Rome Whutꞌenne 16
16
Paul, Rome dilhtsꞌine hadih ubúlhni
1ꞌEt Cenchrea keyoh Sizi Gri gha ꞌilhozdílne butoh ꞌilhoghun tsꞌeke unzoo-un, Phoebe huyúlhni, ꞌen ꞌahoolhyiz wheni neba ꞌutꞌen-un. 2Nohtsꞌóozya de hoonáhtꞌiꞌ whe Sizi Gri booziꞌ gha yoh daóolhtelh. Yakꞌusda oochꞌeꞌne ꞌahli, whuz unꞌa tsꞌihꞌun unꞌa nohba hoontꞌoh ꞌutihnelh huba. Ndai la ye ndunidzít-i cha be óola oohtꞌen. Lhanne la ꞌitꞌen whe ꞌuntꞌoh. Si cha sla ꞌitꞌen.
3Priscilla ꞌinkꞌez Aquila sba bózoo budóhniꞌ. Gri Sizi tsꞌutni-un, ꞌenne sulh ꞌúhutꞌen inleꞌ.
4ꞌEnne hiye khúna-i, ꞌi ꞌantsꞌi buba ꞌuntꞌoh whe suhúlhyih inleꞌ. ꞌEt ndahúja huwa, si ꞌinkꞌez ꞌudun yun kꞌut whutꞌenne Sizi Gri ooba ꞌilhozdílne, tsꞌiyawh musi butsꞌútni.
5Mbene la Gri ooba buyoh ꞌilhozdílne, ꞌenne cha tsꞌiyawh sba bózoo budóhniꞌ.
Skꞌeke Epaenetus ꞌen cha sba bózoo dóhniꞌ. ꞌEn Achaia yun kꞌut ꞌudechoo Gri ooba ꞌalhaꞌ yintꞌoh suliꞌ-un.
6Mary ꞌen cha sba bózoo dóhniꞌ. ꞌEn cha tube ncha-i be nela ꞌitꞌen ínleꞌ.
7Andronicus ꞌinkꞌez Junias ꞌenne cha sba bózoo budóhniꞌ. Snatneke ꞌuhintꞌoh, sulh ꞌáhudanꞌaꞌ ínleꞌ. Whelꞌaꞌne butoh dune ncháne hinli ꞌinkꞌez stso daꞌ Gri hitsꞌu nálhꞌa inleꞌ.
8Amplias ꞌen cha Sizi Gri uniyalh-un ꞌuntꞌoh. Tube ookꞌesiꞌ, sba bozoo dóhniꞌ.
9Urbanus dune, ꞌen cha nebulh ꞌítꞌen Gri be ꞌutꞌen ꞌutsꞌulhꞌen whe ꞌinkꞌez skꞌeke Stachys ꞌenne cha sba bózoo budóhniꞌ.
10Gri uniyálh-un, Apeles, tsꞌiyanne ba unzóo-un,
ꞌinkꞌez Aristobulus ꞌet ooyoh dilhtsꞌíne, ꞌenne cha sba bózoo budóhniꞌ.
11Snadun Herodion ꞌinkꞌez mbene la Narcisus ooyoh dilhtsꞌíne Sizi Gri unidúlhne, ꞌenne cha sba bózoo budóhniꞌ.
12Tryphaena ꞌinkꞌez Tryphosa ꞌenne cha Sizi Gri be ꞌutꞌen ꞌuhulhꞌen, ꞌinkꞌez skꞌeke Persis tube ncha-i be Sizi Gri be ꞌutꞌen tube yughaiznaꞌ ínleꞌ, ꞌenne cha sba bózoo budóhniꞌ.
13Rufus ꞌen ꞌukꞌenus soo Sizi Gri ba ꞌutꞌén-un, ooloo cha ꞌantsꞌi sloo leꞌ ꞌúntꞌoh, ꞌenne cha sba bózoo budóhniꞌ.
14Asyncritus, Phlegon, Hermas, Patrobas, Hermes, ꞌet ꞌonghohne neulhutsinke bubulh ꞌútꞌenne, ꞌenne cha sba bózoo budóhniꞌ.
15Philologus ꞌinkꞌez Julia cha, Nereus ꞌinkꞌez bulhtus cha, ꞌinkꞌez Olympas ꞌinkꞌez mbene la Yakꞌusda oochꞌeꞌne bubulh ꞌútꞌenne, tsꞌiyawh sba bózoo budóhniꞌ.
16ꞌEt bózoo lhudáhni de, ꞌet sih lubeshi ooghu hooloh-i be nalhudoohtsꞌoos.#16:16 Whuz keyoh ꞌet whuz unꞌa huhoontꞌiꞌ whe ilhanahodulh.
