Acts 28
28
Paul Malta whutꞌenne bulaꞌtitꞌelh
1Soo yatsꞌúzdil ndi noo ꞌi Malta huyúlhni ꞌet tꞌetsꞌonanzin. 2ꞋEt whutꞌenne tube netsꞌun hínzoo. Náwhewhunilhtan ꞌinkꞌez whuzkꞌuz. Kwun neba húdulhkꞌan ꞌinkꞌez soo cho neneꞌhulhꞌen. 3Paul tsuz naidalhdzoo-i nus tsídule whe tlꞌughus oolhchꞌoolh-i kwun be nílghaz whe Paul yula súlhchꞌulh. 4ꞋEt whutꞌenne nyoo tlꞌughus Paul yula yé dintꞌi hinilhꞌen ꞌet ꞌulhodútni, “Ndun dune ughan-un la ꞌuntꞌoh. Wheni neyakꞌusda, ꞌen booziꞌ, ꞌi ꞌahoolhyiz ꞌukꞌelháhoolhꞌi-un tsꞌútni, ꞌen hutinalh-un yughá hoꞌalh ꞌaítꞌoh, yatoo kꞌut dujih hóontsꞌi.” 5ꞋEt hoontsꞌi Paul ꞌaw dálhinel whe kwun kꞌut dula yuzghat ꞌet tlꞌughus ootsꞌa ha yánkat. 6Hiba sulhꞌi ꞌólkꞌet tilah kꞌus khuntsul tilah nadílduz ꞌinkꞌez daóotsa. Saꞌ hiba ꞌilhꞌeꞌ hukwꞌelhꞌaz ꞌaw hoonli lheꞌínel ꞌinka ꞌutsꞌun unꞌa naꞌhunudzun ꞌinkꞌez ndun duyakꞌusda bulh ꞌilhoghun la ꞌuntꞌoh huninzun.
7ꞋAw bughu nilhdzaꞌ iloh ꞌet tlꞌo kꞌut whuzdla, noo kꞌut whudayi, Publius huyúlhni, ꞌen oochꞌeꞌ hoonli. Soo ooꞌih te ooghu dáznindil ꞌinkꞌez tat dzin oozih ꞌuzdáltsꞌiꞌ. 8Publius oobá lili kꞌut sulhti dada be cha ꞌinkꞌez dubut kꞌedzoh nuzut. Paul sulhtí-un, ꞌet yughu danínya ꞌinkꞌez tenadidli, yukꞌudálni, ꞌinkꞌez soo náꞌyinla. 9ꞋEt ndúhooja hukwꞌélhꞌaz noo kꞌut whutꞌenne ndudáne tsꞌiyawh whusahándil ꞌinkꞌez ꞌenne cha soo náꞌhuja. 10ꞋEt hoonliyaz lhai netsꞌótilhdil ꞌinkꞌez uztizki whe ndai la ookaꞌ tsꞌun tizilh-i cha netlꞌa náhayilya.
Malta whutsꞌun Rome tsꞌe hutizki
11Ta sanun inleꞌ hukwꞌelhꞌaz, keyoh Alexandria tsꞌe haínkez-i, ꞌi Lhulhutsin Lhtꞌudánkeꞌ huyúlhni, ꞌi tsꞌi khit noo kꞌut intan, ꞌi be uztízki. 12ꞋInkꞌez keyoh Syracuse huwhútni ꞌet uzninki ꞌinkꞌez tat dzin ꞌet ꞌuzdáltsꞌiꞌ. 13ꞋEt whezdinki ꞌet doo cha keyoh Rhegium huwhútni-un whuz tsꞌoozki. ꞋEt ꞌom bun ꞌet nꞌaz ha tistsꞌi ꞌet nat dzin inleꞌ ꞌet keyoh whuyaz Puteoli huwhútni ꞌet yatsꞌúzki. 14Whulohne ooba ꞌálhaꞌ hoontꞌohne nabutsꞌínla whe ꞌilhoh lisman ꞌet duzih ꞌuzdóltsꞌiꞌ nehútni. ꞋEt ꞌawet no ꞌutsꞌuja whe Rome tsꞌe tsꞌoozdil. 15ꞋEt ndunne neulhutsínkene Rome ꞌet nebulh ꞌúhudantsꞌo whe, ꞌeꞌóoket-un, Appius huwhútni-un, ꞌinkꞌez tsꞌuztez bayoh cha tat-un ꞌutꞌalh-un huwhútni-un, ꞌet lheꞌhooldzoh tsꞌe whuz nedodizdil. ꞋEt Paul ꞌubutilhꞌen whe, Yakꞌusda, “Musi,” yudániꞌ ꞌinkꞌez ꞌawet oodzi donáꞌuja.
Paul Rome ꞌet Jesus Christ ghun dune bubulh yálhduk
16ꞋEt Rome tsꞌe tsꞌoozdil whe Paul ndun lhugan-un ꞌilhoghun za yughunli whe dichꞌoh whútꞌi-un higha óoninꞌai.
