Iuta 1
1
Haga Wẽtup 1
Yt Uwe I Aihep Kuap Iesui Po Piat Pyi
1Mesuwat uimiwan atipoꞌoro Iesui mohey haria kape aikope aikope mesuwat yi tote eikupteꞌen hap kape. Uito ti Iesui ywyt sese Iuta e hap het rakat. Iꞌewyte mekewat Iesui ywyt Tiaku ywyt sese areineꞌen. Kuekatu atipoꞌoro ehewowi uiwyriaꞌin.
Pyno uimiwan atipoꞌoro ehewowi uiwyriaꞌin. Eiperia ti Aiꞌywot Tupana mimohãpyk koꞌi sese eipe tomohey haria eipe pote. Pywo ti rat Iesui waku kahato aiꞌapykok hamo. Yt uwe hin i ti aihep kuap Iesui piat aiꞌapykok hawyi katupono iheg me kahato watoineꞌen ipo pe. 2-Tupana are atikyꞌesat kahato ereineꞌen urukyꞌe hat uruehakyꞌeꞌi hap uruete turan miitꞌin yt iꞌatuwese i uruete hap turan are. Iꞌewyte Papai eremoehakyꞌeꞌi Esaꞌyru mohey haria kyewi are yn ehupi Tupana pe. Etunug no miꞌiria emiitꞌin sese iwepiit kahato rakaria wo mesup mukiꞌite hawyi wuatꞌi eꞌat pe are Tupana pe. Uiꞌywot Koro are etiꞌatumowepiit ro emiitꞌin poꞌog saꞌawyꞌi wuat kai toꞌopowyro powyro hamo are ahẽtup epe Tupana urupotypot Iesui set upi mesuwe ehewowi are raꞌyn. 3Uimikyꞌe kahato koꞌi eipe. Saꞌawyꞌi arehaypoꞌoro teran ehewowi aikotã Iesui ahehakyeraꞌat hap kuap hamo. Uimiwan ehowawiat nuat atunug neran maꞌato Tupana Paꞌãu -Yt etiwan neiꞌo miowat Iuta e uhepe. Apuete Iuta maꞌato waku etiwan wẽtup aikotã aikotã hap etiat e uhepe. Waku wẽtup sehay yn naꞌyn etipoꞌoro uimohey haria pe. Miꞌi hawyi worohoꞌomuꞌe teran Tupana Paꞌãu mienoi uhepiat ewywuat yn naꞌyn. Pyno koitywy eipe Iesui miꞌapykok yne. Koitywy uimiwan me worohoꞌonapin Tupana Paꞌãu e hap einapin hamuat wo. -Uimepytꞌin atikyꞌesat kahato eweimoheg eipyꞌa pe Uhaꞌyru mohey hap e Ipaꞌãu ahepuo are. Yt eipohep neꞌi teiꞌo imohey hap ete maꞌato eweimohey poꞌog poꞌog yne eꞌat pe Uhaꞌyru Iesui e ahepe. Aikotã saꞌawyꞌi eweimohey haty wo hap ewy poꞌog poꞌog eweimohey te wuatꞌi eꞌat kape e Tupana ahepe. Aikotã suraraꞌin tunug yne taꞌatuꞌakag koro ehay miꞌi haria ewywuat ro eweikupteꞌen Uhaꞌyru mikyꞌesat koꞌi nug hamo e Tupana Paꞌãu ahepe mesup are. Uito Iuta eiwy sese eimuꞌe raꞌyn are waku.
