2 John 1
1
Hadih nohdúsni, ni John
1Si ꞌutso whudilhdzulh-un, tsꞌeke ꞌutahálti-un ꞌinkꞌez buzkeh cha butsꞌó kꞌeꞌusges. ꞋEnne bukꞌesiꞌ. ꞋAw si za iloh. Mbene khuni ꞌalhaꞌ ꞌuntꞌoh-i tꞌeninzunne, ꞌenne cha bukꞌehinsiꞌ.
2Ndi khuni ꞌalhaꞌ ꞌuntꞌoh neyúdizdla-i, ꞌinkꞌez ꞌilhiz wheni nebulh ꞌútitꞌelh-i, ꞌi gha ꞌudusni.
3Yakꞌusda neBá ꞌinkꞌez neMoodihti Jesus Christ neBá ooYeꞌ, ꞌenne huye unzoo-i, huye téꞌninzun-i, ꞌinkꞌez nedzi whudizghel-i, ꞌohwhi ꞌilhiz wheni nebulh óotꞌeꞌ. Khuni ꞌalhaꞌ ꞌuntꞌoh-i ꞌinkꞌez be lhkꞌetsꞌusiꞌ-i bulh.
NeBá khuni netlꞌa ídanꞌai-i, lhkꞌetsꞌootsiꞌ, ni
4NeBá khuni netlꞌa ídanꞌai-i, tsꞌilhchoot kꞌunꞌa, whuz unꞌa whulohne nohyuzkeh khuni ꞌalhaꞌ ꞌuntꞌoh-i bulh hídulh. ꞋEt nawhusꞌai whe tube hoonústꞌiꞌ. 5ꞋInkꞌez tsꞌeke ꞌandit ntsꞌu tédusdlih. ꞋAw khuni yugha néꞌulhꞌai-i, ꞌandidi be ntsꞌó kꞌeꞌusges iloh. Ndi khuni ꞌudechoo whutsꞌun tꞌezninzun. Lhkꞌetsꞌoosiꞌ, ni. 6Ndai la khuni yugha néulhꞌa oogha nutsꞌóodilh huba ꞌuntꞌoh. Ndi ꞌi bé lhkꞌetsꞌusiꞌ-i, ꞌi ꞌuntꞌoh. ꞋUdechoo whutsꞌun dahtsꞌo ndi khuni yugha néulhꞌa, ꞌi ooghá nohdilh hubaꞌ hoontꞌoh.
Lhane dune nanaꞌáhne yun kꞌéhindil, ꞌet huwa khahdli
7Lhane dune nanaꞌáhne yun kꞌéhindil ꞌet huwa. Nduntꞌohne ꞌaw Jesus Christ ndi yun kꞌut duyustꞌe be nuséya lhuhudusni. Nduntꞌoh-un, ꞌen dune nanaꞌah-un ꞌuntꞌoh ꞌinkꞌez Christ chꞌaz ditni-un cha ꞌuntꞌoh. 8Nohnichꞌoh khahdli! Ndai ꞌutꞌen beni ꞌutsꞌitꞌen-i ninta tsꞌoolelh whuchꞌa. ꞋEt de la soo cho neba ꞌukꞌelha hóleꞌ. 9Mbe nintaꞌutꞌih-un ꞌinkꞌez Christ khuni be ooghu yaduk-i, ꞌaw lhuyóotun de, ꞌaw Yakꞌusda cha lhítꞌih. Mbe la ndi Christ ooghu yaduk-i yoontun de, neBá duYeꞌ bulh nahúltꞌoh ubutꞌi whé ꞌuntꞌoh. 10Mbe Christ ooghu yaduk-i lhuyóotun-un whunoh dutilhꞌeh huba nohghu ninya de, nduntꞌoh-un ꞌaw nohyoh daóoyaꞌ junih, kꞌus danínyaih dóhniꞌ junih! 11Mbe danínyaih yúlhni-un, ꞌen cha tankꞌus neꞌútꞌen-un yula ꞌutꞌen whe ꞌuntꞌoh ꞌet huwa.
John ꞌubulhni, “ꞋIlhudzin de nohtsꞌu tisyalh hukwaꞌ nuszun”
12Lhat-un huwun nohtsꞌó kꞌetisgus, ꞌaw ꞌudustlꞌus ꞌinkꞌez ꞌudustlꞌus tooꞌ be iloh. Nohtsꞌu tísyalh ꞌinkꞌez soo nohnin tsꞌe nohbulh yatisduk ꞌet hukwaꞌ nuszun. ꞋEt de la tube cho tsꞌuhótꞌeꞌ.
13Nohulhtus ꞌutahálti-un buzkeh, ꞌenne hadih nohuhútni. ꞋEt ndo honeh.
Currently Selected:
2 John 1: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.