YOHANE 10
10
Ta Murisi lonene.
1“Ndzi vurisile ndzi ri eka n'wina: La nga ngheniki hi nyangwa etshangeni ra tinyimpfu, kambe a tlulela hi kun'wana, i muyivi ni khamba. 2Kambe la nghenaka hi nyangwa, hi yena murisi wa tinyimpfu. 3Mulanguteri wa nyangwa u n'wi pfulela, kutani tinyimpfu ti yingisa rito ra yena; a vitana tinyimpfu ta yena hi mavito ya tona, a ti byisa ehandle. 4Kuteloko a humesile tinyimpfu ta yena, a ti rhangela emahlweni, kutani tinyimpfu ti n'wi landza, hikuva ti tiva rito ra yena. 5Ti nga ka ti nga landzi un'wana, ti ta n'wi balekela, hikuva a ti tivi rito ra vambe.”
6Yesu a va byela xifaniso lexi, kambe vona a va swi twanga leswi a va byeleke swona.
7Yesu a engeta a ku eka vona: “Ndzi vurisile ndzi ri eka n'wina: Hi mina nyangwa ya tinyimpfu. 8Hinkwavo lava ndzi rhangeleke, a ma ri makhamba ni vawutli, kambe tinyimpfu a ti va yingisanga. 9Hi mina nyangwa. Kungakuloko munhu a nghena ha mina, u ta hlayiseka; u ta nghena a va a huma, a kuma madyelo. 10Khamba a ri ti ntsena, loko ku nga ri ku yiva, ni ku tlhava, ni ku lovisa, mina ndzi tile leswaku tinyimpfu ti va ni vutomi, ti byi kuma hi ntalo.
11“Hi mina murisi lonene. Murisi lonene u nyiketa tinyimpfu ta yena vutomi bya yena. 12Kambe la tirhelaka mali, a nga ri murisi, loyi tinyimpfu ti nga riki ta yena, kuteloko a vona xinkankanka xi ta, a tshika tinyimpfu, a baleka; kutani xinkankanka xi khoma tinyimpfu, xi ti hangalasa. 13La tirhelaka mali wa baleka, hikuva i mutirheli wa mali, a nga vuri nchumu hi tinyimpfu. 14Hi mina Murisi lonene, ndzi tiva tinyimpfu ta mina, kutani ta ndzi tiva na tona. 15Hi mukhuva lowu Tatana a ndzi tivaka, na mina, ndzi tiva Tatana; kutani ndzi nyiketa tinyimpfu vutomi bya mina. 16Ndza ha ri ni tinyimpfu tin'wana leti nga riki ta tshanga leri; na tona ndzi fanele ku ti tisa, ti ta yingisa rito ra mina; kutani ntlhambi wu ta va wun'we, ni murisi a va un'we. 17Hilaha Tatana a ndzi rhandzaka, hikuva ndzi nyiketa vutomi bya mina, ndzi ta tlhela ndzi byi teka. 18A ku na munhu la ndzi tekelaka byona, hi mina ndzi byi nyikaka hi ku rhandza ka mina; ndzi ni matimba ya ku byi nyika ni matimba ya ku tlhela ndzi byi teka; ndzi lerisiwile sweswo hi Tatana.” 19Kutani ku hambana ku tlhela ku va kona exikarhi ka Vayuda hikwalaho ka marito walawo. 20Kutani lavo tala eka vona a va ku: “U ni demona, u hungukile, mi n'wi yingisela yini-ke?” 21Van'wana va ku: “Marito lawa, a hi ya munhu la nga ni demona. Xana demona ri nga hanyanyisa munhu lowo fa mahlo xana?”
Ta vukwembu bya Yesu; byi tiyisiwa hi marito ya yena.
22Nkhuvo wa ku khangula tempele a wu ri kona eYerusalema, kambe a byi ri vuxika. 23Kutani Yesu a a tifambela erikupakupeni ra Solomoni. 24Kavaloko Vayuda va n'wi rhendzela, va ku eka yena: “U ta tshika rini ku hi kanakanisa timbilu xana? Loko u ri Kriste, hi byele erivaleni.” 25Yesu a va hlamula, a ku: “Ndzi mi byerile, kambe a mi pfumelanga; mitirho leyi ndzi yi tirhaka hi vito ra Tatana, hi yona leyi yi ndzi vulaka vumbhoni. 26Kambe n'wina a mi pfumeri, hikuva a mi tinyimpfu ta mina. 27Tinyimpfu ta mina ti yingisa rito ra mina, kutani mina ndza ti tiva, kutani ta ndzi landza, 28mina ndzi ti nyika vutomi lebyi nga heriki; ti nga ka ti nga lovi, ni siku ni rin'we, kambe a ku na munhu la nga ti vutlaka evokweni ra mina. 29Tatana la ndzi nyikeke tona, i nkulu eka hinkwavo; kutani a ku na munhu la nga ti vutlaka evokweni ra Tatana. 30Mina na Tatana hi endla un'we.”
31Hikwalaho Vayuda va tlhela va rhola maribye ku n'wi khandla.
32Yesu a va hlamula a ku: “Ndzi mi kombisile mitirho leyo tala leyo saseka, leyi humaka eka Tatana; ndzi khandleriwa wihi eka yona xana?” 33Vayuda va n'wi hlamula, va ku: “A ku khandleriwi ntirho lowunene, kambe hikwalaho ka xisandzu, hikuva hambi u ri munhu, u tiendla Xikwembu.” 34 Yesu a va hlamula, a ku: “Xana a ku tsariwanga enawini wa n'wina leswaku: ‘Ndzi te: Mi swikwembu’ xana? 35Kungakuloko nawu wu vurile swikwembu lava rito ra Xikwembu ri teleke vona, (kasi Matsalwa ma nga ka ma nga cukumetiwi), 36xana n'wina mi ndzi byela ha yini, mi ku: ‘Wa sandza,’ loko ndzi te: ‘Ndzi N'wana wa Xikwembu’? Kasi hi mina loyi Tatana a nga n'wi hlawula ni ku n'wi rhuma emisaveni. 37Kungakuloko ndzi nga tirhi mitirho ya Tatana, mi nga ndzi pfumeleni. 38Kambe loko ndzi yi tirha, hambi mi nga pfumeri eka mina, pfumelani mitirho leyi, leswaku mi tiva, mi va mi pfumela leswaku Tatana u le ka mina, na mina ndzi le ka yena.”
39Hikwalaho va engeta va lava ku n'wi khoma, kambe a chupuka emavokweni ya vona. 40Kutani a tlhela a ya entsungeni wa Yordani, laha Yohane a tshamaka a khuvulela kona eku sunguleni; a xwa kona. 41Lavo tala va ya eka yena, va ku: “Yohane, yena, a nga endlanga masingita, hambi ri ri rin'we, kambe timhaka hinkwato leti nga vuriwa hi Yohane ehenhla ka loyi, hi tona kunene.” 42Kutani lavo tala va pfumela eka yena kwalaho.
Currently Selected:
YOHANE 10: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.