1 Makabi 2
2
Matatias hemi stap strong long God
1Long datfala taem tu, wanfala prist long laen blong Jehoearib, nem blong hem nao Matatias, hemi san blong Jon an gransan blong Simion, hemi lusim Jerusalem an hemi go stap long taon long Modein. 2Matatias hemi garem faefala san. Olketa ya nao, Jon olketa kolem Gadi, 3an Saemon olketa kolem Tasi, 4an Jiudas olketa kolem Makabi, 5an Eleasa olketa kolem Avaran, an Jonatan olketa kolem Apas.
6Taem Matatias hemi lukim olketa sin wea olketa long Jiudia an Jerusalem i duim, 7hemi tok olsem, “!Ha! ?Waswe nao mi bon fo lukim olketa samting nogud olsem ya hemi kasem olketa pipol blong mi, an bikfala holi taon? ?Waswe, bae mi stap nating olsem taem olketa givim bikfala taon ya long olketa enemi, an olketa putum bikfala Tambuhaos long han blong olketa pipol long deferen ples? 8Bikfala nem blong Tambuhaos hemi barava stap nogud nating olsem wanfala man wea no eniwan hemi wari long hem. 9Olketa enemi tekem evrisamting insaet wea praes blong hem hemi dia tumas, an olketa karim go. An olketa kilim olketa pikinini blong mifala long rod, an olketa sutim olketa yangman blong mifala wetem naef fo faet blong olketa. 10Evri pipol long evri traeb long wol ya olketa kam stap long bikfala taon ya, an olketa tekem evrisamting blong hem. 11Olketa aotem evri dekoresin blong hem wea olketa mekem hem saen gud tumas. Long disfala taem, hemi olsem wanfala slev, hemi no stap fri. 12Yufala lukim Tambuhaos blong yumi, olketa pipol long deferen ples olketa mekem hem barava luk nogud, an olketa tekemaot finis evrisamting wea hemi saen gud tumas insaet. 13?Waswe nao yumi gohed fo laef olsem? Hemi gud tumas sapos yumi dae.”
14Long bikfala sore tumas, Matatias an olketa pikinini blong hem, olketa brekem kaleko blong olketa, an olketa werem ravis kaleko fo som sore blong olketa, an olketa krae bikfala tumas.
15Long distaem nao, olketa advaesa blong Antiokas, bikfala king blong olketa, olketa go olobaot long evri ples fo fosim evri pipol fo olketa fo tane awe from God. Olketa kam kasem long taon long Modein fo fosim olketa pipol long dea fo olketa ofarem bone ofaring fo olketa laea god. 16Plande long olketa pipol long Israel, wetem Matatias an olketa pikinini blong hem, olketa kam fo mitim olketa. 17Olketa advaesa blong king olketa talem long Matatias, “Yu nao wanfala lida long disfala ples wea olketa pipol tingting hae tumas long yu, an olketa pikinini an reletif blong yu olketa herem yu gud tumas. 18So yu nao fasfala man fo yu fo kam an duim wanem king hemi odarem fo duim. Yu lukim, olketa evri pipol long deferen ples, olketa pipol long Jiudia, an olketa evriwan hu i stap baek long Jerusalem, olketa falom lo blong king. An yu, sapos yu duim olsem, bae king hemi kolem yu “Brata blong King” an bae hemi peim yu wetem olketa pikinini blong yu long silva an gol an plande gif moa.”
19Long distaem nao, Matatias hemi tokbaek an tok bik olsem, “Mi no wari nomoa sapos evriwan long olketa hu i no biliv long God, olketa obeim lo blong king, an wiling fo falom toktok blong hem an fo lusim lo blong olo grani blong olketa. 20Mi an olketa pikinini blong mi an olketa reletif blong mi, bae mifala mas mekem tru long saet blong mifala long disfala kontrak wea God hemi mekem wetem olketa olo grani blong mifala. 21Bae hemi had tumas fo mifala livim lo blong God, an fo mifala brekem kontrak blong hem. 22Hemi had tumas fo mifala fo falom lo blong king, an fo mifala sensim samfala wei blong mifala long wosip.”