ꞌEt mbene la njan Gri gha ꞌilhozdílne,
Rome whutꞌenne bózoo nohtsꞌútni.
Paul ubúlhni, mbene la Yakꞌusda ooghuni ꞌatsꞌun unꞌa wheyodulhꞌéhne buka tse hólhleꞌ
17Sulhutsinke njan huwun nohgha dúsni, nohtoh mbene la whunohodalhꞌeꞌ whuchꞌaz yálhdukne, ꞌenne bugha lhchꞌaz nedutahdulh ꞌinkꞌez nohba hoontsiꞌ tileh. ꞌEt nduntꞌóhne buka huwolhleꞌ ꞌinkꞌez buchꞌaz naóolhꞌah. 18ꞌEt duntꞌóhne dune neMoodihti Sizi Gri hikꞌú nulheꞌustꞌenne. Dichꞌoh kꞌunꞌa ꞌuhutꞌen, ꞌinkꞌez ntsꞌenꞌa la dichꞌoh hukwaꞌ huninzun hukwꞌuneꞌ ꞌutꞌenne. Nanuhonaꞌah whe khuni unzoo-i be nohbulh yáhalhduk, ꞌet hukwa tse lhuhoolihne whuz unꞌa nabontiꞌah. 19Ntsꞌenꞌa la Sizi Gri be ꞌutꞌen kꞌoh hukwꞌúneꞌ ꞌahtꞌén-un tsꞌiyanne whulh ꞌúdantsꞌo. ꞌEt huwa tube nohba hoonústꞌiꞌ. Whunihne oolhleꞌ nohba hukwaꞌ nuszun ꞌutꞌen unzoo-i ghun, ꞌinkꞌez la lubeshi kꞌúnulheꞌzoohtꞌen.
20Yakꞌusda ꞌen whudizghel-un negha whuꞌaih-un, ꞌaw lhotuszit whe Satan nohketlꞌah gak yutilhtselh. ꞌEt nohba tenadusdli neMoodihti Sizi Gri ye únzoo-i, ꞌi nohbulh óotꞌeꞌ ha.
21Timotheus, sulh ꞌútꞌen-un, bozoo nohúlhni. ꞌInkꞌez snatneke Lucius, Jason, Sosipater, ꞌenne cha bózoo nohuhútni.
22Tertius suhútni, si ꞌusja ndi ꞌudustlꞌus Paul ba ꞌukꞌu neízusguz. Si cha bózoo nohdúsni.
23Gaius, ꞌen duyoh dásunilhti, ꞌen cha bózoo nohúlhni. ꞌEn ooyoh ꞌet Sizi Gri unidúlhne ꞌilhuhozdil. Erastus, ꞌet keyoh whutꞌi sooneya ghundli-un, ꞌinkꞌez neulhutsin Quartus, ꞌenne cha bózoo nohuhútni.
24NeMoodihti Sizi Gri ye únzoo-i tsꞌiyawh nohbulh óotꞌeꞌ. ꞌEt ndo honeh.
Paul, ꞌawhuz ꞌilhoghun budutánelh-un whuzꞌai
25Yakꞌusda uzdólhtiꞌ. ꞌEn ꞌuntꞌoh ye ulhtus-i ꞌutꞌi Sizi Gri ooba ulhtusne nohoolhtselh ha. Ntsꞌenꞌa la nohdásniꞌ whuz unꞌa ꞌutihnelh, ndet la whunohdusꞌeh Sizi Gri ooghuni unzoo-i ghun. ꞌUdaꞌ ꞌaw dune ndi khuni unzoo-i highu tꞌehonúszun. ꞌOh daꞌ Yakꞌusda ndi yun kꞌut ꞌuyinla, ꞌet whutsꞌun njan wheꞌ hoontꞌoh hooyoh-un buchꞌa nónutꞌiꞌ inleꞌ. 26ꞌEt ꞌandit tsꞌiyawh tꞌeoonidzin. ꞌInkꞌez Yakꞌusda ooghuni nus be tꞌeoonudzun-i dune didohne tsꞌiyanne tꞌehinanzin. Yakꞌusda ꞌilhiz wheni khuna-un, ꞌi khuni netlꞌa ídanꞌai, ꞌi ndi yun kꞌut dunene tsꞌiyawh tꞌéhinanzin. ꞌEt tꞌéhonínzun Sizi Gri ooghuni hiyólhchoot whe hikꞌúneꞌ ootꞌen ha. 27Yakꞌusda ꞌen za whunih whe ꞌuntꞌoh. Sizi Gri ꞌen gha ꞌahoolhyiz uzdólhtiꞌ ꞌilhiz wheni. ꞌEt ndo honeh.
Currently Selected:
Rome Whutꞌenne 16: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.