Abadi 1
1
Nabiya falana lan Edɔn ma
Nabi Yeremi 49.7-22
1Falani ito nan makɛnɛn Abadi xa fe tooni alo xiyena:
Marigina Alatala ito nan falaxi Edɔn kaane fe yi.
Nxu bata xɛrayana nde a fe mɛ fata Alatala ra,
xɛraan bata rasiga siyane tagi,
a xa sa a fala e xa fa fala:
“En keli, en sa Edɔn kaane yɛngɛ!”
2Ala naxa, “Edɔn kaane,
n na ɛ sɛnbɛn xurunma nɛn siyane birin xa.
Birin ɛ raɲaxuma nɛn.
3Wason naxan ɛ bɔɲɛni,
na bata ɛ ratantan
ɛ tan naxanye dɔxi faran yinle ra,
e nun geyane fari,
ɛ tan naxanye ɛ mirima, ɛ naxa,
‘Nde nɔɛ nxu bɛ be xuntagi?’
4Hali ɛ mate ayi alo singbinna,
hali ɛ sa ɛ tɛɛn sa kore alo xɔline,
a mate ayi alo sarene,
n na ɛ ragodoma nɛn.”
Alatalaa falan nan na ra.
5“Xa muɲadena hanma mafu tiine fa i konni kɔɛɛn na,
e mi e waxɔnna xan tongoma ba?
Ɛ luma bɔɲɛ xunbenli di nayi?
Xa muxune fa ɛ nakɔni ɛ manpa bogine muɲadeni,
e mi bogi dando xan gbansan luma na ba?
6Nba, Esayu yixɛtɛne yii seene birin naxɔrima nɛn,
a nafulu luxunxine birin yi to.
7Ɛ mali muxune birin ɛ kedima nɛn ɛ bɔxɔni.
Ɛ xɔyine bata ɛ yanfa, e bata ɛ nɔ.
Muxun naxanye yi ɛ donseene donma,
ne lutin natima ɛ yɛɛ ra nɛn
e naxa, ‘E xaxili mi fa na!’
8Na lɔxɔni,
n mi Edɔn yamanan fekolonne raxɔrɛ ba?
N yi xaxilimane ba Esayu a geyane fari?”
Alatalaa falan nan na ra.
9“Teman kaane,
ɛ sofane gaxuma nɛn
muxune birin yi raxɔri Esayu a geyane ma!”
10“Ɛ yarabima nɛn
bayo ɛ bata gbalo feen liga
ɛ ngaxakedenna Yaxuba yixɛtɛne ra.
Ɛ raxɔrima nɛn han habadan!
11Amasɔtɔ na lɔxɔni ɛ yɛɛn yi na xɔɲɛne ra
e yi soma Yerusalɛn taani waxatin naxan yi
e a nafunle tongo,
e a seene yitaxun masɛnsɛnna xɔn.
Ɛ tan fan luxi nɛn nayi alo e tan.
12Ɛ mi yi lan ɛ sɛwa
ɛ ngaxakedenna Yuda yixɛtɛne tɔrɔ lɔxɔna fe ra.
Ɛ mi yi lan
ɛ ɲaxan e kalan waxatini,
hanma ɛ yi ɛ kanba e sɔxɔlɛn waxatini.
13Ɛ mi yi lan
ɛ so n ma yamana taani
a halagi waxatini.
Ɛ mi yi lan
ɛ a mato sɛwani a kala waxatini,
hanma ɛ yi a nafunle tongo
a halagi waxatini.
14Ɛ mɔn mi yi lan
ɛ ti kira xunne ra ɛ a muxu gixine faxa,
hanma ɛ yi e so e yaxun yii,
e tɔrɔ waxatini.”
15Amasɔtɔ Alatalaa lɔxɔn bata maso,
a siyane birin makitima lɔxɔn naxan yi.
Nayi, ɛ suxuma nɛn
alo ɛ bonne suxu kii naxan yi.
Ɛ fe ɲaxin naxanye liga,
ne xɛtɛma nɛn ɛ ma.
Isirayila a gbeen ɲɔxɔma nɛn Edɔn yamanan ma
16Awa, ɛ to dɔlɔn minxi n ma geya sariɲanxin fari,
nayi siyane birin e minma nɛn
han e a radangu ayi!
E luma e minɲɛ nɛn,
han e lugo,
e yi lu alo e mi da.
17Koni yamaan muxu dɔnxɛne luma nɛn Siyon geyaan fari.
Yaxuba yixɛtɛne e kɛɛn masɔtɔma nɛn.
18Yaxuba yixɛtɛne luma nɛn alo tɛɛna,
Yusufu bɔnsɔnne yi lu
alo tɛɛ dɛgɛna.
Koni Esayu yixɛtɛne luma nɛn
alo sɛxɛna.
Ne e suxuma nɛn
e yi e gan,
muxu yo mi kisima Esayu bɔnsɔnni.
Alatala bata na fala!
19Yuda kaan naxanye dɔxi Negewi yireni,
ne Esayu a geyane suxuma nɛn.
Yamanan lanbanna muxune Filisitine bɔxɔn tongoma nɛn.
E Efirami nun Samari burunne tongo,
Bunyamin bɔnsɔnna muxune yi Galadi suxu.
20Isirayila kaan naxanye suxi yɛngɛni,
gali gbeeni ito,
ne Kanan kaane yamanan suxuma nɛn
siga han Sarepata taana.
Yerusalɛn kaan naxanye suxi yɛngɛni
naxanye Sefarada taani,
ne fan yi Negewi yamanan taane findi e gbeen na.
21Muxu kisixine tema nɛn Siyon geyaan fari,
e Esayu a geya yirene makiti,
mangayaan yi lu Alatala xa.
Currently Selected:
Abadi 1: Kitabuna
Highlight
Share
Copy
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license