Epereu 1
1
Haga Wẽtup 1
Tupana Kaipyi Ihay
1Nimo te ti Tupana ihay kahato aiꞌywania Epereu ywania Iuteu ywania pe tomimoherep i moherep i ahepe nimo tehay. Aikotã aikotã toimoherep tehay moherep haria wẽ pyi. Tohoꞌoium iꞌatuepe tehay tomimoherep koꞌi. Yt toꞌoꞌewy hin i tuwemoherep aiꞌywania saꞌawyꞌi wuat pe tehay e. 2Maꞌato mesup te Tupana aimuꞌe Tosaꞌyru wẽ pyi. Koitywy tuwemoherep ahepe Tosaꞌyru ieineꞌen hap upi Tosaꞌyru minug upi Tosaꞌyru ehay hap upi tuwemoherep mesup. Yt nimo te wuat aimuꞌe hap ewy hin i raꞌyn tutunug mesup katupono Tosaꞌyru po wo Tupana tunug wuatꞌi mesuwarotiaria. Atipy totiat aat waty waikiru koꞌi Tosaꞌyru po wuat iminug koꞌi. Miꞌi tupono ti tutum yne meimewat koꞌi torannia Tosaꞌyru pe. Mesuwat torannia yne meimewat -Ewatno e. Pyno ereineꞌen no Mesuwat Yne Kaꞌiwat no e. 3Tupana Iãꞌãkap Sese Haꞌyru yn iꞌewy sese rakat. Wẽtup Miit ewy yn iꞌatueko wẽtup yn iꞌatumikyꞌesat koꞌi wẽtup yn iꞌatumotypot hap toꞌokupitu. Tosaꞌyru esaika hap wo toimopyhuꞌat yne atipy koꞌi mesuwarotiaria iꞌewyte atipy piaria Haꞌyru inug koꞌi yne yne. Toꞌywot ehay upi toimoesaika yne yi aat waikiru koꞌi waty Haꞌyru esaika hap mo inug iheg me. Iꞌewyte Tosaꞌyru suu wo aipit pit hap aiminug saꞌag toikoho yne. Iesui tipuruk yne aiminug saꞌag hawyi -Waku eraꞌapyk mesuwe uipo sese kai uiꞌyatype atipy pe e. Waku eraꞌapyk mesuwe uhepiat emotypot hap tote e katupono woronug En Wuatꞌi Wuatꞌi Porekuatno poꞌog poꞌog wuatꞌi kawiat hesaika rakatno e Tupana Tosaꞌyru pe. 4Miꞌi tupono yt uwe i atipy piaria poꞌog hesaika Haꞌyru kai. Yt uwe i putꞌok e kuap tuwete atipy piaria Iesui esaika sakpo hap ete katupono miꞌi raꞌyn Wuatꞌi Akag Koro topyhuꞌat. Iꞌewyte het poꞌog iꞌatuset kai iwato katupono Tupana tuwesetpehik -Uhaꞌyru sese ti En e Iesui pe.