4Koitywy tuwehytꞌok tuereto aipyꞌasetpe Tupana mohey hap pun haria. Yt Tupana motypot rakaria i miꞌiria are. Miꞌiria aipyꞌasetpe tukupteꞌen maꞌato yt naku i nug hamuat aimaꞌat hamo tõꞌẽ ahowawi. Miꞌiria ti Tupana Saꞌyru yt kuap i haria. Miꞌiria ti aikotã Tupana ehay enoi haria teꞌeroꞌe saꞌawyꞌi te hap ewy. Mio tã iꞌatuꞌe -Tuut wyti aru eimaꞌat hanuaria sese e miwan me. Miꞌiria wyti aru uimiꞌatuꞌapiheg wuatnuaria teꞌeropyhuꞌat wuatꞌi eꞌat piat nuaria e Tupana miwan me miꞌiria etiat hap nug haria. Miꞌiria ti yt kat i uimotypot hap iꞌatuwanetup hawe haria e. Miꞌi haria wyti aru tuwehytꞌok wehytꞌok eipyꞌasetpe uimotypot yat pe yt naku i nug hamo e. Miꞌiria Tupana e hap ewy -Taꞌi waku ti watunug saꞌag aimikyꞌesat ewywuat iꞌatuꞌe. Waku ahewaire waire kahato iꞌatuꞌe aru are. Taꞌi Tupana yt aiꞌapiheg hin i katupono ti aikyꞌe kahato Tupana iwese kahato rakat pote iꞌatuꞌe aru aimuꞌe saꞌag neꞌi. Yt naku i watunug Tupana Mipoꞌoro Aipotypot no iꞌatuꞌe aru miꞌiria e saꞌawyꞌi te Tupana miwan me eimaꞌat reran haria etiat. 5Pyno eiweꞌeg wo o miꞌiria hap pupi uiwyriaꞌin are. Yt eweiwaure teiꞌo saꞌawyꞌi wanikaptia po pywiat aiꞌywania Iuteu ywania Tupana tiꞌatuehakyeraꞌat yne yi Esituꞌin ahewanikaptia po pyi hap. Maꞌato miꞌi pykai yt taꞌatumohey poꞌog hin i taꞌatuehakyeraꞌat hat Tupana are. Taꞌi miꞌi hawyi mekewat yahig wato tote Tupana tiꞌatuꞌapiheg miꞌiria are. Taꞌi tomohey hap pun haria toiꞌatumoma kahato itote are. Nagnia yne topap itote hawyi taꞌatumepytꞌin yn putꞌok iꞌatuꞌe yi wakuat Tupana miium kape are. Mekewat yahig wato tote hakpap kahato tomohey hap pun haria are. Tupana tiꞌatumoma yne yahig wato tote. Taꞌatumohey kahato saꞌawyꞌi pykai topap taꞌatupun imohey hap pote. Miꞌi hawyi iꞌatumepytꞌin yn tokokaꞌat Tupana miium eꞌyi kape are. 6Iꞌewyte saꞌawyꞌi wuaria atipy piaria waku kahato tukupteꞌen atipy pe Tupana wywo are. Taꞌi saꞌawyꞌi sese ti miꞌiria tukupteꞌen Tupana ehamo atipy pe wen maꞌato meiũran -Uruto poꞌog Tupana kai iꞌatuꞌe saꞌag hawyi Tupana tiꞌatupugha raꞌyn iꞌatuieineꞌen hap atipy piat pyi iꞌatumikyꞌesat saꞌag nug hamuat. Miꞌi pote ti koitywy miꞌiria tukupteꞌen taꞌatupoꞌi poꞌi hawe raꞌyn are.
