Lucas 22
22
Ebꞌ Jix Slatiꞌne El Sbꞌa Tzet Oj Yute Smitxꞌon Jesús
(Mateo 26:1-5, 14-16; Marcos 14:1-2, 10-11; Juan 11:45-53)
1Lalanxa sjul stiempoal skꞌin Pascua ebꞌ Israel, yet chi sloꞌon ixim pan ebꞌ cꞌam yich. 2Jix seyon ebꞌ yaaw yakꞌomal xaambꞌal ebꞌ Israel tet Dios cꞌal ebꞌ cuywam yin sley Moisés tzet utbꞌil oj yute cam Jesús ebꞌ yin ewantajil, yutol chi xiw ebꞌ tet ebꞌ conobꞌ.
3Ey jun chi yij Judas, chi yij pax Iscariote. Yetbꞌi sbꞌa yetoj ebꞌ juslucꞌwan jix ecꞌ cꞌal cuywoj yintaj Jesús. Jix cꞌal oc Satanás yin, 4yuxan jix too kꞌanabꞌ yetoj ebꞌ yaaw yakꞌomal xaambꞌal ebꞌ Israel tet Dios, yetoj ebꞌ yaaw bꞌey templo. Jix bꞌetecꞌ naj yalon tet ebꞌ tzet oj yute yaon oc Jesús naj yul skꞌabꞌ ebꞌ. 5Jix tzala a ebꞌ sicꞌlebꞌil. Catuꞌ jix yakꞌon swa kꞌane ebꞌ, tol oj yakꞌ tumin ebꞌ tet Judas tuꞌ. 6Catuꞌ jix ẍaꞌon scꞌul naj tzet jix yal ebꞌ. Jix seyon tzet oj yute yaon oc Jesús yul skꞌabꞌ ebꞌ yin ewantajil tuꞌ yet cꞌam ánima eyecꞌ yetoj.
Jaꞌ Santa Cena
(Mateo 26:17-29; Marcos 14:12-25; Juan 13:21-30; 1a Corintios 11:23-26)
7Jaꞌ yet jix aapnoj stiempoal sloꞌon ixim pan ebꞌ cꞌam yich, yet chi yakꞌon cam noꞌ smeꞌ ebꞌ yet Pascua,* 8jix yalon Jesús tet Pedro yetoj tet Juan jaxca tiꞌ:
—Asiꞌwej waꞌnewej tzet oj cu loꞌ yet Pascua,* ẍi Jesús tet ebꞌ.
9—¿Bꞌeytuꞌ cha woche chi cu waꞌne? ẍi ebꞌ tet Jesús.
10—Jaꞌ yet oj jex apnoj yul conobꞌ, ey jun winaj oj ilcha je yu. Iꞌbꞌil oc jun mooc jaꞌ yu, lalan stoo bꞌey sna. Chex oc tzajan yintaj naj masantaꞌcꞌal chex apni yetoj naj bꞌey chi apni. 11Catuꞌ oj je yalon tet naj yaaw na tuꞌ jaxca tiꞌ: “Tol quey tiꞌ jix yute yalon naj cu cuywam tiꞌ: ¿Bꞌeytuꞌ ey jun cuarto bꞌey oj jin low yetoj ebꞌ jin cuywom an, yu cu naꞌontej Pascua* tiꞌ? je chi tet,” ẍi Jesús. 12Catuꞌ oj xꞌoxon jun miman cuarto ey jex naat eyaoj, watxꞌ xa yei. Jatuꞌ che waꞌne tzet oj cu loꞌ tuꞌ, ẍi Jesús tet ebꞌ.
