Juan 19
19
1Catuꞌ jix yiꞌontoj Jesús naj Pilato tuꞌ, jix too yakꞌon makꞌleoj. 2Jix lawi tuꞌ, jix spatxꞌonen ey jun qꞌuix ebꞌ soldado tuꞌ. Catuꞌ jix yaon atoj ebꞌ yin sjolom scoronaoj. Catuꞌ jix yaon oc jun morado pichile ebꞌ yin naj.#19:2 Jaꞌ wan morado pichile, asan ebꞌ rey chi aon ocoj. 3Jix lawi tuꞌ, jix apni ebꞌ scꞌatan, catuꞌ jix cꞌoli xij yalon ebꞌ jaxca tiꞌ tet naj:
—Tzalaan jaach sreyal ebꞌ Israel, ẍi ebꞌ tet Jesús. Chi lawi tuꞌ, catuꞌ jix makꞌle naj yu ebꞌ. Jix yun masanil wan tiꞌ yin Naj yu chi bꞌuchwa ebꞌ yin. 4Catuꞌ jix el pax toj Pilato stiꞌ sdespacho bꞌey eyecꞌ ebꞌ yaawil yeoc bꞌey Judea tuꞌ. Jix yalon pax eltej snan xol ebꞌ jaxca tiꞌ:
—Ilaꞌ, tol chi wiꞌeltej je yilaꞌ. Catuꞌ che yotajnen eloj, tol cꞌam niꞌoj spenail chi wil an, ẍi naj tet ebꞌ. 5Catuꞌ jix eltej Jesús tuꞌ stiꞌ despacho tuꞌ. Eyatoj jun qꞌuix tuꞌ scoronaoj yu ebꞌ. Eyoc an morado pichile tuꞌ yu, jix yalon eltej Pilato snan xol ebꞌ jaxca tiꞌ:
—Ilwej ton abꞌ jun winaj tiꞌ, ẍi naj tet ebꞌ. 6Jaꞌ yet jix yilon ebꞌ yaawil yakꞌomal xaambꞌal ebꞌ Israel tet Dios, yetoj cꞌal ebꞌ policía, tol chi elol stiꞌ tuꞌ, jix a bꞌulna ebꞌ yalon yin ipal jaxca tiꞌ:
—A ojabꞌ locan yin culus. A ojabꞌ locan yin culus, ẍi ebꞌ. Catuꞌ jix yalon Pilato tuꞌ tet ebꞌ jaxca tiꞌ:
—Yel watxꞌ che yiꞌtoj jaex tiꞌ, catuꞌ che locbꞌan a yin culus tuꞌ je txꞌojli. Jal jin an xin, cꞌam niꞌoj spenail chi wil an, ẍi naj tet ebꞌ. 7Jix yalon pax ebꞌ tet naj jaxca tiꞌ:
—Jaon tiꞌ ey cu ley, catuꞌ jatacꞌalaꞌ yalon cu ley tuꞌ, tol smoo chi cami, yutol jix yaloc sbꞌa Scꞌaal oj Dios, ẍi ebꞌ tet naj. 8Jaꞌ yet jix yabꞌen Pilato tuꞌ jaxca tuꞌ, caw jix xiwaoj. 9Yu jun tuꞌ jix pax octoj yul sdespacho tuꞌ junelxa. Catuꞌ jix skꞌanlen el tet Jesús tuꞌ jaxca tiꞌ:
—¿Bꞌeytuꞌ taꞌ titnaj jaach xin? ẍi naj tet Jesús. Ma cꞌal takꞌwoj Jesús tet naj. 10Yu jun tuꞌ, yuxan jix yal naj tet Jesús jaxca tiꞌ:
—¿Tzet yuxan cꞌam chach takꞌwi ey jin an? ¿Tumi man ja wotaj oj, tol ey wipal jaach jin locbꞌan a yin culus, catuꞌ ey pax wipal jaach jin jajon eloj? ẍi naj tet Jesús. 11Yuxan jix yal Jesús tet naj jaxca tiꞌ:
—Yutol jaꞌ Dios jix akꞌon ja wopiso tiꞌ, ta cꞌamaj, caw cꞌam niꞌoj ja walon ja wet win an. Yu jun tuꞌ, yuxan, jaꞌ jun jix jin aon oc yul ja kꞌabꞌ tiꞌ an, ecꞌbꞌan spenail jun tuꞌ ja wintaj, ẍi Jesús tuꞌ tet naj. 12Jaꞌ yet jix yabꞌen jaxca tuꞌ xin, jix snaꞌon naj tzet utbꞌil chi yute sjajon el Jesús tuꞌ. Jal pax ebꞌ yaawil yeoc bꞌey Judea tuꞌ, jix a cꞌal bꞌulna ebꞌ yalon yin ipal jaxca tiꞌ:
