Korosi 4
4
Haga 4
Waku Aipainug Hap Tupana Mikyꞌesat Ewy Yn
1Gaꞌiwaria Iesui mohey haria waku watum aipotpap nug haria pe saꞌup waku hap ewy iꞌatupotpap hap oktan. Waku watum saꞌup aikotã miit hãpyk takat tum hap ewy aikotã miit hegyiꞌat rakat ewy. Miꞌi pote waku watimoꞌẽ hãpyk ahemiitꞌin me ahekat katupono atipy pe toineꞌen Aikaꞌiwat koro gaꞌiwaria aito mesuwe pykai.
2Karapeĩ wahẽtup Tupana kape aimikyꞌesat waku wahẽtup -Tuut wyti aru aiꞌe hap wywo. Yt tutum i te hawyi waku wahẽtup i. Miꞌi hawyi aiwesat sio waku e wahẽtup hap kape sio yt e waku -Arehum ewowi Tupana waku watoꞌe. 3Karãpe ewehẽtup eimikyꞌesat koꞌi urupowyro hamuat waku ewehẽtup to -Tupana etum Pauruꞌin moesaika hamuat ehay etiat henoi hamo eweiꞌe. Etiꞌatupowyro o miꞌiria iraniaꞌin yt ekuap i te haria atumuꞌe hamo katupono typyꞌi kahato te Emipoꞌoro Esaꞌyru uruporekuat nuat yt kuap i te haria tukupteꞌen ehay ti migꞌi wo te topyhuꞌat iꞌatuepe waku eweiꞌe Tupana pe -Uruikyꞌesat kahato Pauruꞌin powyro hap katupono morekuaria tipyhyp teran ehay uruporekuat koro etiat waku eweiꞌe Tupana pe are. Iesui ehay pyhyp hamo morekuaria uipyhyp mesuwe woꞌopyhik hawe are. 4Pyno ewehẽtup -Tupana etipowyro kahato o Pauru ehay enoi miitꞌin miat kuap hamo waku eweiꞌe o katupono yt naku i ihik wo neꞌi ehay moherep hap waku eweiꞌe Tupana pe aat kaꞌap uipowyro hamuat. 5Waku weꞌeg kahato haria wo watopyhuꞌat karãpe yt Iesui mohey i raꞌyn haria pyꞌasetpiat ahehay turan. Waku wahenoi iꞌatuepe Aipotypot Iesui etiat. Waku watikat miitꞌin iꞌatumuꞌe hamuat ihay se rakat yne eꞌat turan. 6Waku watikat kahato aiwanetup hawe iꞌatuwesat hamuat yne apo apo iꞌatuꞌe hap ete. Waku watiꞌatuwesat Tupana weꞌeg hap ewy pywuat woꞌowesat hap ewy ihay se rakat ewy waku watekyi Iesui kape yt imohey i te haria are.
Pauru Tipoꞌoro Unesimu Iesui Mohey Hatno Toineꞌen Hawyi
7Mesup atipoꞌoro ehewowi aikywyt aheywyt Tikiku. Waku kahato Tikiku uimikyꞌe kahato. Yt iperup hin i Tupana potpap nug hamo. Tikiku yt toiwaure hin i Tupana eropat hap. Aiꞌewy kahato ipotpap takat Tikiku Aikaꞌiwat potpap ete. 8Pyno atipoꞌoro Tikiku ehewowi tohenoi yne aru putꞌok toꞌe hawyi uhetiat aikotã areineꞌen mesuwe hap etiat. Iꞌewyte aru tohenoi yne ehetiat aikotã eweikupteꞌen Korosi pe hap tohenoi aru putꞌok toꞌe mesuwe i hawyi. Worohoꞌomowepiit teran haype atipoꞌoro Tikiku ehewowi. Tohenoi yne mesuwiat uheineꞌen hap hawyi eiwepiit kahato rakaria wo eweikupteꞌen aru are. 9Ehetawa piat Unesimu aru atipoꞌoro wy ehewowi. Aikywyt aheywyt kahato Unesimu. Iesui mohey kahato hat Unesimu. Putꞌok iꞌatuꞌe Unesimu Tikiku wywo hawyi taꞌatuhenoi kahato ehewowi kat som urutunug mesuwe hap koꞌi.
