Colossians 1
1
Colossia whutꞌenne Paul hadih ꞌubulhni
1Si Paul Jesus Christ ꞌen be whelꞌaꞌ-un ꞌustꞌoh. Yakꞌusda whuz unꞌa sba hukwaꞌ ninzun. ꞋInkꞌez neulhutsin Timothy bulh.
2Nohni Colossia whutꞌenne Christ unidulhne hadih nohtsꞌútni. Christ ꞌen ooyudúlhtsꞌi. Yakꞌusda oochꞌeꞌ ꞌahli. Nohni neulhutsinke ooba ꞌalha ꞌuhoontꞌohne ꞌahli. Yakꞌusda neBá ꞌinkꞌez Jesus Christ neMoodihti, ꞌen tsꞌun nohdzi dóghel ꞌinkꞌez ye unzoo-i cha nohbulh óotꞌeꞌ ha, ꞌet whuz unꞌa za oohtꞌeꞌ hukwaꞌ nuszun.
Dahoontꞌoh whe Christ Jesus ꞌen nohba ꞌalhaꞌ ꞌuntꞌoh
3ꞋEt Yakꞌusda Jesus Christ neMoodihti ooBá, ꞌen tsꞌun musi tsꞌutni, ꞌinkꞌez ꞌahoolhyiz nohni nohba tenazdudli. 4Nohni nohbulh uzditsꞌo dahoontꞌoh whe Christ Jesus ꞌen nohba ꞌalhaꞌ ꞌuntꞌoh ꞌinkꞌez Yakꞌusda oochꞌeꞌ unline, ꞌenne tsꞌiyawh bukꞌehsiꞌ. 5Ndai yakꞌuz tsꞌe nohba ꞌilhozkat-i, ꞌi ooka tse hóhleꞌ. ꞋEt huwa bukꞌeoohtsiꞌ, ꞌinkꞌez khuni unzoo-i whutsodaꞌ bulh ꞌúdahtsꞌo. 6Ndi khuni unzoo-i ndi yun kꞌut ndulcho whe núdilhtsꞌut ꞌinkꞌez ꞌi be ꞌuniztꞌai leꞌ hintꞌoh. Nohni cha whuz unꞌa za nohghu diltsꞌut. Ndet dzin ꞌudechoo whudáhtsꞌo whe khuni ꞌalhaꞌ ꞌuntꞌoh-i, ꞌi gha Yakꞌusda ye unzoo-i tꞌewhunihzin, ꞌinkꞌez ꞌon nus soo náhyeh. 7Epaphras ꞌen ꞌilhoghun be ꞌustle-un, ꞌen nebulh ꞌutꞌen-un ꞌuntꞌoh ꞌinkꞌez ookꞌetsꞌintsiꞌ. ꞋEn gha ye unzoo-i hodilhꞌeꞌ. ꞋEn nohni nohba Christ ꞌen yuba neꞌutꞌen-un unli ꞌuntꞌoh, ꞌinkꞌez ꞌaw nohla dootnih ꞌaitꞌoh. 8ꞋInkꞌez Ndoni be tsꞌiyanne kꞌehsiꞌ, neúlhni.