23Taem Matatias hemi toktok finis, wanfala man long olketa man long Modein wea hemi sapotem lo blong king hemi stanap long ae blong evri pipol wea olketa stap long dea, an hemi tok olsem, “Bae mi falom lo blong king an bae mi ofarem sakrifaes long disfala olta.” 24Taem Matatias hemi herem hemi tok olsem, hem barava kros nogud. Hemi ran go an hemi kilim dae datfala man ya long frant long olta ya, 25an hemi kilim tu disfala man blong king ya wea hemi kam fo fosim olketa pipol fo ofarem bone sakrifaes long laea god ya. Bihaen hemi barava spoelem nao disfala olta ya. 26Long#Nambas 25:6-15. duim olsem, Matatias hemi som dat hemi tinghevi long lo, olsem Finehas hemi duim wetem Simri san blong Salu.
Faet wea Matatias hemi duim
27Bihaen, Matatias hemi wakabaot long evriwea long taon ya an hemi singaot bik an hemi talem olsem, “!Evriwan wea olketa tinghevi long lo blong God, an olketa falom kontrak wea olketa mekem wetem God, hemi gud sapos olketa kam an falom mi!” 28So Matatias wetem olketa pikinini blong hem olketa ranawe go long maonten, an olketa lusim baek long taon ya evri gud samting blong olketa.
29-30Long disfala taem tu, plande long olketa Israel wea olketa stap gud long ae blong God an falom gud lo blong God, olketa stanap an olketa ranawe go long bus wetem olketa pikinini an waef blong olketa, an wetem buluka blong olketa, bikos bikfala safa nao hemi kasem olketa. 31No long taem nomoa nius blong disfala samting hemi go kasem long olketa advaesa an ami blong king hu i stap long haos blong ami long Jerusalem, olsem samfala man i les fo falom lo blong king, an olketa ranawe go long bus fo haed. 32So wanfala#2 Makabi 6:11. bik grup blong ami olketa ronem olketa, an go kasem olketa, an olketa go putumap haostent blong olketa narasaet long ples wea olketa stap, an olketa redi fo go faetem olketa long de blong sabat. 33Olketa singaot go long olketa Jiu an talem olsem, “!Ya, taem blong yufala fo bikhed hemi finis nao! Hemi gud sapos yufala kamaot an falom lo blong king, an bae yufala no dae.”
34Olketa sensimbaek toktok blong olketa olsem, “Hemi had tumas fo mifala fo kamaot. Hemi had tumas tu fo mifala fo falom lo blong king an fo mifala spoelem de blong sabat.”
35So olketa soldia stanap an ran go long olketa nao, fo faetem olketa, 36an olketa Jiu i no traem fo sevem olketa seleva. Olketa no torowe baek eni ston long olketa enemi, o satem mamana long kev wea olketa haed. 37Evriwan long olketa talem olsem, “Mifala evriwan mas dae klin. Heven an disfala wol mas lukim dat yufala kilim mifala wetem no eni gud rison.” 38So, olketa enemi i go kilim olketa long de blong sabat, an olketa kilim evri man, wetem waef an pikinini blong olketa, an buluka blong olketa tu. Hemi kasem wan taosen pipol nao olketa dae long datfala de.
39Taem Matatias an olketa pipol blong Modein herem disfala nius, olketa barava sore tumas, 40an olketa toktok long disfala samting an olketa talem, “Sapos yumi evriwan yumi duim olsem long olketa pipol ya, an yumi no sevem laef blong yumi an lo blong yumi, bae no long taem yumi evriwan bae yumi lus long disfala wol.” 41Long datfala de ya, olketa toktok tugeta an olketa agri an tok olsem, “Sapos olketa kam fo faet long de blong sabat, yumi mas faetbaek wetem olketa, mekem yumi no dae evriwan, olsem olketa wantok blong yumi olketa dae long olketa kev ya.”
