Jṉ. 18
18
Suntar Jesusan achikiárma
(Mat. 26:47-56; Mar. 14:43-50; Ruk. 22:47-53)
1Jesussha nuna tinia amuk ni unuiniamuri̱ji̱a̱i̱ Kitrun entsá katiṉkí̱ numi arakmanum wémiayi. 2Jútassha Nin suruktajtsa pujumia nuka nu ajan nekaamiayi. Untsurí tsawant Jesus ni unuiniamuri̱ji̱a̱i̱ nui̱ iruntramtai Jútas Jesusan nui̱ wáinkiatniun enentáimpramiayi. 3Tura untsurí suntarja̱i̱sha Jesusan tariarmiayi. Pariséusha tura Yúsnan pujurniu peṉkeri̱sha suntarnasha nuyá̱ Yusa Je̱e̱n wáinniuncha Jesusan achikiárat tusa akupkarmiayi. Nisha machitniasha naṉkincha rámparancha jiniasha júkiar weriarmiayi. 4Jesussha ashí átinia nuna neka asa jiintiuki̱ “¿Ya e̱a̱a̱rum?” tímiayi. 5Nisha “Nasarétnumia̱ Jesus” tiármiayi. Jesussha “Witjiai” tímiayi. Jútassha Jesusan surukua nu niji̱a̱i̱ pujuarmiayi. 6Tura Jesus “Witjiai” takui̱ ti ashamkar úkumur waketainiak iniaararmiayi.
7Ataksha Jesus “¿Ya e̱a̱a̱rum?” tímiayi. Nisha “Nasarétnumia̱ Jesus” tiármiayi. 8Nuiṉkia Jesus chichaak “Witjiai, tájarme. Winia e̱a̱tkurmeka Wí shuar ainia ju̱ka waketkiarti” tímiayi. 9Jesus nuik áujuk “Winia Apar surusma nu meṉkakacharai” timia nu uminkiati tusa Jesus “waketkiarti” tímiayi. 10Nuyá̱ Semuṉ Pítiur machitian jusa Marku kuíshi̱n untsuurnumaani̱ tsupirkamiayi. Márkusha Yúsnan pujurniu uuntri̱ takarniúri̱yayi. 11Túramtai Jesus Pítrun chicharuk “Machitrumka awaiṉkim ikiusta. ¿Winia Apar piniṉnum wáitsatniun surakuiṉkia umarchattajak?” tímiayi.
Yúsnan pujurniu úuntri̱n júkiarma
(Mat. 26:57-58; Mar. 14:53-54; Ruk. 22:54)
12Nuiṉkia apach suntarsha tura ni úuntri̱sha Yusa Je̱e̱n wainniusha Jesusan achikiar jiṉkiawarmiayi. 13Nuyá̱ Anasa je̱e̱n júkiarmiayi. Anassha Kaipiasa we̱a̱rí̱yayi Tura Kaipias nu uwitin Yúsnan pujurniu úuntri̱yayi. 14Kaipiaska nuik “¿Ashí Israer shuar mesertin péṉkerkait. Antsu aya chikichik shuar jákatin péṉkerchakait?” timia nuiti.
Pítiur Jesusan natsantramu
(Mat. 26:69-70; Mar. 14:66-68; Ruk. 22:55-57)
15Semuṉ Pítiur chíkich unuiniamuja̱i̱ Jesusa uku weriarmiayi. Yúsnan pujurniu uuntri̱ nú unuiniamunka nékauyayi. Tuma asamtai ni je̱e̱n jeawar, suntar Jesusja̱i̱ a̱a̱ tanishnum wáiniakui nisha waya̱miayi. 16Tura Pítiur a̱a̱ wáitiniam wajaamiayi. Túramtai chíkich unuiniamu jiinkí̱ wáitin wainia nú nuwa̱ja̱i̱ chichas Pítrun awayá̱miayi. Nui̱ nékanu asa yúpichuch awayá̱miayi. 17Waiti wainniusha Pítrun anias “¿Amesha nuna unuiniamuri̱nchukaitiam?” tímiayi. Takui̱ Pítrusha “Atsá, núchaitjiai” tímiayi. 18Tsetsek asamtai suntarsha tura nui̱ takarniusha jinia ikiapárar ni nawe̱n anaak pujuarmiayi. Pítrusha nui̱ pachiniak anamuk pujumiayi.
Kaipias Jesusan aniasma
(Mat. 26:59-66; Mar. 14:55-64; Ruk. 22:66-71)
19Yúsnan pujurniu uuntri̱ Jesusan ni unuiniamia nuna tura ni jintíamuri̱ncha aniasmiayi. 20Jesussha aya̱k “Ashí aents iimiainiai̱ṉ tuke etserniuitjiai. Israer shuar iruntai̱nmasha tura Yusa Uunt Je̱e̱ncha nuyá̱ Israer shuar irunainia nui̱sha arantsuk tuke etserkaitjiai. 21¿Urukamtai Winia inintiam? Winia chichamprun antukarua nu aniastarum. Wi timian ni ujatmákarti. Wi timiancha nisha nékainiatsuk.” 22Jesus nuna takui̱ Yusa Je̱e̱n wáinniua nu nui̱ pujá Jesusan yapiniam awati chicharuk “¿Uunt tu ái̱ktinkiait?” 23Jesussha tutai “¿Warinmampa yajauchirsha aa? Turuttia. Tura tájana nu péṉkeraitkiuiṉkia ¿urukamtai awattam?” tímiayi. 24Nuyá̱ Anas Jesusan jiṉkiá Yúsnan pujurniu uuntri̱ Kaipiasai̱ akupkámiayi.
