Baruk 1
1
Fas toktok
1Baruk#Jeremaea 36:4. san blong Neraea, gransan blong Maseia, Maseia hemi san blong Sedekaea, an Sedekaea hemi san blong Hasadaea, an Hasadaea san blong Hilkaea. Baruk hemi raetem disfala buk long Babilon, 2long mekseven de long mans insaet long mekfaev yia bihaen taem olketa Babilon holem Jerusalem an olketa bonem long faea. 3-4Baruk#2 Kings 24:8-17. hemi ridim laod buk ya fo Jehoeakin san blong Jehoeakim king blong Jiuda, an fo olketa evri pipol wea olketa stap long Babilon saet long Sud Riva. Olketa bik pipol, an olketa famili long traeb blong olketa king, an olketa bikman blong traeb ya, olketa evri pipol, olketa holem bikfala waka go kasem olketa pipol nating, olketa kam tugeta fo herem Baruk.
5Taem olketa herem Baruk hemi ridimaot disfala buk, evriwan olketa krae, an mekem olketa seleva no kaikai, an olketa prea long Lod. 6Bihaen, evriwan long olketa givim seleni olsem hemi save givim. 7Seleni wea olketa kolektem, olketa putum tugeta an olketa sendem go long Jerusalem fo haeprist, nem blong hem Jehoeakim, san blong Hilkaea, an gransan blong Salum, an givim go tu fo olketa narafala prist, an evri pipol wea olketa stap wetem Jehoeakim long Jerusalem.
8Long mekten de long mans blong Sivan, Baruk hemi tekembaek olketa samting blong Tambuhaos wea olketa Babilon olketa tekemaot bifoa, an hemi tingting fo sendem baek evrisamting long Jiuda. Olketa samting blong Tambuhaos olketa mekem long silva, olketa wea Sedekaea san blong Josaea king long Jiuda hemi odarem olketa fo duim. 9Olketa duim bihaen taem Nebukadnesa hemi king long Babilon hemi holem Jehoeakin, wetem olketa lida long ples, an olketa pipol save mekem olketa samting, wetem olketa bik pipol, an hemi tekem olketa go long Babilon olsem slev.
Leta olketa raetem go long pipol blong Jerusalem
10Olketa pipol long Israel stap long Babilon olketa raet go long olketa i stap long Jerusalem an olketa tok olsem:
Mifala givim go long yufala disfala seleni fo baem animol fo bonem sakrifaes, an ofaring fo fogivim olketa sin, an fo baem insens wea hemi smel gud tumas, an olketa frut wea hemi grou long gaden. Yufala ofarem long olta blong Lod God blong yumi,
11Yufala prea fo Nebukadnesa hemi king blong Babilon, an fo Belsasa hemi san blong hem mekem tufala laef long taem. 12Bae tufala lukaotem mifala gud, mifala bae waka gud fo tufala long hol laef blong mifala. Long diswan nao bae tufala laekem mifala gud. An Lod bae hemi mekem mifala strong an gadem mifala.
13Mifala askem yufala tu fo yufala prea long Lod God blong yumi fo mifala, bikos mifala sin long ae blong hem, hemi kros long mifala yet kam kasem tude.
14Ya, hemi gud yufala mas ridim disfala buk wea mifala givim go long yufala, yufala tu mas talemaot olketa sin blong yufala insaet long Tambuhaos long Bikde fo stap long smolfala haos, an long olketa narafala Bikde taem olketa pipol kam tugeta.
15Hemi gud sapos yufala talem olsem, Lod God blong yumi hemi gudfala an hemi stret olowe, yumi evriwan sem hemi kavam yumi, evri pipol long Jiuda, an Jerusalem, 16olketa king, an lida long ples blong yumi, olketa prist, an olketa profet, an olketa olfala grani blong yumi, 17bikos yumi sin long ae blong Lod God. 18Yumi no herem toktok blong hem, an yumi no stap falom lo an tambu blong hem. 19Stat long taem Lod hemi tekemaot olketa olfala grani blong yumi from Ijip go kasem long disfala de, yumi go-go hed nomoa fo no stap strong long hem, an yumi no herem toktok blong hem. 20Ya,#Diutronomi 28:15-68. hemi tru, bifoa Lod hemi tekemaot olketa olfala grani blong yumi from Ijip mekem hem givim olketa gudfala graon wea hem garem gudfala frut. Long disfala taem nao Lod hemi promis long maos blong Mosis, olsem bae hemi panisim yumi sapos yumi no stap strong long hem. Safa an trabol wea Lod nao hemi givim kam long yumi hemi kavam yumi kasem tude. 21Ya, yumi les fo falom toktok blong Lod God hemi tok long yumi long maos blong olketa profet. 22Yumi falom nomoa tingting blong yumi seleva, an yumi go rong. Yumi go long olketa laea god an yumi duim wanem Lod hemi no laekem.
Currently Selected:
Baruk 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.