Saꞌawyꞌi atipy piaria miꞌiria maꞌato mio te taꞌatupyhyp hawe tukupteꞌen. Iꞌypyryp sese pe mekewat iꞌypyryp hun kahato rakat pe iheg sese pe tukupteꞌen. Mio ti itote taꞌatuhekatup taꞌatuꞌapiheg sese hap eꞌat Tupana piat hap. Katupono Tupana toꞌe iꞌatuepe -Atiꞌatuꞌapiheg wyti aru eipe e raꞌyn iꞌatuepe. Koitywy heꞌat yn taꞌatuhekatup. Miꞌi e hap ewy te Tupana toꞌe koran Tosaꞌyru mohey hap pun haria pe. Miꞌi pote waku watokenꞌẽ kahato miꞌiria ewywuaria pupi e. 7Saꞌawyꞌi mekewat tawa Sutuma piaria iꞌewyte mekewat tawa Kumura piaria topap meremo katupono Tupana tiwuk yne miꞌiria are. Miꞌi tawa koꞌi piaria etiat eweikuap taꞌyn. Taꞌi meimuẽwat tawa koꞌi ti Tupana tiwuk aikotã atipy piaria Tupana atoiat haria ewy kahato tukupteꞌen pote. Katupono miꞌiria eko ti iꞌatuewaire waire hap kape yn iꞌatuwanetup hap hawyi ihainiaꞌin ti ihainiaꞌin wywo iꞌewyte haryporiaꞌin ti haryporiaꞌin wywo. Yt miitꞌin ewywuat i taꞌatunug hap ete yn taꞌatuwanetup. Teꞌeruwanetup yn aikotã mekewat taꞌatuminug saꞌag koꞌi ete yn. Miꞌiria ti ihainiaꞌin wywo yne haryporiaꞌin wywo hap kape yn teꞌeruwanetup aat kaꞌap are. Miꞌi pote yt miitꞌin ewywuat hin i tukupteꞌen toꞌope toꞌope toꞌopytyk pytyk pote. Ihainia ti ihainia wywo ti raꞌyn haryporia ti haryporia wywo ti raꞌyn taꞌatukyꞌesat saꞌag. Miꞌi tã hawyi Tupana tiwuk iꞌatuetawa aria saꞌag iꞌaman ewywuat wo. Miꞌiria wuk hap ti aria hewo atipy kaipyi iꞌatuꞌapiheg hamuat. Miꞌi hap ti mesup topyhuꞌat aimuꞌe hamo raꞌyn ainapin hap taꞌyn. Waku aiꞌapiheg hap pupi watokenꞌẽ are. Yt naku i Tupana miꞌapiheg koꞌi tawa Sutuma tawa Kumura piaria ewy watopyhuꞌat. Iꞌatuetawa wuk hap kaipyi watikuap aria wato wuatꞌi eꞌat piat yt imohey i haria wuk hap etiat watikuap are. 8Iꞌewyte yt naku i watopyhuꞌat miꞌiria ewywuat uiwyriaꞌin. Miꞌiria ti aat kaꞌap teꞌeruwanetup hawe ikat aikotã me waku taꞌatunug saꞌag hap iꞌewyte miitꞌin maꞌat hap kape. Miꞌi pote iꞌatumuꞌetu ti saꞌag yn naꞌyn are. Miꞌi hap kaipyi ti taꞌatupiit ete iꞌatumikyryꞌi kahato katupono waire waire hap yn iꞌatuwanetup hawe. Miꞌi pote ti taꞌatunapin neran iraniaꞌin taꞌatueko nug hamuat. Iꞌatusaiwot kahato Tupana ete taꞌatupyꞌa pe. Iꞌatuhuhaꞌi neꞌi pote waĩꞌiꞌatuꞌe Tupana pe. Iꞌewyte torannia morekuaria ete yne tuꞌisaria ete iꞌatusaiwot iꞌatuhuhaꞌi yn naꞌyn. Iꞌewyte Tupana emiitꞌin atipy piaria ete iꞌatumikyryꞌi. Yt teꞌerokenꞌẽ hin i ahiag mupi are. 9Maꞌato atipy piaria suraraꞌin akag Mikeu atipy kaipywiat yt tuwekyryꞌi hin i ahiag ete. Miꞌi ti saꞌawyꞌi Tupana tipoꞌoro tesurara koro Mikeu atipy kaipyi yi kape Muisei syp hamo maꞌato muap upi ahiag tipyhyp teran. Miꞌi hawyi yt kat e i Mikeu ahiag me maꞌato meremo tohẽtup atipy kape -Tupana meremo ro etiꞌakit ahiag katupono uipyhyp teran emikyꞌesat nug hap ete e tokenꞌẽ haype. Muisei ikuꞌuro hawyi ahiag tikyꞌesat ipiit towatnuat. Miꞌi pote atipy kaipywiat surara akag Mikeu hẽtup meremo Tupana pe -Etiꞌakit ro ahiag Uikaꞌiwat mesuwe e. Etiꞌapiheg no ahiag e yn. Yt toꞌe hin i -Woropun en yt e i ahiag me atipy piaria surara koro pykai. Maꞌato toineꞌen aipyꞌasetpe miitꞌin yt imohey i te haria. Miꞌiria toꞌokyryꞌi kahato Tupana ete iꞌewyte ahiag ete iꞌewyte torannia akag koꞌi ete sio tuꞌisaria sio morekuaria ete -Uruto ti poꞌog nakaria wo torannia kai iꞌatuꞌe taꞌatuwanetup hawe.