10Aiwy Aritaku toineꞌen mesuwe woꞌopyhyp hawe uiwywo toineꞌen. Kuekatu toipoꞌoro ehewowi. Iꞌewyte Panape enyt mepyt Maku ipoꞌoro tehay wy tuwehum hap ehewowi. Pyno meiũran Maku putꞌok e itote pote waku -Ereke ro uruwy eweiꞌe o Maku pe eiwepiit hap wywo ikyꞌe hap wywo aikotã areꞌe saꞌawyꞌi hap ewy ewetunug Maku pe are. 11Mehin Iusue iꞌewyte ipoꞌoro kuekatu ehewowi mekewat wẽtup het Iutu e hap. Pywo ti rat uipowyro kahato mesuwe miꞌiria kuekatu e haria are. Taꞌatukyꞌesat kahato Tupana topyhuꞌat Morekuat no mesuwat yi tote hap miꞌi pote iꞌatupotpap kahato inug hamo. Miꞌiria yne uiꞌewy Iuteu ywania kawiat Iesui mohey haria. Uimowepiit haria kahato miꞌiria are.
12Aiwy Epawai toineꞌen mesuwe. Miꞌi iꞌewyte waku e hap toipoꞌoro ehewowi. Aipotypot Iesui eropat kahato hat Epawai eipyꞌasetpywiat miꞌi. Miꞌi pote tohẽtup aat kaꞌap topyꞌa pyi Tupana kape yne hesaika hap wywo -Etipowyro aiwyriaꞌin tawa Korosi piaria emikyꞌesat oktan nug hanuaria teꞌeropyhuꞌat. Etiꞌatumotag miꞌiria Esaꞌyru oktan e. Etiꞌatumoesaika yt karãpe i eꞌatoiat hamuat e. Atikyꞌesat itotiaria pywo iꞌatuꞌe yne hap ehay etiat hap e Epawai aat kaꞌap meiũpepyi Tupana kape epowyro hamuat. 13Aiwy Epawai tikyꞌesat kahato yne eipe yne tawa Korosi piaria Iesui mohey haria wo hap toiꞌatukyꞌesat iꞌewyte tawa Irautiseia piaria iꞌewyte tawa Erapori piaria yt uheso hin i toiꞌatukyꞌesat yne eipe imohey haria wo hap are.
14Iꞌewyte aimikyꞌe aipohag nug hat Iruka iꞌewyte aiwy Tema tiꞌatupoꞌoro eikyꞌe hap -Uruipoꞌoro uruiꞌatukyꞌe eiperia e hap. 15Yne Iesui mohey haria piat waku e hap uruipoꞌoro. Kuekatu uruipoꞌoro tawa Irautiseia piaria kape. Uruikyꞌesat kahato ehehãite hap eweiꞌe mehin Niwa pe iꞌewyte yne Iesui mohey haria toꞌyat puat waꞌatunug haria pe are. Miꞌiria kape kuekatu uruipoꞌoro.
16Meikowat uimiwan o eweimowẽpap aiũpe eiiwaꞌatunug hap tote are. Miꞌi hawyi eweikuap yne raꞌyn hawyi waku eweipoꞌoro tawa Irautiseia kape miꞌiria piat ikuap hamo teꞌeruwaꞌatunug hawyi. Iꞌewyte eiperia eweimowẽpap o uimiwan saꞌawyꞌi wuat uimipoꞌoro tawa Irautiseia piaria pe. 17Miꞌi hawyi atipoꞌoro i sehay uhyt Akipu kape. Pyno koitywy atoiat eipo pe raꞌyn Aikaꞌiwat potpap koꞌi. Miꞌi hap ti koitywy tutum eipo pe raꞌyn. Pyno koitywy eweꞌeg wo o. Eweimoma o ipotpap hap imikyꞌesat oktan are.
18Pyno ti uipo wo ti yne mesuwat atunug uimiwan are. Pyno atunug mesuwe miwan me uhet sese uipo minug uikuap hamuat sio uito sio yt kuap hamo. Pyno yt eweiwaure teiꞌo uipyhik hap mesuwe morekuat woꞌopyhyp hawe. -Pyno Tupana etiꞌatukyꞌe kahato Tupana mohey haria tawa Korosi piaria.
Currently Selected:
Korosi 4: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.