John 7
7
Bulhutsinke ꞌaw buba ꞌalhaꞌ lheꞌhóotꞌoh Sizi ꞌen Gri ꞌuntꞌoh
1Njan hukwꞌelhꞌaz Sizi Galilee yun kꞌut za nusúya. Lizwifne hituzilhghelh hukwaꞌ huninzun ꞌet whuchꞌa ꞌaw Judea yun kꞌut nóyaꞌ hukwa lheꞌnízun. 2Lizwifne budzenis whuti, ꞌet la ꞌulbun be yoh nehúwhulih-un#7:2 Njan nimbali nehulih huwhútni-un, ꞌet la tlꞌo ꞌuhulhꞌih hukwꞌelhꞌaz. Lizwifne ꞌudaꞌ Moses bulh dune lhuhootꞌih-un tsꞌe ínleꞌ whe whúnahulnih. ꞌEt whutoh ꞌet la Jerusalem ꞌet ꞌulbun be yoh nehuwhulih ꞌinkꞌez tube cho honílhni lhih. cha huwhútni, ꞌawet nilhdukw whuzꞌai. 3ꞌEt bulhutsinke khuni beꞌ huyulhni, “Njan huwinyalh ꞌinkꞌez Judea yun kꞌut tsꞌe inyalh, ꞌet de la ngha hodulꞌehne ndai ꞌutꞌen oogha ína-un honoolhꞌen. 4Mbe la tsꞌiyanne tꞌeinózin hukwaꞌ ninzun-un ꞌaw whuꞌiz neꞌootꞌen ꞌaítꞌoh. ꞌAlha ꞌuhooncha túneꞌ ꞌintꞌen de, ndi yun kꞌut dunene tsꞌiyanne nyun nghun tꞌehonózin huba ꞌuhoontꞌoh!” 5Bulhutsinke ꞌenne hoontsꞌi ꞌaw ndun Gri ꞌen ꞌuntꞌoh ꞌaw buba ꞌalhaꞌ lheꞌhóotꞌoh, ꞌinka ꞌoh te néꞌhiduniꞌ.
6ꞌEt Sizi ꞌubulhni, “Stso whudizulh-un ꞌawhuz whusalhúwhulhtsꞌit, ꞌet nohni nohtsꞌu hóoltsꞌulh-un, ꞌahoolhyiz lhawhúdintꞌoh. 7Ndi yun kꞌut dunene ꞌaw nohni nohtsꞌo dootni ꞌaítꞌoh, ꞌet si stsꞌu hudutni. Tankꞌus ꞌúhutꞌen-un tsꞌiyawh ꞌet huwun ꞌubudúsni, ꞌet huwa. 8Whute dzenis whuti tsꞌe whuz áhdulh. Sghá whuntꞌai-un ꞌawhuz ꞌaw lhalhódusne, ꞌet huwa ꞌawhuz ꞌaw si dzenis whuti tsꞌe toosyaꞌ ꞌaítꞌoh,” ubúlhni. 9Njan ꞌet ndubúdaniꞌ hukwꞌelhꞌaz Galilee yun kꞌut ꞌet indaꞌ.
10Bulhutsinke dzenis whuti tsꞌe whehandil hukwꞌelhꞌaz, Sizi didutchꞌoh cha whuꞌiz ꞌet whuz whinya, ꞌaw dunene bunalh iloh. 11ꞌEt nyo dzenis whuti whutoh ꞌet Lizwifne hika itísꞌen ꞌinkꞌez ꞌuhutni, “Ntsꞌe ꞌutꞌen whe ꞌuntꞌoh?” hutni.
12ꞌEt ꞌilhozdílne didutchꞌoh dutoh whuꞌízyaz whe highu yalhduk. Whulohne cha ꞌen unzoo hutni, ꞌinkꞌez whulohne cha ꞌawundooh dune nanaꞌah hutni.
13ꞌEt hóontsꞌi ꞌaw ꞌilhoghun hoontsꞌi tsꞌet highu yalhulhduk, ndunne Lizwif moodihne bubé hunuljut ꞌet huwa.
