2 Thessalonica Whutꞌenne 3
3
Neulhutsinke neba tenadoohdli
1Sulhutsinke ꞌudekꞌez nohdusni, neba tenadoohdli. NeMoodihti ooghuni ꞌa cho nohtadókat ꞌinkꞌez nohba dótiꞌ nohni dáhja la, whuz unꞌa. 2Mbene la tankꞌus neꞌútꞌenne ꞌinkꞌez dune ntsiꞌne, buchꞌa naneólelh. ꞌAw tsꞌiyawh iloh buba ꞌalha ꞌuhoontꞌoh ꞌet huwa. 3ꞌEt hoontsꞌi neMoodihti ootꞌa níuznootan hubaꞌ hoontꞌoh. ꞌEn ulhtus-i be núdulhya nohulhtsi. ꞌInkꞌez ndun ntsiꞌ-un, ꞌen chꞌa nohghunli. 4ꞌInkꞌez nohni nohghun neMoodihti ootꞌa níuznintan nohba nutsꞌúhizyeꞌ-un, ꞌet ndahtꞌen ꞌinkꞌez ꞌet za ndóhtꞌen. 5Yakꞌusda ye nékꞌensiꞌ-i ꞌinkꞌez Gri hoolhtus whe usyin-un, ꞌet whuz unꞌa nducha neMoodihti nohdzi wheínulhtun.
Tsedoohtni junih
6ꞌEt ꞌawet neulhutsinke, neMoodihti Sizi Gri booziꞌ gha njan dunohtsꞌutni, ndunne ooba ꞌalha ꞌuhoontꞌohne neulhutsinke hinli, tsedutni ꞌinkꞌez ꞌantsꞌi oogháꞌ tikulh za huba sulhꞌi de, ꞌet nduntꞌohne, ꞌenne tsꞌiyawh buchꞌa nasahdilh, ꞌinkꞌez buyit ꞌahtꞌoh. Ndi Yakꞌusda ooghuni whubutsꞌodalhꞌeꞌ-un, ꞌaw lhuhuhóotun ꞌet huwaꞌ hintꞌoh. 7ꞌEt wheni nohbulh ꞌutsꞌutꞌen whe ꞌaw tselhtsꞌudítni. ꞌEt tꞌeoonihzin wheni nekꞌunꞌa oohtꞌeꞌ hubaꞌ hoontꞌoh. 8Ahtꞌi-i, ꞌaw ꞌantsꞌet lhtsꞌiꞌulh. Neba howa whulnaꞌ whe ꞌulhdzis ꞌinkꞌez dzenis ꞌi bulh ꞌutsꞌutꞌen. ꞌEt nohtꞌa nílhtsꞌunoostan. 9Tsꞌiyai be nela oohtꞌen hubaꞌ hoontꞌoh ꞌet hoontsꞌi ꞌaw ndúlhtsꞌustꞌen. Nekꞌunꞌa oohtꞌeꞌ ha whuz unꞌa ꞌutsꞌintꞌoh ꞌet huwa. 10ꞌEt ꞌoh daꞌ nohbulh ꞌutsꞌintꞌoh whe nohba nutsꞌúhizyeꞌ, ꞌet whulohne ꞌaw ꞌuhutitꞌelh hukwa lheꞌhunízun de, ꞌaw ꞌuhooꞌalh huba lheꞌhóotꞌoh.
11ꞌEt nohni nohtoh whulh ꞌúzditsꞌo, tsedutnine cha hoonli ꞌinkꞌez ꞌaw lheꞌhustꞌen. ꞌEt hoontsꞌi ꞌuyoonne eꞌutꞌen kꞌoh huwu hinli. 12ꞌEt nduntꞌohne neMoodihti Sizi Gri booziꞌ gha khuni ulhtus-i be ndunóhtsꞌutni, nánilhtsulyaz ꞌuhootꞌen whe didutchꞌoh huyaꞌalh-i nahólelh. 13ꞌEt nohni neulhutsinke, ꞌutꞌen unzoo-i ꞌulhꞌen, khun ꞌetsul oohneh junih.
14ꞌInkꞌez neꞌeꞌdustlꞌus be, neghuni yukꞌunulheꞌustꞌen-un, ꞌen tꞌenoohzeh ꞌinkꞌez bulh lheꞌzoohtꞌen. ꞌEt de si yooya ooleꞌ. 15Khun nohulhutsinke ꞌutsꞌun unꞌa neꞌhutꞌen de, ꞌaw nohchꞌaz ditni-un nóohzin junih. Nohulhutsin kꞌunꞌa oogha dóohniꞌ.
Yakꞌusda ye unzoo-i nohbulh óotꞌeꞌ
16Nedzi whúdizghel-un whuMoodihti, ꞌen dichꞌoh ꞌahoolhyiz ꞌinkꞌez tsꞌiyantsuk nohdzi whúdoghel nohghá holelh. ꞌEt nohni tsꞌiyawh neMoodihti nohbulh óotꞌeꞌ.
17Si, Paul, sichꞌoh sla be ꞌukꞌu nusúsguz-i, ꞌi be hadih nohdúsni. Nohtsꞌo kꞌeꞌ usgus totsuk ꞌet ndunóhdusni.
18NeMoodihti Sizi Gri ye unzoo-i, ꞌi nohni tsꞌiyawh nohbulh óotꞌeꞌ. ꞌEt ndo honeh.
Currently Selected:
2 Thessalonica Whutꞌenne 3: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.