13Jix too ebꞌ xin. Jaꞌ yet jix apni ebꞌ, catuꞌ jix yilon ebꞌ, caw yel ton chi yal Jesús tuꞌ. Yuxan, jatuꞌ jix swaꞌne ebꞌ tzet oj loꞌle yet Pascua tuꞌ. 14Jaꞌ yet jix aapnoj yorail, catuꞌ jix apni Jesús yetoj wanxa ebꞌ scuywom. Catuꞌ jix oc joyan ebꞌ yin meẍa lowoj. 15Catuꞌ jix yalon tet ebꞌ jaxca tiꞌ:
—Caw chi yoche jin cꞌul chin low yet jun Pascua tiꞌ je yetoj an, yajbꞌan cꞌamto chin cam an. 16Yutol chi wal ey jex, cꞌamxa bꞌey oj jin low yet Pascua junelxa masantaꞌcꞌal oj oc jun yet oj waꞌxoj oc Dios Yaawiloj, ẍi Jesús tet ebꞌ.
17Catuꞌ jix yiꞌon a jun vaso. Jix yalon yu diosalil tet Dios yu. Catuꞌ jix yalon tet ebꞌ jaxca tiꞌ:
—Chaꞌwej jun tiꞌ. Ucꞌwej. 18Yutol chi wal ey jex, manxa oj wucꞌ yal sat uva tiꞌ, masantaꞌcꞌal oj waꞌxoj oc Dios Yaawiloj, ẍi Jesús tet ebꞌ.
19Catuꞌ jix yiꞌon a jun pan. Jix yalon yu diosalil yu. Jix spoꞌon ecꞌ xol ebꞌ tuꞌ. Catuꞌ jix yalon tet ebꞌ:
—Jaꞌton jin mimanil oj akꞌle je yu cꞌal tiꞌ. Loꞌwej, yu jin je naꞌontej, ẍi Jesús tet ebꞌ.
20Quey pax tuꞌ jix yute jun vaso, yet jix lawi sloꞌon ixim pan ebꞌ tuꞌ. Jix yalon tet ebꞌ jaxca tiꞌ:
—Jaꞌ tzet eey yul jun vaso tiꞌ, jun swa kꞌane Dios tol to chi yakꞌ je yetoj. Yu jin chiqꞌuil, oj yun jun wa kꞌane tuꞌ. Jaꞌ jin chiqꞌuil chi el je yu.
21Jaꞌ mac oj jin aon oc yul skꞌabꞌ ebꞌ tuꞌ, eyecꞌ yin meẍa tiꞌ wetoj an. 22Jain Akꞌbꞌil Wopiso yu Dios xol ebꞌ ket animail tiꞌ an,* sowalil oj jin camoj, jaxca snaꞌbꞌal Dios. Jaꞌ jun oj jin aon oc yul skꞌabꞌ camich tuꞌ an, caw okꞌbꞌalcꞌule naj, ẍi Jesús tet ebꞌ.
23Yuxan, jix skꞌanle el ebꞌ yin junjunal tet Jesús, mactxequel jun oj aon oc yul skꞌabꞌ camich tuꞌ.
Steelebꞌail Ebꞌ Cuywom Yu Cꞌal Yalon Ebꞌ Mactxequel Junoj Yel Miman Yeloc Apnoj Xol Ebꞌ
24Jix lawi jun tuꞌ, catuꞌ jix steelen sbꞌa ebꞌ cuywom yu mactxequel junoj yel miman yeloc apnoj xol ebꞌ tuꞌ, yutol junjun cꞌal mactxequel yel miman yeloc apnoj snaꞌoni. 25Yuxan jix yal Jesús tet ebꞌ jaxca tiꞌ:
—Jaꞌ ebꞌ rey bꞌey junjun nación, caw yaaw yeoc ebꞌ. Yetoj ebꞌ yaaw, watxꞌ ebꞌ yalon ebꞌ ánima. 26Jaex tiꞌ, manche je yute je bꞌa jaxca ebꞌ yaaw tuꞌ. Ta ey jex yel miman je yeloc apnoj je xol, iꞌwej eytej je bꞌa jaxca junoj unin cꞌam yeloc apnoj. Yetoj pax oj, ta jaex yaaw je yei, utewej je bꞌa yin moosoal. 27Kꞌinaloj yet chi oc junoj loꞌo tinaniꞌ, ¿mactxequel junoj miman yeloc apnoj che naꞌ? ¿Jam mactxequel chi ey chotan lowoj, ma jaꞌ mac chi bꞌatxwi eltej loꞌbꞌe? Jaꞌ mac chi ey chotan low tuꞌ, yel miman yeloc apnoj. Jal jin jain tiꞌ, mooso weoc je xol jex wakꞌon servil.
