Malakae 2
2
Yawe hemi tokstrong long olketa prist from ravis tising blong olketa
1Yawe hu hemi garem evri paoa, hemi tok olsem, ?Olketa prist. Distaem mi givim disfala strong toktok long yufala. 2Sapos yufala no obeim mi o tinghevi fo mekhae long nem blong mi, bae mi mekem trabol fo kasem yufala an fo kasem gudfala laef wea yufala prist i garem. Ya, mi duim finis long yufala, bikos yufala nating tinghevi fo mekhae long nem blong mi. 3An from disfala samting nao, bae mi finisim laen blong yufala, an bae mi rabem fes blong yufala wetem bele yufala aotem from olketa animol wea yufala sakrifaesim. So yufala no fit fo waka olsem prist an bae mi tekem yufala wetem olketa bele ya, an torowem go long ravis. 4Long datfala taem nao, bae yufala save wea mi wonem yufala long disfala strong toktok olsem, mekem mi mas no finisim disfala spesol agrimen wea mi bin mekem bifoa wetem yufala prist long traeb blong Livae.#Nambas 3:11-13. 5Long disfala agrimen, mi bin promis fo givim gudfala laef long piis fo olketa long laen blong yufala. Ya, mi duim olsem mekem olketa tinghevi fo mekhae long nem blong mi.#Nambas 25:12-13. 6Olketa bin gohed fo tisim pipol fo falom nomoa stretfala wei. Olketa bin falom stretfala wei ya blong mi an stap gudfala long piis, an helpem plande pipol fo no falom ravis wei blong sin.
7?Olketa prist nao i mesenja blong mi Yawe hu mi garem evri paoa. So, olketa mas tisim pipol fo savegud long tru wei blong mi, an hemi gud fo pipol i kam fo lane from olketa. 8Bat yufala olketa prist i les finis long stretfala wei. An evrisamting wea yufala tisim long pipol, hemi mekem plande fo gorong. Yufala brekem finis disfala spesol agrimen wea mi bin mekem wetem yufala long traeb blong Livae. 9So, mi letem evri pipol fo meksem long yufala, bikos yufala nating falom nomoa wei blong mi, bat fevarem nomoa samfala pipol taem yufala tisim olketa.?
Hem nao toktok blong Yawe hu hemi garem evri paoa.
Olketa long Jiuda i maritim woman blong narafala ples
10 (Profet) God hu hemi dadi blong yumi, hem nao hemi mekem yumi evriwan. ?Sapos hemi olsem, waswe nao yufala brekem spesol agrimen wea olketa olo blong yumi bin mekem wetem God? ?An waswe nao yufala spoelem wei wea yumi stap gudfala tugeta? 11Yufala long Jiuda i brekem finis disfala spesol agrimen wea yumi bin mekem wetem God. Ya, yufala long Jerusalem an long evri narafala ples long kantri ya i duim barava ravis samting. Long wei wea yufala maritim olketa woman blong narafala kantri wea i wosipim olketa narafala god, yufala mekravis long haos blong Yawe wea hemi barava laekem tumas. 12Man hu hemi duim kaen samting olsem, letem Yawe hemi tekem hem aot from laen blong yumi long Israel. An bae yumi no letem hem fo joen moa wetem yumi taem yumi givim ofaring go long Yawe hu hemi garem evri paoa.
Yawe hemi heitem wei wea man hemi divosim waef
13 (Profet) Narafala samting moa wea yufala gohed fo duim, hemi olsem: Taem yufala lukim dat Yawe hemi les long olketa ofaring blong yufala, yufala krae go-go tias blong yufala hemi kavaremap olta blong hem. 14?Waswe nao hemi olsem? Hemi les, bikos hemi lukim dat yufala no kipim strongfala promis wea yufala bin mekem long waef blong yufala. Taem yufala yang yet, an yufala marit, yufala bin mekem strongfala promis long waef. Nomata hemi pat long yufala, bat yufala brekem finis disfala promis long hem. 15Bat long taem wea man hemi mekem promis long waef blong hem, God hemi joenem tufala fo kamap olsem wan bodi, an fo garem wan tingting. ?Waswe nao God hemi duim olsem? Hemi duim olsem mekem tufala garem olketa pikinini, wea bae olketa i kamap barava pipol blong God. So, evriwan long yufala mas lukaftarem laef blong hem seleva, an no brekem promis wea hemi mekem long waef wea hemi maritim taem hemi yang. 16Hem ya toktok blong Yawe hu hemi God blong Israel. Hemi tok olsem, ?Mi barava heitem disfala wei wea man hemi divosim waef blong hem. Ya, diskaen wei wea man hemi mekem waef blong hem safa, hem nao mi barava heitem.? So, evriwan long yufala mas lukaftarem laef blong hem seleva, an no brekem promis blong hem.
De wea Yawe hemi jajem pipol bae hemi kam
17 (Profet) Olketa toktok blong yufala mekem Yawe fo les. Bat yufala gohed fo ask olsem, ??Hao nao olketa toktok blong mifala mekem hem les?? Bikos yufala talem dat Yawe hemi hapi nomoa long man hu hemi duim olketa ravis samting. An yufala gohed fo tok olsem, ??Waswe nao disfala God no jajem pipol long stretfala wei??
Currently Selected:
Malakae 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.