10Yt naku i watopyhuꞌat aikotã tawa Sutuma hawyi tawa Kumura eko ewy. Itotiaria yt teꞌerokenꞌẽ hin i atipy kaipywiaria pupi. Iꞌewyte miꞌiria taꞌatumikyryꞌi kahato yne akag koꞌi etiat haria. Yt taꞌatukuap i Tupana esaika hap pykai iꞌatuehay saꞌag neꞌi. Yne akag koꞌi ete iꞌatuehay saꞌag. Taꞌi miꞌiria ti aikotã gaꞌapy piaria haiwot rakaria ewy tukupteꞌen katupono torannia miitꞌin akag koꞌi ete iꞌatuhuhaꞌi neꞌi iraniaꞌin mimotypot koꞌi ete. Yt taꞌatukuap i waku rakaria haype hawyi yne wakuap koꞌi ete iꞌatusaiwot. Miꞌiria ti Tupana miꞌatusatyꞌi satyꞌi koꞌi katupono tuweupiaria raꞌyn taꞌatuminug saꞌag ete yn teꞌeremoehapap. Miꞌiria iraniaꞌin moweukaꞌi taꞌatueso wywuat haria. Miꞌiria wakuap sese koꞌi yt kuap i haria aikotã awyato miit auka hat ewywuaria iꞌatueko. Miꞌi pote miitꞌin miꞌauka wo teꞌeropyhuꞌat awyato auka hap ewywuat are. Iꞌatuhaiwot popuo syꞌat iꞌatuꞌe yt nakuap i utui hap ete hawyi teꞌeruwewi teꞌeruweꞌauka. 11Taꞌi uiwyriaꞌin miꞌiria ti saꞌawyꞌi wuat Kaĩ e hap het rakat ewywuat heko rakaria. Kaĩ ti saꞌawyꞌi ipyꞌahak toꞌywyt wakuat Apeu toiꞌauka yt nakuat i uito teꞌe hap toimoherep. Kaĩ ewywuat sese koꞌi miꞌiria tukupteꞌen aat kaꞌap are. Nimo te mekewat Tupana ehay ran moherep hat paini koro Parãu me Tupana toꞌe -Yt ereto teiꞌo uiꞌywania Iuteu ywania kuasa te hamo e. Maꞌato Parãu toto raꞌyn toikyꞌesat kahato haꞌup iwato morekuat po pyi. Miitꞌin tiꞌaparap mono Tupana kapiat weꞌeg hap teꞌetu yt naku i nug hamo toto. Itote toimoherep yne saꞌag sepap hap. Miꞌi hap ewy miꞌiria paini Parãu ewywuat tukupteꞌen Tupana ehay ran moherep haria maꞌato iꞌatupyꞌa pe yt kat i Tupana kyꞌe sese hap wywo are. Taꞌatuhenoi miitꞌin wen maꞌato iꞌatuekat kyewi hap yn teꞌeruwewanetup wywo. Iꞌewyte ti teꞌeruwemowato teran kahato hap kape yn teꞌeruwewanetup kaꞌap are. Yt kat i Tupana motypot hap sese iꞌatuekai are. Saꞌawyꞌi wuat paꞌi ran Kora e hap wanetup hap -Uito poꞌog Muisei kai e nimo Tupana mohey haria Muisei miꞌapykoktia pe. Toipohari yne teran Muisei Tupana mohey haria Tupana hũria haype. Maꞌato toiꞌaparap kahato Tupana pe hawyi Tupana miꞌauka meremo rakatno topyhuꞌat