5Miꞌi rakirẽ yt karãpe i atipy piaria pe -Uhaꞌyru sese En wuatꞌi eꞌat pe Eꞌywot sese wo areineꞌen Uito e Tupana Tosaꞌyru pe yn. Maꞌato yt karãpe i atipy piaria pe -Uhaꞌyru sese ti En e Tupana morekuat Tawi wepy miwan 2.7 pe. 6Maꞌato Tosaꞌyru sese tomimotypot wuatꞌi eꞌyian mete wuat pe mio tã e -Meiũran aru woromoherep En wuatꞌi miitꞌin me e. Miꞌi tupono uipotpoꞌororia pe areꞌe -Eweimotypot ro Uhaꞌyru sese areꞌe yn atipy piaria pe e Tupana. 7Maꞌato atipy piaria pe mio tã e Tupana miwan me -Eipe ti uheropat haria meremo rakaria wasere hyha hap ewywuaria eipe e. Merep merepꞌe hap ẽty ewywuaria eipe worohoꞌonug e. Uhehay ereto merep hanuaria eipe e Tupana topotpoꞌororia atipy piaria pe mekewat Tawi wepy 104 piat pe. 8Maꞌato Tosaꞌyru pe mio tã wẽtup e -Wuatꞌi Porekuat Eporekuat no ti erepyhuꞌat e. Wuatꞌi akag Porekuat no En e. Yt karamuo i ikahuro Miitꞌin Porekuat Koro wo En e. Toineꞌen epo pe puretig ewywuat hap esaika moherep hamuat e. Taꞌi En ni wuatꞌi miitꞌin powyro teran hanuat katupono wakuat yn nug hat En e Tupana Tosaꞌyru pe. 9Morekuat Koro wo ieineꞌen hat Uhaꞌyru katupono En hãpyk yn hat Wakuat Sese Kyꞌe Hat En mote e. En ni yne yt naku i etiat haiwot rakatno e. Miꞌi pote woroꞌairo En Uhaꞌyru Wuatꞌi Porekuat no e. Koitywy atopag eꞌakag me ikap takat mohag ewywuat e. Miꞌi ti wuatꞌi kawiat Morekuat poꞌog poꞌog ekatuwyriaꞌin kai e hap e. En ni Uimimowato Uimimowepiit En e Tupana morekuat Tawi miwan 45.67 piat pe.
10Miꞌi hawyi toꞌe Tosaꞌyru piat pe saꞌawyꞌi wuat miwan me -Wuatꞌi nug hat En Uhaꞌyru e. Yi gaꞌapy mikoi nug hat aat waty waikiru koꞌi nug hat En e. Torannia saꞌawyꞌi wuat nug hat En e. Epo esaika hamo atunug yne yne e. 11Maꞌato miꞌiria aru meiũran teꞌeruwewuk yne taꞌatuporo hawyi ikahuro raꞌyn maꞌato En ni aru ereineꞌen ihãite wuatꞌi eꞌat piat rakatno e. En ni ereineꞌen yne yne weityk pykai e. Maꞌato aat atipy waikiru yi gaꞌapy yꞌy waty ti aru tuwemoweityk yne sokpe potꞌi ewy maꞌato En yt karãpe i e. 12Miꞌiria aikotã sokpe potꞌi ewywuat tukupteꞌen. Topugha hawyi sokpe potꞌi tuweityk hap ewy aru miꞌi hawyi ipakup takat toimoherep e. Maꞌato En Uhaꞌyru yt karãpe i epotꞌi aru katupono ereineꞌen aru wuatꞌi eꞌat pe epakup yn e Tupana Iesui pe saꞌawyꞌi pyi te nimo te morekuat Tawi wepy 102.25 pe. 13Miꞌi hawyi Tosaꞌyru pe mio tã e iwan me -Eraꞌapyk to Uhaꞌyru mesuwe uipo sese kai uimimotypot no e. Meiũran aru ewanikaptia okpe tote epy topyhuꞌat aikotã morekuaria tunug -Uito poꞌog e hap moherep hamo. Wuatꞌi eꞌat pe ewanikaptia akit hatno areineꞌen e miwan me. Maꞌato iraniaꞌin atipy piaria pe yt karãpe i mio tã e. 14Pyno ahenoi ehepe mio tã e Tupana atipy piaria pe. Taꞌi mio tã e teropat haria pe -Eipe uheropat haria e. Maꞌãu kawiat eipe e. Eipe ti uimiehakyeraꞌat haria yi totiaria powyro hanuaria e. Miꞌi nug hamo worohoꞌopoꞌoro e. Uhaꞌyruꞌin uhakiꞌytꞌin uimohey haria powyro hanuaria wo worohoꞌonug eipe e. Iꞌewyte yt uimohey i te haria powyro imohey hap etiat haria wo worohoꞌonug eipe e Tupana saꞌawyꞌi te miwan me atipy piaria pe. Pyno koitywy watikuap taꞌyn poꞌog Haꞌyru atipy piaria teropat haria kawiat hap.
Currently Selected:
Epereu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.