28Jaex tiꞌ, jix je tecꞌbꞌa je bꞌa je yecꞌ wetoj yet jix jul wan porobꞌal wibꞌan an. 29Yuxan oj jex waoc yaawil, jaxca oj yun woc Yaawilal yu cu Mam Dios. 30Yuxan oj skeꞌ je low wetoj yin jin meẍa bꞌey ey jin oc Yaawiloj tuꞌ an. Yetoj pax oj, oj jex ey chotan bꞌey junjun je despacho. Catuꞌ oj je yakꞌon yaawilal yibꞌan ebꞌ lacawebꞌ bꞌulan ket Israelal, ẍi Jesús tet ebꞌ scuywom tuꞌ.
Jix Yaltej Jesús Yin Eyojto Tol Oj Yiꞌel Jesús Naj Pedro Yin
(Mateo 26:31-35; Marcos 14:27-31; Juan 13:36-38)
31Jix yalon pax Naj Kaawil jaxca tiꞌ:
—Simón, Simón, jaꞌ Satanás jix skꞌan spermiso tet Dios yutol chi yoche naj chex yakꞌ porobꞌal, jaxca chi yun ixim tiriw yet chi txayele ixim.#22:31 “Yet chex txayele jaxca tiriw”, chi yal yeloc apnoj tol chi yakꞌle naj diablo jex yijbꞌantoj yin spenail. 32Caw jix jin kꞌanle tet Dios yet watxꞌ cꞌam cha wiꞌel ja cꞌul yin Dios. Jaꞌ yet oj ja waon pax oc ja cꞌul win junelxa an, akꞌ stecꞌanil snaꞌbꞌal ebꞌ ja wuẍtaj, ẍi Jesús tet naj Pedro.
33Yuxan jix yal pax naj Simón tuꞌ tet Jesús jaxca tiꞌ:
—Jaach Cuywam, bꞌejan jin cꞌul woc preso ja wetoj an, caxcꞌal oj jin cam ja wetoj, ẍi naj Pedro tet Jesús.
34—Pedro chi wal ey jaach, oxel xax jin ja wiꞌel ja win an, catuꞌ oj okꞌa noꞌ caẍlan yet jun akꞌbꞌalil tiꞌ, ẍi Jesús tet Pedro.
Sowalil Oj Yun Tzet Chi Yal Yul An Juun Tzꞌibꞌebꞌilcanoj
35Jix yal Jesús tet ebꞌ scuywom jaxca tiꞌ:
—Che naꞌtej yet jix jex jin chejontoj yet junel, cꞌam niꞌoj je pa jix je yiꞌ, cꞌam je tzꞌuum yet je tumin, cꞌam je xanabꞌ jix je yiꞌtoj je toi. ¿Ey mi tzet cꞌam ey jex? ẍi Jesús tet ebꞌ.
—Tzꞌajan cꞌal tzet ey, ey jon, jon, Jaach Cuywam, ẍi ebꞌ tet Jesús.
36Jal tinaniꞌ xin, jaꞌ mac jex ey je morral, je tzꞌuum yet je tumin, iꞌwejtej je yetoj. Jaꞌ mac jex cꞌam je yespada, txonwej el je chumpa, catuꞌ che manon je yet. 37Yutol chi wal ey jex, sowalil oj yun tzet albꞌilcan yul An Juun Tzꞌibꞌebꞌilcanoj, bꞌey chi yal jaxca tiꞌ: “Jaxca tzet chi utele oc yibꞌan ebꞌ pena sbꞌeybꞌal, queytuꞌ tzet oj ale oc yibꞌan junxa,” ẍi yul An Juun tuꞌ.#Isaías 53:12. Masanil jin kꞌaneal tzꞌibꞌebꞌilcan yul An Juun tuꞌ, sowalil oj yunne, ẍi Jesús tet ebꞌ.