Pítiur ataksha Jesusan natsanma
(Mat. 26:71-75; Mar. 14:69-72; Ruk. 22:58-62)
25Tuke Anasa je̱e̱n chichainiai̱ Pítiur jinia anamuk pujan shuar iniiniak “¿Amesha Jesusa unuiniamuri̱nchukaitiam?” tiármiayi. Tutai Pítrusha “Atsá, wíchaitjiai” tímiayi. 26Chíkich takarin Marku shuari̱ nui̱ pujumiayi. Pítiur Marku kuíshi̱n tsupirkamia nuna shuari̱ asa chichaak “¿Ajanam Jesusja̱i̱ wekaamin wáinkiachmakjam?” 27Tutai Pítiur ataksha “atsá” ta̱i̱ṉ atash shiniukmiayi.
Piratu Jesusan aniasma
(Mat. 27:1-2,11-14; Mar. 15:1-5; Ruk. 23:1-5)
28Nuyá̱ Kaipiasai̱ya̱ Jesusan júkiar tsawant tsawa̱a̱munam apachi úuntri̱n Piratu takatai̱ je̱a̱nam ejeniarmiayi. Israer shuarsha ni uuntri̱ akupkámia núnisar wapik ajasá̱i̱j tusar nu je̱a̱nam waya̱charmiayi. Waya̱warka Paskua nampernum yurumáchmin ármiayi. 29Nu asamtai Piratu niji̱a̱i̱ chichastaj tusa jiinkí̱ chichaak “¿Jú̱ aishmaṉsha warí tunáa túrait?” 30Takui̱ nisha “Tunaarinchaitkiuiṉkia amiini̱ itiacha̱a̱ji” tiármiayi. 31Tutai Piratu chicharainiak “Atumek jukirum atumí akuptámmari̱ji̱a̱i̱ ni tunaarí̱ nekaatarum” tutai Israer shuarsha chichainiak “Antsu iikia Israer shuartikia tunáa shuarsha máchminiaitji” tiármiayi. 32Yaunchu Jesus ni jákatniuri̱n enentáimtus “Wi awajnaitniuitjiai” tímiayi. Nisha krúsnum awajnain asamtai itiur mantuawartata Ni timia nu uminkiamiayi. 33Piratusha atak je̱á̱ wayá̱ Jesusan untsuk “¿Ámeka Israera Úunt Akupniuri̱ṉkiaitiam?” 34Tutai Jesussha chichaak “¿Amekek nu inintram. Kame chíkich turamainiatsuash?” takui̱ 35Piratu aya̱k “¿Wi Israer shuarkaitiaj? Amé shuarak Yúsnan pujurniu peṉkeri̱ji̱a̱i̱ wini̱n itiarmarai. ¿Warí tunáa túraitiam?”
36Nuiṉkia Jesus chichaak “Wi jú̱ nuṉkanam akupniuchuitjiai. Ju̱ya̱itkiuiṉkia Winia nemartuiniana nu mánaikiara̱a̱yi. Túrawarmatai Israer shuarnum surutkachara̱a̱yi. Antsu ju̱yá̱ akupniuchuitjiai.” 37Piratusha “¿Nuikia ame nekas úunt akupniukaitiam?” tutai Jesussha “Ee, ame támena nu nekasaiti. Jú̱ nuṉkanam akiinian ashí shuaran nekasa nuna ujaktinian táwitjiai. Ashí shuar nekasa nuna umirniuka Wi táman ántawai” tímiayi. 38Tura Piratu “¿Nekasa nusha warimpiait?” tímiayi.
Piratu Jesusan mantamnatniun timia
(Mat. 27:15-31; Mar. 15:6-20; Ruk. 23:13-25)
Piratusha nuna ti atak Israer shuarja̱i̱ chichastajtsa jiinkí̱ chichaak “Jú̱ aishmaṉka tunaari̱n peṉké wáittsujai” tímiayi. 39“Tura ashí uwitin Paskua nampernum sepunmaya̱ shuar aṉkant akupkatniuiti. Núnisrum tuke searme. Tuma asamtai ¿yamaikia Israera Úunt Akupniuri̱n aṉkant akupkáttajak?” tímiayi. 40Nuiṉkia ashí kakantar untsumainiak “Ju̱ akupkaip; antsu Parapás akupkata” tiármiayi. Nu Parapássha kásauyayi.
Currently Selected:
Jṉ. 18: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.