Mike 2
2
Fe ɲaxin saranna nun tuli sana
1Gbalon na kanne xa,
naxanye hakɛn mirima,
e fe ɲaxini tɔn e sadeni.
Kuye nɛma yibama
e yi sa a liga,
amasɔtɔ na fɛrɛna e xa.
2E mila xɛɛne xɔn,
e yi e tongo,
e kunfa banxine xɔn,
e yi e kansun.
E muxune nun e denbayane nun e kɛɛne suxu.
3Nanara, Alatala ito nan falaxi, a naxa,
“A mato,
n gbalon nan nafama bɔnsɔnni ito ma.
Ɛ mi ɛ xunna raminɛ a bun mumɛ!
Ɛ mi fa sigan tima xunna kenli,
amasɔtɔ tɔrɔ waxatin na a ra.
4Na lɔxɔni, sandani ito falama nɛn ɛ xili ma,
e ɛ magelema nɛn mawuga sigini.
E naxa, ‘En bata kala fefe,
n ma yamaan kɛ bɔxɔn bata yitaxun gbɛtɛye ra.
E bata a ba n yii,
e bata en ma xɛɛne so yanfantenne yii!’ ”
5Nanara, muxu yo mi bɔxɔna nde maligɛ
i tan kɛɛn na Alatala yamani.
Naxanye Nabi Mike matandima
6E waliyiya falan tima n xili ma iki,
e naxa, “Ɛ nama waliyiyaan fala!
Waliyiya falani ito nama ti de!
A findima yagin nan na!”
7Ɛ tan Yaxuba bɔnsɔnna,
a lan ɛ xa na fala ba?
Diɲan ɲanɲɛ Alatala yi ba?
A darixi na ligɛ ba?
Ala naxa,
“N ma falane fan na kanna xa
naxan kɛwanle fan.
8Ɛ bata keli n ma yamaan xili ma
waxati dɔnxɛni ito yi alo yaxune.
Ɛ muxune gubane bama e ma
naxanye xɛtɛmatɔ a ra
keli yɛngɛni bɔɲɛ xunbenli.
9Ɛ n ma yamaan ɲaxanle kedima e rafan banxine yi.
Ɛ n ma binyen ba e diine ma habadan.
10Ɛ keli, ɛ siga,
amasɔtɔ ɛ matabude mi ito ra,
bayo ɛ yamanan bata raharamu.
A findima tɔrɔn nan na
naxan magaxu han!
11Xa muxuna nde a gima foyen fɔxɔ ra
a wule waliyiya falane ti, a naxa,
‘I fama dɔlɔn nun manpaan sɔtɔdeni nɛn!’
Na nabi sifan nan yi lanɲɛ yamani ito ma yati!”
12“N na ɛ birin malanma nɛn Yaxuba bɔnsɔnna.
N na ɛ tan muxu dɔnxɛne xun lanma nɛn,
naxanye luxi Isirayila bɔnsɔnni.
N na ɛ malanma nɛn
alo yɛxɛɛne sansanna kui,
alo xuruse kuruna e dɛgedeni.
Gali gbeen sɔnxɔ xuiin yi mini na.
13Naxan kiraan nabama,
na tima nɛn e yɛɛ ra.
E kiraan nabama nɛn, e mini.
E mangan bata ti e yɛɛ ra,
Alatala nan e xunna ra.”
Currently Selected:
Mike 2: Kitabuna
Highlight
Share
Copy
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license