14ꞌAwet dzenis whuti lhoohoolcho atꞌen ꞌuhootꞌelh, ꞌet Sizi ndo lugliz whucho tsꞌe oozya, ꞌinkꞌez dune hubodulhꞌeh, 15ꞌinkꞌez daja ni la Lizwifne tube buba hooncha ꞌinkꞌez ꞌuhutni, “ꞌAw dune hodulꞌeh tsꞌe indaꞌ iloh, ꞌinkꞌez ntsꞌenꞌa stabe ꞌon nus lhat-un tꞌéwhunínzun?”
16ꞌEt Sizi ꞌubulhni, “Ndai la bunohodusꞌeh-i, ꞌaw si schꞌeꞌ iloh ꞌuntꞌoh. Mbe la whuz de sútilhꞌaꞌ-un, ꞌen ootsꞌu haídiltsꞌut-i, ꞌi ꞌuntꞌoh. 17Mbene la Yakꞌusda yukꞌúneꞌ titꞌen hukwaꞌ ninzunne, ꞌenne la tꞌehonózin, ndi khuni Yakꞌusda ootsꞌu ha idiltsꞌut-i ꞌuntꞌoh, kꞌus sichꞌoh sghuni be tilah yasduk, ꞌet la tꞌehonózin. 18ꞌEt dune didutchꞌoh khuyanalduk de, dichꞌoh dutátiꞌ-i ꞌet za hukwunúta whe ꞌutni. ꞌEt hoontsꞌi dune yalhdúk-un, mbe la whuz de yútilhꞌaꞌ-un, ꞌen yudutálhtiꞌ-un hukwunúta de, ꞌen tsꞌihꞌun unꞌa dune unli whe ꞌutni ꞌinkꞌez tankꞌus neꞌutꞌen-i ooghu whéyooloh. 19Moses ꞌen ndi khuni ootulhúhisdeꞌ-i, ꞌi nohtlꞌa idanꞌai, ꞌet hoontsꞌi ꞌaw ookꞌú nulheꞌzuhtꞌen, ꞌinkꞌez di ha sutuzilhghelh hukwaꞌ tahꞌen?” ubúlhni.
20ꞌEt ꞌilhozdílne ꞌuhuyulhni, “Ntsiꞌ-i nudúdeh-i, ꞌi nyudínda! Mbe nyutuzilhghelh-un hukwunúta wheꞌ dini?”
21ꞌEt Sizi ꞌubulhni, “ꞌEt natsꞌulyís-un dzin ꞌilhoghi ꞌutꞌen ncha-i ꞌúsdla, ꞌet nohni huwa ꞌíhꞌen. 22Moses, ꞌen gha ooka dune uhli-i, ꞌi oonahtꞌus ínleꞌ. (ꞌAw Moses ꞌen gha za iloh, nohtsodaꞌne, ꞌenne butsꞌu ha hóoltsꞌut whe ꞌuhtꞌen.) ꞌInkꞌez ꞌet natsꞌulyis dzin chalhtsꞌul duneyaz whulih te, ꞌon ꞌat natsꞌulyis dzin ꞌet yuka dune unli-i, ꞌi huyitꞌus. 23Moses be ꞌudustlꞌus kꞌut ootulhúhisdeꞌ-i kꞌohyis whuchꞌa, natsꞌulyís-un dzin ꞌet dzin hoontsꞌi chalhtsꞌul dune whulih te yuka dune unli huyoohtꞌas. ꞌInkꞌez di ha ꞌet si dune natsꞌulyis-un, ꞌet dzin dune soo náꞌusdla ꞌet hukwa sulh húnulhchꞌe? 24ꞌAw whunulhꞌen-un ꞌet huwa iloh dune ba nahahyeh, tsꞌihꞌun unꞌa ꞌuhoontꞌoh hukwꞌunꞌa za dune ba nahoohyeh,” ubúlhni.