Christ ꞌen tsꞌiyantsuk whe ꞌukꞌenus diztiꞌ-un ꞌuntꞌoh
9ꞋEt whula gha tsꞌe ꞌoh daꞌ ndet dzin whulh ꞌúzdantsꞌo, ꞌoh daꞌ whutsꞌun nohba tenazdudli-un ꞌaw ꞌetsul lheꞌtsꞌudísni. Whuz unꞌa Yakꞌusda nohba tsꞌoodulhkut whe nohtsꞌo hukwaꞌ ninzun-un, soo tsꞌihꞌun unꞌa tꞌewhunoohzeh. ꞋEt whe Ndoni ꞌen be, be whutnih-i ꞌinkꞌez be tꞌeoonudzun-i cha, ꞌi tsꞌiyawh ꞌi be dutíhbun. 10ꞋEt neMoodihti ꞌen ba tsꞌihꞌun unꞌa ndi yun kꞌut dúlhtsꞌi. Ndai ꞌulhꞌen-i tsꞌiyawh yé hotꞌeꞌ. ꞋUtꞌen unzoo-i ꞌi ootsꞌu ha yóokat, ꞌinkꞌez Yakꞌusda ꞌon nus tꞌentihzeh. 11Ye ulhtus-i diztiꞌ-i, tsꞌiyawh ꞌi be ꞌon nus ulhtus óohle. ꞋInkꞌez hoonáhtꞌiꞌ whe soo hoonli talhodahni ꞌinkꞌez dzoh nahdeh-un whulh nudulhya. 12ꞋInkꞌez neBá musi dahni. Yakꞌusda oochꞌeꞌne be hóotꞌen-i toh nudilhyanne, ꞌen yutꞌi-i bugha ítalelh-i, ꞌi ooloh negha tikulh, ꞌet wheni sooꞌ tsꞌuldzooꞌ nesulhtsi. 13NeBá ndi tsalhgus yo ulhtus-i tsꞌu ha náneanla, ꞌinkꞌez duYeꞌ yukꞌensiꞌ-un, ntsꞌe whulerwe unli-un, ꞌet nenáneninla. 14ꞋEn duduzkaiꞌ be naneonket. ꞋEt whe nelubeshi tsꞌiyawh neba ꞌun yutilhdil.
15ꞋEt Yakꞌusda ꞌaw lhistꞌen whe ꞌuntꞌoh ꞌet hoontsꞌi ooYeꞌ ꞌen yundultꞌoh whe ꞌuntꞌoh tꞌetsꞌoninzun. Ndi tsꞌiyaitsuk ꞌulya-i, ꞌi ꞌudechoo whuzdli-un unli, ꞌet huwa tsꞌiyawh whumoodih unli. 16ꞋEn be tsꞌiyaitsuk ꞌulya ꞌet huwa. Ndai yat ꞌinkꞌez yakꞌuz cha ꞌuntꞌoh-i, ꞌinkꞌez ndi yun kꞌut cha. Ndai uznilhꞌen-i ꞌinkꞌez lhtsꞌisꞌen-i cha. Yakꞌuz tsꞌe kwꞌutsꞌuzda cho diztiꞌ-i kꞌudilhtsꞌine, ꞌinkꞌez nududeh-i ulhtus-i, ꞌi cha ꞌuyínla. Ndet la whe hooncha tuneꞌ whutꞌen-un, ꞌinkꞌez whulohne nududeh-i ꞌuyoo nududeh-i kꞌuneꞌ yulꞌen, ꞌohwhi cha ꞌuyínla. ꞋEn oogha ꞌúhoolya ꞌinkꞌez ooba ꞌuhóolya. 17ꞋInkꞌez ꞌen ꞌuntꞌoh tsꞌiyai tso unli, ꞌinkꞌez ꞌen gha tsꞌiyai lhootun leꞌ ꞌuntꞌoh. 18ꞋInkꞌez Yakꞌusda ba ꞌilhunaoodulhne, hiyustꞌe hinli, ꞌen butso whudilhdzulh-un ꞌuntꞌoh. Mbe ꞌudechoo wheꞌ whuditꞌen-un, ꞌen ꞌuntꞌoh. ꞋInkꞌez yaidlane butoh, ꞌen ꞌudechoo whuzdli-un ꞌuntꞌoh. ꞋEt ꞌen tsꞌiyaitsuk yanus diztiꞌ-un ꞌuntꞌoh.
Christ Yakꞌusda dutsꞌun nenánedilya
19Yakꞌusda hoontꞌiꞌ whe ntsꞌenꞌa la dantꞌoh, ooYeꞌ yulh hulhgha ꞌuntꞌoh whe ꞌuntꞌoh. 20ꞋEn gha tsꞌiyaitsuk ꞌinkꞌez wheni cha Yakꞌusda dutsꞌun nenánedilya. Tsꞌiyaitsuk ndi yun kꞌut ꞌuntꞌoh-i, ꞌinkꞌez yakꞌuz cha ꞌet hoontsꞌi, tulalhgus kꞌut buzkaiꞌ oochꞌa yuntsus-i, ꞌi be whudizghel neba whulhtsi.
