Neiham 1
1
Fas toktok
1Hem ya profesi abaotem Nineve wea Yawe hemi talemaot long Neiham, hu hemi wanfala man from disfala taon long Elkos.
Yawe hemi kros tumas long olketa pipol blong Nineve
2 (Profet) Yawe nomoa hemi God, an hemi no laekem eniwan hu hemi falom hem fo falom moa eni narafala god. Hemi kros tumas long evriwan hu i agensim hem, an bae hemi panisim olketa.#Eksodas 20:5; 34:14; Diutronomi 4:24; Josua 24:19. 3Hemi no save kros kuiktaem, bat hemi garem paoa. So, bae hemi panisim evriwan hu i duim olketa ravis samting.#Eksodas 34:6-7; Nambas 14:18; Joel 2:13; Jona 4:2.
Taem Yawe hemi kam, hemi save kam antap long saekloun. An taem hemi step long graon, dast hemi kamap olsem bikfala klaod. 4Hemi save tok long solwata, an hemi kamap drae. Hemi mekem olketa riva tu fo drae. Hemi mekem olketa gudfala graon long Basan hemi drae, an olketa tri long maonten long Kaamel i drae tu. Evri gudfala flaoa long Lebanon tu, hemi mekem olketa dae. 5Taem hemi kam, olketa bikfala maonten i seksek, an olketa smolfala hil i kamap sof olsem wata wea hemi randaon. Disfala wol wetem evriwan hu i stap long hem, i fraet an seksek. 6?Hu nao hemi fitim fo stanap strong taem Yawe hemi kros?#Sam 76:7; Esikiel 22:14; Joel 2:11; Malakae 3:2; Revelesin 6:17. Taem hemi kros, hemi olsem bikfala faea wea hemi laet, an olketa bikfala ston i smas go nomoa long asis.
7Yawe hemi gud tumas. Hemi save lukaftarem olketa pipol blong hem taem trabol hemi kasem olketa. Hem nao hemi strongfala sefples fo olketa hu i trastem hem.#Sam 46:1; Jeremaea 16:19. 8Bat bae hemi spoelem Nineve wetem olketa pipol long hem, olsem wea wanfala bikfala flad hemi kavaremap evri ples. Ya, bae hemi kilim dae olketa hu i gohed fo agensim hem.
9Eniwan hu hemi mekem enikaen ravis plan fo agensim Yawe, bae Yawe hemi spoelem hem. No eniwan save agensim Yawe long mektu taem. 10Bae hemi olsem wea ropnila hemi taengem hem, o hemi barava drang fogud an no save stanap. Bae Yawe hemi spoelem hem fogud, olsem wea faea hemi bonem drae gras.
11!Olketa pipol blong Nineve! Wanfala man long yufala hemi mekem olketa ravis plan fo agensim Yawe, an hemi givim tu olketa ravis advaes long olketa pipol.
12Yawe nao hemi tok olsem, “Olketa pipol blong Jiuda. Nomata olketa pipol blong Nineve i plande tumas an strong winim yufala, bat bae mi spoelem olketa finis, an no eniwan long olketa bae hemi laef. Mi bin mekem yufala safa tumas, bat bae mi no duim moa enitaem. 13Bae mi brekem disfala paoa blong Nineve wea hemi gohed fo taengem yufala olsem strongfala sen, mekem yufala go fri.”
14Yawe nao hemi tok olsem agensim olketa pipol blong Nineve, “Bae yufala no garem pikinini fo kipim nem blong yufala. Olketa kaving wea i stap long olketa tambuhaos blong yufala ya, bae mi spoelem evriwan. Bae mi digim grev fo yufala, bikos hemi no fitim nao fo yufala laef.”
15 (Profet) !Olketa pipol blong Jiuda! !Yufala lukim! Wanfala man fo tekem mesij, hemi katkros kam long olketa maonten. Hem nao hemi tekem kam gudnius, an hemi talemaot nius long piis.#Aesaea 52:7. Hemi gud wea yumi gohed fo selebretem olketa bikde blong yumi, an fo kipim olketa promis wea yumi bin mekem long Yawe. Bae olketa ravis pipol i kanduit kam moa fo tekova long lan blong yumi. Bae Yawe hemi barava spoelem olketa finis, an no eniwan long olketa bae hemi laef.
Currently Selected:
Neiham 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.