. 17Jaꞌ bꞌey satcan chi tit masanil tzetyetal watxꞌ, tol tucꞌal chi saꞌle ey jon. Jaꞌton Dios chi saꞌon masanil tzetyetal watxꞌ tuꞌ ey jon. Jaꞌton Dios jix waꞌnen wan satcanil tzejtebꞌal. Caxcꞌal mi tol chi qꞌuexlabꞌi yili ebꞌ, catuꞌ chi oc ewan yin, jal pax Dios xin, man quey oj tuꞌ. Cꞌam bꞌey chi qꞌuexlabꞌi snaꞌbꞌal Dios. 18Yutol jix el yin scꞌul Dios, jix cu swaꞌne yuninal oj, yin yakꞌbꞌalnen skꞌane tol caw yel, yutol jaxca tuꞌ jix el yin scꞌul jix yute, yet watxꞌ oj cu bꞌabꞌoj sattaj masanil tzetyetal jix swaꞌne.
Sowalil Chi Kun Tzet Chi Yal Skꞌane Dios
19Jex wuẍtaj, jex wanabꞌ, je yotaj xa wan chi wal tiꞌ an. Awej oc je txiquin je yabꞌeni. Man comonoj che yal junoj tzetyetal yin eymanil. Man ojabꞌ pax comonoj chi tit je jowal. 20Yutol jaꞌ yet chi tit cu jowal, man yochwan oj Dios chi kunne. Yutol chi yoche Dios chi kun masanil yin sjichanil. 21Yuxan, bꞌejwej can masanil spenail, cꞌal tzetyetal man watxꞌoj. Chaꞌwej skꞌane Dios yin eyilal, tol chi awle can oc yin cu pixan. Yutol chi skeꞌ scolcha can el cu pixan yu jun kꞌane tuꞌ. 22Jijewej tzet chi yal skꞌane Dios tuꞌ xin. Man ojabꞌ tucꞌal oj chi kabꞌe. Ta tol tucꞌal chi kabꞌe, chi ketne cu bꞌa. 23Ey mac chi abꞌen skꞌane Dios, cꞌam pax chi sjije ebꞌ, laan ebꞌ jaxca junoj mactxequel chi yil sat yul junoj chꞌen nen. 24Chi cꞌal lawi yilon sat yul nen tuꞌ xin, catuꞌ chi toi. Jaꞌ yet chi cꞌal too tuꞌ xin, chi too qꞌueycꞌulal yu, tzet utbꞌil yili sat. 25Ey jun ley tol caw tzꞌajan yei. Jaꞌ jun ley tuꞌ, laan jaxca jun nen tuꞌ. Jaꞌton jun tuꞌ chi cu jajon can eloj. Ta tol chi cam cu cuyoni, catuꞌ cꞌam chi too qꞌueycꞌulal ku tzet chi yalaꞌ, catuꞌ chi cu bꞌeybꞌalneni. Ta tol queytuꞌ chi kunne, oj yakꞌ tzalabꞌoj cu cꞌul Dios yin masanil tzet chi kunne. 26Ta tol chi cu naꞌ tol ey jon oc yin jun jaꞌcaw akꞌo servil Dios, ta cꞌam pax chi cu mitxꞌey cu tiꞌ yin tzet chi kalaꞌ, naꞌbꞌacꞌal ton chi kalaꞌ, tol ey jon oc yin jun jaꞌcaw akꞌo servil Dios tuꞌ. Catuꞌ jaon cꞌal oc chi ketne cu bꞌa. 27Yetoj pax oj, ta ey ebꞌ unin tol cꞌamxa smam cꞌal xutx, cꞌal ebꞌ ix tol camnajxa yichamil, catuꞌ eyoc ebꞌ yin syaꞌilal, sowalil chi kiltoj ebꞌ, catuꞌ chi cu colwa yin ebꞌ. Yetoj pax oj, chi cu poꞌoel cu bꞌa xol masanil spenail bꞌey yul yibꞌankꞌinal tiꞌ. Ta tol chi kun wan tiꞌ, yel toni, jichan cu naꞌbꞌal yul sat cu Mam Dios, chi yal tuꞌ.
Currently Selected:
Santiago 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.