yi kaꞌa pe ipyyp. Taꞌi mekewat paꞌi Kora ewywuaria kahato tukupteꞌen ne mesup aipyꞌasetpe are. Miꞌiria Tupana hũria aimiꞌapykok aiwyriaꞌin Iesui mohey haria ete aipohari teran aimiꞌapykok wẽtup sehay upi yt Iesui ehay upi i haria. Miꞌiria wyti aru Tupana mimoma wuatnuaria paꞌi Kora ewywuat are. 12Yt naku i miꞌiria tunug aat kaꞌap toꞌope toꞌope pykai yt teꞌerokenꞌẽ hin i teꞌerenuk aiwywuat hamo. Aikotã uut aimiꞌu ete tenuk hap ewy miꞌiria aipyꞌasetpe ahenuk aiwoꞌokyꞌe hap nug hap etiat turan. -Heno watenuk yt aiꞌe pykai i teꞌerenuk aiwywo Iesui piit iãꞌãkap man watuꞌu turan iꞌewyte Iesui suu iãꞌãkap Uwa hy watuꞌu turan. -Tupana tikyꞌesat ahewaire waire hap iꞌatuꞌe Iesui mohey haria ewaure kaꞌa pe yt kat i wemoti hap wywo. Taꞌatumikyꞌesat yt weꞌeg i hap nug hap kape yn iꞌatuehay. Miꞌiria ti tukupteꞌen aikotã mekewat ywyhig hun ewy. -Meiẽ tuut aru iꞌaman aimikoi huꞌi hamo watoꞌe wen maꞌato ywytu uwato yn putꞌok e aiꞌmikoi pun hamuat. Yt iꞌaman hin i hewo aiko aimikoi ete. Miꞌi hap ewywuaria ti miꞌiria tukupteꞌen are. Miꞌiria ti ikahuria aimikoi ypia iyhop ikahuria ewywuat koꞌi maꞌato yt karãpe i haat rakaria ewywuaria. Karãpe haat eꞌat putꞌok e hawyi watuwat iꞌywa soꞌohep hamo maꞌato yt kat hin i ikaipyi watipuẽti miꞌu hewo hap ewy haria are. Miꞌi tã ti tukupteꞌen miꞌiria aikotã aimikoi aimiꞌypy hep yi pywiat rakat igag hap ewy are. Aikotã aimikoi ikuꞌuro rakaria ewy miꞌiria tukupteꞌen aimikoi ypia pyꞌasetpe are. 13-Taꞌi uruto eiꞌewy Iesui mohey kahato haria iꞌatuꞌe wen maꞌato Iesui mohey ran haria aikotã yꞌy ihy weꞌokmoĩ koꞌi wasere upi tõꞌẽ tõꞌẽ hawyi ihy mohun hap hawyi aimiꞌu wuat hap ewy Iesui mohey ran haria. Iꞌatuwanetup saꞌag nakat yn pote ti aiwanetup hap ywyk hanuaria. Iꞌewyte Iesui mohey ran haria ti aikotã waikiru hewyry ewy kahato are. Aikotã waikiru hoꞌowasat tuwewi aikowo aikowo taꞌatumikyꞌesat ewy tuwat. Maꞌato meiũran iꞌatuowasat hawe tukupteꞌen yt hẽtyhot i ywyhig hun me iꞌypyryp sese pe hap ewy aru aikope Tupana yn ikuap hap tote. Miꞌi hap ewy ti Iesui mohey ran haria iꞌypyryp aikotã wãtym koro iꞌypyryp hap ewy Tupana kuap hap ete.
