1 Iuwãu 1
1
Haga Wẽtup 1
Tuwemoherep Taꞌyn Tupana Ehay Ahewowi
1Uito ti Iesui mikyꞌe Iuwãu. Mesuwat uimiwan atipoꞌoro ehewowi uiwyriaꞌin. Iesui etiat atiwan ehewowi. Aheineꞌen hap eꞌyian mete Iesui toineꞌen are. Pywo ti rat uruto ipotmuꞌeria urueha wo urutaꞌakasa raꞌyn mesuwe mekewat Tupana ehay Miit kawiat rakat. Iꞌewyte miꞌi turan uruewaure kaꞌa wo uruikuap ihay wakuat. Iꞌewyte ti urutemig urupo wo mekewat aipiit ewywuat rakat. 2Saꞌawyꞌi yt heremo i toineꞌen Tupana ehay wakuat rakat maꞌato miꞌi hawyi tuwepiit nug naꞌyn tuwemoherep taꞌyn Miit no sese raꞌyn ahowawi are. Miꞌi Miit wyti urutaꞌakasa raꞌyn. Miꞌi hap ti koitywy uruimoherep taꞌyn ehepuo uruehay wuat. Miꞌi ti wuatꞌi eꞌat piat ieineꞌen hat urutaꞌakasa raꞌyn. Saꞌawyꞌi Toꞌywot atipy piat wywo yn toineꞌen maꞌato koitywy toimoherep ahepe Tosaꞌyru. 3Aiwywo raꞌyn toineꞌen. Miꞌi hap uruikuap uruewaure kaꞌa pe. Uruehaꞌat hap uruimoherep ehepe katupono uruꞌewy aiwoꞌoꞌewy ewy watopyhuꞌat hap uruikyꞌesat kahato Iꞌywot wywo Haꞌyru wywuat aiwoꞌowese hap. Uruꞌewywuat Aipotypot Iesui ewywuat hap uruikyꞌesat. 4Miꞌi hap kyewi ti mesuwat urumiwan atipoꞌoro ehewowi uruehay eimowepiit kahato hamuat.
Waku Aiꞌaparap Hap Wahenoi Raꞌyn
5Pyno Haꞌyru wẽ pywiat imienoi uruimoherep taꞌyn ehepe saꞌawyꞌi te wuat imienoi mio tã e hap. Tupana yn nyti ariãty sese e hap. Tupana kai ti yt kat i iꞌypyryp hap toineꞌen. Yt naku i nug hap yt kat i ikai. 6Pyno Tupana wywo urutoꞌowese kahato watoꞌe maꞌato watunug ne seko saꞌag nug hap pote iꞌypyryp wiat watoineꞌen hap ewy. Miꞌi pote ti -Atikuap Tupana watoꞌe maꞌato yt naku i watunug saꞌag pykai. Miꞌi pote aiwemaꞌat hap neꞌi topyhuꞌat yt kat i wyti aiꞌe pywo piat hap pote are. 7Maꞌato watopyhuꞌat hẽtyhot pe Aikaꞌiwat ewy pote pywo pe watoineꞌen. Miꞌi pote ti iwywuat aiwoꞌowese hap topyhuꞌat kahato are. Miꞌi hap kaipyi ti Tosaꞌyru Iesui suu wo Tupana tikoho yne aiminug saꞌag koꞌi. Mekewat kat koꞌi kat koꞌi aiminug saꞌag koꞌi toiꞌatukoho aat kaꞌap ahewyry Iesui wywo imikyꞌesat ewywuat pote. Miꞌi hawyi tomikyꞌesat nug haria watopyhuꞌat. 8Iꞌewyte ti -U yt karãpe i saꞌag atunug watoꞌe pote iꞌewyte koitywy yt karãpe i atiꞌaparap Tupana pe watoꞌe pote heso rakatno watopyhuꞌat katupono iꞌaparap kahato haria aito pote. -Yt kat i saꞌag atunug watoꞌe pote aiwemaꞌat hap topyhuꞌat mio tã aiꞌe hap kaipyi are. Yt kat i hin i topyhuꞌat pywo aiꞌe hamuat hap e. Miꞌi hawyi heso rakaria wo watoineꞌen. 9Maꞌato watoꞌe Tupana pe aipyꞌa pyi -Uiꞌywot atiꞌaparap kahato epe uhehay wo uiminug saꞌag wo watoꞌe pote aimohãpyk kahato. Miꞌi hawyi -Waku pe ereineꞌen mesup e ahepe watoiat yne aiminug saꞌag hawyi. Tupana aikyꞌe kahato pote toineꞌen kahato aikawiatno hamo. Yt aiꞌatoiat teran hin i watiꞌaparap topiat pykai aikyꞌe kahato. Aiꞌapiheg hamuat pykai aikyꞌe hap wywo aiꞌapiheg are. 10Maꞌato watoꞌe -Yt karãpe i atiꞌaparap Tupana pe miitꞌin me watoꞌe pote ti -Heso rakaria wo eipe e Tupana ahepe katupono yne miitꞌin iꞌaparap haria atikuap kahato e Tupana ahepe. Atikuap yne eiwanetup saꞌag hap koꞌi e ahepe.
Currently Selected:
1 Iuwãu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.