Nambas 1
1
Fas sensas fo kaontem olketa pipol blong Israel
1Long mektu yia bihaen long taem wea olketa traeb blong Israel i lusim Ijip, long mektu mans, long fas de blong hem, Yawe hemi toktok long Mosis. Hemi hapen taem olketa stap long drae eria long Saenae. Yawe hemi toktok wetem Mosis insaet long Tambu Haostent wea olketa mit wetem hem. An hemi tok olsem, 2“Mosis, yu wetem Haeprist Eron, yutufala mas mekem sensas fo kaontem olketa man blong Israel. Yufala mas kaontem olketa falom olketa laen an olketa famili long tuelfala traeb blong Israel. Yufala mas raetemdaon nem blong olketa man 3hu i kasem tuenti yia an goap, an hu i fit fo go faet. 4An yutufala mas tekem wanfala lida from evri traeb long tuelfala traeb blong yufala, mekem olketa helpem yutufala. 5Nem blong tuelfala lida ya nao hemi olsem:
Long traeb blong Ruben, lida blong olketa nao Elisua, san blong Sedeua.
6An long traeb blong Simion, lida blong olketa nao Selumiel, san blong Surisadae.
7An long traeb blong Jiuda, lida blong olketa nao Nason, san blong Aminadab.
8An long traeb blong Isaka, lida blong olketa nao Netanel, san blong Sua.
9An long traeb blong Sebulun, lida blong olketa nao Eliab, san blong Helon.
10An long Efrem, disfala fas traeb blong Josef, lida blong olketa nao Elisama, san blong Amihud.
An long Manase, disfala mektu traeb blong Josef, lida blong olketa nao Gamaliel, san blong Pedasua.
11An long traeb blong Benjamin, lida blong olketa nao Abidan, san blong Gideoni.
12An long traeb blong Dan, lida blong olketa nao Ahiesa, san blong Amisadae.
13An long traeb blong Asa, lida blong olketa nao Pagiel, san blong Okran.
14An long traeb blong Gad, lida blong olketa nao Eliasaf, san blong Duel.
15An long traeb blong Naftali, lida blong olketa nao Ahira, san blong Enan.”
16Hem nao tuelfala lida wea Yawe hemi siusim fo duim waka ya. Olketa evriwan i lida long tuelfala traeb blong Israel, an bikman long olketa laen blong olketa.
17-46Long mektu mans, long fas de blong hem, Mosis an Eron i tekem tuelfala lida ya. Olketa nao i kolem evriwan fo kam tugeta. An olketa kaontem olketa man falom olketa laen an famili blong olketa. Olketa raetemdaon nem blong olketa man hu i kasem tuenti yia an goap, hu i fit fo go long faet. So olketa kaontem evriwan olsem wea Yawe hemi bin talem Mosis. Nao, hemi mekem disfala sensas long taem wea olketa stap long drae eria long Saenae. Olketa stat long traeb blong Ruben, hu hemi fasbon pikinini blong Israel, an namba blong olketa evriwan i olsem:
Olketa man long traeb blong Ruben, namba blong olketa kasem 46,500.
An olketa man long traeb blong Simion, namba blong olketa kasem 59,300.
An olketa man long traeb blong Gad, namba blong olketa kasem 45,650.
An olketa man long traeb blong Jiuda, namba blong olketa kasem 74,600.
An olketa man long traeb blong Isaka, namba blong olketa kasem 54,400.
An olketa man long traeb blong Sebulun, namba blong olketa kasem 57,400.
An olketa man long traeb blong Efrem, namba blong olketa kasem 40,500.
An olketa man long traeb blong Manase, namba blong olketa kasem 32,200.
An olketa man long traeb blong Benjamin, namba blong olketa kasem 35,400.
An olketa man long traeb blong Dan, namba blong olketa kasem 62,700.
An olketa man long traeb blong Asa, namba blong olketa kasem 41,500.
An olketa man long traeb blong Naftali, namba blong olketa kasem 53,400.
Nao namba blong olketa evriwan i kasem 603,550 man.#Nambas 26:1-51.
47Bat olketa no kaontem olketa long traeb blong Livae wetem olketa narawan, 48bikos Yawe hemi bin tok olsem long Mosis fastaem, 49“Taem yu kaontem olketa man hu i fit fo faet, yu mas no kaontem olketa long traeb blong Livae wetem olketa narafala traeb. 50-51Waka blong traeb blong Livae hemi fo lukaftarem Tambu Haostent wetem evrisamting wea i stap long hem. Oltaem olketa mas putumap evri haostent blong olketa raonem Tambu Haostent, an sapos yufala muv go long narafala ples, olketa ya mas karim Tambu Haostent wetem evrisamting. Bae olketa nomoa mas tekemaot Tambu Haostent, an mas putumap moa long eni ples wea bae yufala go long hem. Bat sapos eni narafala man hemi kam insaet long tambuples, yufala mas kilim hem dae.
52“Olketa traeb blong Israel mas stap long olketa grup blong olketa, an long famili blong olketa, an olketa mas putumap haostent blong olketa kolsap long flag blong olketa. 53Bat olketa long traeb blong Livae nao mas stap kolsap raonem Tambu Haostent fo lukaftarem an gadem, mekem no eniwan hemi save kam spoelem hem. Long disfala wei, bae mi no kros long evriwan blong Israel.”
54Nao olketa blong Israel mekem evrisamting barava olsem wea Yawe hemi talem long Mosis.
Currently Selected:
Nambas 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.