14Nimo te ti mio tã e mekewat Tupana ehay moherep hat pot Enoki Atãu emiariru emiariru toꞌe -Tuut ti aru Tupana Aikaꞌiwat ahowawi typyꞌi kahato tesuraraꞌin atipy piaria wakuaria sese wywo e yt naku i nug haria moma hamo e. 15Wuatꞌi miitꞌin yt imohey haria i apiheg hamo tuut aheTupana e Enoki. Miꞌi hawyi ti aru toimoherep yne uwe waku uwe yt nakuat i hap e. Mekewat eꞌat pe ti aru toimoherep miitꞌin minug saꞌag nakat koꞌi yt nakuat i nug haria pe Tupana yt mikyꞌesat i nug haria pe e. Toiꞌatumoherep wuatꞌi ehamo e. Iꞌewyte torannia yt naku i iꞌatuehay saꞌag tetiat e. Iꞌatupyꞌahak tetiat hap enoi wuatꞌi miitꞌin ehamuat hamo tuut aheTupana e. Toimoherep yn woꞌoeremopusu hap koi hawyi yn soso hap iꞌewyte -Tupana ti yt naku i kahato iꞌatuꞌe hap moherep hamo tuut e. 16Iꞌatuweukaꞌi tetiat hap sio tomohit hap koꞌi toiꞌapykok yne hamo. AheTupana tuut tesuraraꞌin sem wywo e Enoki nimo. Miꞌiria ti taꞌatumikyꞌesat saꞌag ewywuat raꞌyn nug aat kaꞌap maꞌato yt heremo i haria are. Taꞌatuwẽ pyi ti -Uito poꞌog wuatꞌi kai iꞌatuꞌe ahepe are. Miꞌiria tikyꞌesat kahato taꞌatumotypot kahato hap -En poꞌog urukai iꞌatuꞌe iraniaꞌin hap. Miꞌiria ti ikat kahato taꞌatumotypot kahato -En ni yt naku i rakat iꞌatuꞌe wakuaria pe. Karãpe aiwat aimikyꞌesat ete aipowyro hawyi aheromopusu kahato hap -Yt naku i ti meke tã miꞌi miit ewy watunug iꞌatuꞌe iraniaꞌin me ahetiat pe. Yt watiꞌatumowepiit kuap i raꞌyn miꞌiria are. Taꞌatumikyꞌesat saꞌag yn taꞌatunug neran mote wakuat yt taꞌatunug kuap i taꞌatuhãꞌãg pykai are. -Uito ti waku kahato poꞌog torannia kai wakuap atunug iꞌatuꞌe. Waku kahato en iꞌatuꞌe ahepe ahekat kyewi. Iꞌatuehay se rakat taꞌatuehay wo aimowepiit maꞌato yt pywo pe hin i aimaꞌat teran haype neꞌi are. Miꞌi tã hap ete teꞌeremopokuap kahato. Miꞌiria ti teꞌeropotmuꞌe wẽtup sehay yt Iesui etiat enoi haria hin i. Eiweꞌeg wo o Tupana ehay pun haria miꞌiria are.