Whulohne dune Sizi ꞌen Gri ꞌuntꞌoh huninzun
25Whulohne Jerusalem whutꞌenne ꞌuhutni, “Ndun ꞌen lakw ꞌuntꞌoh hituzilhghelh wheni hikunuta? 26Whunilhꞌen tsꞌiyanne dune bez usda ꞌinkꞌez bubulh yálhduk, ꞌet hoontsꞌi ꞌaw dune daja lhunuhidusnih. Ndunne moodihne, ꞌenne tꞌehonínzun tilah ꞌet ndun ꞌen ꞌalhaꞌ Gri ꞌuntꞌoh? 27ꞌEt ndun ꞌen ntsꞌez de haínya la tꞌetsꞌonínzun, ꞌet hoontsꞌi Gri whusaínya de, ntsꞌez de hainya, ꞌaw ꞌilhoghun hoontsꞌi tꞌewhunózin ꞌaítꞌoh,” hutni.
28ꞌEt nyo lugliz whucho dune hodulhꞌeh whe Sizi soo khuniti be ubúlhni, “Nohni tꞌesunáhzun ꞌinkꞌez ntsꞌez de hásya-un cha tꞌewhunáhzun, ꞌaw sichꞌoh sghá iloh whusásya, ꞌet hoontsꞌi mbe la whuz de ha sálhꞌaꞌ-un, ꞌen soo tsꞌihꞌun ꞌen unli whe ꞌuntꞌoh, ꞌen ꞌaw nohni tꞌenuzuhzun. 29ꞌEt ꞌen ootsꞌu hásya ꞌet huwa tꞌenuszun ꞌinkꞌez ꞌen whuz de ha sálhꞌaꞌ!” ubúlhni.
30ꞌEt hukwaꞌ huyólhchoot hukwaꞌ hitꞌen ꞌet hoontsꞌi ootsꞌun whudiltsꞌulh-un ꞌawhuz whusalhúwhulhtsꞌit, ꞌet huwa ꞌaw dalhúhuyilel. 31ꞌEt ꞌilhozdílne butoh lhane ꞌen buba ꞌalhaꞌ yintꞌoh suliꞌ ꞌinkꞌez ꞌuhutni, “Ndun Gri whusaínya de, ndun yanus toleh huwa ꞌítꞌen te néꞌtitꞌen? ꞌAwundooh!” hutni. ꞌEt huwa ꞌen Gri ꞌuntꞌoh huninzun.
32ꞌEt ndunne ꞌilhozdílne whuz unꞌa Sizi highu yalhduk whe Phariseene hubodántsꞌo, ꞌet Phariseene ꞌinkꞌez lubret moodihne, neilhchúkne whuz whehalhꞌaꞌ Sizi hiyólhchoot ha.
33ꞌInka Sizi ꞌilhozdílne ubúlhni, “ꞌAwhuz dzoh saꞌyaz tileh ꞌet nohbulh ꞌutistꞌelh ꞌet ꞌinkꞌez mbe la whuz de ha sálhꞌaꞌ-un, ꞌen ootsꞌu nátisdalh. 34Nohni skunoohtaꞌ la ꞌet hoontsꞌi ꞌaw nasólhtelh ꞌaítꞌoh, ntsꞌe la ꞌustꞌoh tsꞌe ꞌaw nohni whuz toohyaꞌ ꞌaítꞌoh.”
35ꞌEt Lizwifne dichꞌoh ꞌulhodutni, “Ntsꞌe atꞌen tiyalh whe ꞌutni? ꞌAw natsꞌólhtelh ꞌaítꞌoh neúlhni. ꞌUdun yun kꞌut whutꞌenne, ꞌenne butuz toleh tiyalh whuz Lizwifne whulohne yahandil inleꞌ, ꞌinkꞌez whuz toleh ꞌudun yun kꞌut whutꞌenne hubodutilhꞌeh? 36Daja ni whe utni inleꞌ, ‘Nohni skunóohtaꞌ la ꞌet hoontsꞌi ꞌaw nasólhtelh ꞌaítꞌoh, ꞌinkꞌez ntsꞌe la tisdalh tsꞌe ꞌaw nohni whuz toohyaꞌ ꞌaítꞌoh,’ ꞌet daja ni whe ꞌutni?” hutni.