—Ta cha jajeloj, acꞌul jaach oc yin naj yaaw bꞌey Roma, chi yal tuꞌ. Jaꞌ jun tiꞌ jix yaloc sbꞌa reyal. Yal cꞌal mac chi alon jaxca tuꞌ, acꞌul oc yin naj yaaw bꞌey Roma tuꞌ, ẍi ebꞌ tet naj. 13Jaꞌ yet jix yabꞌen naj jaxca tuꞌ, jix yakꞌon iꞌle eltej Jesús tuꞌ yu bꞌey eyecꞌ tuꞌ, catuꞌ jix ey chotan bꞌey chi naꞌle oc spenail ebꞌ ánima tuꞌ. Jaꞌ jun lugar tuꞌ, Gabatá sbꞌi yin Hebreo, stiꞌ ebꞌ Israel. Chi yal yeloc apnoj, latzꞌbꞌil ey chꞌen. 14Jaꞌ yet jix ey chotan naj tuꞌ, tuxa chi oc chuman cꞌu. Tꞌinan xa yoc kꞌin Pascua.* Catuꞌ jix yalon eltej snan xol ebꞌ a Judea tuꞌ jaxca tiꞌ:
—Ilwej ton abꞌ Naj je reyal tiꞌ, ẍi eltej naj tet ebꞌ. 15Jix a pax yaw ebꞌ yin ipal junelxa jaxca tiꞌ:
—Cam ojabꞌi, cam ojabꞌi. A ojabꞌ locan yin culus, ẍi ebꞌ.
—¿Tumi oj jin locbꞌa a je reyal tiꞌ yin culus, chi yal tuꞌ? ẍi naj tet ebꞌ. Catuꞌ jix takꞌwitoj ebꞌ yaawil yakꞌomal xaambꞌal ebꞌ tet Dios jaxca tiꞌ:
—Jaon tiꞌ, asan naj yaaw bꞌey Roma eyoc cu yaawiloj. Cꞌam junojxa, ẍi ebꞌ. 16Jix lawi tuꞌ xin, jix ale oc Jesús tuꞌ yul skꞌabꞌ ebꞌ, yu stoo slocbꞌan a ebꞌ yin culus. Yu jun tuꞌ xin, yuxan jix yiꞌtoj ebꞌ.
Jaꞌ Yet Jix A Locan Jesús Yin Culus
(Mateo 27:32-44; Marcos 15:21-32; Lucas 23:26-43)
17Jaꞌ Jesús xin, jix sjolomxicꞌnetoj sculusal. Catuꞌ jix iꞌletoj bꞌey jun lugar chi yij Gólgota yin Hebreo, tol chi yal yeloc apnoj: “Sbꞌajil Jolome”. 18Jaꞌ tituꞌ jix ale oc Jesús yin culus yu ebꞌ. Ey cawanxa mac jix a pax locan yin culus yetoj Naj, jun bꞌey junjun pacꞌ. Yuxan jaꞌ snan xol sculusal ebꞌ tuꞌ jix a locan Naj yin culus tuꞌ. 19Jix yakꞌon tzꞌibꞌele oc jayebꞌ kꞌane naj Pilato sjolomtaj sculusal Jesús, tol chi yal jaxca tiꞌ: “Jaꞌton Jesús a Nazaret tiꞌ, Sreyal ebꞌ Israel,” ẍi. 20Stiꞌel conobꞌ ey jun lugar bꞌey jix bꞌet a tꞌunan tuꞌ. Yu jun tuꞌ, yuxan ecꞌal ebꞌ Israel jix ilon tzet ẍi jayebꞌ kꞌane eyoc sjolomtaj sculusal tuꞌ. Tzꞌibꞌebꞌil oc yin stiꞌ ebꞌ, cꞌal yin stiꞌ ebꞌ Griego, cꞌal yin Latin, stiꞌ ebꞌ a Roma. 21Yu jun tuꞌ, yuxan jix yal ebꞌ syaawil yakꞌomal xaambꞌal ebꞌ Israel tet Dios tuꞌ tet Pilato jaxca tiꞌ:
—Tol oj wal manaj “Sreyal ebꞌ Israel” tuꞌ jix ja wakꞌ tzꞌibꞌele oc sjolomtaj teꞌ culus tuꞌ. Yel watxꞌ quey tiꞌ oj ja wute ja tzꞌibꞌen jaxca tiꞌ: “Jaꞌ Naj tiꞌ, jix yaloc sbꞌa Naj sreyaloj ebꞌ Israel,” ta ja chi, ẍi ebꞌ tet naj.