17Taꞌi mesup taꞌyn uiꞌe hap ewy taꞌatunug naꞌyn miꞌiria eipyꞌasetpe wẽtup sehay enoi haria are. Uiheꞌywytꞌin uheinytꞌin yne uhekatuwyria wẽtup sehay kape yn ni waku watuwanetup. Miꞌi ti ainapin saꞌawyꞌi wuat Iesui etiat 12 ok takaria aimuꞌe hap kape yn waku are. 18Mekewat saꞌawyꞌi wuaria Aipotypot Iesui potpoꞌororia sese ainapin kahato miꞌiria aimaꞌat teran haria ete aimaꞌat pupi are. Taꞌi mio tã iꞌatuꞌe ahepe 12 ok takaria -Meiũran wuatꞌi kahuro hap eꞌyian mete wyti aru tõꞌẽ kahato wẽtup ehay enoi haria. Miꞌiria ti aru aiꞌatumaꞌat reran haria iꞌatuꞌe raꞌyn ahepe. Mekewat yi kahuro hap yt pya i raꞌyn turan putꞌok iꞌatuꞌe ahowawi. Miꞌiria ti ikohyeput kahato taꞌatupiit mikyꞌesat guꞌuro ypy yn nug hap upi iꞌatuꞌe. Tõꞌẽ ehewowi wẽtup sehay moherep hanuaria iꞌatuꞌe. Eimimohey hãpyk takat Iesui etiat mohit hanuaria tõꞌẽ hawyi eipyꞌasetpe tukupteꞌen iꞌatuꞌe 12 ok takaria. Miꞌiria ti taꞌatupiit mikyꞌesat yt naku i guꞌuro ypy nug hap etiat wemoehapap haria yt Tupana mikyꞌesat wuatꞌi eꞌat piat ieineꞌen hap yt kyꞌesat i haria iꞌatuꞌe ahepe saꞌawyꞌi 12 ok takaria. 19Miꞌiria aimuꞌe haria wẽtup takat wakuat aiwoꞌokyꞌe hap moma rakaria aimohey ete aipohari teran haria. Miꞌiria ti ikyꞌesat aiwoꞌoewaure aimimohey etiat hap yn. Miꞌiria piit pe ti yt kat i raꞌyn Tupana Paꞌãu rakaria. Miꞌiria ti aikotã gaꞌapy puat haiwot rakaria miit auka haria ewy. Teꞌeruwanetup mesuwarotiat koꞌi kape yn.
20Miꞌiria ehay upi yt naku i watuwat are. Waku watomohey poꞌog poꞌog wuatꞌi eꞌat Aiwy Iesui are. Waku iheg kahato ihay hawyi watunug iꞌe hap yn. Waku aikotã ipotmuꞌeria 12 ok takaria ainapin haria wo watukupteꞌen motꞌi hap ewy aito are. Mio tã are yn uiwyriaꞌin waku sese rakat aimimohey pote. Waku watoꞌomoesaika moesaika aimimohey wakuat ete yn are. Taꞌi aiwat aimimohey ti poꞌog wakuat torannia kawiat hat are. Taꞌi miꞌi yn ni waku kahato ahehay Tupana kapiat hamo het upi are. Tupana Paꞌãu mikyꞌesat ewy yn waku wahẽtup Ipaꞌãu upi are. -Etum no esaika hap uhehay ewowiat sepap hamo watoꞌe Ipaꞌãu me are. Miꞌi hap yn ni waku raꞌyn Ipaꞌãu upi wahẽtup hap are. 21Uito ti atimohey kahato. Miꞌi pote eipe atikyꞌesat uiꞌe eweimohey kahato hap. Tupana ti yt puo hin i eikai uiꞌe tomohey hap ium ehepiat hamo. Tupana tum neran aikyꞌe hap miꞌi pote toꞌiro watikyꞌe Aikyꞌe hat. Waku watuweium Tupana pe aikyꞌe hamo. Waku Tupana yt wahowaĩ i aikyꞌe teran tipyt. Taꞌi waku ti Aikaꞌiwat wahekatup wuatꞌi eꞌat pe. Miꞌi hap yn ti waku uiwyriaꞌin. Tupana mipoꞌoro ahetiatno ihakyꞌeꞌi kahato tutum toineꞌen wuatꞌi eꞌat piat hamo. Miꞌi pote waku watikyꞌe Aikyꞌe hat are. 