Eklesiastes 1
1
No enisamting hemi fitim tingting blong yumi
1Olketa toktok insaet long disfala buk, hemi blong Waes Tisa hu hemi san blong King Deved, an hemi king long Jerusalem.
2Disfala Waes Tisa hemi tok olsem,
“!Laef blong yumi, hemi no fitim tingting blong yumi!
!Ya, evrisamting hemi barava no fitim wanem yumi tingim!”
3Oltaem yumi barava wakahad tumas,
bat yumi no garem eni gudfala samting from olketa hadwaka blong yumi.
4Evriwan i bon kam long disfala wol,
an bihaen olketa dae nomoa.
Bat oltaem, disfala wol hemi stap semsem nomoa.
5Evri de, san hemi kamap long moning, an hemi godaon moa long ivining.
An hemi goraon fo kamap moa long neks de.
6Win hemi blou go long saot, an hemi blou go long not.
Hemi goraon olsem nomoa, go-go hemi
kambaek moa falom sem rod wea hemi kamap long hem.
7Oltaem evri riva i ran godaon insaet long solwata,
bat solwata hemi nating fulap nomoa winim mak blong hem.
Oltaem, wata hemi gobaek moa long ples wea hemi kamaot long hem bifoa,
an hemi falom moa sem rod blong hem godaon long solwata.
8Evrisamting ya hemi gohed olowe olsem nao.
Oltaem, yumi lukim olketa samting ya
an yumi herem olketa samting ya,
bat yumi nating save talem hemi naf nao.
9Olketa samting wea hemi kamap bifoa, bae hemi kamap moa.
Olketa samting wea olketa duim bifoa, bae olketa duim moa.
No eni niufala samting hemi stap long disfala wol.
10Samfala pipol i tok olsem,
“!Oloketa! !Hem ya wanfala niu samting nao!”
!Bat hemi no tru ya!
Samting ya hemi stap finis long bifoa kam.
11Olketa pipol no save tingim olketa olo blong bifoa kam.
An olketa pipol wea bae i bon kam bihaen long yumi,
olketa tu, no eniwan bae tingim olketa ya.
Olketa samting i no fitim tingting blong yumi
12Mi nao mi Waes Tisa, an mi king long Israel, wea mi stap long Jerusalem. 13Mi bin yusim save an waes blong mi fo faendemaot wanem pipol i duim long disfala wol. An mi lukim dat disfala laef God hemi givim long yumi, hemi barava hevi tumas. 14Mi lukim finis evrisamting wea hemi gohed long disfala wol, bat mi save talem nomoa dat evrisamting ya hemi no fitim tingting blong yumi. Hemi olsem yumi gohed fo aftarem win nomoa.
15Ya, enisamting wea hemi no stret, yumi no save stretem,
an enisamting wea hemi no stap, yumi no save kaontem nao.
16Mi tingting olsem, “Mi kamap wanfala bikman finis, an mi waes winim olketa king hu i bin rul fastaem long Jerusalem. An mi savegud long olketa wei blong waes tingting.”#1 Kings 4:29-31. 17So, mi traehad fo save long wanem hemi waes, an mi traem fo save long wanem hemi krangge. Bat mi lukim hemi olsem wea mi gohed fo aftarem nomoa win.
18Bikos, taem man hemi kamap waes tumas, hemi gohed fo wari tumas tu,
an taem hemi save tumas, hemi gohed fo sore tumas tu.
Currently Selected:
Eklesiastes 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.