SWIVURISO 1
1
1Marito ya Solomoni, n'wana Davhida, Hosi ya Israele:
2Ku tiva vutlhari ni tidyondzo,
Ni ku hlamusela marito ya vutlhari;
3Ku amukela dyondzo ya ku anakanya swo lulama,
Ya ku tivisisa ku lulama ni mfanelo;
4Ku tlharihisa varivali,
Ni ku nyika lavantshwa ku tiva ni ku anakanya.
5La tlhariheke, a a yingise, u ta tiengetela ku tiva;
La nga ni ku twisisa u ta tikumela mano
6Ya ku twisisa swivuriso ni marito ya ku enta,
Ni timhaka ta lavo tlhariha, ni dyondzo ya vona leyi fihlekeke.
7Ku chava Yehovha, i masungulo ya vutivi hinkwabyo;
Kambe lavo rivala va tsan'wa vutlhari ni dyondzo.
8N'wananga, yingisa dyondzo ya tata wa wena,
U nga fularheli ku laya ka mana wa wena;
9Hikuva swi ta va xibombiso lexo saseka enhlokweni ya wena,
Ni sindza ra nkoka enhan'wini ya wena.
10N'wananga, loko vadyohi va ku kanganyisa,
U nga pfumeli.
11Loko va ku:
“A hi fambeni swin'we! Hi ya etlelela,
Hi rhiya lava nga riki na nandzu, hi halata ngati ya vona,
12Hi va mita va ha hanya, kukotisa xivandla xa vafi,
Hinkwavo va ta fana ni lava hojomelaka ekheleni;
13Hi ta kuma swo saseka hinkwaswo,
Hi tata tindlu ta hina hi leswi hi swi phangeke;
14U ta kuma ku averiwa swin'we na hina,
Hi ta hlanganisa mali enkwameni wun'we!”
15N'wananga, u nga tshuki u famba hi tindlela ta vona,
U hambukisa nenge wa wena emitileni ya vona.
16Hikuva milenge ya vona yi tsutsumela eku biheni,
Va hatlisa ku halata ngati.
17Kunene ntlhamu wu rhiyiwile mahala emahlweni ka tinyanyana hinkwato,
18Kasi vona va halata ngati ya vona,
Va tirhiya vutomi bya vona.
19Hi yona mhaka ya hinkwavo lava tinyiketaka rifuwo,
Hikuva ri khoma moya wa lava ri fuwaka.
20Vutlhari byi huwelela ehandle,
Byi tlakusa rito emitsendzeleni,
21Byi huwelela emindyangwini ya pongo.
Enyangweni ya muti, byi dyondzisa timhaka, byi ku:
22“N'wina, varivali, mi ta rhandza ku rivala ku yisa kwihi?
Xana vasandzi va ta tsakela ku sandza,
Ni va rihuhu va ta venga vutivi ku yisa kwihi xana?
23Hundzukani hi ku tshinya ka mina!
Maswivo, ndzi ta mi chelela moya wa mina,
Ndzi mi dyondzisa timhaka ta mina.
24Kungakuloko ndzi vitana, mi ala ku yingisa,
Ndzi kondza ndzi tshambuluta voko ra mina, ku nga ri na munhu la tsundzukaka.
25Mi munyile ku tsundzuxa ka mina,
A mi yingisanga ku tshinya ka mina;
26Na mina, ndzi ta hleka emakhombyeni ya n'wina,
Ndzi sandza siku mi humelelaka hi ku chava,
27Siku ku chava ku mi humelelaka kukotisa xidzedze,
Ni makhombo ma mi tsutsumela kukotisa xihuhuri;
Kutani mahlomulo ni mbitsi ya mbilu swi mi wela ehenhla,
28Enkarhini wolowo va ta vitana eka mina, kambe ndzi nga ka ndzi nga hlamuli;
Va ta ndzi lava, kambe va nga ka va nga ndzi kumi.
29Hikuva va vengile vutivi,
A va tihlawulelanga ku chava Yehovha,
30Va arile ku lerisa ka mina,
Va sandzile ku tshinya ka mina,
31Va ta dya mihandzu ya mikhuva ya vona,
Va ta xurha hi makungu ya vona.
32Hikuva ku hambuka ka varivali ka va dlaya,
Kutani ku tsaka ka varihuhe ka va lovisa.
33Kambe la ndzi yingisaka u ta tiakela hi ku rhula,
A nga chavi khombo.”
Currently Selected:
SWIVURISO 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.