42Long distaem tu wanfala strongfala grup long Israel, olketa kolem olketa Hasides, olketa kam an joen wetem grup blong Matatias. Olketa givim olketa seleva fo faet agensim enemi fo mekem lo blong God hemi strong. 43Evriwan wea olketa spoelem olketa an olketa ranawe, olketa tu kam an joen wetem Matatias, an hemi barava mekem grup blong Matatias hemi garem plande man blong hem fo faet. 44Long bikfala kros blong olketa, olketa stanap an go fo olketa Jiu wea olketa les fo falom lo blong God, an olketa i ranawe an go long narafala ples fo staphaed. 45Matatias wetem olketa man blong hem olketa go long evri ples, an olketa spoelem nogud olketa olta blong olketa. 46Olketa holem evri yangman wea olketa stap long Israel an katem olketa wea olketa no katem olketa yet. 47Olketa lukaotem tu olketa man blong king an holem olketa. 48Olketa sevem lo blong Mosis from olketa pipol wea olketa no biliv long God wetem king blong olketa, an olketa tekemdaon strong blong Antiokas, disfala king wea hemi duim olketa ravis samting.
Dae blong Matatias
49Taem Matatias hemi save olsem hemi kolsap dae, hemi talem long olketa pikinini blong hem, “Long disfala taem, yumi barava safa nogud. Olketa pipol wea olketa praod tumas, olketa lukaotem yumi an olketa tokspoelem yumi. 50Bat yufala olketa pikinini blong mi, yufala mas holem strong disfala lo an yufala mas redi fo dae mekem yufala save faet fo kipim disfala kontrak hemi strong wea God hemi mekem wetem olo grani blong yumi. 51Yufala mas tingimbaek wanem olketa olo grani blong yumi duim taem olketa laef long disfala wol, an yufala mas siusim wanem olketa duim, an evri pipol bae olketa tinghae long yufala, an nem blong yufala bae hemi stap olowe long laef blong evri pipol. 52Yufala#Jenesis 15:16; 22:15-18. mas tingimbaek Ebraham. Hemi putum trast blong hem long God, an hemi no lus biliv blong hem long God, taem God hemi traem hem. Lod hemi barava hapi long hem, an hemi stap stret long ae blong God. 53Josef#Jenesis 39:1—45:28. tu, taem hemi stap long safa, hemi falom lo blong God, bihaen hemi kamap olsem wanfala lida long hol Ijip. 54Finehas hemi wanfala olo grani blong yumi, hemi wiling tumas fo falom lo blong God. So, God hemi promisim hem olsem olketa grani blong hem nao bae olketa holemap disfala waka olsem prist. 55God hemi siusim Josua#Nambas 13:1—14:12. fo hemi waka olsem man blong jaj long Israel bikos hemi falom gud lo blong Mosis. 56Kelab nao hemi tekembaek gudnius fo olketa pipol, an olketa givim long hem wanfala pis lan olsem gif blong hem. 57Deved,#2 Samuel 7:16. bikos hemi stap strong long God, hemi kamap wanfala king, an God hemi promis long hem olsem olketa grani blong hem bae olketa holemap disfala waka olsem king. 58Elaeja,#2 Kings 2:9-12. hemi waka had tumas fo helpem olketa pipol fo falom gud lo, an God hemi tekem hem laef fo go antap long heven. 59Hananaea,#Daniel 3:8-30. Asaraea, an Misael, God hemi sevem laef blong trifala ya from faea bikos olketa garem strongfala biliv. 60Daniel,#Daniel 6:1-24; Bel an Draegon 31-42. hemi wanfala gud an stretfala man, so Lod hemi sevem hem long maos blong olketa laeon. 61Ya, yufala mas tingim gud gudfala wei blong olketa olo grani blong yumi. Yufala mas save gud dat eniwan hu hemi biliv long God bae hemi garem bikfala strong. 62Yufala no fraetem toktok blong praod pipol wea hemi save duim olketa ravis samting. Bae hemi dae tu, an nem blong hem bae hemi lus nating. Hemi bae roten an wom bae olketa kaikaim finis bodi blong hem. 63Hemi tru tumas olsem nem blong hem hemi bikfala tude, an tumoro bae hemi lus nating, an bodi blong hem bae hemi gobaek long graon, an olketa nogud toktok wea hemi planem bae hemi finis nating. 64Yufala pikinini blong mi, yufala mas strong an no fraet fo stanap an sapotem disfala lo, bikos long falom lo nao bae olketa pipol tinghae long yufala.