22Jaꞌ jayebꞌ kꞌane jix wakꞌ tzꞌibꞌele oc tiꞌ, can ojabꞌ jaxca tuꞌ, ẍi naj tet ebꞌ. 23Jix lawi yale oc Jesús yin teꞌ culus yu ebꞌ soldado tuꞌ xin, catuꞌ jix yiꞌon a spichil ebꞌ tuꞌ. Jix spoꞌon ecꞌ ebꞌ. Canebꞌ jix eloc an yu ebꞌ, yuxan junjun cꞌal liman yet junjun ebꞌ. Jal an pichile chi ya cꞌaltaꞌ oc xin, junne cꞌal yeoc an, cꞌam bꞌey tzꞌisbꞌil. 24Yu jun tuꞌ, yuxan jix yal ebꞌ jaxca tiꞌ:
—Jaꞌ jun tiꞌ xin, manche cu nicꞌtoj an catuꞌ chi cu poꞌon ecꞌ an kin. Yel watxꞌ chi kaoc suerte yin an, yal cꞌal mac ey suerte yiꞌoni, ẍi ebꞌ. Jaxca ton tiꞌ jix yun yunen el tzet tzꞌibꞌebꞌilcan yul An Juun, bꞌey chi yal jaxca tiꞌ: “Oj spoꞌon ecꞌ jin pichil ebꞌ yin, catuꞌ oj yakꞌon suerte ebꞌ yin junxa,” ẍi can yul An Juun tuꞌ.#Salmos 22:18. Yu jun tuꞌ, yuxan queytuꞌ jix yute ebꞌ soldado tuꞌ. 25Jaꞌ scawilal bꞌey tꞌunan a Jesús tuꞌ, eecꞌ xutx. Ey jun sno ix eyecꞌ yetoj, yetoj pax María, yistil Cleofás, cꞌal ix María Magdalena. 26Ey pax jun scuywom Jesús eyecꞌ scꞌatan xutx tuꞌ, jun scuywom caw camcꞌulnebꞌil yu. Jix tit tꞌanan Jesús yin ebꞌ, catuꞌ jix yalon tet xutx tuꞌ jaxca tiꞌ:
—Chicay, jaꞌ jun eyecꞌ ja wetoj tiꞌ, jaxca ja wuneꞌ chi yun can ocoj, ẍi Jesús tet xutx. 27Catuꞌ jix yalon tet jun scuywom tuꞌ jaxca tiꞌ:
—Jaꞌ jin txutx tiꞌ, jaxca ojabꞌ ja txutx cha wute ja cꞌul yin, ẍi Jesús tet naj. Yu jun tuꞌ xin, yuxan jaꞌ jun scuywom tuꞌ, jaꞌ jix iꞌon cantoj ix xutx Jesús tuꞌ yetoj bꞌey sna, catuꞌ jix eecꞌ ix yintaj.
Scamichal Jesús
(Mateo 27:45-56; Marcos 15:33-41; Lucas 23:44-49)
28Jix lawi tuꞌ xin, yotaj xa Jesús, tol jix yun masanil tzet tzꞌibꞌebꞌilcan yin, yuxan jix yal jaxca tiꞌ:
—Caw chi taj jin tiꞌ, ẍi Jesús. Jix yal jaxca tuꞌ, yu yunen el tzet tzꞌibꞌebꞌilcan yul An Juun Tzꞌibꞌebꞌilcanoj. 29Ey jun vaso vinagre eyecꞌ tituꞌ, jix slabꞌa eytoj jun chi sococqui ebꞌ xol. Jaꞌ jix yaoc ebꞌ ẍumuc jun teꞌ hisopo tuꞌ, jix yaon atoj ebꞌ yin stiꞌ Jesús tuꞌ. 30Jix lawi tuꞌ, jix stzꞌubꞌon eloj, catuꞌ jix yalon jaxca tiꞌ:
—Jix yiꞌ sbꞌa masanil, ẍi Jesús. Jix lawi tuꞌ xin, catuꞌ jix ey noanoj catuꞌ jix yakꞌon spixan yul skꞌabꞌ Dios, catuꞌ jix cami.
