Hebreos Introducción
Introducción
Jaꞌ jun libro tiꞌ jix tzꞌibꞌelecan yet abꞌil 67-69 d.C. Man kotajoj mac jix tzꞌibꞌencan jun carta tiꞌ. Jix tzꞌibꞌelecan jun libro tiꞌ tet jun bꞌulan ebꞌ creyente a Israel.
Hebreos sbꞌi jun libro tiꞌ, jaꞌton jun carta tiꞌ tzꞌibꞌebꞌiltoj tet ebꞌ creyente Israel sajleminaj ye cantoj, yutol ian wal jix jul scaabꞌcꞌulal ebꞌ yu wan syaꞌtajilal jix ale oc yibꞌan ebꞌ yu wan chi jowi oc yin ebꞌ. Jix ujtele ecꞌ ebꞌ yet chi sbꞌejoncan yaon oc scꞌul ebꞌ yin Dios, yet chi sbꞌeybꞌalne ebꞌ wan icham bꞌeybꞌale yet yalantoj. Jaꞌ mac jix tzꞌibꞌencan jun carta tiꞌ, manxa jantajoj cuybꞌanile jix al-le can tet ebꞌ creyente, chi akꞌle yotajne el ebꞌ tol asanne Cristo jix aletej yu Dios.
Jaꞌ jun carta tiꞌ chi yalaꞌ tol jaꞌ Jesús Scꞌaal Dios, yu jun tuꞌ, yel xacꞌal ecꞌbꞌan yeloc apnoj yopiso yintaj ebꞌ ẍejabꞌ Dios, yintaj ebꞌ ángel, yintaj naj Moisés yetoj cꞌal pax naj Josué. Jaꞌcaw Dios jix aloni tol jaꞌ Jesús Sat Yakꞌomal xaambꞌal yeoc yin junelne. Yel xacꞌal ecꞌbꞌan pax yeloc apnoj yintaj ebꞌ yakꞌomal xaambꞌal tzꞌibꞌebꞌilcan skꞌaneal yul an juun tiꞌ.
Asanne yu Jesús chi skeꞌ scolcha el masanil ánima xol spenail. Ta tol chi yaoc scꞌul ebꞌ yin, chi colcha can el ebꞌ tet xiwcꞌulal cꞌal yul skꞌabꞌ camich yin junelne. Asanne Jesús chi skeꞌ yakꞌon scolbꞌanil cu pixan, yu jun tuꞌ, jaꞌ cuybꞌanile yet Dios tzꞌibꞌebꞌilcan ey skꞌaneal, jaꞌton chi cu ijbꞌani.
Jaꞌ jun mac jix tzꞌibꞌencan jun carta tiꞌ, jaꞌ chi alon can yu skꞌaneal ebꞌ jix yaoc scꞌul yin Dios yet peyxa, yet chi yotajne pax el ebꞌ creyente tinaniꞌ, yet chi stecꞌbꞌan sbꞌa ebꞌ masantaꞌcꞌal slawubꞌal, chi yaon pax oc snaꞌbꞌal ebꞌ jantaj tzet albꞌilcan yu Cristo. Chi lawi can wan kꞌane tiꞌ yetoj cuybꞌanile, cꞌal naꞌbꞌale yetoj cꞌal scawil scꞌul ebꞌ creyente.
Currently Selected:
Hebreos Introducción: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.