Titu 3
3
Haga Myẽꞌym 3
Waku Aiꞌakagnia Motypot Haria Wo Watoineꞌen
1Etiꞌatumuꞌe epotmuꞌeria mio tã ereꞌe o Titu -Eweiꞌatuehay upi ehetuꞌisaria eiꞌakagnia iꞌewyte ehesuraraꞌin eweiꞌatuehay upi eweikupteꞌen ereꞌe o. Miꞌi hap etiat iꞌatumuꞌe hap ete yt waure wo eweikupteꞌen ereꞌe o. Karapeĩ eiꞌakagnia eipoꞌoro motpap wakuap nug hap miꞌi pote -Hẽ eweiꞌe kahato ereꞌe o epotmuꞌeria pe. 2Iꞌewyte yt uwe teiꞌo eweiꞌatuehay moweukaꞌi ereꞌe o. Iꞌewyte miitꞌin wuatꞌi wywo o eiwese eweikupteꞌen ereꞌe o Titu. Iꞌewyte waku eweikat ewy ewese hap wywo. Iꞌewyte eiperupꞌi kahato yn o yne miitꞌin ete eweikupteꞌen ereꞌe o Iesui mohey haria pe. 3Kat pote ti aito nimo te yt hãpyk i sese rakaria watoineꞌen. Woꞌoehay upi haria wo i ti aito katupono mekewat eꞌat pe aito aiminug saꞌag atoiat reran aiꞌe pykai yt watoiat kuap i. Miꞌi hawyi ti mekewat aiminug saꞌag kape neꞌi watoineꞌen. Miꞌi hap kaipyi ti aiwoꞌoweukaꞌi aiwoꞌopiat hap yn naꞌyn tuwekuap ahete. Miꞌi haype ti -Atikyꞌesat ewat uiwatno aiꞌe hap aiwanetup hawe. Iꞌewyte -Atikyꞌesat ti uito poꞌog ekai iraniaꞌin kai aiꞌe hap yn. Miꞌi hap kaipyi ti ipyꞌahak takaria wo aito yne miitꞌin ete. Iꞌewyte iraniaꞌin torannia ipyꞌahak takaria wo ahete tukupteꞌen. 4Yt naku i kahato ahete mekewat eꞌat pe maꞌato miꞌi pykai Tupana tuwemoherep taꞌyn ahepe aikyꞌe kahato hap. Miꞌi kaipyi ahehakyeraꞌat hamuat. Iwese kahato ti ahete. Tuwepyi aikyꞌe teꞌen neꞌi haype. 5Taꞌi Tupana yn ti Ahehakyeraꞌat kuap hat. Aito ti yt watiꞌatuehakyeraꞌat kuap hin i aiwewi. Iꞌewyte aiminug wakuap koꞌi ti yt putꞌok e i ahehakyeraꞌat hamuat kyiꞌat hamo. Tepiat ahehakyꞌeꞌi hap kaipyi yn ti Tupana ahehakyeraꞌat kuap. Iꞌewyte aiminug saꞌag ipit pit kahato hap koꞌi Tupana yn ikoho kuap. Iꞌewyte ti tutum ahepe Topaꞌãu Wakuat Sese raꞌyn. Miꞌi hawyi ti tosaꞌyruꞌin no tosakiꞌytꞌin no ainug Topaꞌãu wo. Miꞌi hawyi ti koitywy ipakup i rakaria wo raꞌyn watoineꞌen. Tupana tunug ni tuweran miꞌi tã hap ahetiat tuwepyi. 6Miꞌi hawyi ti aipiit wyti Topaꞌãu Wakuat eiam mo raꞌyn tutunug. Tutum kahato Topaꞌãu wakuat poꞌog naꞌyn ahepe aimiẽtup kai katupono ti Aikaꞌiwat Iesui tikyiꞌat tuwekaipyi raꞌyn ahehakyeraꞌat hamuat. 7Koitywy ti Iesui tum naꞌyn ahepe Topaꞌãu aikyꞌe haype. Yt aiwaku hap upi i tutum neꞌen neꞌi. Miꞌi pote Tupana toꞌe ahepe watimohey Haꞌyru hawyi -Koitywy waku rakaria wo eweikupteꞌen uipyꞌa pe e Tupana ahepe e. Eipo pe raꞌyn ti atum yne uipowatꞌyp e. Uhekat yne atum ehepe e ahepe. Miꞌi tupono wuatꞌi eꞌat piat ieineꞌen hap kape yn naꞌyn aiwatetup.
