Ioane 16
16
O le Mavaega a Iesu
1“‘Ua ‘ou fai atu nei mea ‘iā te ‘outou, ‘ina ne‘i vaivai lo ‘outou fa‘atuatua. 2E tulia ‘outou i sunako e i latou; ‘ae o‘o lava i le aso e manatu ai sē na te fasioti ‘iā te ‘outou, ‘ua na faia le taulaga i le Atua.#Ioane 9.22; Galu 26.9-11; Isai 66.5 3E faia fo‘i e i latou ia mea ‘iā te ‘outou, auā latou te le‘i iloa le Tamā ‘atoa ma a‘u.#Ioane 15.21 4A ‘ua ‘ou fai atu ‘iā te ‘outou nei mea, ‘ina ‘ia ‘outou manatua pe a o‘o i le aso, na a‘u fai atu ai ‘iā te ‘outou.
O le Galuega a le Agaga Pa‘ia
“‘Ou te le‘i fai atu nei mea ‘iā te ‘outou i le amataga, auā na ‘ou i ai ‘iā te ‘outou.#Luka 22.53; Ioane 17.12 5‘Ae ‘ou te alu atu nei ‘iā te ia na ‘auina mai a‘u; e le‘i fesili mai fo‘i se tasi o ‘outou, ‘Po o fea ‘e te alu i ai?’#Ioane 7.33 6A ‘ua tumu o ‘outou loto i le fa‘anoanoa, ‘ina ‘ua ‘ou fai atu nei mea ‘iā te ‘outou. 7‘Ae peita‘i a‘u, o le ‘upu moni lava ‘ou te fai atu ai ‘iā te ‘outou, e aogā ‘iā te ‘outou pe a a‘u alu ‘ese; auā ‘āfai ‘ou te lē alu ‘ese, e lē maliu mai le Fesoasoani ‘iā te ‘outou; ‘ae ‘āfai ‘ou te alu, ‘ou te ‘auina mai o ia ‘iā te ‘outou. 8A maliu mai fo‘i o ia, na te fa‘ailoa atu i le lalolagi le agasala, ma le amiotonu, ma le fa‘amasinoga.#1 Kori 14.24; Epe 4.12 9O le agasala, auā ‘ua lē fa‘atuatua ‘iā te a‘u; 10o lē amiotonu, auā ‘ou te alu atu i lo‘u Tamā, tou te lē toe va‘ai mai fo‘i ‘iā te a‘u;#Galu 3.14; 7.52; 1 Pete 3.18 11o le fa‘amasinoga, auā ‘ua fa‘amasinoina le ali‘i o le lalolagi nei.
12“‘Ua totoe ‘iā te a‘u mea e tele e fai atu ai ‘iā te ‘outou, ‘ae tou te lē mafaia ‘ona talia i nei ona po. 13‘Ae a maliu mai o ia, o le Agaga lea e tupu mai ai le ‘upu moni, e ta‘ita‘i e ia ‘iā te ‘outou i ‘upu moni uma; auā e lē tautala fua o ia na o ia, a o mea uma e fa‘alogo i ai o ia, e tautala ai lava, ma fa‘ailoa mai ‘iā te ‘outou mea e o‘o mai.#Ioane 14.26; 1 Ioane 2.27 14O ia lava e vivi‘i mai ‘iā te a‘u, auā e maua e ia mai ‘iā te a‘u, ma fa‘ailoa atu ai ‘iā te ‘outou. 15O mea uma lava o i le Tamā, o ‘iā te a‘u fo‘i ia; o le mea lea na ‘ou fai atu ai, e maua e ia mai ‘iā te a‘u, ma fa‘ailoa atu ai ‘iā te ‘outou.#Ioane 17.10
O le Fiafia ma le Fa‘anoanoa
16“E toe itiiti ‘ona ‘outou lē va‘ai mai ai lea ‘iā te a‘u; e toe itiiti fo‘i ‘ona ‘outou toe va‘ai mai ai lea ‘iā te a‘u.”#Ioane 14.19
17‘Ona fetautalatala‘i lea o isi ona so‘o, “Pe se a lenei mea na ia fetalai mai ai ‘iā te i tatou, ‘E toe itiiti ‘ona ‘outou le va‘ai mai ai lea ‘iā te a‘u;’ e toe itiiti fo‘i ‘ona ‘outou toe va‘ai mai ai lea ‘iā te a‘u, ‘auā ‘ou te alu atu i le Tamā?’” 18‘Ona latou fa‘apea ane lea, “Pe se a lenei mea ‘ua ia fetalai mai ai, ‘E toe itiiti?’ Tatou te le‘i iloa le mea ‘ua ia fetalai mai ai.”
