Jirm. 1
1
1Wi Papru ju̱ papin áaran akuptajme ámin, Jirimiuṉká. Ii yachi̱ Timiutéusha ju̱na akuptúrmawai. Wi Jesukrístu takaru asan sepunam pujajai. Ame iiji̱a̱i̱ tsaniṉkia takáa asakmin ju̱ papin akuptajme. 2Núnisaṉ ame je̱e̱miin Yus shuar irunainia nunasha tura ii umái̱ Apiancha tura Arkipiuncha iiji̱a̱i̱ ti kakaram takasu asamtai ju̱ papin akuptajrume. 3Yus ii Aparí̱ tura ii Uuntri̱ Jesukrístu shiir enentáimturma ásar imiatkinchanum tuke shiir pujustinian yaintmakarti.
Jirimiúṉ péṉker Yus shuar ámiayi
4-5Ame Uunt Jesus shiir enentáimtakum ashí Yus shuar ainia nusha aneamun antukjai. Nuna antukan ámin ti shiir enentáimtakun Yusan áujeakun yúmiṉkiajai. 6Áujeakun chíkich shuarsha ámiji̱a̱i̱ métek Yusan nekas enentáimtuiniak ashí péṉker ana nuna ti paant nekaawarat tusan seajai. Ashí péṉker ana nuka Jesukrístu shiir awajsámuja̱i̱ takakji. 7Wisha ame aneṉkratmaja̱i̱ ti shiir enentáimtakun waraajai. Yatsuru, ámiji̱a̱i̱ ashí Yus shuarsha shiir enentáimiainiawai.
Papru Jirimiúṉkan Unisemu waitnentrai tama
8Nu asamtai kakaram tátsujme. Kame wakeraknaka Kristu akatrámu asan “ju̱ túrata” tíminiaitjiame. 9Antsu aneakun aya jú̱nisan tájame. Wi Papru úuntach asan tura Krístun takarkun sepunam pujakun 10Unisemu waitnentrai tusan seajme. Nisha wi ujakmája̱i̱ Yus shuar ajasu asa winia uchirua núnisaiti. Sepunam pujayatnak ni aparí̱ya áintsanak ajasjai.
11Nuikia Unisemuka ántrauyi antsu yamaikia aminí̱sha winisha yáimniuiti. 12Ataksha awaṉtajme. Wi tí peṉker aneamu asamtai péṉker itiaata. 13Wi Yus Chichaman étserkun sepunam pujajai. Túmakun ame yajá pujakum yáintkiatin tujintiakmin ni antsu wiji̱a̱i̱ pujus yaintkiat tusan wakerimjiai. 14Túrasha ámin ujatsuk túrachmin enentáimpramjai. Kame ame wakerakum útsukchamuja̱i̱ “pujusti” tákumni̱ṉkia maak. 15Jú̱nissha enentáimpramniaiti. Unisemu ishichik tsawant meṉkakamai tura yamaikia waketki̱ ámiji̱a̱i̱ tuke pujustatui. 16Kame yamaikia emetachma antsu ame aneamu yátsumea áinis átatui. Nuka ti péṉkerchakait. Wisha nin ti aneajai. Tura yaintmakmin asamtai tura Krístunam ame yátsum ajasu asamtai winí̱ naṉkaamas aneashtapash.
17Wisha tí peṉker amikrumchakaitiaj. Tuma asam winia itiaarua nútiksam shiir awayá̱ta. 18Yajauch awajtámkaitkiuiṉkia tura ámiji̱a̱i̱ tumashitkiuisha wi akiktatjai. 19Wi Papru nekas winia uwejruja̱i̱ ju̱na áaran ti nekas akiktatjame tájame. Túrasha winia tumashitmena nuna páchittsujme. Kame wi ujakam Yus shuar ajaschamkum. 20Wátsek, yatsuru, amesha Yus shuar asam wi seajme jú̱ túrutata. Kristu enentáimtakum shiir enentáimtikrurta.
21Tí peṉker uminiaitme nuna nékakun jú̱nisan áatjame. Tura wi seajmena nuna naṉkaamas túrattamna nuna nékajai. 22Ayu. Átum Yus áujturkurmin atumíin iiraitniun Yus winia tsaṉkatruktatui. Tuma asamtai wi nui̱ jean pujustin iwiarturata.
Amikmátmainiamu
23Epaprassha nisha Jesukrístunu étseruk sepunam wiji̱a̱i̱ pujus amikmátmarme. 24Núnisaṉ Márkussha Aristárkusha Témassha tura Rúkassha Yus Chichaman etserkatniun yaintiainia nusha amikmátmainiawai.
25Ii Uuntri̱ Jesukrístu atumniasha ti shiir yaintmakarti.
Nuke atí.
Currently Selected:
Jirm. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.