22Tupana ti waku watipowyro ihay enoi hap ete. Miꞌi tã ti toikyꞌesat kahato katupono iraniaꞌin yt tokuap i te haria piat tokuap hap toikyꞌesat tomotypot hap. Tomotypot saꞌup mo tutum neran iꞌatuehakyeraꞌat hap. Katupono toiꞌatuehakyeraꞌat teran iraniaꞌin yt imohey kuap i te haria are. 23Waku ti watiꞌatuehakyeraꞌat iraniaꞌin aria wato po pyi. Waku watimoherep muap aria wuatꞌi eꞌat piat hoꞌopot hap pyi. Waku paa watoꞌe iꞌatukyꞌe hap aipyꞌa pyi are. Iꞌewyte iraniaꞌin yt imohey kahato i te haria waku watiꞌatuekyi iꞌatukyꞌe hap wywo. Uiwyriaꞌin waku ti aiweꞌeg wo kahato yt nakuaria i yt imohey i te haria i muꞌe turan. Miꞌiria ti karãpe watimoherep Iesui ehay aimoꞌakagꞌaia teran yt nakuap i nug hamo. Yt naku i wataꞌat iꞌatuehay upi waire waire nug hamo. Waku watokenꞌẽ miꞌi nug hamo. Waku ti iꞌatupiit kahu hap yt aimoꞌakagꞌaia i iꞌatupiit kyꞌesat hamo. Waku aikotã ahesokpe ikytsig kahato ete yt watikyꞌesat i hap ewy. Waku ti watiꞌatuekyi yt naku i nug haria Iesui kape. Waku ti taꞌatupiit mikyꞌesat nug haria waire waire haria taꞌatuwuk hap kapiat haria watekyi Iesui kapiat weꞌeg haria wo. Aiweꞌeg i hap watiꞌywyk wywo pote watokenꞌẽ iꞌatueko pupi are. Yt naku i wataꞌaipok neꞌi aheko saꞌawyꞌi wuat yt naku i nug hap kape i raꞌyn are.
24Uiwyriaꞌin karãpe putꞌok e ahete ahoꞌopot hap ahatek hap turan ni Tupana ti aimoesaika kuap yne ahãꞌãg hap akit hamo are. Miꞌi pote waku watoꞌe Tupana pe -Urupowyro En Tupana katupono yt urutunug neran i ahiag miat iraniaꞌin miat uruiãꞌãg hap upi waku watoꞌe. Yt naku i uruiꞌatoiat En Tupana uruꞌywot maꞌato urupowyro En urumaꞌat hap akit hamo watoꞌe neꞌi. Taꞌi etikuap yne uruiãꞌãg hap putꞌok e turan. Miꞌi pote urumoesaika mekewat saꞌag nug hap akit hamuat waku watoꞌe Tupana pe are. 25-Tupana En yn ni uruetupana urutoꞌe. Miꞌi hawyi En ni poꞌog weꞌeg torannia kawiat hat urutoꞌe. Iꞌewyte En yn uruehakyeraꞌat kuap hat urutoꞌe. Urupowyro En uruiꞌaparap hap moma hamo Tupana. Urunug no En hãpyk sese rakaria wo ewaku hap ewy urutoꞌe. Uruikyꞌesat kahato ehamo urutukupteꞌen mesup mukiꞌite wuatꞌi eꞌat pe urutoꞌe. Urumowepiit ro En ewy. Uruimotypot reran En urumohãpyk kuap hat sese En mote. En ni poꞌog wuatꞌi apy tote urutoꞌe. En ni Wuatꞌi porekuaria Porekuat. En ni Wuatꞌi Miitꞌin Akag Koro. En ni wuatꞌi atipy piaria iꞌewyte yi totiaria Akag Koro urutoꞌe. En ni rat wuatꞌi apy i ipotmokoꞌi rakat. Gaꞌatpo hawyi mesup mukiꞌite hawyi torannia eꞌat piat urutoꞌe ewowi iꞌewyte Esaꞌyru Emipoꞌoro uruporekuat nuat Iesui set puo waku.
Currently Selected:
Iuta 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.