19‘Ua silafia e Iesu lo latou fia fesili mai ‘iā te ia; ‘ona fa‘apea atu lea o ia ‘iā te i latou, “Pe tou te felafolafoa‘i ‘ea i le mea na ‘ou fai atu ai, ‘E toe itiiti ‘ona ‘outou lē va‘ai mai ai lea ‘iā te a‘u; e toe itiiti fo‘i ‘ona ‘outou toe va‘ai mai ai lea ‘iā te a‘u?’ 20E moni, o moni, ‘ou te fai atu ‘iā te ‘outou, e tagi ‘outou ma taufaitagiauē, ‘ae ‘oli‘oli le lalolagi; e tigā ‘outou, ‘ae liua lo ‘outou tigā ma ‘oli‘oli. 21A fānau se fafine ‘ua tigā ai o ia auā ‘ua o‘o i lona aso; a uma ‘ona fānau mai o lana tama, ‘ua lē toe manatua e ia lona tigā, ‘ona o le ‘oli‘oli, ‘ina ‘ua fānau mai le tagata i le lalolagi.#Isai 13.8; Hose 13.13; 1 Tesa 5.3 22O lenei fo‘i, ‘ua maua nei ‘outou e le fa‘anoanoa; ‘ae tatou te toe feiloa‘i ma a‘u, ‘ona ‘oli‘oli ai lea o ‘outou loto, e lē ‘ave‘eseina fo‘i e se tasi lo ‘outou ‘oli‘oli.
23“O lea aso tou te lē toe fesili mai ai ‘iā te a‘u i se mea e tasi. E moni, e moni, ‘ou te fai atu ‘iā te ‘outou, o mea uma tou te ole atu ai i le Tamā i lo‘u igoa, e foa‘i mai e ia ‘iā te ‘outou.#Ioane 14.13, 14, 20; 1 Ioane 5.14; Mata 7.7; Mare 11.24 24‘Ua o‘o mai nei lava tou te le‘i ole atu i se mea i lo‘u igoa; ‘inā ole atu ia, ‘ona ‘outou maua ai lea, ‘ina ‘ia ‘ato‘atoa ai lo ‘outou ‘oli‘oli.
O le Manumālō i le Lalolagi
25“‘Ua ‘ou tautala atu ‘iā te ‘outou i nei mea i ‘upu fa‘atusa; ‘ae o‘o atu i ona aso ‘ou te lē toe tautala ai ‘iā te ‘outou i ‘upu fa‘atusa; ‘ae ‘ou te matua fa‘ailoa atu ‘iā te ‘outou e uiga i le Tamā.#Ioane 10.6 26O lea aso e ole atu ai ‘outou i lo‘u igoa; ‘ou te lē fai atu fo‘i ‘iā te ‘outou ‘ou te fa‘atoga i le Tamā mo ‘outou; 27auā e alofa mai lava le Tamā ‘iā te ‘outou, ‘ina ‘ua ‘outou alofa mai ‘iā te a‘u, ma ‘ua ‘outou talitonu o a‘u nei ‘ua ‘ou sau mai le Atua.#Ioane 14.21 28‘Ua ‘ou sau mai le Tamā, ma ‘ou sau i le lalolagi; o le a a‘u toe tu‘ua le lalolagi, ma alu atu i le Tamā.”
29‘Ona fai mai lea o ona so‘o ‘iā te ia, “Fa‘auta, o lenei, ‘ua e ta‘utino mai lava, ‘ua e lē fetalai mai i le ‘upu fa‘atusa.#Ioane 16.25 30‘ua matou iloa nei ‘ua e silafia mea uma lava, e lē aogā fo‘i ‘iā te oe ‘ona toe fesili atu se tasi ‘iā te oe; o le mea lea ‘ua matou talitonu ai, na e maliu mai mai le Atua.”#Ioane 2.25
31‘Ua tali atu Iesu ‘iā te i latou, “‘Ua ‘outou talitonu mai nei ‘ea? 32Fa‘auta, e o‘o i le aso, ‘ua o‘o nei fo‘i i ai, e ta‘ape‘ape ai ‘outou, e ta‘itasi ma alu i lona ‘āiga, ‘ae tu‘ua a‘u e to‘atasi; a ‘ou te lē to‘atasi lava, auā ‘ua ‘iā te a‘u le Tamā.#Saka 13.7; Mata 26.31, 45; Mare 14.27, 50; Ioane 8.29 33‘Ua ‘ou fai atu nei mea ‘iā te ‘outou, ‘ina ‘ia ‘outou maua le manuia ‘iā te a‘u; e maua fo‘i ‘outou o le puapuagā i le lalolagi, a ‘ia ‘outou loto tetele, auā ‘ua ‘ou manumālō i le lalolagi.”#Ioane 14.27; 15.18; Roma 8.37; 2 Kori 2.14; Fa‘aa 3.21
Currently Selected:
Ioane 16: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.