3a Juan 1
1
Watxꞌ Kꞌane Chi Al-le Yin Naj Gayo
1Jain ton anciano jin chin tzꞌibꞌetoj jun jin carta tiꞌ ey jaach an, jaach wuẍtaj Gayo. Chach jin camcꞌulne yin masanil jin cꞌul. 2Jaach wuẍtaj camcꞌulnebꞌil. Wotaj an, tol caw tecꞌan yakꞌon ja naꞌbꞌal sattaj Dios. Chin txali tet Dios, yet watxꞌ, watxꞌ ojabꞌ cꞌal chi ecꞌ cꞌu ja win yin masanil tzettaj yetal, catuꞌ watxꞌ ojabꞌ cꞌal ja cꞌul jaxca yakꞌon ja naꞌbꞌal tuꞌ. 3Jaꞌ yet jix jul yalon ecꞌ ebꞌ kuẍtaj tzet utbꞌil ja weocoj, caw jix tzala a jin cꞌul titiꞌ an. Yutol jix yal ebꞌ, tol caw eyoc ja naꞌbꞌal yin cuybꞌanile jaꞌcaw yel. Catuꞌ asan jun yel tiꞌ cha wunne. 4Jaꞌ yet chi wabꞌen an, tol jaꞌ ebꞌ jix yaoc scꞌul yin Cristo wu an, jacꞌalaꞌ sjijen cuybꞌanile caw yel ebꞌ, caw chin tzala an. Cꞌam junojxa tzetyetal bꞌey yel chi tzala jin cꞌul jaxca tuꞌ, yutol jaxca tol wuninal yeoc ebꞌ an. 5Jaach wuẍtaj camcꞌulnebꞌil, watxꞌ ton lalan ja wuten ja naꞌbꞌal tituꞌ chi wabꞌ an. Chach colwa tet ebꞌ kuẍtaj cꞌal tet ebꞌ kanabꞌ, caxcꞌal man ja wotaj oj ebꞌ, jaxca cꞌal tuꞌ cha wute ja cꞌul yin ebꞌ. 6Ey ebꞌ jix alon sattaj iglesia tiꞌ, tol yel toni ey ja camcꞌulal tituꞌ. Chach colwa cꞌal tet ebꞌ yet ey bꞌey chi too ebꞌ. Smoo jaxca cꞌal tuꞌ cha wute colwa ja bꞌa tet ebꞌ, yutol queytuꞌ chi yoche Dios. 7Jaꞌ ebꞌ tuꞌ, asan yu yakꞌon servil Jesucristo ebꞌ yuxan chi ecꞌ ebꞌ. Cꞌam niꞌoj tzetyetal chi ẍaꞌ ebꞌ tet ebꞌ man creyenteoj. 8Yuxan cu cuenta cu colwa tet ebꞌ. Ta chi cu colwa tet ebꞌ, jaxca tol jaon jun lalan cu mulna yetoj ebꞌ, yet lalan yecꞌ ebꞌ yalon el cuybꞌanil caw yel.
Spena Sbꞌeybꞌal Naj Diótrefes
9Jix jin tzꞌibꞌetoj jun jin carta ey jex an, jex che yambꞌa je bꞌa tituꞌ. Jal naj Diótrefes chi yoche chex ijbꞌan tituꞌ. Jaꞌ tzet chi wal jain tiꞌ, cꞌam niꞌoj yeloc apnoj yul sat naj. 10Yuxan, jaꞌ yet oj jin apnoj ey jex tuꞌ, catuꞌ oj walon tzet spenail naj. Yutol chi ecꞌ snaꞌa kꞌane naj kin. Man asanne oj wan tuꞌ chi yal naj. Cꞌam pax chi ẍaꞌ naj ebꞌ kuẍtaj chi apni ey jex tuꞌ. Ilaꞌ, ta jaex che yoche che chaꞌ ebꞌ tuꞌ, caw chi tit sjowal naj je yin, tol tax chex ujtele el yu naj xol iglesia tituꞌ. 11Jaach wuẍtaj camcꞌulnebꞌil, manche ja wun jaxca sbꞌeybꞌal ebꞌ cꞌam swatxꞌil sbꞌeybꞌal. Asan sbꞌeybꞌal ebꞌ watxꞌ, jaꞌ ojabꞌ cha bꞌeybꞌalne. Ta watxꞌ chi kute cu bꞌa, tol yet jon xa Dios, chi yal tuꞌ. Jal mac cꞌam swatxꞌil chi yute sbꞌa, man otajbꞌiloj Dios yu.
Watxꞌ Sbꞌeybꞌal Naj Demetrio
12Jal pax kuẍtaj Demetrio, watxꞌ yul sat ebꞌ masanil, yutol miman txequel tol lalan sjijen jun cuybꞌanil jaꞌcaw yel. Ilaꞌ, jaon tiꞌ pax oj, watxꞌ naj yul cu sat. Ja wotaj tol yel tzet chi kalaꞌ.
Chi Too Scawil Scꞌul Ebꞌ Yu Naj Juan
13Ecꞌal tocꞌal tzetyetal chi woche chi waltoj ey jaach, man oj jin tzꞌibꞌetoj yul jun jin carta tiꞌ an. 14Yutol chin naꞌ ta chi skeꞌ jin too jaach wilon an. Catuꞌ jato yet tuꞌ chi wal wanxa tzetyetal tuꞌ ey jaach an. 15Ey ojabꞌ watxꞌcꞌulal snan je xol tituꞌ. Chi yatoj scawil ja cꞌul ebꞌ kuẍtaj titiꞌ. Tol chi wa pax toj scawil scꞌul junjun ebꞌ kuẍtaj tituꞌ.
Currently Selected:
3a Juan 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.