Galatians 6
6
Ndet huwa whúlnaꞌ-un lhla ꞌahtꞌen
1Sulhutsinke nohni Ndoni kꞌuneꞌ ꞌutꞌenne ꞌahtꞌoh, ꞌinkꞌez mbe la nohtoh lubeshi be ulhgooh-un, ꞌen nalhchoot. Nánilhtsul tsꞌihꞌun nenánulhtih. Nohnichꞌoh naꞌdunulhꞌen, doo ka sih nohni cha tankꞌus nóohtꞌi. 2ꞋIlhone ꞌahli ndet la nohba howa whulnaꞌ hoontsꞌi lhla oohtꞌen. ꞋEt de la Christ, ooghuni netlꞌa díltsꞌut-i, ookꞌuneꞌ tihtꞌen wheꞌ hoontꞌoh. 3Mbe la hoonli ꞌustꞌoh naꞌdunudzun-un, ꞌen dichꞌoh naꞌdunutꞌah. ꞋAw hoonli lhiloh whe ꞌuntꞌoh ꞌet huwa. 4ꞋEt ꞌilhoghun ꞌahli whe dude ꞌutꞌen kꞌoh soo cho honoolhꞌen. ꞋEt ꞌutꞌen unzoo-i ꞌinla de, ꞌet la didutchꞌoh duba hótꞌeꞌ, ꞌinkꞌez ꞌaw ꞌuyoonne ba iloh. 5ꞋIlhone tsinli whe whenichꞌoh ne-eꞌutꞌen ꞌutsꞌoolhꞌen hubaꞌ hoontꞌoh.
Tube cho dahzoo ꞌinkꞌez hoonzoo tuneꞌ ꞌahtꞌen
6ꞋEt mbe la Yakꞌusda ghuni hodulhꞌeh-un, ꞌen mbe la whuyodalhꞌeꞌ-un, ꞌen ndai la unzoo-i yutꞌi, ꞌi yuloh ye yulaꞌootꞌen hubaꞌ hoontꞌoh.
7Khun nanoohtꞌah junih. ꞋAw Yakꞌusda ooghohdloh ꞌaitꞌoh. ꞋEt ndai la dune ꞌainulih-i, ꞌi za ha yuntilelh whe ꞌuntꞌoh. 8ꞋEt ntsꞌe la dune ooyustꞌe nintꞌi tsꞌe, ꞌet ooyustꞌe whutsꞌu nintꞌi-un, whuz unꞌa datitsah. ꞋEt hoontsꞌi mbe la Ndoni yunilhtꞌi kꞌunꞌa neꞌutꞌen-un, ꞌen Ndoni gha ꞌilhiz hutinalh. 9ꞋEt hoonzoo-un ꞌutsꞌuwhulhꞌen ꞌet huwa néznotsilh junih. ꞋEt ꞌaw whula lhtsꞌudustni de, whusahóoltsꞌut de, ꞌet de ha ꞌúznoolelh. 10ꞋEt huwa negha whultsuk te, ꞌuyoonne laꞌ tsꞌootꞌen. Mbene la be ꞌalha ꞌuhoontꞌoh unline, ꞌenne ꞌukꞌenus bulaꞌ tsꞌootꞌen hubaꞌ hoontꞌoh. ꞋEt ꞌilhoh ꞌutsꞌintꞌoh wheꞌ tsꞌintꞌoh.
Jesus Christ tulalhgus kꞌut dazsai-un, ꞌet whe tsꞌohótꞌeꞌ
11Ndi nulhꞌen sichꞌoh nohtsꞌo kꞌeusguz-i ꞌuntꞌoh. Lhelcho susi whe ookꞌu neꞌzusguz.
12ꞋEt mbene la ooyustꞌe ꞌet huba soo ꞌuldzooꞌne, ꞌenne ꞌet hukwaꞌ hutꞌen, ꞌenne ꞌuhintꞌoh, nohni ooka dune ꞌahli-i kꞌut nohotitꞌus whutsꞌu nohonilhtꞌi. ꞋEt njan huwa hutꞌen, Christ tulalhgus kꞌut neba dazsai-un huwa yatsꞌulhduk-un, ꞌet huwa dzoh nunéhulhdzut, ꞌet whuchꞌa neꞌhootꞌen-un hukwaꞌ hutꞌen. 13ꞋEt ndunne yuka dune unli-i kꞌut ustꞌúsne, ꞌenne hoontsꞌi Moses be ꞌudustlꞌus ꞌaw hikꞌu nulheꞌustꞌen. ꞋEt hoontsꞌi whuz unꞌa ooka dune ꞌahli-i kꞌut nohotitꞌus whuz nohonilhtꞌi. ꞋEt ndunóhohinla de, ꞌet daꞌ wheꞌ hotꞌeꞌ ooleꞌ daꞌ. 14ꞋEt Jesus Christ tulalhgus kꞌut neba dazsai-un, ꞌet za whdústꞌiꞌ wheꞌ hoontꞌoh. NeMoodihti Jesus Christ ootulalhgus, ꞌi gha za sdzi do ꞌúja. ꞋEn bulh dasusai le ꞌustꞌoh. ꞋEt huwa ndi yun ꞌantsꞌi sba whuzdliꞌ. ꞋInkꞌez si cha ꞌantsꞌi whuba usdli suliꞌ. 15Wheni tsꞌiyawh Christ Jesus ꞌen bulh ꞌutsꞌintꞌoh de, ꞌet de yuka dune unli-i kꞌut ꞌustꞌusne, kꞌus dune lhitꞌusne, ꞌet ꞌantsꞌi ꞌuhoontꞌoh ꞌet huwa. ꞋEt hoontsꞌi wheni mbene la Christ Jesus ꞌen bulh ꞌuntꞌohne, doo cha za tsꞌuwhuzdli wheꞌ tsꞌintꞌoh. 16ꞋInkꞌez mbene la ndi khuni ꞌi gha yukꞌúneꞌ ꞌústꞌenne de, ꞌet de be nedzi dizghel-i, ꞌinkꞌez be negha teꞌnidzeh-i, ꞌohwhi la huyulh ootꞌeꞌ. Israel ootsꞌu haínzutne, mbene la Yakꞌusda ooduneꞌ unline, ꞌenne cha.
Yakꞌusda ye unzoo-i, ꞌi nohbulh óotꞌeꞌ
17ꞋAndit whutsꞌun ꞌaw dune dzoh nusoolhdzut junih! Jesus Christ ooba ꞌustꞌen whe dzoh nusúsdzut, ꞌet huwa syustꞌe ndulcho whe be hóodatꞌen whe ꞌuntꞌoh.
18Sulhutsinke, neMoodihti ye unzoo-i, ꞌi nohbulh ootꞌeꞌ. ꞋEt ndo honeh.
Currently Selected:
Galatians 6: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.