VAAVANYISI 1
1
Ta vana va Israele loko, va hlasela matiko ya Vakanana.
1Kuteloko Yoxuwa a file vana va Israele va vutisa Yehovha va ku: “I mani exikarhi ka hina la nga ta rhanga a khandziya eka Vakanana, a lwa na vona?” 2Yehovha a hlamula a ku: “Ku ta huma Yuda; vonani, ndzi nyiketile tiko emavokweni ya yena.” 3Kutani Yuda a byela makwavo Simiyoni, a ku: “A hi tlhandluke swin'we etikweni leri ndzi ri averiweke, hi ya pfuka Vakanana, hi lwa na vona. Kutani ndzi ta ya na wena eka leri averiweke wena.” 4Simiyoni a famba na yena; kutani Yuda a tlhandluka, Yehovha a nyiketa Vakanana ni Vaperesi emavokweni ya vona, kutani va dlaya vavanuna va 10 000 eBezeki. 5Kutani va kuma Adoni-Bezeki emutini wa Bezeki, va lwa na yena, va hangalasa Vakanana ni Vaperesi. 6Kambe Adoni-Bezeki a baleka, kutani va n'wi hlongorisa, va ya n'wi khoma, va n'wi tsema makhudzu ya mavoko ni ya milenge. 7Adoni-Bezeki a ku: “Ku ni tihosi ta 70 leti tsemiweke makhudzu ya mavoko ni ya milenge, leti a ti tshama ti rholela mahlanhla ehansi ka tafula ra mina. Xikwembu xi ndzi tlherisele leswi ndzi swi endleke.” Kutani va n'wi yisa eYerusalema, a ya fela kona. 8Kutani vana va Yuda va pfukela Yerusalema, va wu nghena, va dlaya vaaki va kona hi ku kariha ka fumu, va hisa muti. 9Vana va Yuda va ngirimela va ya pfuka Vakanana lava akeke etintshaveni, ni le dzongeni, ni le timbaleni. 10Kambe va Yuda va pfukela Vakanana lava akeke eHebroni. (Vito ro sungula ra Hebroni a a ri Kiriyata-Araba.) Va hlula miti ya Xexayi, na Ahimani, na Talimayi. 11Kuteloko va suka kona, va pfuka lava akeke eDebiri; (vito ro sungula ra Debiri a a ri Kiriyata-Sefere).
12Kutani Kalebe a ku: “La nga ta hlula Kiriyata-Sefere, a wu teka, ndzi ta n'wi nyika n'wana wa mina Akisa, a va nsati wa yena.” 13Otiniele, n'wana Kenazi, ndzisana ya Kalebe, a wu teka, kutani Kalebe a n'wi nyika n'wana wa yena, Akisa, a va nsati wa yena. 14Kuteloko Akisa a fikile ekaya, a kucetela nuna wa yena leswaku a kombela nsimu eka tata wa yena. 15Kavaloko Akisa a xika embhongolweni, kutani Kalebe a ku eka yena: “U na yini?” Yena a ku: “Ndzi nyike xilo xin'wana, hikuva u ndzi nyikile tiko leri nga etlhelo ra le dzongeni, u ndzi ha ni swihlovo.” Hikwalaho Kalebe a n'wi nyika swihlovo swa le henhla ni swihlovo swa le hansi.
16Loko, va ri vana va Mukeni, mukon'wana wa Muxe, a va sukile emutini wa micindzu, va tlhandlukela ni vana va Yuda emananga ya Yuda, edzongeni ka Aradi; kutani va ya kona, va aka ni vanhu va kona. 17Kambe Yuda a famba swin'we na Simiyoni, makwavo, va ya hlula Vakanana lava akeke eSefata, va va endla lavo yila (anathema). Hikwalaho muti wolowo wu thyiwile vito ra Horma (anathema). 18Yuda a teka na Gaza ni tiko ra kona, na Axikeloni, ni tiko ra kona, na Ekroni, ni tiko ra kona. 19Yehovha a va na Yuda, kutani a hlongorisa lava akeke etintshaveni, kambe a tsandzeka ku hlongorisa lava akeke erivaleni, hikuva a va ri ni tigolonyi ta nsimbhi. 20Kalebe a nyikiwa Hebroni, hilaha Muxe a nga vula hakona, kutani a hlongorisa kona vana va Anaka lavanharhu va vavanuna.
21Loko, va ri vana va Benjamini, a va hlongorisanga Vayebusi lava akeke eYerusalema; hikwalaho Vayebusi va ha akile eYerusalema, kun'we ni vana va Benjamini ni namuntlha. 22Va yindlu ya Yosefa va tlhandlukele eBetele, kutani Yehovha a va na vona. 23Va yindlu ya Yosefa va rhumela ku ya kambela Betele (vito ro sungula ra muti wolowo a wu ri Luzi). 24Kutani tinhlori ti vona munhu la humaka emutini, ti ku eka yena: “Hi kombise laha ku nga ngheniwaka emutini, hi ta ku endlela hi tintswalo.” 25Kuteloko a va kombisile laha ku nga ngheniwaka hakona emutini, va dlaya va muti wolowo hi ku kariha ka fumu, kambe va tshika munhu yeloyi, ni va yindlu ya yena hinkwavo, va tifambela. 26Kutani munhu yeloyi a rhurhela etikweni ra Vahiti; a aka muti kona, a wu thya vito ra Luzi. Ra ha ri vito ra wona ni namuntlha.
27Manase, yena, a nga hlongorisangi va Beta-Xeyani ni va miti ya kona, hambi va ri va Taanaka ni va miti ya kona, hambi va ri lava akeke eDori ni va miti ya kona, hambi va ri lava akeke eYibiliyamu ni va miti ya kona hambi va ri lava akeke eMegido ni va miti ya kona; kambe Vakanana va alela etikweni rero. 28Kuteloko Vaisraele va kumile matimba, va luvisa Vakanana, kambe va tsandzeka ku va hlongolela makumu.
29Loko a ri Efrayimi, a nga hlongolanga Vakanana lava akeke eGezere kutani Vakanana va aka na vona eGezere.
30Zebuloni, na yena, a nga hlongolangi lava akeke eKitironi, hambi va ri lava akeke eNahalala; kutani Vakanana va aka na vona, kambe va va humesisa ndzuvo.
31Loko a ri Asere, a nga hlongolanga lava akeke eAko, hambi va ri lava akeke eSidoni, na Ahalabu, na Akizibi, na Heliba, na Afeke, na Rehobo. 32Va Asere va aka ni Vakanana lava akeke etikweni rero, va nga va hlongorisi.
33Na yena Neftali, a nga hlongolangi lava akeke eBeta-Xemexe, hambi va ri lava akeke eBeta-Anati, a aka ni Vakanana lava akeke etikweni rero; lava akeke eBeta-Xemexe na Beta-Anati va n'wi humesela ndzuvo.
34Kutani Vaamori va va ni sindziso eka vana va Dani entshaveni, va nga va pfumeleri ku xikela erivaleni. 35Hikwalaho Vaamori va alela Hara-Herexi, na Ayaloni, na Xaalabimi, hambiswiritano, va nyimba ya Yosefa va va tikela, va ko va humesisiwa ndzuvo. 36Loko ri ri tiko ra Vaamori, a ri sukela entshaveni ya Akrabimi, eribyeni, ku ya etlhelo ra le henhla.
Currently Selected:
VAAVANYISI 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.