Sizi Ndoni butsꞌú yoozi
37ꞌEt ꞌawet nuhwhújeh-un cho whutoh, ꞌudekꞌez dzin-un, ꞌet dzin ꞌukꞌenus hooncha. ꞌEt dzin ꞌet Sizi butoh usyin ꞌinkꞌez soo khuniti be bubulh yálhduk, “Mbene la taꞌóosdane stsꞌun túhdilh ꞌinkꞌez uhtnai! 38Mbe la si ooba ꞌalhaꞌ ꞌustꞌohne, Yakꞌusda ooghuni ꞌukꞌu nusguz-i ndutni, ‘Too, ꞌi ꞌilhiz wheni be tsꞌúkhuna-i, ꞌenne ootsꞌu haítili,’” ubúlhni. 39ꞌEt Sizi ndutni whe Ndoni ghun bubulh yaílhduk. Mbene la didut buba ꞌalhaꞌ yintꞌohne, ꞌenne buyudútiltsꞌulh. ꞌAw ꞌaho iloh. Sizi ooba whudáltiꞌ hukwꞌelhꞌaz de, ꞌet de nduwhutanelh.
40ꞌEt ꞌilhozdílne butoh ndi khuni hidántsꞌo whe lhanne, ꞌenne ꞌuhutni, “ꞌAlhaꞌ-i be ndun ꞌen nyoon nus hóoꞌen-un ooghu yaduk inleꞌ-un ꞌuntꞌoh.”
41ꞌEt whulohne cha ꞌuhutni, “Ndun ꞌen Gri ꞌen ꞌuntꞌoh.” ꞌEt ꞌuyoonne cha ꞌuhutni, “ꞌAwundooh! ꞌAw Gri Galilee yun kꞌut tsꞌe toleh ha tíyalh!
42Yakꞌusda ooghuni ꞌukꞌu nusguz-i, ꞌi ndutni, David yutsꞌu ha kédanzut-un, ꞌen keyoh Bethlehem huwhútni, David ookeyoh ínleꞌ, Gri whuz de ha tíyalh,” hutni. 43ꞌInka ꞌet huwa ndunne ꞌilhozdílne nyoon ꞌen ooghun lhchꞌaz nehúdindil. 44Whulohne, ꞌenne huyitálhchulh hukwaꞌ huninzun, ꞌet hoontsꞌi dalhúhuyilel.
45ꞌEt nyoonne neilhchúkne, lubret moodihne ꞌinkꞌez Phariseene te hubuhalhꞌaꞌne cha hiyit whuz náhoosdil whe ubuhoodulhkut, “Di ha whusálhulhtel?”
46Neilhchúkne ꞌuhutni, “ꞌAw whutsodaꞌ ꞌuyoon dune ꞌen ndun dune kꞌunꞌa yalhulhduk.”
47ꞌEt Phariseene ꞌuhutni, “Nohni cha eh nohnanꞌa wheꞌ dahni? 48Wheni moodihne kꞌus Phariseene wheni cha neba ꞌalhaꞌ ꞌuntꞌoh nahzun eh? ꞌAwundooh! 49ꞌEt hoontsꞌi ndunne ꞌilhozdílne lugliz whucho ꞌet, tsꞌiyawh laitꞌénne ꞌuhintꞌoh ꞌet huwa ndai la Moses ꞌukꞌu néyuzguz-i ꞌaw dudeni be tꞌéhinúszun!” hutni.
50Nicodemus, ꞌen la ꞌilhe ꞌúlhdzis Sizi yughu ninya inleꞌ-un, ꞌen cha Pharisee bubulh ꞌilhoghun unli whe dudulh Phariseene ꞌubulhni, 51“Wheni neba khuni ootulhúhisdeꞌ-i, ꞌi ꞌutni, dune ooghuni ꞌuzdántsꞌo ꞌinkꞌez be ꞌutꞌen uznalhꞌen de, ꞌet de za ooba natsꞌuhooyeh huba ꞌuhoontꞌoh.”
52ꞌEt ꞌuhuyúlhni, “Nyun cha eh Galilee tsꞌe haínya-un inli? Yakꞌusda ooghuni ꞌukꞌu nusguz-i soo cho nilhꞌen, ꞌet de la nyeni be tꞌéoonónzin, ꞌaw ꞌilhoghun hoontsꞌi nus hóoꞌen-un, ꞌen Galilee yun kꞌut tsꞌe haínya-un hooloh!”
53ꞌEt ꞌawet tsꞌiyanne duyoh tsꞌe whenáhidil.
Currently Selected:
John 7: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.