Oséias 14
14
Wenoz Izaew Tupàn pe wazewyr haw rehe wà
1Teko Izaew wà. Pezewyr Tupàn Tuweharupi Wiko Ma'e pezar pe nehe. Pe'ar ta'e pezapo ikatu 'ym ma'e xe. 2Pezewyr Tupàn pe nehe. Peze'eg izupe nezewe nehe. — Emunàn ureremiapo kwer ikatu 'ym ma'e wà nehe. Nereharaz izuwi nehe. Einu katu ko ureze'eg nehe. Urumume'u putar nekàgaw nehe, nekatu haw nehe. A'e ma'e imume'u àwàm upyta putar newe ureremimono ràm romo nehe. 3Axir nupuner kwaw urepyro haw rehe wà. Zauxiapekwer kawaru ku'az har nupuner kwaw urerehe uzekaiw katu haw rehe wà. — Peiko urezar romo, nuru'e pixik kwaw tupàn a'ua'u ureremiapo kwer wanupe nehe. Ne Tupàn urepuhareko katu pe ne. Xo ne zo erezekaiw katu putar ma'e hereko 'ymar wanehe ne, peze izupe nehe.
Waneko haw pyahu Izaew wanupe
4Tupàn Tuweharupi Wiko Ma'e uze'eg nezewe.
Amukatu putar heremiaihu ihe wà nehe,
herehe wazeruzar 'ymaw wi ihe wà nehe.
Azamutar katu putar hepy'a nànàn ihe wà nehe.
Ta'e apytu'u wanehe hekwahy re ihe xe.
5Aiko putar àmàn ài Izaew wanupe nehe.
Hezuz putar ma'eputyr wanehe nehe. Iputyr nuzawy kwaw ma'eputyr iri her ma'e wà nehe.
Wanapo ohoete wà,
ywyra Irimano ywy rehe har wanapo ohoete haw ài wà.
6Hàkàgwer uzeaiko putar wà nehe.
Ipuràg eteahy putar uri 'yw hàkàgwer ài wà nehe.
Hyàkwegatu putar ywyra ywyràkàxigyw Irimano rehe har ài wà nehe no.
7Izaew wiko wi putar heremimonokatu kwer romo wà nehe.
Heta tetea'u putar arozràn ài wà nehe.
I'akatu putar uwà 'yw ài wà nehe no.
Teko paw uze'egatu win Irimano parer rehe wà. Nezewegatete uze'egatu putar Izaew wanehe wà nehe no.
8Teko Izaew uze'eg putar nezewe wà nehe.
— Na'ikatu pixik kwaw tupàn a'ua'u wà, i'i putar wà nehe.
Ihe Tupàn Tuweharupi Wiko Ma'e
ainu katu heremiaihu waneminoz ihe.
Ihe azekaiw katu wanehe ihe.
Aiko ywyra pin 'yw her ma'e ài. Teko upyta he'àg rehe wà.
Amono ikatu ma'e paw purupe ihe no,
i'i Tupàn.
Uze'eg iahykaw rehe har
9Teko ma'e kwaw katu har a'e wà, teko ikatu ma'e iapo haw ikwaw katu har a'e wà no, tuwe weinu katu ze'eg ko pape rehe har a'e wà nehe. Ikatuahy Tupàn Tuweharupi Wiko Ma'e hape a'e. Teko ikatu ma'e wata a'e hape rupi wà. Ikatu 'ym ma'e iapo har uzepyapi hehe wà, u'ar pà wà. Upaw.
Currently Selected:
Oséias 14: gub
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.