Juan 17
17
Jaꞌ Yet Jix Txali Jesús
1Jix lawi yalon Jesús wan tiꞌ, jix a tꞌanan bꞌey satcan. Catuꞌ jix yalon jaxca tiꞌ:
—Mamin, jix jul stiempoal ja txꞌoxon yil ebꞌ tol miman weloc apnoj jain ja Cꞌaal jin tiꞌ. Catuꞌ oj jin txꞌoxon pax eloj, tol caw miman ja weloc apnoj. 2Yutol jaach jix ja wakꞌ wopiso yibꞌan masanil ánima, yet watxꞌ chi skeꞌ wakꞌon kꞌinale tol ey cꞌal yin tobꞌalkꞌinal tet ebꞌ jix ja wakꞌ ey jin an. 3Ta chach yotajne el ebꞌ tol asan jaach Dios jaach, catuꞌ chin yotajnen el ebꞌ, jain Jesucristo jin tiꞌ an, tol jain ton chejbꞌil jintej an, jaꞌton yu jun tuꞌ, yuxan ey skꞌinal ebꞌ tol ey cꞌal yin tobꞌalkꞌinal. 4Jaꞌ yet ey jin ecꞌ bꞌey yul yibꞌankꞌinal tiꞌ, jix jin txꞌoxeloj tol caw miman ja weloc apnoj. Jaꞌ jun mulnail akꞌbꞌil can wun tiꞌ, jix waꞌxi wu an. 5Jaꞌ yet cꞌamto chi waꞌxi yul yibꞌankꞌinal tiꞌ, ey jin xacꞌaltaꞌ ecꞌ ja wetoj bꞌey xol cu watxꞌilal. Jal tinaniꞌ xin, Mamin, chaꞌ jin pax apnoj ja wetoj bꞌey xol cu watxꞌilal tuꞌ, jaxca cꞌaltaꞌ weecꞌ ja wetoj. 6Jaꞌ ebꞌ jix ja sicꞌ eltej xol ebꞌ yet yul yibꞌankꞌinal tiꞌ, catuꞌ jix ja wakꞌon ebꞌ ey jin an, jix wakꞌ yotajne el ebꞌ tzet utbꞌil yoc ja naꞌbꞌal. Jaꞌ ebꞌ jix ja wakꞌ ey jin tiꞌ, tucꞌaltaꞌ ja wet cꞌaltaꞌ ebꞌ. Jix sjije ja kꞌane ebꞌ. 7Jaꞌ tinaniꞌ, masanil cꞌal tzet akꞌbꞌil ey jin, yotaj ebꞌ, tol jaꞌ ey jaach jix tita. 8Jaꞌ ja kꞌane akꞌbꞌil ey jin tuꞌ, jix cꞌal wal tet ebꞌ, catuꞌ jix yaon oc scꞌul ebꞌ yin. Yu jun tuꞌ, yuxan yotaj ebꞌ, tol yel toni jaꞌ ey jaach tuꞌ jix jin tita. Chi yaoc ebꞌ yin scꞌul, tol jaach jix jin ja chejtej. 9Yu jun tuꞌ xin, chin txali yu ebꞌ. Jal ebꞌ yet yul yibꞌankꞌinal tiꞌ xin, cꞌam chin txali yu ebꞌ. Asanne ebꞌ jix ja wakꞌ ey jin an, asan ebꞌ tuꞌ chin txali yu, yutol ja wet xa ebꞌ. 10Masanil cꞌal ebꞌ wet, ja wet xa pax ebꞌ. Jacꞌalaꞌ pax ebꞌ ja wet, wet xa pax yeoc ebꞌ ja wetoj. Jaꞌton ebꞌ tuꞌ chi txꞌoxon eloj tol caw miman weloc apnoj. 11Txenxane tiempo ey jin ecꞌ yul yibꞌankꞌinal tiꞌ, catuꞌ chin paxa ja wetoj. Jal ebꞌ tiꞌ xin, oj can ebꞌ niꞌojxa bꞌey yul yibꞌankꞌinal tiꞌ. Mamin, caw watxꞌ ja naꞌbꞌal. Jaꞌ ebꞌ jix ja wakꞌ ey jin tiꞌ, teyne ebꞌ yetoj ja wipal, yet watxꞌ junxane ojabꞌ snaꞌbꞌal ebꞌ jaxca wakꞌon ja wetoj. 12Yet ey jin ecꞌ yetoj ebꞌ bꞌey yul yibꞌankꞌinal tiꞌ, jix jin teyne ebꞌ yetoj ja wipal. Jaꞌ ebꞌ jix ja wakꞌ ey jin an, jix ton jin teyne ebꞌ, yet watxꞌ cꞌam tzet chi ion ebꞌ. Yu jun tuꞌ, yuxan cꞌam junoj ebꞌ jix qꞌueyeloj. Asanne naj tꞌinan cꞌaltaꞌ sqꞌueyeloj, yet watxꞌ chi yun tzet tzꞌibꞌebꞌilcan yul An Juun. 13Oj jin paxa ey jaach tuꞌ an. Yajbꞌan ey jin to ecꞌ niꞌojxa yul yibꞌankꞌinal tiꞌ, chi wal can wan tiꞌ, yet watxꞌ jaxca ojabꞌ jin tzala tiꞌ, quey ojabꞌ tuꞌ chi yun stzala a ebꞌ sicꞌlebꞌil. 