65“Saemon brata blong yufala hemi waes tumas, an bikos hemi olsem, yufala mas herem hem gud olowe olsem yufala duim long mi. 66Jiudas Makabi hemi strong tumas long hol laef blong hem. Hem nao bae hemi kamap wanfala lida fo hemi lidim yufala fo go faetem olketa enemi. 67Yufala mas kolem kam olketa evriwan hu i falom lo blong God fo kam joen wetem yufala. Bihaen, yufala mas faet baek long olketa hu i spoelem olketa pipol blong yufala. 68Ya, yufala mas faetem olketa evriwan hu i no biliv long God an panisim olketa fo olketa nogud samting wea olketa duim long pipol blong yumi. Yufala mas falom gud evri lo an tambu.”
69Bihaen Matatias hemi blesim olketa pikinini blong hem an hemi dae. 70An olketa go berem hem nao long Modein long ples wea olketa berem olketa long famili blong hem, an evri pipol long Israel olketa krae long dae blong hem. Disfala samting ya hemi hapen long yia 146.#2:70 “long yia 146” Datfala yia hemi 166 B.K.
Currently Selected:
1 Makabi 2: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
1 Makabi 2
2
Matatias hemi stap strong long God
1Long datfala taem tu, wanfala prist long laen blong Jehoearib, nem blong hem nao Matatias, hemi san blong Jon an gransan blong Simion, hemi lusim Jerusalem an hemi go stap long taon long Modein. 2Matatias hemi garem faefala san. Olketa ya nao, Jon olketa kolem Gadi, 3an Saemon olketa kolem Tasi, 4an Jiudas olketa kolem Makabi, 5an Eleasa olketa kolem Avaran, an Jonatan olketa kolem Apas.
6Taem Matatias hemi lukim olketa sin wea olketa long Jiudia an Jerusalem i duim, 7hemi tok olsem, “!Ha! ?Waswe nao mi bon fo lukim olketa samting nogud olsem ya hemi kasem olketa pipol blong mi, an bikfala holi taon? ?Waswe, bae mi stap nating olsem taem olketa givim bikfala taon ya long olketa enemi, an olketa putum bikfala Tambuhaos long han blong olketa pipol long deferen ples? 8Bikfala nem blong Tambuhaos hemi barava stap nogud nating olsem wanfala man wea no eniwan hemi wari long hem. 9Olketa enemi tekem evrisamting insaet wea praes blong hem hemi dia tumas, an olketa karim go. An olketa kilim olketa pikinini blong mifala long rod, an olketa sutim olketa yangman blong mifala wetem naef fo faet blong olketa. 10Evri pipol long evri traeb long wol ya olketa kam stap long bikfala taon ya, an olketa tekem evrisamting blong hem. 11Olketa aotem evri dekoresin blong hem wea olketa mekem hem saen gud tumas. Long disfala taem, hemi olsem wanfala slev, hemi no stap fri. 12Yufala lukim Tambuhaos blong yumi, olketa pipol long deferen ples olketa mekem hem barava luk nogud, an olketa tekemaot finis evrisamting wea hemi saen gud tumas insaet. 13?Waswe nao yumi gohed fo laef olsem? Hemi gud tumas sapos yumi dae.”