21ꞋInkꞌez ꞌoh daꞌ nohni cha Yakꞌusda oochꞌoh ꞌahtꞌoh inleꞌ. Noheni be oochꞌaz ditnine ꞌahli inleꞌ, ꞌinkꞌez hoontsiꞌ tuneꞌ zahtꞌen. ꞋEt hoontsꞌi dughu nanohnínla. 22OoYeꞌ ndi yun kꞌeinya whe wheni nekꞌunꞌa ooyustꞌe whuzdliꞌ, ꞌinkꞌez ꞌi be neba dazsai. ꞋEt huwa ꞌaw ꞌon ꞌun nebulh lhúhiskoh. ꞋEt whe nohtsun hooloh tileh. Nohkꞌéholtsꞌit cha ꞌaitꞌoh. ꞋInkꞌez ꞌaw ꞌon ꞌun nohchꞌaz yaooduk ꞌaitꞌoh. ꞋEt whuz unꞌa duBá tsꞌun nohtilelh. 23Be nohba ꞌalha ꞌuhoontꞌoh-i, soo dutsꞌo-i whe oohtun. ꞋInkꞌez whudutsꞌo-un yoh ookꞌu whuzꞌai-i leꞌ ꞌahtꞌoh. ꞋInkꞌez khuni unzoo-i bulh ꞌudahtsꞌo-un, ndi khuni ooka tse hóohli khun oola doohtnih junih. Ndi yun kꞌut ndulcho whe ndi khuni unzoo-i bugha ídiltsꞌut. ꞋEt huba si, Paul, Christ ba neꞌutꞌen-un susdliꞌ.
Soo hooltus whe ꞌustꞌen
24ꞋEt ꞌandit Christ ꞌen gha nohba dzoh nuszut-un hoonústꞌiꞌ. ꞋEt syustꞌe kꞌoh ꞌuhoontꞌoh-un ꞌi be ꞌen ooyustꞌe ba lhaoodutisdleh. Ndi ooyustꞌe, ꞌi Yakꞌusda ba ꞌilhunaoodulh-un, ꞌet ꞌuwhúlhni. 25ꞋEt huba ooba neꞌutꞌen-un susdliꞌ. Yakꞌusda ye sooꞌ whulhꞌen-i, nohni nohgha sgha whuntꞌai, ꞌet whe nohba oola ꞌustꞌen-un susdliꞌ. ꞋEt Yakꞌusda ooghuni tsꞌihꞌun unꞌa lhadutisdleh. 26Ndi wheꞌ hoontꞌoh hooyoh-un, ꞌaw niz de ha oodanzut whutsꞌun, tsꞌiyanne buchꞌa whunistꞌi. ꞋEt hoontsꞌi ꞌawet Yakꞌusda oochꞌeꞌne, wheni tsꞌiyawh tsꞌet gaih whunénilhtan. 27Ndi wheꞌ hoontꞌoh hooyoh-un, ꞌet tꞌetsꞌontizeh ꞌet netsꞌu hukwaꞌ ninzun. Dawhuldzooꞌ ꞌinkꞌez dawhulcho ꞌuhoontꞌoh ꞌinkꞌez ꞌudun yun kꞌut whutꞌenne, ꞌenne bubaꞌ hoontꞌoh. Christ ꞌen nohyudinda, ꞌet huwa Yakꞌusda ye diztiꞌ-i, ꞌi ooka tse hoohli.
28ꞋEn ghun tsꞌiyanne bulh yatsꞌulhduk. Be whutnih-i, ꞌi be tsꞌiyanne bugha tsꞌútni, ꞌinkꞌez tsꞌiyawh whubutsꞌodulhꞌeh. ꞋEt whe tsꞌiyanne Christ Jesus ꞌen be lhadulyane ꞌuhootꞌeꞌ. ꞋEt whuz unꞌa za ꞌuhintꞌoh whe neBá ootsꞌun buztilelh. 29ꞋEt huba soo hoolhtus whe ꞌustꞌen. Ntsꞌenꞌa ye ulhtus-i, ꞌi ye sílhtus whe ꞌustꞌen, ꞌet ꞌuwhultus whe ꞌustꞌen.
Currently Selected:
Colossians 1: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.