Jaꞌ Yet Jix Tejletoj Lanza Bꞌey Smootx Jesús Yu Jun Soldado
31Yecaloj xacꞌal kꞌin Pascua* yet jun cꞌu tuꞌ, scꞌual xa xewilal pax oj. Jaꞌ ebꞌ yaawil yeoc bꞌey Judea, cꞌam chi yoche ebꞌ chi can smimanil ebꞌ yin culus tuꞌ. Yutol jaꞌ junxa cꞌu lalanxa sjul tuꞌ, caw miman yeloc apnoj yul sat ebꞌ Israel. Yu jun tuꞌ, yuxan jix too ebꞌ yet chi oc tean ebꞌ yin Pilato, ta chi yakꞌ makꞌle poꞌo sbꞌajil spenec ebꞌ, yet watxꞌ eyman chi eytej smimanil ebꞌ yin culus tuꞌ.#19:31 Chi yoche ebꞌ tol chi makꞌle poꞌo spenec ebꞌ eyatoj yin culus yu ebꞌ, yet watxꞌ chi cam ebꞌ yin eymanil, catuꞌ chi iꞌle eytej ebꞌ. Jaꞌ sbꞌeybꞌal ebꞌ Romano, tol chi cancan tꞌunan smimanil ebꞌ masantaꞌ chi kꞌaꞌtoj smimanil ebꞌ yin culus. 32Yu jun tuꞌ, yuxan jix too ebꞌ soldado bꞌey tꞌunan a ebꞌ tuꞌ, catuꞌ jix makꞌle poꞌo sbꞌajil spenec ebꞌ tꞌunan a yetoj Jesús tuꞌ yu ebꞌ. 33Jaꞌ yet jix apni ebꞌ yin Jesús xin, jix yilon ebꞌ, tol camnajxa. Yuxan ma xa makꞌle poꞌo sbꞌajil spenec naj yu ebꞌ. 34Ey pax jun soldado jix tejon atoj slanza yin smootx Jesús. Eyman jix eltej chicꞌ cꞌal jaꞌ. 35Jain Juan jin tiꞌ, caw jix wil wan tiꞌ. Yu jun tuꞌ, yuxan chi wakꞌ jin bꞌa testigoal yin, yet watxꞌ che yaoc yin je cꞌul jaex tiꞌ. Jaꞌ wan tzet chin tzꞌibꞌe can tiꞌ, caw yel. Jain tiꞌ, wotaj, tol caw yel chi wal an. 36Yu yunen el tzet tzꞌibꞌebꞌilcan yul An Juun, yuxan queytuꞌ jix yunne, yutol chi yal yul An jaxca tiꞌ: “Cꞌam junoj sbꞌajil oj smakꞌ poꞌo ebꞌ,” ẍi.#Éxodo 12:46; Números 9:12; Salmos 34:20. 37Chi yalon pax junxa tiꞌ yul An Juun tuꞌ: “Ja ebꞌ jix tejon Naj, oj yiloc ebꞌ yin,” ẍi.#Zacarías 12:10.
Oclenajtoj Smimanil Jesús Yul Chꞌen Smujbꞌanil Camom
(Mateo 27:57-61; Marcos 15:42-47; Lucas 23:50-56)
38Ey jun winaj chi yij José, a conobꞌ Arimatea. Jaꞌ jun winaj tuꞌ, scuywom Jesús, asan tol scuywom yin ewantajil, yutol caw chi xiwi, ta chi yabꞌ ebꞌ yaawil yeoc bꞌey Judea. Jaꞌ jix jul kꞌanon eytej smimanil Jesús yin culus tet naj Pilato, yet watxꞌ chi smuj octoj. Jix akꞌle tet yu Pilato tuꞌ, yuxan jix bꞌet yiꞌeytej, catuꞌ jix yiꞌontoj. 39Jix apni pax Nicodemo tituꞌ, jix yiꞌtej oxebꞌ arroba wan sukꞌukꞌi sabꞌ chi yij mirra,#19:39 Mirra, yaal jun tujan teꞌ. Chi iꞌle eloj, catuꞌ chi akꞌle tajoj, catuꞌ chi kꞌanbꞌalne yin perfumeal. calbꞌil yetoj junxa chi yij áloe.#19:39 Áloe, yaal junxa tujan teꞌ chi kꞌanbꞌalne yin perfumeal. Jaꞌ jun Nicodemo tiꞌ, jaꞌton bꞌetnaj ecꞌ kꞌanabꞌ yetoj Jesús yet akꞌbꞌalil. 40Jix yiꞌon a smimanil Jesús ebꞌ tuꞌ. Catuꞌ jix spichon oc wan mimej kꞌabꞌ ebꞌ yin, jix yaon pax oc wan sukꞌukꞌi sabꞌ tuꞌ ebꞌ yin. Yutol queytuꞌ yoc sbꞌeybꞌal ebꞌ Israel tuꞌ yet chi smujon scamom ebꞌ. 41Jaꞌ scawilal bꞌey jix a locan Jesús tuꞌ yin culus, ey wan awbꞌeal teꞌ. Jaꞌ xol tuꞌ, jatuꞌ ey jun chꞌen chꞌen jolbꞌil eltej yul. Cꞌamto junoj camom chi ecꞌ yul jun chꞌen tuꞌ. 42Yutol junxane txolan catuꞌ chi ẍaꞌon el yich scꞌual xewilal ebꞌ Israel, yu jun tuꞌ, yuxan jaꞌ yul jun chꞌen tuꞌ jix bꞌet ya can octoj smimanil Jesús ebꞌ, catuꞌ yu pax tol scawilal bꞌey jix cam tuꞌ ey jun chꞌen tuꞌ.
Currently Selected:
Juan 19: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.