Jṉ. 13
13
Jesus ni unuiniamuri̱ nawe̱n nijiatramu
1Paskua namper jeatin chikichík tsawant ajasmatai Jesusa tsawantri̱ jeatémayi. Túramtai ju̱ nuṉkan ikiukí̱ ni Aparí̱i̱n wétiniuyi. Jesussha nuna nekaamiayi. Ashí Níniun ju̱ nuṉkanam pujuinian tuke anea asa amúamunmasha yapají̱tsuk tuke aneemiayi. 2Nu tsawantai̱sha murikiun yúatin ármiayi. Tura yurumátin jeatsa̱i̱ṉ iwianchi uuntri̱ Semuṉka uchirí̱ Jútas Iskariúti enentái̱n Jesusan surukat tu enentáimtikramiayi. 3Tura Jesus Yusai̱ya̱ tau asa waketkitniuyi. Tura Yus Apa ashí mash susamiayi akupin atí tusa. Jesussha nuna nekáa 4chíkich yurumuk pujuiniai̱ wajakmiayi. Tura pushiri̱n áimiak awaṉkéman emenmamamiayi. 5Nuyá̱ nijiaamatainium entsan yará ni unuiniamuri̱ nawe̱n nijiatramiayi. Tura awaṉkémja̱i̱ japirmiayi. 6Semuṉ Pítiur jearin Pítiur chichaak “Uuntá, ¿winia nawer nijiartaj tamek?” 7Takui̱ Jesussha chichaak “Wi túrajna nu yamái nékatsme tura ukunam nekaattame.” 8Tutai Pítiur chichaak “Peṉké winia nawerka nijiarchattame” takui̱. Jesussha chichaak “Wi nijiaachkuiṉkia Wiji̱a̱i̱ tsaniṉkia pujuschamniaitme.” 9Tutai Semuṉ Pítiur chicharuk “Nuiṉkia Uuntá, aya nawerkechu antsu uwejrusha tura muukarsha nijiatrurta” tímiayi. 10Tura Jesus chichaak “Yamái mainkia aya̱shí̱ shiir asamtai aya nawe̱ni̱ṉ nijiamártiniaiti. Atumí enentái̱n ashí péṉkeraitrume. Túrasha ashí shuarcha” tímiayi. 11Kame Jútas Nin suruktinian nekáa “ashí shuarchan” tímiayi.
12Jesussha nijiar umik ni pushiri̱n entsarmiayi. Tura atak pujus chichaak “¿Atumsha Wi túrajna nu nekaarmek? 13Wi atumí Uuntri̱ asamtai nekas ‘Uuntá’ túrutrume. Nusha péṉkeraiti. 14Tura Jintinniuitiatan tura Úuntaitiatan atumí nawe̱n nijiarchajak. Atumsha núnisrumek nuamtak náwem nijiatnairatarum. 15Atumín nekapruatsan túramjai. Atumsha núnisrumek túratarum. 16Ti nekasan tajai. Takarniuka ni uuntri̱ naṉkaamaschaiti. Akupkámusha akupea nuna naṉkaamaschaiti. 17Nu nekaarum túrakrumka shiir átatrume.
18 Tura tájana nuna ashí tátsujrume. Anaikiaitiaj núnaka Wi nékajai. Tura Yus Chicham uminkiatniuiti, nékajai. Ju̱ áarmaiti ‘Wiji̱a̱i̱ yurumna nu winia nemasur ajasái.’ YKan. 41:9 19Nuka túmatsa̱i̱ṉ ujajrume. Nuyá̱ túrunamtai Yusa Uchirí̱ntiaj nusha paant nekaattarme. 20Wi tájana nu nekasaiti. Shuar Wi akupeaj nuna shiir itiaakka Winiasha shiir itiaarui. Tura Winia shiir itiaarna nusha Winia Akuptúkuncha itiaawai” tímiayi.
Jesus Jútas Nin suruktinian étserui
(Mat. 26:20-25; Mar. 14:17-21; Ruk. 22:21-23)
21Nuna ti Jesus ni enentái̱n ti itiurchat enentáimpramiayi. Tura chichaak “Ti nekas tajai chikichik ju̱i̱ atumji̱a̱i̱ pujana nu Winia surutkattawai” tímiayi. 22Tutai ni unuiniamuri̱ nuamtak íiniaisar “¿Yanak taa?” tiármiayi. 23Chikichík unuiniamuri̱ Jesus ti aneamu Niji̱a̱i̱ tsaniṉ yurumuk pujumiayi. 24Tuma asamtai Semuṉ Pítiur ni uwejé̱ja̱i̱ iniakmas “Aniasta, ¿yanak áujmata?” 25Tutai Jesusan áyanmatsan aniasmiayi. “¿Yait Uuntá?” tímiayi. 26Jesussha aya̱k “Páṉkan túumnium aju̱ṉkan susattaj nuiti” tímiayi. Tura nuya̱i̱k páṉkan túumnium aju̱ṉ Semuṉka uchirí̱n Jútas Iskariútin susamiayi. 27Tura wárik Jútas páṉkan achikmatai iwianchi uuntri̱ Satanás ni enentái̱n waya̱miayi. Nuyá̱ Jesus chicharuk “Túrattamna nu wárik túrata” tímiayi.
28Tura ashí nui̱ yurumáiniak pujuarmia nusha wariniak taa tusa nekaacharmiayi. 29“Kuítrincha kuit súsarta” tátsuash tu enentáimprarmiayi. Tura chikitcha “nampernum yurumátin atsumajnia nu sumakta” tátsuash tu enentáimprarmiayi. Jútas kuítian wáinin asamtai tu enentáimprarmiayi. 30Jútas páṉkan yua kashi ajasmanum jiinkimiayi.
Yamaram akupkámu
31Jútas jiinkimtai Jesus chichaak “Wi Aents Ajasu asamtai winia kakarmar yamaikia paant átatui. Tura wi túramuja̱i̱ Yusa kakarmari̱sha ti paant átatui. 32Wi Yusa kakarmari̱n paant awajeakui Wisha ni Uchirí̱ asamtai winia kakarmarnasha Yuska wárik paant awajsattawai. 33Uchichiru, atumji̱a̱i̱ tí untsurí tsawant pujuschattajai yamaikia. Wi Israer shuaran tímiaj nútiksanak atumín tájarme. Atumsha Winia e̱a̱tkáttarme tura wi wéamunam winishtatrume. 34Ju̱ yamaram akupeamun amaajai nuamtak mái̱ anenai ajatarum tusan. Wi atumín aneajrumna núnisrumek atumsha nuamtak mái̱ anenai ajatniuitrume. 35Anenaiyakrumni̱ṉkia nuja̱i̱ ashí shuar ‘Kristu unuiniamuri̱ áiniawai’ turamartatui.”
Pítiur Nin natsantratniun Jesus ujakma
(Mat. 26:31-35; Mar. 14:27-31; Ruk. 22:33-34)
36Semuṉ Pítiur Jesusan aníak “Uuntá, ¿túa wéam?” tutai Jesussha “Wi wéajna nui̱ yamaikia winichminiaitrume. Tura ukunam winittiarme” tímiayi. 37Nuyá̱ Pítiur chichaak “Uuntá, ¿urukamtai yamaikia winichminiaitiaj? Ámin yáiṉtajtsan jakataj tajai” takui̱ 38Jesussha chichaak “¿Nekasmek tame? Ti nekas tájame, atash shiniatsa̱i̱ṉ Winia menaintiú natsantrurtatme” tímiayi.
Currently Selected:
Jṉ. 13: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.