Sirako 1
1
O le Tupu‘aga o le Poto
1O le Ali‘i le Atua ‘ua ala mai ai le poto uma lava; #Fa‘ata 2.6; Poto 9.4
sa fa‘atasi pea ma ia ma ‘ua talu mai le vavau lava ia.
2O ai na te faitauina le oneone o i le sami po o matāua o le timu?
O ai na te fuatia le maualuga o le lagi ma le lautele o le lalolagi ma le loloto o le vanu?
3Po o ai na te su‘esu‘eina le poto o le Atua
na muamua ia i mea uma?
4E muamua i mea uma ‘ona faia le poto, #Sira 24.12, 13; Fa‘ata 8.22; Paru 3.20-22; Iopu 28.12-23
o le malamalama fo‘i o le mafaufau e mai le vavau.
5O le pogai ma le tupu‘aga o le poto,
o le afioga a le Atua i mea aupitoaluga,
a o ona ala, o poloa‘iga e fa‘avavau.
6‘Ua fa‘aalia ‘iā te ai le a‘a o le poto,
o ai fo‘i ‘ua na iloa ona ala lilo?
7‘Ua fa‘aalia ‘iā te ai le a‘oa‘oga o le poto ma ‘ua malamalama ai ‘iā te ia?
O ai ‘ua na lagona ifo o le tele o ona ala?
8‘Ua na o le Silisili‘ese, o lē ona le mana uma,
‘ua na faia mea uma, o le Tupu mamana ma le matuā mata‘utia,
o le Atua o lo‘o nofo i lona nofoāli‘i ma pule i mea uma.
9O ia na faia le poto, ‘ua na iloa o ia, #Iopu 28.27
‘ua na faitauina, na na fuaina.
10‘Ua na liligiina fo‘i i ana galuega uma, #Ioe 2.28-29; Galu 2.17-21, 33; Fai 2.26
i luga fo‘i o tagata uma, e tusa ma lana fa‘asoaga,
‘iā te i latou e alolofa ‘iā te ia.
O le Mata‘u i le Atua
11O le mata‘u i le Ali‘i, o le mamalu,
o le vi‘iga, o le fiafia ma le pale o le ‘oli‘oli.
12O le mata‘u i le Ali‘i e fiafia ai le loto,
e maua ai le ‘oli‘oli ma le fiafia ma le fa‘alevaleva o le olaga.
13O lē mata‘u i le Ali‘i, e manuia o ia i aso amulī, #Sira 11.29
e fa‘amanuiaina ai o ia i le aso e oti ai.
14O le alofa i le Atua, o le poto mamalu lea;
15o i latou e fa‘aalia i ai, latou te naunau i ai,
pe a tepa i ai ma mautinoa ai ana galuega ofoofogia.
16O le amataga o le poto o le mata‘u i le Ali‘i; #Fa‘ata 1.7
‘ua tupu fa‘atasi ma tagata amiotonu i le manava o latou tinā;
‘ua savali fa‘atasi ma fafine filifilia,
‘ua aliali fo‘i ia i tagata amiotonu ma tagata fa‘amaoni.
17O le mata‘u i le Ali‘i o le amiotonu lea o le poto i le Atua.
18O le amiotonu e tausia ai ma fa‘apa‘iaina ai le loto,
e maua mai ai le manuia ma le fiafia.
19E manuia le tagata ‘ua mata‘u i le Ali‘i,
e fa‘amanuiaina o ia i ona aso mulimuli.
20O le mata‘u i le Atua o le ‘ato‘atoa lea o le poto, #Fa‘ata 8.18-19
ma ‘ua tino mai o lona ‘ato‘atoa i ona fua lelei.
21Na te fa‘atumuina le fale o le tagata poto i ona fua, #Poto 7.11
o ona potu fo‘i i ‘oloa tāua.
22O le mata‘u i le Ali‘i o le pale lea o le poto, na te fa‘afaula‘i le manuia ma le fua o le fa‘aolataga. 23‘Ua na iloa le poto ma ‘ua na fuafuaina; o mea foa‘ifua a le Atua o i lā‘ua uma. 24E liligi e le poto le iloa ma le atamai o le fa‘autauta ma ‘ua na fa‘ateleina le mamalu o tagata ‘ua latou tāofi i ai. 25O le pogai o le poto o le mata‘u lea i le Ali‘i ma ‘ua lē āu mamae ona lālā. #Sira 1.12 26O tu‘ugā‘oloa o le poto ‘ua i ai le iloa ma le amiotonu o le loto i le Atua; a ‘ua ‘inosia lava ia e tagata agasala. 27O le mata‘u i le Ali‘i e tuli‘eseina ai le agasala, 28auā e lē mafai ‘ona ta‘uamiotonuina lē ‘ua aunoa ma le mata‘u; auā o le osovale o lona ita e fulisia ai o ia. #Fa‘ata 29.22
O le ‘Onosa‘i ma le Amio Pulea
29O le tagata ‘onosa‘i e ‘o‘ono lava ia se‘ia o‘o i aso e tatau ai, ‘ona toe maua ai lea o lona manuia. 30O le tagata fa‘autauta na te tāofi ana ‘upu se‘ia o‘o i se aso, ‘ona talaina lea o lona poto e laugutu o le to‘atele. 31O tu‘ugā‘oloa o le poto ‘ua i ai tulafono o le a‘oa‘oga, 32a o le to‘aga i le Atua e ‘inosia lava e tagata agasala.
O le Amiotonu i le Atua
33Lo‘u atali‘i e, a e naunau i le poto, ‘ia e tausi pea i le amiotonu, ‘ona foa‘iina mai ai lea e le Atua ‘iā te oe. 34Auā o le poto ma le a‘oa‘oga, o le mata‘u lea i le Ali‘i; o mea e fiafia ai o lona finagalo, #Fa‘ata 15.33 35o le fa‘amaoni ma le agamalū, na te fa‘afaula‘i fo‘i o ‘oloa a i latou ‘ua tausi i ai. 36‘Aua ‘e te ‘alo ‘ese i le mata‘u i le Ali‘i, ‘aua fo‘i ‘e te sā‘ili i ai ma le fa‘alotolotolua. 37‘Aua ne‘i e fa‘afiaamiotonu i luma o tagata, ‘aua ne‘i ‘avea fo‘i ou laugutu ma mea ‘e te tausuai ai. #Sira 2.14; 5.11; Iako 3.6-8 38‘Ia e leoleo lava i ai, ‘ina ne‘i e pa‘ū ai, ma fa‘atupu le māsiasi i lou agaga, 39‘ina ne‘i fa‘aali e le Atua mea ‘ua e natia, ‘ona tu‘ipalaina lea o oe i totonu o le potopotoga; 40‘ona ‘ua e fa‘alata atu i le Ali‘i ma le loto leaga, ma ‘ua tumu lou loto i le pepelo ma le fa‘a‘ole‘ole.
Currently Selected:
Sirako 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.