38Jix yalon ebꞌ scuywom tuꞌ tet jaxca tiꞌ:
—Jaach Cuywam, tol ey caabꞌ espada titiꞌ, ẍi ebꞌ tet Jesús.
—Kꞌojbꞌil caabꞌ tiꞌ, ẍi Jesús tet ebꞌ.
Yet Jix Bꞌetecꞌ Jesús Txaloj Bꞌey Getsemaní
(Mateo 26:36-46; Marcos 14:32-42)
39Jix eltej Jesús yul na, catuꞌ jix too bꞌey wonan Olivo tuꞌ jaxca taꞌ sbꞌeybꞌal. Jix oc tzajan ebꞌ scuywom yintaj. 40Jix cꞌal apni catuꞌ jix yalon tet ebꞌ jaxca tiꞌ:
—Txalanwej, yet watxꞌ cꞌam chex akꞌle porobꞌal, ẍi Jesús tet ebꞌ.
41Catuꞌ jix sbꞌoson el sbꞌa tet ebꞌ tuꞌ. Jaxca taꞌ snaatil chi apni junoj chꞌen skꞌojlei, queytuꞌ bꞌey jix sbꞌosel sbꞌa. Jix ey kaan tituꞌ, catuꞌ jix txali. 42Jix yal yin xa jaxca tiꞌ:
—Mamin, ta chi el yin ja cꞌul, cha tenel jun syaꞌilal tiꞌ wibꞌan an, catuꞌ cꞌam chi wabꞌ syaꞌil an. Man ojabꞌ pax jaxca oj chi woche an, tol jaxca ojabꞌ cha woche, ẍi Jesús.
43Jix lawi cꞌal jun tuꞌ, jix eyol jun ángel bꞌey satcan, jix jul akꞌle stecꞌanil yu. 44Caw jix oc pitzꞌan cuscꞌulal yin scꞌul. Yuxan jix yiꞌatej scꞌul xali sicꞌlebꞌil. Caw jix el jaꞌ yin. Caw jix ey tꞌulabꞌoj jaꞌ yin jaxca chicꞌ, queytuꞌ jix el yin, jix eyqꞌuey sat txꞌotxꞌ.
45Jaꞌ yet jix lawi xali, catuꞌ jix a linanoj. Jix meltzo bꞌey ey can ebꞌ scuywom tuꞌ. Jaꞌ yet jix apni scꞌatan ebꞌ, jix yiloni, tol chi wey ebꞌ. Jix tit sweyan ebꞌ yu cuscꞌulal. 46Yuxan, jix yal tet ebꞌ jaxca tiꞌ:
—¿Tzet yuxan chex weyi? Aanwej waanoj. Txalanwej, yet watxꞌ cꞌam chex akꞌle porobꞌal, ẍi Jesús tet ebꞌ.
Jaꞌ Yet Jix Mitxꞌle Jesús
(Mateo 26:47-56; Marcos 14:43-50; Juan 18:2-11)
47Lalanto yalon Jesús tet ebꞌ jaxca tuꞌ, catuꞌ jix apni bꞌulna jun miman bꞌulan ánima tituꞌ. Jaꞌ naj Judas, naj yetbꞌi sbꞌa yetoj ebꞌ juslucꞌwan, jaꞌ naj jix bꞌabꞌi sattaj ebꞌ. Eyman jix apni naj yin Jesús yu stzꞌubꞌon el stiꞌ. 48Jix yalon Jesús tet naj jaxca tiꞌ:
—Judas, ¿tumi jaxca tiꞌ chin ja wute ja waon oc yul skꞌabꞌ camich, jain Akꞌbꞌil Wopiso yu Dios xol ebꞌ ket animail tiꞌ, yuxan chach jul yu ja tzꞌubꞌon el jin tiꞌ an? ẍi Jesús tet naj.