14Jix wal ja kꞌane tet ebꞌ. Jal ebꞌ ánima yet yul yibꞌankꞌinal tiꞌ, caw chi jowi oc scꞌul ebꞌ yin ebꞌ, yutol manxa yetoj yul yibꞌankꞌinal ebꞌ yetoj ebꞌ. Jaxca jin ton pax oj, manxa yetoj jin yul yibꞌankꞌinal tiꞌ. 15Man lalan oj walon ey jaach, tol cha wiꞌel ebꞌ yul yibꞌankꞌinal tiꞌ yin eymanil. Tol chin kꞌan ey jaach, tol cha teyne ebꞌ, yet watxꞌ cꞌam ebꞌ chi etex el yu jun yel xacꞌal pena. 16Jain tiꞌ, man jin yetoj yul yibꞌankꞌinal tiꞌ. Jacꞌalaꞌ pax ebꞌ, man yetoj yul yibꞌankꞌinal tiꞌ ebꞌ. 17Cha waꞌne oc snaꞌbꞌal ebꞌ yu ja kꞌane tol yel chi yalaꞌ. Asan ton ja kꞌane tuꞌ caw yel chi yalaꞌ. 18Jaxca jix jin ja wute ja chejontej xol ánima yul yibꞌankꞌinal tiꞌ, jaxca ton tuꞌ jix wute jin chejon pax toj ebꞌ xol ánima tiꞌ. 19Yu swatxꞌiloj ebꞌ, yuxan chi wakꞌ jin bꞌa ey jaach, yet watxꞌ chi oc ebꞌ ja wetoj sicꞌlebꞌil. 20Man asanne oj yu ebꞌ, chin txali, chin txali pax yu ebꞌ tol to oj yaoc scꞌul win yu tzettaj oj yal ebꞌ jin chejabꞌ tiꞌ. 21Chin kꞌan ey jaach xin, tol junxane ojabꞌ chi yun snaꞌbꞌal ebꞌ masanil. Mamin, junne weoc ja wetoj, junne pax ja weoc wetoj an. Tol oj wal jaxca keoc tuꞌ, quey ojabꞌ tuꞌ chi yun ebꞌ, junxane chi yun ebꞌ ketoj. Jaxca tuꞌ xin, oj yaoc ebꞌ ánima bꞌey yul yibꞌankꞌinal tiꞌ yin scꞌul, tol jaach jix jin ja chejtej. 22Jaꞌ ja watxꞌilal akꞌbꞌil can ey jin an, jaꞌ jix wakꞌ tet ebꞌ, yet watxꞌ junxane chi yun can snaꞌbꞌal ebꞌ, jaxca jin ja wetoj. 23Jain, ey jin oc yin ebꞌ, jaach, ey jaach oc win an, yet watxꞌ junxane oj yun snaꞌbꞌal ebꞌ, catuꞌ oj naꞌcha el yu ebꞌ ánima bꞌey yul yibꞌankꞌinal, tol jaach jix jin ja chejtej. Oj yil ebꞌ, tol jaxca chin ja wute ja camcꞌulneni, jaxca tuꞌ cha wute ja camcꞌulnen pax ebꞌ tiꞌ. 24Mamin, jaꞌ ebꞌ jix ja wakꞌ ey jin tuꞌ an, chi woche tol jaꞌ bꞌey oj jin eyecꞌoj, jatuꞌ chi ey pax ecꞌ ebꞌ wetoj an, yet watxꞌ oj yil ebꞌ swatxꞌilal akꞌbꞌil ey jin an. Yutol camcꞌulnebꞌil jin xa an, yet tax cꞌamto chi waꞌxi yul yibꞌankꞌinal tiꞌ. 25Mamin, watxꞌ ton ja naꞌbꞌal. Jaꞌ ebꞌ yet yul yibꞌankꞌinal tiꞌ, man jaach yotaj oj ebꞌ. Jal jin jain tiꞌ, wotaj jaach an. Jal ebꞌ tiꞌ xin, yotaj xa ebꞌ, tol jaach jix jin ja chejtej. 26Jain jix wakꞌ yotajne el ebꞌ, tzet utbꞌil yeoc ja naꞌbꞌal. Tol oj wakꞌ cꞌal yotajne el ebꞌ, yet watxꞌ jaxca chin ja wute ja camcꞌulneni, jaxca ojabꞌ tuꞌ cha wute ja camcꞌulnen pax ebꞌ. Catuꞌ chach oc caan yin ebꞌ yin junelne, ẍi Jesús tet cu Mam Dios.
Currently Selected:
Juan 17: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.