8Pywo kahato ti mesuwat uimienoi paĩ. Miꞌi tupono Titu etiꞌatunapin kahato epotmuꞌeria -Waku watuwanetup kahato aikotã aru watunug waku hap ete ereꞌe o iꞌatuepe katupono waku nug haria wo watoineꞌen mote Tupana mowepiit kahato haria wo watopyhuꞌat. Iꞌewyte waku miitꞌin powyro kahato rakaria wo watopyhuꞌat ereꞌe o Iesui mohey haria pe Titu. 9-Maꞌato mekewat wuꞌuka hap ehay wuat yt kat hamuat i. Miꞌi hap koꞌi waku watoiat yne ereꞌe o. Yt eiwuꞌuka teiꞌo -Uruwat uruꞌywania ni waku poꞌog iraniaꞌin ywania kai eiꞌe hap ete. Uruꞌywania set poꞌog poꞌog eiꞌywania pe kai eiꞌe hap ete yt eiwuꞌuka teiꞌo. Iꞌewyte yt eiwuꞌuka teiꞌo miitꞌin waĩꞌe hap hit koꞌi ete miitꞌin seko hit ete kat miꞌu waku watuꞌu kat som waku kat som yt aipainug hap ete. Yt kan hamo i aheko urueko hap ete watuꞌuka. Yt aipowyro hin i watuꞌuka sokpe ete yt Tupana ehay kaipyi i pote. Pyno mekewat nagnia ehay seko etiatno yt naku i watuꞌuka ereꞌe o are. 10Maꞌato toĩ wẽtup ok aipyꞌasetpe Iesui mohey hat wuꞌuka teran hat eipatꞌok patꞌok teran hat miꞌi pote waku eweikay kay miꞌi ehewowi hawyi eweinapin miꞌi. Uhyt mana etoiat ro mekewat meruwatno sehay eweiꞌe tope. Miꞌi hawyi tutunug i raꞌyn miꞌi pote waku eweikay kay i raꞌyn waĩꞌeiꞌe hamo. Maꞌato yt toikuap i tonapin hap miꞌi hawyi o yt eiwanetup i raꞌyn ihay kat e hap kat e hap koꞌi kape. 11Katupono tuꞌuka teran haype yt naku i tutunug. Tuwepyi raꞌyn tutunug waĩꞌaiꞌe pykai raꞌyn. Mekewat wuꞌuka hap nug hap kaipyi ti yne miitꞌin tikuap taꞌyn yt nakuat inug hat miꞌi. Miꞌi pote waku raꞌyn aipohep taꞌyn mekewat ihay ete.
12Titu atipoꞌoro teran wẽtup ok esaipe piatno aimimuꞌeria apykok hamuat maꞌato yt atikuap i te uwe waku atipoꞌoro hap. Koitypuo maꞌato atipoꞌoro mehin Atema sio mehin Tikiku are. Pyno putꞌok e esaipepiat hawyi etikat kahato epuꞌap uhowawiat eꞌuut hamuat Titu. Areineꞌen wyti aru mekewat tawa Nikopuri tote are. Miꞌi kape eriot meremo uhaꞌyru. Miꞌi hawyi mekewat iꞌaman mot naꞌak hap eꞌat koꞌi pe tawa Nikopuri pe watukupteꞌen. 13Pyno Titu etipowyro mekewat mehin Sena mekewat wuꞌuka haria atunapin hat muap saꞌup ete. Iꞌewyte mekewat mehin Apauru puꞌap saꞌup ete etipowyro. Etum o mekewat mieroto wo imiꞌu hesokpe aikotã aikotã waku hap ewy. 14Pyno Titu koitywy waku watoꞌe aipotmuꞌeria pe Iesui mohey haria pe -Eweiꞌatumuꞌe ro hoꞌopot haria powyro hamuat ete. Iꞌewyte aikotã waku hatek sese rakaria powyro hamo eweikupteꞌen hap ete waku watoꞌe aipotmuꞌeria pe katupono yt naku i kahato ti watoineꞌen neꞌen neꞌi ahowawi yn wanetup hatno neꞌi. Waku watiꞌatunapin Iesui mohey haria. 15Pyno koitywy torannia meiũpiaria uiwywuaria gupteꞌen haria tipoꞌoro taꞌatuekuekatu ewowi Titu. Iꞌewyte kuekatu raꞌyn ti aru aiwyriaꞌin itotiaria Iesui mohey haria pe urutoꞌe.
Pyno -Tupana etum no uhaꞌyru Titu pe imowepiit kahato hap egyiꞌat hap oktan iꞌewyte torannia itotiaria Esaꞌyru mohey haria pe ahẽtup epe Tupana waku. Toran naꞌyn uimiwan ewowi uiwy Titu.
Currently Selected:
Titu 3: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.