49Jaꞌ yet jix yilon ebꞌ eyecꞌ yetoj Jesús tuꞌ tzetyetal lalan sjul yibꞌan ebꞌ. Jix skꞌanlen ebꞌ tet Jesús jaxca tiꞌ:
—Jaach Cuywam, ¿chim skeꞌ cu xibꞌtentoj ebꞌ yetoj kespada tiꞌ? ẍi ebꞌ tet.
50Yet jun txolan tuꞌ, ey jun scuywom tuꞌ jix tzꞌokꞌon el xiquin jun smooso naj yaawil yakꞌomal xaambꞌal ebꞌ Israel tet Dios, cꞌuxan cꞌal jaꞌ swatxꞌ jix michꞌcha yu. 51Jix yalon Jesús tet ebꞌ scuywom tuꞌ jaxca tiꞌ:
—Bꞌejwej, manche je yute jaxca tuꞌ, ẍi tet ebꞌ.
Catuꞌ jix too mitxꞌan yin xiquin naj tuꞌ. Jix oc can yu junelxa. 52Jaꞌ ebꞌ yaawil yakꞌomal xaambꞌal ebꞌ Israel tet Dios, yetoj ebꞌ yaawil stemplo Dios cꞌal ebꞌ ichamtaj winaj ey yopiso, jaꞌ ebꞌ jix apni smitxꞌon Jesús. Yuxan, jix yal Jesús tet ebꞌ jaxca tiꞌ:
—¿Tzet utbꞌil wili che yil an? ¿Tumi elkꞌom jin? yuxan chex jul win an yetoj espada cꞌal teꞌ. 53Ey jin cꞌal ecꞌ je yetoj junjun cꞌu yul stemplo Dios, ma cꞌal jin je mitxꞌ pax oj. Yuxan jaꞌton yorail je yakꞌon je naꞌbꞌal tiꞌ, yetoj naj syaawil kꞌejkꞌinal, ẍi Jesús tet ebꞌ.
Jix Yal Naj Pedro Tol Man Yotaj Oj Mactxequel Jesús
(Mateo 26:57-58, 69-75; Marcos 14:53-54, 66-72; Juan 18:12-18, 25-27)
54Jix lawi jun tuꞌ xin, jix oc mitxꞌan ebꞌ yin Jesús. Jix yiꞌontoj ebꞌ bꞌey sna naj yaaw yakꞌomal xaambꞌal ebꞌ Israel tet Dios. Jal pax naj Pedro xin, naat xacꞌal tzajan stoo naj. 55Jix yaoc skꞌakꞌ ebꞌ bꞌey stiꞌ na tuꞌ. Jix ey chotan ebꞌ, catuꞌ jix oc joyan ebꞌ yin kꞌakꞌ. Catuꞌ jix apni naj Pedro, catuꞌ jix ey chotan xol ebꞌ. 56Ey jun ix criada jix ilon oc yin naj Pedro yin eymanil yet chotan ey xol ebꞌ tuꞌ. Jix oc tꞌanan ix yin naj, catuꞌ jix yalon ix jaxca tiꞌ:
—Jaꞌ jun winaj tiꞌ, yetbꞌi sbꞌa yetoj Jesús, ẍi ix.
57Jaxa naj Pedro jix takꞌwi:
—Txo ix, man wotaj oj jun mactxequel cha wal tuꞌ, ẍi Pedro tet ix.
58Junxa txolan tuꞌ, catuꞌ jix il-le oc yin naj yu junxa. Catuꞌ jix yalon pax jaxca tiꞌ:
—Jaach tiꞌ, ja wetbꞌi ja bꞌa yetoj ebꞌ, ẍi naj tet Pedro.
—Cꞌamaj cha, man wetbꞌi oj jin bꞌa yetoj ebꞌ, ẍi naj Pedro tet naj.
