2a Timoteo 4
4
1Jaꞌ yet oj jul Naj Kaawil Jesucristo yet scaelal, oj oc Naj yin Reyal. Catuꞌ oj naꞌle oc yin masanil ebꞌ ánima camnajxa, cꞌal ebꞌ iquisto yu Naj. Yu jun tuꞌ, yuxan sattaj Dios cꞌal sattaj Naj Kaawil Jesucristo chi cam walontoj ey jaach an, 2tol cha walel skꞌane Dios xol ánima. Caxcꞌal chi yoche chi yabꞌ ebꞌ, caxcꞌal cꞌamaj, al cꞌal eloj, cha monte ebꞌ. Cha tenchane ebꞌ yin tzet man watxꞌoj, cha jej snaꞌbꞌal ebꞌ. Miman cha wute ja cꞌul yin ebꞌ yet cha cuyon pax ebꞌ yin skꞌane Dios. 3Yutol ey jun tiempoal oj juloj, tol man oj ẍaꞌ ebꞌ yabꞌ yet chi al-le cuybꞌanile jaꞌcaw yel. Asanxane comon kꞌane oj yoche ebꞌ oj yabꞌe. Yuxan ecꞌal cuywawom oj syambꞌatej ebꞌ. Jal wan cuywawom tuꞌ, tucꞌal oj tzꞌaj yal ebꞌ wanoj comon kꞌane, jaxca chi yoche ebꞌ ánima tuꞌ. 4Yuxan man oj yaoc xiquin ebꞌ yabꞌen cuybꞌanile jaꞌcaw yel. Asan yin comon kꞌane oj yaoc snaꞌbꞌal ebꞌ. 5Jal jaach, jaach tiꞌ, tecꞌan cꞌal cha wute ja naꞌbꞌal tobꞌalkꞌinal. Akꞌ cꞌal techa syaꞌilal chi jul ja wibꞌan. Al cꞌal el skꞌaneal yet colbꞌanile snan xol ánima. Mulna an sicꞌlebꞌil, yet watxꞌ cꞌam tzet man tzꞌajanoj yin ja wopiso tuꞌ. 6Jal jin xin, lalanxa sjul stiempoal jin cam an. Jaxca junoj xaambꞌal chi akꞌle camoj, jaxca tuꞌ oj wun an. 7Jaxca junoj mac chi oc yin junoj ani, jaxca tuꞌ chi wute wakꞌon ganar slawi wopiso yin swatxꞌil. Jix jin yaꞌilne tobꞌalkꞌinal wan cuybꞌanile bꞌey eyoc cu cꞌul. 8Jaꞌ tinaniꞌ, cꞌuanxa ecꞌ jin pajtzebꞌal, yutol jichan cꞌal jix wute jin bꞌeybꞌal. Jaꞌ Naj Kaawil, caw jichan Naj, oj naꞌle oc yin masanil ánima. Jaꞌ yet jun cꞌual tuꞌ, oj jin chaꞌ jin paj yet tuꞌ tet Naj. Man asanne oj jin, oj jin chaꞌ spaj wet tuꞌ, tol oj ẍaꞌ pax yet ebꞌ chi ochen chi jul Naj yet scaelal.
Wanxa Ẍejbꞌanil Naj Timoteo Yu Naj Pablo
9Chi woche cha wakꞌ ja wip ja seyon tzet chi yun ja tit eyman. 10Yutol jix jin bꞌejlecan yu naj Demas jin txꞌojli. Jix too naj bꞌey conobꞌ Tesalónica yutol asan tzetyetal ey yul yibꞌankꞌinal tiꞌ chi yoche. Jaꞌ kuẍtaj Crescente, jaꞌ bꞌey Galacia jix toi. Jal kuẍtaj Tito xin, jaꞌ bꞌey Dalmacia jix toi. 11Tol asan naj Lucas eyecꞌ wetoj an. Jaꞌ yet chach tita, chi ecꞌ jaꞌ wiꞌ naj Marcos ja wetoj, yutol caw chi oc yopiso naj smulna naj yin yet Naj Kaawil. 12Jix jin chejtoj kuẍtaj Tíquico bꞌey Éfeso. 13Jaꞌ yet chach tita, tol oj wal chi ecꞌ ja wiꞌ jun jojan pichile jix jin bꞌejcan bꞌey Tróade bꞌey sna naj Carpo, yetoj wan jin libro cꞌal wan an wuun tol sowalil chi tita. 14Jaꞌ naj Alejandro, naj chakꞌom chꞌen, caw pena jix yute sbꞌa naj ey jin an. Jaꞌ Naj Kaawil oj pajtzen tet naj yu tzet jix yunne. 15Il cꞌal pax ja bꞌa tet naj jaach tiꞌ, yutol chi yakꞌ acꞌulal naj yin jun kꞌaneal chi kaleloj. 16Jaꞌ yet jix wal jin bꞌa yet sbꞌabꞌelal sattaj yaaw, cꞌam junoj mactxequel jix oc wetoj an. Jix cꞌal jin sbꞌejcan ebꞌ jin txꞌojli. Toloj wal cꞌam chi tit sjowal scꞌul Dios yin ebꞌ yu wan tuꞌ. 17Jix cꞌal oc Naj Kaawil wetoj an. Jix colwa Naj wetoj an, yuxan jix skeꞌ walon can el skꞌaneal yet colbꞌanile. Jix cꞌal yabꞌ ebꞌ man Israeloj masanil. Jaꞌ junel jaxca tol jix jin michꞌcha yu junoj noꞌ león, catuꞌ ian jix jin ẍiꞌeytoj noꞌ. Jix jin col-le cꞌal el yul stiꞌ noꞌ yu Naj Kaawil. 18Oj jin scolel Naj yul skꞌabꞌ masanil tzet man watxꞌoj. Watxꞌ oj jin yute scꞌubꞌan a Naj, yet watxꞌ oj jin aapnoj yul skꞌabꞌ bꞌey satcan. Miman ojabꞌ yeloc apnoj naj tobꞌalkꞌinal. Amén.
Ebꞌ Chi Aontoj Scawil Scꞌul Naj Pablo
19Cha wakꞌ scawil scꞌul kanabꞌ Prisca#4:19 Prisca, ma Priscila. Hechos 18:2. yetoj kuẍtaj Aquila, cꞌal sfamilia Onesíforo. 20Jaꞌ kuẍtaj Erasto jix can naj bꞌey conobꞌ Corinto. Jal kuẍtaj Trófimo xin, jaꞌ bꞌey Mileto jix wakꞌcanoj yutol yaꞌey naj. 21Cha wakꞌ ja wip ja tita, yajbꞌan cꞌamto chi oc nabꞌilkꞌinal. Chi yatoj scawil ja cꞌul naj kuẍtaj Eubulo. Ilaꞌ pax kuẍtaj Pudente, yetoj kuẍtaj Lino, cꞌal kanabꞌ Claudia, cꞌal masanil ebꞌ creyente, chi ya pax toj scawil ja cꞌul ebꞌ. 22Chi woche tol ey ojabꞌ oc Naj Kaawil Jesucristo ja wetoj. Chi woche chi xꞌox swatxꞌcꞌulal Dios ey jex tituꞌ je masanil.
Currently Selected:
2a Timoteo 4: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.