14Long bikfala sore tumas, Matatias an olketa pikinini blong hem, olketa brekem kaleko blong olketa, an olketa werem ravis kaleko fo som sore blong olketa, an olketa krae bikfala tumas.
15Long distaem nao, olketa advaesa blong Antiokas, bikfala king blong olketa, olketa go olobaot long evri ples fo fosim evri pipol fo olketa fo tane awe from God. Olketa kam kasem long taon long Modein fo fosim olketa pipol long dea fo olketa ofarem bone ofaring fo olketa laea god. 16Plande long olketa pipol long Israel, wetem Matatias an olketa pikinini blong hem, olketa kam fo mitim olketa. 17Olketa advaesa blong king olketa talem long Matatias, “Yu nao wanfala lida long disfala ples wea olketa pipol tingting hae tumas long yu, an olketa pikinini an reletif blong yu olketa herem yu gud tumas. 18So yu nao fasfala man fo yu fo kam an duim wanem king hemi odarem fo duim. Yu lukim, olketa evri pipol long deferen ples, olketa pipol long Jiudia, an olketa evriwan hu i stap baek long Jerusalem, olketa falom lo blong king. An yu, sapos yu duim olsem, bae king hemi kolem yu “Brata blong King” an bae hemi peim yu wetem olketa pikinini blong yu long silva an gol an plande gif moa.”
19Long distaem nao, Matatias hemi tokbaek an tok bik olsem, “Mi no wari nomoa sapos evriwan long olketa hu i no biliv long God, olketa obeim lo blong king, an wiling fo falom toktok blong hem an fo lusim lo blong olo grani blong olketa. 20Mi an olketa pikinini blong mi an olketa reletif blong mi, bae mifala mas mekem tru long saet blong mifala long disfala kontrak wea God hemi mekem wetem olketa olo grani blong mifala. 21Bae hemi had tumas fo mifala livim lo blong God, an fo mifala brekem kontrak blong hem. 22Hemi had tumas fo mifala fo falom lo blong king, an fo mifala sensim samfala wei blong mifala long wosip.”
23Taem Matatias hemi toktok finis, wanfala man long olketa man long Modein wea hemi sapotem lo blong king hemi stanap long ae blong evri pipol wea olketa stap long dea, an hemi tok olsem, “Bae mi falom lo blong king an bae mi ofarem sakrifaes long disfala olta.” 24Taem Matatias hemi herem hemi tok olsem, hem barava kros nogud. Hemi ran go an hemi kilim dae datfala man ya long frant long olta ya, 25an hemi kilim tu disfala man blong king ya wea hemi kam fo fosim olketa pipol fo ofarem bone sakrifaes long laea god ya. Bihaen hemi barava spoelem nao disfala olta ya. 26Long#Nambas 25:6-15. duim olsem, Matatias hemi som dat hemi tinghevi long lo, olsem Finehas hemi duim wetem Simri san blong Salu.
Faet wea Matatias hemi duim
27Bihaen, Matatias hemi wakabaot long evriwea long taon ya an hemi singaot bik an hemi talem olsem, “!Evriwan wea olketa tinghevi long lo blong God, an olketa falom kontrak wea olketa mekem wetem God, hemi gud sapos olketa kam an falom mi!” 28So Matatias wetem olketa pikinini blong hem olketa ranawe go long maonten, an olketa lusim baek long taon ya evri gud samting blong olketa.