59Junxa mi wal hora yalon jun tuꞌ, jix yalon xacꞌal junxa jaxca tiꞌ:
—Jaꞌ naj tiꞌ, caw yel yetbꞌi sbꞌa yetoj naj jix iꞌle jul tiꞌ, yutol yet a Galilea sbꞌa naj yetoj ebꞌ, ẍi junxa tuꞌ.
60Caw yel cha, caw man wotaj oj tzet cha wal tuꞌ, ẍi Pedro tuꞌ tet naj.
Lalanto yaloni, jix okꞌa noꞌ caẍlan. 61Jix meltzotoj jacan Naj Kaawil yin naj Pedro tuꞌ. Yuxan jix snaꞌtej tzet jix yal Naj tet. Jaxca tiꞌ jix yute yalon Naj tet: “Oxel xax jin ja wiꞌel ja win an, oj ja waloni tol man ja wotaj oj jin an, catuꞌ oj okꞌa noꞌ caẍlan yet jun akꞌbꞌalil tiꞌ,” ẍi Jesús tet. 62Catuꞌ jix eltoj naj xol ebꞌ tuꞌ. Jaꞌ yet jix eltoj naj tuꞌ, caw jix okꞌa naj sicꞌlebꞌil.
Yet Jix Bꞌuchle Jesús
(Mateo 26:67-68; Marcos 14:65)
63Jaꞌ ebꞌ chi teynen Jesús, jix bꞌuchwa ebꞌ yin, catuꞌ jix smakꞌon pax ebꞌ. 64Jix majchele sat Naj yu ebꞌ. Jix cꞌoli smakꞌontoj sat ebꞌ. Catuꞌ jix tzꞌaj skꞌanlen ebꞌ tet jaxca tiꞌ:
—Al ey jon, mac chach makꞌon cha wabꞌe, ẍi ebꞌ tet Jesús.
65Jantaj tzet jix yal ebꞌ tet yin bꞌuchwal kꞌaneal.
Skꞌaneal Yet Jix Bꞌetecꞌ Jesús Sattaj Ebꞌ Yaaw
(Mateo 26:59-66; Marcos 14:55-64; Juan 18:19-24)
66Jaxa yet jix sajbꞌi eloj, jix syambꞌa sbꞌa ebꞌ icham winaj ey yopiso xol ebꞌ Israel yetoj ebꞌ yaaw yakꞌomal xaambꞌal ebꞌ Israel tet Dios, cꞌal ebꞌ cuywam yin sley Moisés. Jix yiꞌontoj Jesús ebꞌ sattaj ebꞌ yaaw. Jix skꞌanlen ebꞌ tet tituꞌ jaxca tiꞌ:
67Al ey jon, ¿tumi yel jaach Cristo* jaach? ẍi ebꞌ tet.
—Naꞌbꞌacꞌal chi wal ey jex, tumi oj je yaoc yin je cꞌul. 68Yetoj pax oj, ta ey tzet chin kꞌanle el ey jex, ¿tumi oj je yal ey jin an? ¿Tumi oj jin je jaj pax el an? 69Jal jin jain tiꞌ, Akꞌbꞌil Wopiso yu Dios xol ebꞌ ket animail an, jaꞌ tinaniꞌ oj jin aapnoj chotan bꞌey swatxꞌ kꞌabꞌ Dios, caw miman yip tuꞌ, ẍi Jesús tet ebꞌ.
70—¿Tumi Scꞌaal Jaach Dios chi yal tuꞌ? ẍi ebꞌ tet.
—Jain tiꞌ, Scꞌaal jin ton Dios jaxca je yalon tiꞌ, ẍi tet ebꞌ.
71Catuꞌ jix yalon ebꞌ jaxca tiꞌ:
—Tinaniꞌ, manxa sowalil oj ey cu testigo. Ilaꞌla, jaꞌcaw chi alon yetoj stiꞌ, ẍi ebꞌ.
Currently Selected:
Lucas 22: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.