17ꞋEt hukwꞌelhꞌaz tat dzin inleꞌ whe Paul ꞌet whutꞌenne Lizwif dune unchane bubulh yátilhduk ha usda tsꞌe toodilh ubúlhni. Whusahándil whe ꞌet ubúlhni, “Dunene ꞌinkꞌez sulh Lizwifne ꞌaw hoonli sulh didowhne buchꞌa nulhéꞌustꞌel ꞌinkꞌez netsodáꞌne bukꞌoh tsꞌe néꞌwhutꞌen-un ꞌoh cha whuchꞌa nulhéꞌustꞌel. ꞋEt hoontsꞌi Jerusalem ꞌet ꞌasodilhꞌai ꞌinkꞌez Rome whutꞌenne, ꞌenne butlꞌá sahalhti. 18ꞋEt ꞌenne suhoodalhkut ꞌinkꞌez hoonli whe níntaꞌ nustꞌen-un hukwꞌelha datísah sghun nálhuhuhóoꞌalh ꞌet huwa sla nahudutitnih hukwaꞌ huninzun. 19ꞋEt hoontsꞌi Lizwifne whanchꞌaz nehúnindil ꞌinkꞌez sulh dunene ꞌaw whe tankꞌus unꞌa bughu yaoosduk ꞌaitꞌoh ꞌet hoontsꞌi oosneh hubaꞌ hoontꞌoh ꞌet huwa lerwe díztiꞌ-un oobut netísyalh ꞌinkꞌez ootsꞌu tédutisdlih. 20Ndi Israel ootsꞌu hainzutne hika tse hóoli-un, ꞌet sba ꞌálhaꞌ ꞌuntꞌoh huwa ndi lhuztih tlꞌool be suzghel. ꞋEt huwa nohtisꞌelh ꞌinkꞌez nohbulh yátisduk-un hukwáꞌ dísniꞌ.”
21ꞋEt njan nduhúyulhni, “ꞋAw nyun nghun yun kꞌut Judea whutsꞌun ꞌudustlꞌus netsꞌó tlꞌa lhúhusdloh, ꞌaw neulhutsinkene cha whuz de haíndilne cha nyun hoontsiꞌ kꞌunꞌa nghu yalhuhulhduk. 22ꞋEt hoontsꞌi daja dutanelh-un ntsꞌu yootuzalhtsꞌilh hukwa tsꞌuninzun. Tꞌetsꞌonínzun duneꞌne butsꞌú dintnine ndulcho whe yun ka buchꞌaz yáhalhduk ꞌet huwa.”
23ꞋEt Paul tsꞌun lhahódinla ndet dzin hitsꞌu tídulh-un. ꞋEt ꞌon nus ꞌultsukne, ꞌenne ꞌet dzin hitsꞌu whúsaindil. ꞋEt bundadaꞌ hulhgha whutsꞌun Yakꞌusda dune kꞌúneꞌ bulꞌen-un huwun hubodulhꞌeh. Yakꞌusda be nus hóoꞌenne ꞌukꞌu nuhúyuzguz ꞌinkꞌez Moses ꞌukꞌu núyuzguz-i cha ꞌi gha Jesus buba ꞌalha ꞌootꞌeꞌ hooleꞌ ubúlhni. 24Whulohne buba ꞌalhaꞌ dija ꞌet hoontsꞌi ꞌonghunne, ꞌenne ꞌaw buba ꞌalhaꞌ lheꞌdusnih. 25ꞋEt Lizwifne lhdulhyo ꞌuhudutni. ꞋEt ꞌaz náhidulh whe Paul njan dúbulhni, “Dalcho-i be Ndoni ꞌen Yakꞌusda be nus hóoꞌen-un Isaiah huyúlhni-un, yudániꞌ ndi khuni nohtsodáꞌne butlꞌa ídooꞌalh ha. 26ꞋEt ꞌutni,
‘Inyalh ꞌinkꞌez ndunne dune ndubudini,
soo cho oozúlhtsꞌai ꞌet hoontsꞌi ꞌaw tꞌeoonoohzeh ꞌaítꞌoh;
soo cho whunulhꞌen ꞌet hoontsꞌi lhozíhꞌen.
27Ndunne dune budzi dútsꞌo,
dudzeh cha whudáꞌhudinla,
ꞌinkꞌez hunílhtsꞌul cha ꞌuhintꞌoh.
ꞋEt njan ꞌaw ndulhúhitꞌoh de soo daꞌ huhooꞌen,
ꞌinkꞌez ꞌuhudótsꞌo, ꞌinkꞌez bubeni cha daꞌ tꞌéoonoozeh óoleꞌ.
ꞋEt de daꞌ stsꞌun náhalhya ꞌinkꞌez daꞌ soo náꞌboosdleh, ni Yakꞌusda.’”
28ꞋInkꞌez Paul ꞌudekꞌez ubúlhni, “ꞋEt huwa njan tꞌéoonohzin hubaꞌ hoontꞌoh, Yakꞌusda ooghuni be uzdujih-i ꞌudun yun kꞌut whutꞌenne, ꞌenne butsꞌo tlꞌaidanꞌai ꞌinkꞌez huyoozólhtsꞌaiꞌ la!”
29ꞋInkꞌez Paul ꞌet ndudániꞌ hukwꞌelhꞌaz tube cho lhdulhyo ꞌuhudutni whe Lizwifne whenáhidil. 30Nat yus kꞌut ꞌet Paul nyo hukwꞌelha hoolhꞌi-un ꞌet hootꞌeꞌ. Mbene la yughundilhne duꞌih te bubutulhꞌih, 31tsꞌet whucho Yakꞌusda dune kꞌúneꞌ bulꞌen-un, ꞌinkꞌez Jesus Christ neMoodihti ꞌen ghun cha dune hodulhꞌeh. ꞋAw dune whuchꞌa lhinúsyoot whe ndutni.
Currently Selected:
Acts 28: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.