29-30Long disfala taem tu, plande long olketa Israel wea olketa stap gud long ae blong God an falom gud lo blong God, olketa stanap an olketa ranawe go long bus wetem olketa pikinini an waef blong olketa, an wetem buluka blong olketa, bikos bikfala safa nao hemi kasem olketa. 31No long taem nomoa nius blong disfala samting hemi go kasem long olketa advaesa an ami blong king hu i stap long haos blong ami long Jerusalem, olsem samfala man i les fo falom lo blong king, an olketa ranawe go long bus fo haed. 32So wanfala#2 Makabi 6:11. bik grup blong ami olketa ronem olketa, an go kasem olketa, an olketa go putumap haostent blong olketa narasaet long ples wea olketa stap, an olketa redi fo go faetem olketa long de blong sabat. 33Olketa singaot go long olketa Jiu an talem olsem, “!Ya, taem blong yufala fo bikhed hemi finis nao! Hemi gud sapos yufala kamaot an falom lo blong king, an bae yufala no dae.”
34Olketa sensimbaek toktok blong olketa olsem, “Hemi had tumas fo mifala fo kamaot. Hemi had tumas tu fo mifala fo falom lo blong king an fo mifala spoelem de blong sabat.”
35So olketa soldia stanap an ran go long olketa nao, fo faetem olketa, 36an olketa Jiu i no traem fo sevem olketa seleva. Olketa no torowe baek eni ston long olketa enemi, o satem mamana long kev wea olketa haed. 37Evriwan long olketa talem olsem, “Mifala evriwan mas dae klin. Heven an disfala wol mas lukim dat yufala kilim mifala wetem no eni gud rison.” 38So, olketa enemi i go kilim olketa long de blong sabat, an olketa kilim evri man, wetem waef an pikinini blong olketa, an buluka blong olketa tu. Hemi kasem wan taosen pipol nao olketa dae long datfala de.
39Taem Matatias an olketa pipol blong Modein herem disfala nius, olketa barava sore tumas, 40an olketa toktok long disfala samting an olketa talem, “Sapos yumi evriwan yumi duim olsem long olketa pipol ya, an yumi no sevem laef blong yumi an lo blong yumi, bae no long taem yumi evriwan bae yumi lus long disfala wol.” 41Long datfala de ya, olketa toktok tugeta an olketa agri an tok olsem, “Sapos olketa kam fo faet long de blong sabat, yumi mas faetbaek wetem olketa, mekem yumi no dae evriwan, olsem olketa wantok blong yumi olketa dae long olketa kev ya.”
42Long distaem tu wanfala strongfala grup long Israel, olketa kolem olketa Hasides, olketa kam an joen wetem grup blong Matatias. Olketa givim olketa seleva fo faet agensim enemi fo mekem lo blong God hemi strong. 43Evriwan wea olketa spoelem olketa an olketa ranawe, olketa tu kam an joen wetem Matatias, an hemi barava mekem grup blong Matatias hemi garem plande man blong hem fo faet. 44Long bikfala kros blong olketa, olketa stanap an go fo olketa Jiu wea olketa les fo falom lo blong God, an olketa i ranawe an go long narafala ples fo staphaed. 45Matatias wetem olketa man blong hem olketa go long evri ples, an olketa spoelem nogud olketa olta blong olketa. 46Olketa holem evri yangman wea olketa stap long Israel an katem olketa wea olketa no katem olketa yet. 47Olketa lukaotem tu olketa man blong king an holem olketa. 48Olketa sevem lo blong Mosis from olketa pipol wea olketa no biliv long God wetem king blong olketa, an olketa tekemdaon strong blong Antiokas, disfala king wea hemi duim olketa ravis samting.
