VAGALATIYA 1
1
Ku xeweta.
1Pawulo, muapostola, ku nga ri hi vanhu, hambi ku ri hi munhu ni un'we, kambe ku ri ha Yesu Kriste, ni Xikwembu, Tatana, la n'wi pfuxeke eku feni;
2Ni vamakwerhu hinkwavo lava nga na mina;
Eka tikereke ta le Galatiya:
3Tintswalo ni ku rhula a swi ve na n'wina, swi huma eka Xikwembu Tatana, ni ka Hosi ya hina Yesu Kriste, 4la tinyiketeke hikwalaho ka ku dyoha ka hina, a ta hi simula emisaveni ya sweswi, leyo biha, hi ku rhandza ka Xikwembu la nga Tata wa hina; 5eka yena a ku ve ku kwetsima hilaha ku nga heriki. Amen!
Ku hambuka ka Vagalatiya.
6Ndza hlamala hikuva mi tshikile la mi vitaneke etintswalweni ta Kriste, mi hatlise ku hundzela eEvhangelini yin'wana, 7swi nga ri leswaku yin'wana yi kona, kambe vanhu va kona lava mi pfilunganyaka, lava rhandzaka ku soholota Evhangeli ya Kriste.
8Kasi loko a ri kona loyi a mi dyondzisaka Evhangeli yin'wana eka leyi hi nga mi dyondzisa yona, hambi ku nga va hina, hambi yi ri ntsumi ya le tilweni, a yi ve anathema. 9Hilaha hi nga rhanga hi mi byela hakona ni sweswi ndza ha vurisa sweswo: Loko un'wana a mi byela Evhangeli yin'wana eka leyi mi yi amukeleke, a a ve anathema! 10Hikuva ndzi ri, xana ndzi lava ku khensiwa hi vanhu kumbe hi Xikwembu xana? Kumbexana ndzi rhandza ku tsakisa vanhu-ke? Kasi loko a ndza ha rhandza ku tsakisa vanhu, ingi ndzi nga ri nandza wa Kriste.
Pawulo u vekiwe muapostola hi Yesu Kriste, ku nga ri hi vanhu.
11Kutani ndza mi tivisa vamakwerhu, leswaku Evhangeli leyi ndzi mi byeleke yona, a yi humi eka vanhu; 12hikuva a ndzi yi amukelanga eka munhu, hambi ku ri ku yi dyondzisiwa hi munhu, kambe ndzi hlavuteriwile yona hi Yesu Kriste.
13Hikuva mi twile ta mahanyelo ya mina ya khale, loko ndza ha ri eVuyudeni, hilaha ndzi nga xanisa hakona kereke ya Xikwembu hi ku kariha loko nghasi, a ndzi ri karhi ndzi yi hangalasa, 14kutani a ndzi siyile ekule lavo tala va ntangha ya mina, a ndzi ri emahlweni ka vona etimhakeni ta Vuyuda, etikweni ra hina, hi ku hisekela mikhuva ya vatata wa hina.
15Kambe siku swi tsakiseke Xikwembu lexi nga ndzi hlawula, ndza ha ri ekhwirini ra manana, xi va xi ndzi vitana hi tintswalo ta xona, 16ku ndzi pfuletela N'wana wa xona leswaku ndzi ya n'wi vula exikarhi ka vamatiko; a ndzi vutisanga nyama ni loko yi ri ngati; 17na kona, a ndzi tlhelelanga eYerusalema eka vaapostola lava nga vo rhanga eka mina; kambe ndzi hatlisile ndzi tiyela eArabiya, ndzi vuya ndzi tlhelela eDamaska.
18Kute eku heleni ka lembe ra vunharhu, ku va kona ndzi tlhandlukelaka eYerusalema, ku ya tivana na Kefasi, kutani ndzi tshame eka yena masiku ya khume na ntlhanu. 19A ndzi vonanga wumbe wa vaapostola van'wana, loko a nga ri Yakobo, makwavo wa Hosi. 20Timhaka leti ndzi mi tsalelaka tona, ndzi tiyisa emahlweni ka Xikwembu, a ndzi hembi vunwa.
21Ku va kona ndzi yaka ematikweni ya Siriya na Kilikiya. 22Kasi a ndzi nga si tiviwa hi mahlo hi tikereke ta Yudiya leti nga eka Kriste, 23a ti twile ntsena loko va ku: “Loyi ingi khale a hi xanisa, sweswi u dyondzisa ku pfumela loku khale a a ri karhi a ku hangalasa.” 24Kutani a ti khensa Xikwembu hikwalaho ka mina.
Currently Selected:
VAGALATIYA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.