HABAKUKU 1
1
Hlavutelo leyi hlavuteriweke muprofeta Habakuku.
1Yehovha, ndzi ta huwelela kangani u nga ndzi twi xana? 2Ndzi ta vitana eka wena kangani hikwalaho ka ku pfukeriwa matimba, u nga ndzi hanyisi-ke? 3U ndzi kombisela yini ku homboloka, kutani u langutela yini ku xanisa? Ku onhaka ni ku nonon'hwa swi le mahlweni ka mina; ka holoviwa, ku va ku pfuka ni ku hambana. 4Hikwalaho, nawu wu etlele, a ka ha avanyisiwi hi ku lulama; hikuva lowo biha u rhendzele la lulameke, kutani ku avanyisa ka hombolokisiwa.
5Vonani ematikweni, mi languta, mi va mi hlamala, mi ku ntsee! Hikuva emasikwini ya n'wina, ndzi ta tirha ntirho! Mi nga ka mi nga wu pfumeri, hambi mi nga wu byeriwa. 6Hikuva ndzi ta pfuxa Vakalediya tiko leri xanisaka, ra vukari, leri handzulaka ku anama ka misava ku teka matiko lama nga riki ya rona. 7Ra chavisa, ra tshukisa; hi rona ri tilerisaka, ri tikhorisaka ri ri roxe. 8Tihanci ta rona ti vevuka ku tlula tiyingwe, ti tsutsuma ngopfu ku tlula timhisi ta madyambu; vakhandziyi va rona va famba hi ku tikurisa; vakhandziyi va rona va pfa hi le kule va haha kukotisa koti leri tilunghiselaka ku wela swakudya swa rona. 9Hinkwavo va tele ku onha; mimombo ya vona yi phikelela ku ya emahlweni, va hlengeleta lava va va phangeke kukotisa sava. 10Tiko rolero ri sandza tihosi, eka rona, tihosana i xisandzu; ri hleka makhokholo hinkwawo ri va ri hlengeleta ntshuri, kutani ri nghena eka wona. 11Kutani ri va ri hundza kukotisa moya, ri ya emahlweni, ri va ni nandzu, hikuva matimba walawo ya rona i xikwembu xa rona.
12Xana a hi wena wa ku sungula wena, Yehovha, Xikwembu xa mina, Mukwetsimi wa mina? Hi nga ka hi nga fi! Oho Yehovha! Tiko lero u ri vekele ku avanyisiwa; wena, Ribye ra mina, u lunghisele rona ku tshinyiwa. 13Wena lowa mahlo lama tengeke lama chavanaka ni ku biha, lama hlulekaka ku languta ku xaniseka, u langutele yini vaxisi? U miyelela yini, loko lowo biha a mita la n'wi tlulaka hi ku lulama? 14U endlele yini vanhu va fana ni tinhlampfi ta lwandle kukotisa swikokovi leswi nga riki ni la nga swi fumaka? 15U va humesa hinkwavo hi xinjovo; u va koka hi nkukuto wa yena, a va hlengeleta hi rikoka ra yena; ku va kona a tsakaka, a tsakisisaka; 16hikwalaho u humesela nkukuto wa yena magandzelo, u hisela rikoka ra yena mirhi ya risuna, hikwalaho ka swona ku averiwa ka yena hi loku noneke, ni swakudya swa yena leswi xawulaka. 17Loko swi ri tano, xana swi nga fanela loko a tshama a chulula rikoka ra yena, a nga tshiki ku dlaya matiko hi masiku, a nga ri na nsovo xana?
Currently Selected:
HABAKUKU 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.