Dae blong Matatias
49Taem Matatias hemi save olsem hemi kolsap dae, hemi talem long olketa pikinini blong hem, “Long disfala taem, yumi barava safa nogud. Olketa pipol wea olketa praod tumas, olketa lukaotem yumi an olketa tokspoelem yumi. 50Bat yufala olketa pikinini blong mi, yufala mas holem strong disfala lo an yufala mas redi fo dae mekem yufala save faet fo kipim disfala kontrak hemi strong wea God hemi mekem wetem olo grani blong yumi. 51Yufala mas tingimbaek wanem olketa olo grani blong yumi duim taem olketa laef long disfala wol, an yufala mas siusim wanem olketa duim, an evri pipol bae olketa tinghae long yufala, an nem blong yufala bae hemi stap olowe long laef blong evri pipol. 52Yufala#Jenesis 15:16; 22:15-18. mas tingimbaek Ebraham. Hemi putum trast blong hem long God, an hemi no lus biliv blong hem long God, taem God hemi traem hem. Lod hemi barava hapi long hem, an hemi stap stret long ae blong God. 53Josef#Jenesis 39:1—45:28. tu, taem hemi stap long safa, hemi falom lo blong God, bihaen hemi kamap olsem wanfala lida long hol Ijip. 54Finehas hemi wanfala olo grani blong yumi, hemi wiling tumas fo falom lo blong God. So, God hemi promisim hem olsem olketa grani blong hem nao bae olketa holemap disfala waka olsem prist. 55God hemi siusim Josua#Nambas 13:1—14:12. fo hemi waka olsem man blong jaj long Israel bikos hemi falom gud lo blong Mosis. 56Kelab nao hemi tekembaek gudnius fo olketa pipol, an olketa givim long hem wanfala pis lan olsem gif blong hem. 57Deved,#2 Samuel 7:16. bikos hemi stap strong long God, hemi kamap wanfala king, an God hemi promis long hem olsem olketa grani blong hem bae olketa holemap disfala waka olsem king. 58Elaeja,#2 Kings 2:9-12. hemi waka had tumas fo helpem olketa pipol fo falom gud lo, an God hemi tekem hem laef fo go antap long heven. 59Hananaea,#Daniel 3:8-30. Asaraea, an Misael, God hemi sevem laef blong trifala ya from faea bikos olketa garem strongfala biliv. 60Daniel,#Daniel 6:1-24; Bel an Draegon 31-42. hemi wanfala gud an stretfala man, so Lod hemi sevem hem long maos blong olketa laeon. 61Ya, yufala mas tingim gud gudfala wei blong olketa olo grani blong yumi. Yufala mas save gud dat eniwan hu hemi biliv long God bae hemi garem bikfala strong. 62Yufala no fraetem toktok blong praod pipol wea hemi save duim olketa ravis samting. Bae hemi dae tu, an nem blong hem bae hemi lus nating. Hemi bae roten an wom bae olketa kaikaim finis bodi blong hem. 63Hemi tru tumas olsem nem blong hem hemi bikfala tude, an tumoro bae hemi lus nating, an bodi blong hem bae hemi gobaek long graon, an olketa nogud toktok wea hemi planem bae hemi finis nating. 64Yufala pikinini blong mi, yufala mas strong an no fraet fo stanap an sapotem disfala lo, bikos long falom lo nao bae olketa pipol tinghae long yufala.
65“Saemon brata blong yufala hemi waes tumas, an bikos hemi olsem, yufala mas herem hem gud olowe olsem yufala duim long mi. 66Jiudas Makabi hemi strong tumas long hol laef blong hem. Hem nao bae hemi kamap wanfala lida fo hemi lidim yufala fo go faetem olketa enemi. 67Yufala mas kolem kam olketa evriwan hu i falom lo blong God fo kam joen wetem yufala. Bihaen, yufala mas faet baek long olketa hu i spoelem olketa pipol blong yufala. 68Ya, yufala mas faetem olketa evriwan hu i no biliv long God an panisim olketa fo olketa nogud samting wea olketa duim long pipol blong yumi. Yufala mas falom gud evri lo an tambu.”
69Bihaen Matatias hemi blesim olketa pikinini blong hem an hemi dae. 70An olketa go berem hem nao long Modein long ples wea olketa berem olketa long famili blong hem, an evri pipol long Israel olketa krae long dae blong hem. Disfala samting ya hemi hapen long yia 146.#2:70 “long yia 146” Datfala yia hemi 166 B.K.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.